1. E aoga pefea ki a tatou a te ‵kau atu ki te Fakamanatuga o te mate o Keliso i te tausaga?

 E MAUTINOA eiloa i a koe me i te togiola se meaalofa tāua ‵ki! (2 Koli. 9:15) E auala i te taulaga a Iesu, e mafai o maua ne koe se va fakataugasoa mo Ieova te Atua. E mafai foki o maua ne koe te fakamoemoega ke ola ki te se-gata-mai. Tela la, se mea ‵tau eiloa ke fakaasi atu ‵tou loto fakafetai mō te togiola, penā foki ki a Ieova telā ne tuku mai ne ia ona ko te lasi o tena alofa ki a tatou! (Loma 5:8) Ke fesoasoani mai ke fakatumau ‵tou loto fakafetai ki te togiola kae ke sē manatu mā‵ma ki ei, ne fakatonu mai a Iesu ke fakamanatu ne tatou a tena mate fakatasi i te tausaga.—Luka 22:​19, 20.

2. Ne a mea ka sau‵tala ki ei i te mataupu tenei?

² I te tausaga nei, ka pakū eiloa te Fakamanatuga ki te Aso Ono, Apelila po 12, 2025. E mautinoa eiloa me ka fai ‵tou palani ke ‵kau katoa ki ei. Ka maua ne tatou a mea aoga e uke māfai e fakaaoga te vaitaimi o te Fakamanatuga ke mafaufau ‵loto a ki mea ne fai ne Ieova mo tena Tama mō tatou. I te mataupu tenei, ka sau‵tala tatou ki mea e akoako mai ne te togiola e uiga ki a Ieova mo tena Tama. Kae ka fesoasoani mai te suā mataupu ke malama‵lama tatou i te aoga o te togiola ki a tatou mo te auala ke fakaasi atu ‵tou loto fakafetai ki ei.

 MEA E AKOAKO MAI NE TE TOGIOLA E UIGA KI A IEOVA

3. Ne mafai pefea ne te mate o se tagata e tokotasi o fakasaoloto a te fia miliona o tino mai te agasala mo te mate? (Onoono foki ki te ata.)

³ E akoako mai ne te togiola i a Ieova e fai fakamasinoga ‵tonu. (Teu. 32:4) I te auala fea? Mafaufau ki te mea tenei: Mai te sē fakalogo o Atamu, ko maua ne tatou te agasala telā e iku atu ki te mate. (Loma 5:12) Ke fakasaoloto tatou mai te agasala mo te mate, ne uga mai ne Ieova a Iesu mō fai te togiola. Kae e mafai pefea ne te taulaga a se tino ‵lei katoatoa e tokotasi o fakasaoloto a te fia miliona o tino mai te agasala mo te mate? Ne fai mai te apositolo ko Paulo: “E pelā eiloa mo tino e tokouke ko fai mo tino agasala e auala i te sē fakalogo o te tagata e tokotasi [ko Atamu] e penā foki te fai o tino e tokouke mo fai ne tino amio‵tonu e auala i te fakalogo o te tagata e tokotasi [ko Iesu].” (Loma 5:19; 1 Timo. 2:6) I nisi tugapati, ne fai ne te sē fakalogo o te tagata ‵lei katoatoa e tokotasi ke maua ne tatou te agasala mo te mate. Tela la, mai te fakalogo o te tagata ‵lei katoatoa e tokotasi, ko saoloto ei tatou mai te agasala mo te mate.

4. Kaia ne seki talia ei ne Ieova ke ola ki te se-gata-mai a tama‵liki a Atamu kolā ne faka‵logo ki a Ia?

⁴ E mata, ne ‵tau eiloa o mate a Iesu ke faka‵sao ei tatou? Kaia ne seki talia ei ne Ieova ke ola ki te se-gata-mai a tama‵liki a Atamu kolā ne faka‵logo ki a Ia? Ki tino sē ‵lei katoatoa, kāti tenā eiloa te ‵toe auala ‵lei ke faka‵lei aka te fakalavelave. Kae ki a Ieova, a te mea tenā e sē se faifaiga tonu. Me kafai e fai penā, ko pelā eiloa me seki fai ne Atamu se agasala matagā kae e se agasala foki i ei ana tama‵liki. Kae ko te mea tenā e se tonu.

