1. Ne a mea e ‵saga atu ki ei a tino e tokouke i aso nei?

 E LAVEA ne koe me tokouke a tino i aso nei ko ‵saga fua ki a latou eiloa? E pelā mo nisi tino ko fakaaoga ne latou a te itaneti ke fai‵pati fakamata‵mata e uiga ki a latou eiloa mo olotou mea e fai. Kae ne nai tino fua i aso nei e tuku atu ne latou te ‵malu ki a Ieova te Atua. I te mataupu tenei, ka sau‵tala tatou ki te uiga o te tuku atu a te ‵malu ki a Ieova kae kaia e ‵tau ei o fai tatou penā. Ka tauloto foki tatou ki te auala e tuku atu ne tatou ki te Atua a te ‵malu e ‵tau o maua ne ia mo te auala ka faka‵malu ne ia tena igoa i se taimi pili mai mua nei.

SE A TE UIGA O TE TUKU ATU KI A IEOVA A TE ‵MALU?

2. Ne fakaasi atu pefea ne Ieova tena ‵malu i te Mauga o Sinai? (Onoono foki ki te ata i te ‵kava.)

² Se a te ‵malu? I te Tusi Tapu, a te pati “‵malu” e mafai o fakasino ki so se mea telā e fai i ei se tino ke takutakua. Ne tu ‵kese te ‵malu ne fakaasi mai ne Ieova mai tua malie o te faka‵saoga o tino Isalaelu mai te ‵nofoga fakapagota i Aikupito. Mafaufau ki te mea tenei: Ne maopoopo te fia miliona o tino Isalaelu mai lalo o te Mauga o Sinai ke fetaui mo te lotou Atua. Ne pouli te mauga i se kaumana matolu. I konā eiloa ne poko se mafuie kae ne galulu te laukele mai lalo i olotou vae, ‵pa fa‵tili, kae ne gasolo eiloa o maluga atu a te ‵tagi o te pu. (Eso. 19:​16-18; 24:17; Sala. 68:8) Mafaufau la ki te fia‵fia o tino Isalaelu konā i te fakaasiatuga ne Ieova te malosi o tena ‵malu.

3. Se a te uiga o te tuku atu ki a Ieova a te ‵malu?

 ³ Kae pefea a tino? E mata, e mafai o tuku atu ne tatou te ‵malu ki a Ieova? Ao, e mafai. A te auala e tasi e faka‵malu i ei ne tatou a Ieova ko te fai‵pati atu ki nisi tino e uiga ki tena ‵mana fakaofoofogia mo ana uiga a‵lofa. Suā auala foki e faka‵malu ne tatou a te Atua māfai e tavae ne tatou a ia mō mea ne fai ne ia e auala i tena malosi. (Isa. 26:12) Ne tu ‵kese eiloa a te tupu ko Tavita i te auala ne faka‵malu ei ne ia a Ieova. I te ‵talo ne fai ne ia i mua o tino Isalaelu, ne fai atu a Tavita ki te Atua: “I o koe e Ieova te tulaga sili mo te malosi mo te taulekaleka mo te gali mo te tulaga ‵malu, me i a koe a mea katoa i te lagi mo te lalolagi.” I te otiga o te ‵talo a Tavita, “ne ‵viki atu eiloa a te fakapotopotoga kātoa ki a Ieova.”—1 Nofo. 29:​11, 20.