5. Kaia e mautinoa i a tatou me ka fai faeloa ne Ieova a te mea tonu?

⁵ Kae e a moi ne seki tuku mai ne Ieova se togiola, kae fakatafa kea‵tea ne ia tena fakamasinoga tonu mai te talia ke ola a tama‵liki sē ‵lei katoatoa a Atamu ki te se-gata-mai? Kāti ka mafau‵fau a tino me ko fakaseaoga foki ne te Atua a tena fakamasinoga tonu i nisi feitu. E pelā me se fakaakoakoga, e mata, e mafai o se tausi a ia ki ana nisi tautoga? E se ‵tau o manava‵se tatou ki te feitu tenei. A te ‵tonuga loa, a te faiga ne Ieova te fakamasinoga tonu faitalia te faigata ki a ia ke ofo mai tena Tama pele e pelā me se togiola, e fakatalitonu mai i ei ki a tatou me ka fai faeloa ne ia a te mea tonu.

6. Se a te suā uiga ne fakamalosi atu ki a Ieova ke uga mai ne ia tena Tama? (1 Ioa. 4:​9, 10)

⁶ E tiga eiloa e fesoasoani mai te togiola ke malamalama tatou i te fai mea tonu o Ieova, kae e fesoasoani mai foki ke malamalama tatou i te ‵poko o tena alofa mō tatou. (Ioa. 3:16;  faitau te 1 Ioane 4:​9, 10.) Ne uga mai ne Ieova tena tama ke mate mō tatou, me e manako a ia ke ola tatou ki te se-gata-mai kae fai foki mo vaega o tena kaukāiga. Mafaufau aka la ki te mea tenei: I te taimi ne agasala ei a Atamu, ne tapale kea‵tea ne Ieova a ia mai te kaukāiga o Ana tino tapuaki. Ona ko te mea tenā, a tatou katoa ne fa‵nau mai tua o te kaukāiga o te Atua. Kae auala i te togiola, ne fakamagalo ne Ieova ‵tou agasala, kae ka ‵taki fakamuli atu ne ia tatou ki tena kaukāiga o tino kolā e fakatuanaki kae faka‵logo ki a ia. Ko mafai foki o maua nei ne tatou se fesokotakiga ‵lei mo Ieova mo ‵tou taina tapuaki. E tonu, a Ieova e alofa tonu mai eiloa ki a tatou!—Loma 5:​10, 11.

7. E fesoasoani mai pefea te logo‵mae o Iesu ke malamalama tatou i te lasi o te alofa o Ieova mō tatou?

⁷ E mafai o malamalama faka‵lei tatou i te lasi o te alofa o Ieova ki a tatou, māfai ko mafau‵fau ki te ‵togi o te togiola. E fai mai a Satani me ka seai eiloa se tavini a te Atua ka tumau i te fakamaoni ki a Ia māfai e faigata ke fai penā. Ke fakamaoni aka te loi o Satani, ne talia ne Ieova ke logo‵mae a Iesu mai mua o mate. (Iopu 2:​1-5; 1 Pe. 2:21) Ne lavea ne Ieova a tino ‵lotu ‵teke e fakatauemu atu ki a Iesu, ko sotia e ‵kini a ia kae ‵tuki ana lima ki ‵fao. Ne toe kilokilo ifo foki a Ieova ki tena Tama pele telā ne mate i se auala fakalogo‵mae. (Mata. 27:​28-31, 39) E isi se malosi o Ieova ke fakagata aka a mea katoa konā ne fai ki tena Tama. E pelā mo te taimi ne fai atu a tino ‵teke, penei: “Fai la ke fakasao nei ne [te Atua] a ia eiloa māfai e manako a Ia ki ei,” ne mafai fua ne Ieova o fai a te mea tenā. (Mata. 27:​42, 43) Kae moi ne fai ne ia, penei ko seai se togiola kae ka seai foki se ‵tou fakamoemoega. Tela la, ne talia ne Ieova ke kufaki tena Tama i logo‵maega ke oko eiloa ki tena mate.