4. Ne tuku atu pefea ne Iesu a te ‵malu ki a Ieova?

⁴ I te nofoga a Iesu i te lalolagi, ne faka‵malu ne ia tena Tamana mai te fakailoa atu ki tino me ko Ieova ne tuku atu ki a ia te ‵mana ke fai a vavega. (Male. 5:​18-20) Ne faka‵malu foki ne Iesu a Ieova i te auala ne faipati a ia e uiga ki tena Tamana mo ana faifaiga ki nisi tino. I te aso e tasi, ne akoako a Iesu i te sunako. Ne aofia i ana tino fakalogo‵logo se fafine telā ne pukea ne temoni i tausaga e 18. Ne fai ne te temoni ke makau tou fafine kae ko se mafai o tu ‵tonu ki luga. Ko oko loa i te fakaalofa! Ona ko te alofa atafai, ne fanatu a Iesu ki te fafine kae faipati atu mo te alofa, ana muna: “Te fafine, ko fakasaoloto koe mai tou masaki.” Ne tuku atu ei ana lima ki luga i tou fafine, kae se mea vave eiloa o tu ‵tonu “kamata ei o tavae atu ki te Atua,” mo te loto fakafetai me ko toe maua ne ia te malosi! (Luka 13:​10-13) Ne maua ne te fafine tenā se pogai ‵lei ke faka‵malu ne ia a Ieova, kae penā foki tatou.

KAIA E AVATU EI NE TATOU KI A IEOVA A TE ‵MALU?

5. Kaia e āva ei tatou ki a Ieova?

⁵ E faka‵malu ne tatou a Ieova me āva malosi tatou ki a ia. E uke a pogai e āva ei tatou ki a ia. A Ieova e malosi katoatoa; e seai se gatamaiga o tena ‵mana. (Sala. 96:​4-7) E lavea faka‵lei atu te lasi o tena poto i ana mea ne faite. Ne māfua mai i a Ia te ola mo mea katoa e ola ei tatou. (Faka. 4:11) A ia e fakamaoni. (Faka. 15:4) A mea katoa e fai ne ia e manuia faeloa, kae fakataunu faeloa ne ia ana tautoga. (Iosu. 23:14) E se tioa loa o fai mai te pelofeta ko Ielemia e uiga ki a Ieova: “Mai tino ‵poto katoa o atufenua mo olotou malo katoa, e seai eiloa se tino e ‵pau mo koe”! (Iele. 10:​6, 7) Tela la, e uke ‵ki eiloa a pogai e ‵tau ei o āva tatou ki ‵tou Tamana i te lagi. Kae i tafa o te āva ki a Ieova, e a‵lofa foki tatou ki a ia.

6. Kaia e a‵lofa ei tatou ki a Ieova?

⁶ E faka‵malu ne tatou a Ieova me a‵lofa malosi tatou ki a ia. Mafaufau ki nisi uiga o Ieova kolā e fai ei ke a‵lofa tatou ki a ia. A ia e alofa fakamagalo kae alofa atafai. (Sala. 103:13; Isa. 49:15) A ia e loto malamalama; e logo‵mae māfai e logo‵mae tatou. (Saka. 2:8) E fai ne ia ke se ma‵taku tatou o fakapili‵pili atu ki a ia kae fai taugasoa mo ia. (Sala. 25:14; Galu. 17:27) A ia e loto maulalo; “e punou ifo a ia o kilo ki te lagi mo te lalolagi, e fakatu aka ne ia te tino vāivāi mai te ‵pefu.” (Sala. 113:​6, 7) Ko oi la te tino e se manako o faka‵malu ne ia te ‵tou Atua sili?—Sala. 86:12.

7. Se a te avanoaga gali e maua ne tatou?

⁷ E faka‵malu ne tatou a Ieova me ma‵nako tatou ke iloa ne nisi tino a ia. E se iloa ne tino e tokouke a mea ‵tonu e uiga ki a Ieova. Kaia? Me ko oti ne fakapouli ne Satani a mafaufau o tino mai te fakasalalau atu a loi matagā e  uiga ki a Ieova. (2 Koli. 4:4) Ko oti ne fai ne Satani ke tali‵tonu a tino me i a Ieova e saua, e se alofa, kae māfua mai i a ia a logo‵maega i te lalolagi nei. Kae e iloa ne tatou a mea ‵tonu e uiga ki te ‵tou Atua! E maua ne tatou te avanoaga gali ke fakailoa atu a mea ‵tonu e uiga ki a ia kae ke faka‵malu foki ne nisi tino a ia. (Isa. 43:10) Te Salamo 96 e faipati eiloa ki auala ke faka‵malu ei a Ieova. I te taimi e sau‵tala tatou ki nisi pati ‵gali i te salamo tenei, ke mafaufau ki auala e mafai o avatu ne koe ki a Ieova a te ‵malu e ‵tau o maua ne ia.