8. E mata, ne logo‵mae a Ieova i te laveaga ne ia tena Tama e logo‵mae? Fakamatala mai. (Onoono foki ki te ata.)

⁸ E se ‵tau o mafau‵fau tatou me ona ko te Atua e malosi katoatoa, e seai ne ana lagonaga! Ne faite ne ia a tino ki tena fakatusa, ke maua ne latou a lagonaga, tela la, e isi eiloa ne lagonaga o Ieova. E fai mai te Tusi Tapu me ne maua ne ia a lagonaga ‘logo‵mae’ kae ‘fanoanoa.’ (Sala. 78:​40, 41) Mafaufau foki la ki te tala o Apelaamo mo Isaako. Ne fakatonu atu a Ieova ki a Apelaamo ke ofo atu a tena tama eiloa e tokotasi e pelā me se taulaga. (Kene. 22:​9-12; Epe. 11:​17-19) E mafai eiloa o fakaataata ne koe a lagonga kese‵kese ne maua ne Apelaamo i te taimi ne fakatoka a ia ke tamate a tena tama ko Isaako. Kae mafaufau aka la ki te lasi o te fanoanoa o Ieova i te taimi ne kilokilo mai a ia ki tena Tama e fai fakamasei ne tāgata sē amioatua ke oko eiloa ki tena mate!—Onoono ki te vitio ko te Imitate Their Faith—Abraham, Part 2 i te jw.org.

9. E fesoasoani mai pefea te Loma 8:​32, 38, 39 ke malamalama tatou i te ‵poko o te alofa o Ieova mō koe mo ou taina tapuaki?

 ⁹ E akoako mai ne te togiola me e seai eiloa se tino e lasi atu tena alofa ki a tatou i tafa o Ieova—ke oko foki loa ki ‵tou kāiga io me se taugasoa pele. (Faitau te Loma 8:​32, 38, 39.) E mautinoa eiloa me e sili atu te alofa o Ieova ki a tatou i lō tatou ki a tatou eiloa. E mata, e fia ola koe ki te se-gata-mai? E sili atu te manako o Ieova ke maua ne tatou te ola se-gata-mai. E mata, e manako koe ke fakamagalo au agasala? E sili atu te manako o Ieova ke fakamagalo ne ia tatou. A te mea fua telā e manako a ia ke fai ne tatou, ko te talia o tena meaalofa tāua mai te fakaasi atu te fakatuanaki kae fakalogo. A te fakalogo se fakaasiga sili eiloa o te alofa o te Atua. Kae i te lalolagi fou, ka tauloto tatou ki mea e uke atu e uiga ki te alofa o Ieova.—Fai. 3:11.

MEA E AKOAKO MAI NE TE TOGIOLA E UIGA KI A IESU

10. (a) Se a te mea ne mafatia malosi i ei a Iesu e uiga ki tena mate? (e) I auala fea ne fakamaluga ei ne Iesu te igoa o Ieova? (Onoono foki ki te pokisi “ Ne Fakamaluga ne te Fakamaoni o Iesu te Igoa o Ieova.”)

¹⁰ Ne saga tonu a Iesu ke ‵lei te ata o tena Tamana. (Ioa. 14:31) Ne fanoanoa a Iesu me i ‵losiga ne fai ne tino me i a ia e pati masei ki te Atua kae ‵teke ki te malo, e mafai o taku fakamasei i ei te igoa o tena Tamana. Tenā ne ‵talo atu ei a ia, penei: “Toku Tamana, kafai e mafai, ave kea‵tea te ipu tenei mai i a au.” (Mata. 26:39) Mai te tumau i te fakamaoni ki a Ieova ke oko ki tena mate, ne fakamaluga aka ei ne Iesu a te igoa o tena Tamana.

11. Ne fakaasi mai pefea ne Iesu te ‵poko o tena alofa ki tino? (Ioane 13:1)

¹¹ E akoako mai foki ne te togiola me ne saga tonu atu a Iesu ki tino, maise loa ana soko. (Faata. 8:31; faitau te Ioane 13:1.) E pelā me se fakaakoakoga, ne iloa ne Iesu me i nisi vaega o  tena galuega talai i te lalolagi nei ka faigata ‵ki, maise loa tena mate fakalogo‵mae. Kae i te faiga o tena galuega i te lalolagi nei, ne seki fakatāua ne ia ana lagonaga totino. I lō te fai penā, ne tuku katoatoa atu tena loto ki te faiga o te galuega talai, akoako atu, kae tavini atu ki nisi tino. Ke oko foki loa ki te aso ne mate ei a ia, ne fakaaoga ne Iesu te taimi tenā ke mulumulu ne ia a vae o ana apositolo kae tuku atu ki a latou ana toe pati fakamalosi e uke mo fakatonuga. (Ioa. 13:​12-15) Kae i luga i te pou, ne fakaaoga ne ia te avanoaga tenā ke fakailoa atu ki se pagota a te fakamoemoega kae fakatoka se tino ke tausi atu ki tena mātua. (Luka 23:​42, 43; Ioa. 19:​26, 27) Tela la, ne fakaasi mai ne Iesu a te ‵poko o tena alofa e auala i tena mate penā foki mo tena olaga kātoa i te lalolagi nei.

12. Ne a mea ko fai nei ne Iesu ke fesoasoani mai ki a tatou?

¹² E tiga eiloa ne mate a Keliso “fakatasi eiloa mō taimi katoa,” koi fai eiloa ne ia a mea e uke mō tatou. (Loma 6:10) E pefea la? E galue faeloa a ia o tuku mai ki a tatou a mea ‵lei e uke ko mafai o maua nei ne tatou ona ko te togiola. Mafaufau ki galuega e uke e fai ne ia. E tavini a ia e pelā me ko te ‵tou Tupu, Faitaulaga, kae ko te ulu foki o te fakapotopotoga. (1 Koli. 15:25; Efe. 5:23; Epe. 2:17) E onoono a ia ki te galuega ko te fakamaopoopomaiga o te kau fakaekegina mo te vaitino tokouke, se galuega telā ka fakaoti mai mua o oti te fakalavelave lasi. b (Mata. 25:32; Male. 13:27) E onoono foki a ia me e mata, e fagai faka‵lei ana tavini fakamaoni i te feitu faka-te-agaga i aso fakaoti konei io me ikai. (Mata. 24:45) Kae i tena Pulega i te Afe Tausaga, ka galue faeloa a ia mō tatou. Ko Ieova eiloa ne tuku mai ne ia a tena Tama ke mate mō tatou!

TUMAU FAELOA I TE TAULOTO

13. E mafai pefea o fesoasoani atu te mafaufau ‵loto ke tumau koe i te tauloto ki te alofa o te Atua mo Keliso mō tatou?

¹³ E mafai eiloa o tumau koe i te tauloto ki te alofa ne fakaasi mai ne Ieova te Atua mo Keliso Iesu, māfai e tumau koe i te mafaufau ‵loto ki ei. Kāti i te vaitaimi tenei o te Fakamanatuga, e mafai o faitau faka‵lei koe ki se tusi e tasi io me uke atu i Tusi Evagelia. Sa taumafai fua o faitau ki mataupu e uke i te taimi eiloa e tasi. Kae ke faitau malie kae mafaufau ‵loto ki pogai e ‵tau ei o a‵lofa tatou ki a Ieova mo Iesu. Kae sili atu i ei, ke fakailoa atu ne koe ki nisi tino au mea e tauloto.