E AVATU PEFEA NE TATOU KI A IEOVA A TE ‵MALU E ‵TAU O MAUA NE IA?

8. Se a te suā auala ke faka‵malu ne tatou a Ieova? (Salamo 96:​1-3)

⁸ Faitau te Salamo 96:​1-3. E mafai foki o faka‵malu ne tatou a Ieova e auala i ‵tou pati e fai e uiga ki a ia. I fuaiupu konei, e ‵kami atu ki tino o Ieova ke “usu se pese ki a Ieova,” ke “‵viki atu ki tena igoa,” ke “folafola atu te tala ‵lei o tena fakaolataga,” kae ke “folafola atu a tena ‵malu i atufenua katoa.” Konei a auala e mafai o faka‵malu i ei ne tatou te ‵tou Tamana i te lagi. Ne seki fakata‵mala eiloa a tino Iutaia fakamaoni mo Kelisiano i te senitenali muamua i te fakailoa atu ki tino a mea e uiga ki a Ieova mo mea ‵lei katoa ne fai ne ia mō latou. (Tani. 3:​16-18; Galu. 4:29) E mafai pefea o fai tatou penā?

9-10. Ne a mea ne tauloto ne koe mai te tala o Angelena? (Onoono foki ki te ata.)

⁹ Mafaufau ki te tala o Angelena, a se tuagane e nofo i Amelika. Ne ‵pulu eiloa mo te loto malosi ne ia a Ieova i tena koga galue. E pelā me se tino galue fou, ne ‵kami a Angelena ki se fono telā e fakamatala atu ne tino ‵fou ki tino ga‵lue se tala toetoe e uiga ki olotou olaga. Ne fakatoka ne Angelena ne ata ke fakaasi atu te gali o tena olaga e pelā me se Molimau a Ieova. Kae mai mua malie o fai tena tala, ne tu aka te suā tino galue kae fai atu me ne puti aka a ia pelā me se Molimau a Ieova. Kae ne kamata o fakamasei ne ia a ‵tou talitonuga. Muna a Angelena: “Ne tuki toku fatu i te manavase. Kae oti aka ne fai ifo au: ‘E mata, ka talia eiloa ne au a te tino tenei ke fai atu ne ia a tala sē ‵tonu e uiga ki a Ieova? Io me ka ‵pulu ne au a Ieova?’”

¹⁰ I te otiga o te tala a te tagata tenā, ne fai fakavave ne Angelena tena ‵talo i se leo malalo.  Oti aka, faipati atu ei mo te atafai ki te tagata tenā, ana muna: “E tai ‵pau eiloa tāua. Ne puti aka foki au e pelā me se Molimau a Ieova, kae koi fai eiloa au pelā me se Molimau ke oko mai ki te aso nei.” Faitalia te faigata o te tulaga tenā; kae ne tumau loa a Angelena i te fakaasi atu a ata o mea ‵gali ne maua ne ia mai polokalame faka-te-agaga ne aofia a ia i ei, i te taimi ne fakamatala atu ne ia mo te āva ana talitonuga. (1 Pe. 3:15) Ne a mea ne iku mai i ei? I te otiga o te tala a Angelena, ne ‵kese ‵ki te tagata tenā. Ne fakaasi mai ne ia a tena fiafia i te taimi ne puti aka ei a ia pelā me se Molimau a Ieova. Ne fai mai a Angelena: “E ‵tau eiloa o fakailoa atu a te mea tonu e uiga ki a Ieova. Se tauliaga eiloa ke faipati atu mō tena igoa.” E maua foki ne tatou te tauliaga ke ‵viki atu ki a Ieova kae faka‵malu a ia faitalia me taku fakamasei ne tino a ia.

11. Ne faka‵logo pefea a tino tapuaki ‵tonu i aso mua ki te fakatakitakiga i te Salamo 96:8?

¹¹ Faitau te Salamo 96:8. E mafai o faka‵malu ne tatou a Ieova e auala i ‵tou kope totino. E fakaaloalo atu eiloa a tino tapuaki ‵tonu ki a Ieova i te auala tenā. (Faata. 3:9) E pelā me se fakaakoakoga, ne tuku atu ne tino Isalaelu olotou meaalofa ki te faitega mo te tausiga o te faletapu. (2 Tupu 12:​4, 5; 1 Nofo. 29:​3-9) Ne tavini atu eiloa a soko o Keliso ki a ia mo ana apositolo mai te “fakaaoga olotou kope totino.” (Luka 8:​1-3) Ne avatu foki ne Kelisiano i te senitenali muamua ne mea ke fesoasoani ki olotou taina mo tuagane faka-te-agaga. (Galu. 11:​27-29) I aso nei e mafai foki o faka‵malu ne tatou a Ieova mai te faiga o ‵tou meaalofa.

12. E mafai pefea o faka‵malu ne tatou a Ieova e auala i ‵tou meaalofa? (Onoono foki ki te ata.)

¹² Mafaufau ki se tala telā e fakaasi mai ei te auala e mafai o faka‵malu ne tatou a Ieova e auala i ‵tou meaalofa. Ne fai mai se lipoti me ne poko se tau la lasi ‵ki i Zimbabwe mō se taimi leva i te 2020. Ne ‵tu a ola o te fia miliona o tino i se tulaga fakamataku ona ko te fia‵kai, e aofia i ei te tuagane ko Prisca. Faitalia te masei o te tau la, ne tumau loa Prisca i tena polokalame masani ko te talai i Aso Tolu mo Aso Lima, ke oko foki loa ki taimi e fakamalū ei te laukele mō fai fatoaga. Ne fakatauemu ne ana tuakoi tou fafine me fano sāle o talai kae e se fano o galue i tena fatoaga, olotou muna, “A koe ka mate eiloa ona ko te fiakai.” Ne tali atu a Prisca mo te loto talitonu, “A Ieova e seki tuku tiaki eiloa ne ia  ana tavini.” E seki leva, kae ne maua ne tou fafine a meakai mo nisi mea aka mai te ‵tou fakapotopotoga. Ne mafai fua o maua a mea konā ona ko ‵tou meaalofa. Ne ofo eiloa a tuakoi o Prisca, kae ne fai atu latou ki a ia, “Ne seki tuku tiaki eiloa koe ne te Atua, matou ko ma‵nako ke tauloto a mea e uke e uiga ki a ia.” E tokofitu ana tuakoi ne kamata o ‵kau ki fakatasiga a te fakapotopotoga.

13. E mafai pefea o faka‵malu ne tatou a Ieova e auala i ‵tou amioga? (Salamo 96:9)

¹³ Faitau te Salamo 96:9. E mafai o faka‵malu ne tatou a Ieova e auala i ‵tou amioga. A faitaulaga kolā ne tavini atu i te faletapu o Ieova e ‵tau o ‵ma i te feitu faka-te-foitino. (Eso. 40:​30-32) Kae e sili atu te tāua ke ‵ma i mea tau amioga i tafa loa o te ‵ma i te feitu faka-te-foitino. (Sala. 24:​3, 4; 1 Pe. 1:​15, 16) E ‵tau o ga‵lue malosi tatou o ‵pei kea‵tea a “uiga mua”—ko uiga mo faifaiga sē ‵ma—kae ke faka‵pei ki luga i a tatou a “uiga ‵fou”—ko mafaufauga mo faifaiga kolā e fakaasi atu ei te ‵malu o Ieova. (Ko. 3:​9, 10) Mai te fesoasoani o Ieova, e mafai eiloa o ‵fuli a toe tino amio matagā kae uiga fakasaua kae fakapei ki a latou a uiga ‵fou.