14. E ‵tusa mo te Salamo 119:97 mo te fakamatalaga mai lalo, e mafai pefea o fesoasoani mai a sukesukega ke tumau tatou i te tauloto ki te togiola mo nisi akoakoga aka? (Onoono foki ki te ata.)

 ¹⁴ Kafai koe ko leva ne papatiso, kāti ka mafaufau koe me e mata, e isi ne mea ‵fou e manakogina ke tauloto ne koe mai mataupu tai ‵pau e pelā mo te fakamasinoga a te Atua, tena alofa, mo te togiola. A te ‵tonuga loa, e seai se gataga ki te ‵tou tauloto ki mataupu konei mo nisi mea aka. Tela la, ne a mea e mafai ne tatou o fai? Fakaaoga faka‵lei a fakamatalaga e uke e maua i ‵tou tusi. Kafai e faitau ne koe se fuaiupu telā e se malamalama katoatoa koe i ei, fai au sukesukega, mafaufau ‵loto ki mea ko oti ne sukesuke koe ki ei mo mea ne tauloto ne koe e uiga ki a Ieova, tena Tama, mo te lā a‵lofa ki a koe.—Faitau te Salamo 119:97 mo te fakamatalaga mai lalo.

15. Kaia e ‵tau ei o ‵sala faeloa tatou ki taemani i te Tusi Tapu?

¹⁵ Sa loto vāivāi māfai e seki maua ne koe se mea fou io me se mea fakafiafia i taimi katoa e faitau koe ki te Tusi Tapu io me fai au sukesukega. Mafaufau la māfai koe se tino telā e taumafai o ‵sala ki aulo. Pelā mo te masani, a te tino telā e ‵sala ki aulo e fakamāumāu ne ia a itula e uke io me ne aso ke oko ki te taimi ko maua ne ia a tamā aulo. E se ‵fiu vave a ia kae kufaki eiloa o salasala, me e tāua ‵ki eiloa a tamā aulo konā ki a ia. Kae e sili atu la te tāua o te munatonu i te Tusi Tapu i lō aulo! (Sala. 119:127; Faata. 8:10) Tela la, ke kufaki kae ‵piki ‵mau ki tau polokalame ki te faitauga ki te Tusi Tapu.—Sala. 1:2.

16. E mafai pefea o fakaakoako tatou ki a Ieova mo Iesu?

¹⁶ I te taimi e fai ei au sukesukega, ‵sala ki auala ke fakagalue au mea e tauloto. E pelā mo te fakaakoako ki te fai mea tonu o Ieova i ana faifaiga sē fakailoga tino ki nisi tino. Fakaakoako ki te alofa o Iesu ki tena Tamana mo nisi tino mai te toka ke logo‵mae koe mō te igoa o Ieova kae tuku atu tou ola mō ou taina Kelisiano. E se gata i ei, fakaakoako ki a Iesu mai te talai atu ki nisi tino, ko te mea ke maua foki ne latou a te avanoaga ke talia te meaalofa tāua ‵ki a Ieova.

17. Ne a mea ka suke‵suke tatou ki ei i te suā mataupu?

¹⁷ Ko te lasi o te ‵tou malamalama kae loto fakafetai ki te togiola, ko te momea aka foki o te ‵tou a‵lofa ki a Ieova mo tena Tama. Ona ko te mea tenā, ka momea aka foki te lā a‵lofa ki a tatou. (Ioa. 14:21; Iako. 4:8) Tela la, ke na fakaaoga ne tatou a mea ne tuku mai ne Ieova ke tumau tatou i te tauloto e uiga ki te togiola. Ka suke‵suke tatou i te suā mataupu ki nisi auala e mafai o maua ne tatou a mea aoga mai te togiola mo te auala e fakaasi atu ei ‵tou loto fakafetai ki te alofa o Ieova.