14. Ne a au mea ne tauloto mai te tala o Jack? (Onoono foki ki te ata.)

¹⁴ Mafaufau ki te tala o Jack, se tagata fakasaua kae fakamataku telā e taku sāle ne tino ki Te Temoni. Ona ko te ma‵sei o ana amioga, ne ‵pei a Jack ki te mate i te falepuipui. Kae i te taimi koi faka‵tali ei ki tena fakasalaga, ne talia ne Jack ke fai sena akoga faka-te-Tusi Tapu mo se taina telā e āsi atu sāle ki te falepuipui e ‵loka i ei a Jack. Faitalia te olaga ne puti aka i ei, ne ‵pei kea‵tea ne Jack ana uiga mua kae ne fetaui ‵lei a ia ke mafai o papatiso. I te okoga ki te aso ne tamate ei a Jack, kae ko oti ne ‵fuli katoatoa a ia, tenā ne ‵tagi i ei a nisi tausi pagota i te taimi ne fakatofa ki a ia. Ne fai mai se ofisa telā ne galue i te falepuipui, penei: “Ne fai a Jack mo fai te ‵toe pagota matagā eiloa i loto nei. Nei la, ko ia te ‵toe pagota tafasili i te ‵lei.” I te vaiaso mai tua o te tamatega a Jack, ne fetaui a taina kolā ne ‵foki atu o fai te fakatasiga i te falepuipui mo se pagota telā ne kau atu mō te taimi muamua ki te fakatasiga. Kaia ne kau atu ei a ia? Ne ofo a ia i te auala ne ‵fuli ei a Jack kae ne fia iloa ne ia ana mea e ‵tau o fai ke mafai o tapuaki atu a ia ki a Ieova. E manino  ‵lei, me mafai eiloa o faka‵malu ne tatou a te ‵tou Tamana i te lagi e auala i ‵tou amioga!—1 Pe. 2:12.

KA FAKA‵MALU PEFEA NE IEOVA A TENA IGOA I ASO MAI MUA?

15. Ka faka‵malu katoatoa pefea ne Ieova a tena igoa i aso mai mua? (Salamo 96:​10-13)

¹⁵ Faitau te Salamo 96:​10-13. E fakamatala mai i fuaiupu fakaoti o te Salamo 96 a Ieova e pelā me se Tupu mo se Famasino amiotonu. Ka faka‵malu pefea ne Ieova a tena igoa i aso mai mua nei? E auala i ana fakamasinoga. Ko pili fua o fakaseai ne ia a Papelonia te Sili ona ko fakamaseiga ne fai ne ia ki tena igoa tapu. (Faka. 17:​5, 16; 19:​1, 2) A nisi tino kolā ne lavea ne latou te fakaseaiga o Papelonia te Sili e mafai o ‵kau mai ki a tatou i te tapuakiga tonu. Fakamuli loa, i Amaketo, ka fakaseai atu ei ne Ieova a te lalolagi masei a Satani, mai te tamate katoatoa atu a tino kolā e takalia‵lia ki a ia kae taku fakamasei tena igoa, kae ka faka‵sao ne ia a tino katoa kolā e a‵lofa kae faka‵logo ki a ia kae ma‵nako o faka‵malu a ia. (Male. 8:38; 2 Tesa. 1:​6-10) Mai tua o te tofotofoga fakaoti telā e ‵tao mai tua o te Pulega a Keliso i te Afe Tausaga, kae ko oti ne fakamaluga katoatoa ei ne Ieova tena igoa. (Faka. 20:​7-10) I te taimi tenā, a “te lalolagi ka ‵fonu i te iloaga e uiga ki te ‵malu o Ieova e pelā mo vai e ‵fonu i ei te tai.”—Sapa. 2:14.

16. Se a te mea ka fakaiku aka ne tatou ke fai? (Onoono foki ki te ata.)

¹⁶ Se mea fakafiafia eiloa māfai ko mafai ne tino ola katoa o tuku atu ki a Ieova a te ‵malu e ‵tau o tuku atu ki tena igoa! Kae ke oko atu ki te aso tenā, ke na fai eiloa ‵tou tiute ki te faka‵maluga o te ‵tou Atua i so se avanoaga. Ona ko te tāua o te tiute tenei, ko oti ne filifili ne te Potukau Pule a te Salamo 96:8 mo fai te ‵tou tusi siki fakavae mō te 2025: “Tuku atu ki a Ieova a te ‵malu e ‵tau o tuku atu ki tena igoa.”