1. Ne a muna‵tonu ne tauloto ne koe i tau kamataga o sukesuke ki te Tusi Tapu?

 E MASAUA ne koe te taimi ne kamata ei o fai tau akoga ki te Tusi Tapu? Kāti ne poi koe i te iloaga ne koe me isi se igoa o te Atua. Kāti ne pelā aka eiloa ou lagonaga i te iloaga ne koe me e se fakapuapuaga ne te Atua a tino i te afi i seoli. Kae kāti ne fiafia koe ki te fakamoemoega ke fetaui mo ou tino pele kolā ko ‵mate kae ke ola fakatasi mo latou i te lalolagi palataiso.

2. I tafa o te tauloto ki muna‵tonu i te Tusi Tapu, ne a nisi mea ne fai ne koe ke gasolo ki mua faka-te-agaga? (Efeso 5:1, 2)

² Ko te lasi o tau sukesuke ki te Muna a te Atua, ko te momea aka foki te lasi o tou alofa ki a Ieova. Ko te alofa eiloa tenā ne fakamalosi ne ia koe ke fakagalue au mea ne tauloto. Ko ‵lei atu nei au fakaikuga kolā e fakavae ki fakatakitakiga i te Tusi Tapu. Ko gasolo aka o ‵lei atu au amioga mo faifaiga ona ko tou manakoga ke fakafiafia te Atua. E pelā eiloa mo se tamaliki telā e fakaakoako ki tena mātua alofa, e fakaakoako eiloa koe ki tou Tamana i te lagi.—Faitau te Efeso 5:1, 2.

3. Ne a fesili e mafai o fesili ifo ne tatou?

³ E mafai o fesili ifo tatou: ‘E mata, ko gasolo atu nei o malosi toku alofa mō Ieova i lō te taimi muamua ne fai au mo fai se Kelisiano? Talu mai taku papatisoga, e mata, a te auala e mafaufau ei au pelā foki aku faifaiga ko tai ‵pau mo auala o Ieova—maise i te fakaasiatuga o te alofa ki taina mo tuagane?’ Kafai ko gasolo o matafitafi a “te alofa telā ne maua muamua ne koe,” sa loto vāivāi. Ne tupu se mea tai ‵pau penā ki Kelisiano i te senitenali muamua. Ne seki ‵fiu a Iesu i a latou, kae ka se ‵fiu foki  a ia i a tatou. (Faka. 2:4, 7) E iloa ne ia me e mafai o toe fakamalosi aka ne tatou a te alofa telā ne maua muamua ne tatou i te taimi ne tauloto ei ki te munatonu.

4. Ne a mea ka sau‵tala tatou ki ei i te mataupu tenei?

⁴ Ka sau‵tala tatou i te mataupu tenei ki te auala ke tupu aka te ‵tou a‵lofa ki a Ieova mo nisi tino. Ka oti ko onoono ei ki nisi fakamanuiaga kolā ka maua ne tatou pelā foki mo nisi tino māfai e ga‵lue tatou o fakamalosi aka ‵tou a‵lofa ki a Ieova mo te kautaina.

5-6. Ne a fakalavelave ne fepaki mo te apositolo ko Paulo i tena galuega talai, kae ne a mea ne fakamalosi atu ki a ia ke tumau i te tavini atu ki a Ieova?

⁵ Ne fiafia kae lotomalie te apositolo ko Paulo ki tena olaga i te taviniga ki a Ieova, kae ne ‵tau o manumalo a ia i nisi fakalavelave e uke. Ne masani o faimalaga a Paulo ki koga ‵mao, kae ne seki faigofie te mea tenā i aso konā. I ana malaga konā, ne fepaki a Paulo i nisi taimi mo “mea fakama‵taku i vaitafe” mo “mea fakama‵taku mai tino kai‵soa.” Ne fai fakamasei foki a ia i nisi taimi ne tino ‵teke. (2 Koli. 11:23-27) Kae ne seki fakaasi atu faeloa ne taina Kelisiano o Paulo a te loto fakafetai ki ana mea ne fai ke fesoasoani ki a latou.—2 Koli. 10:10; Fili. 4:15.

⁶ Ne a mea ne fesoasoani atu ki a Paulo ke tumau i te taviniga ki a Ieova? E uke a uiga o Ieova ne tauloto ne Paulo mai te Tusi Tapu pelā foki mo mea ne ‵tupu ki a ia. Ne fai ei ke talitonu a Paulo me i a Ieova te Atua e alofa ki a ia. (Loma 8:38, 39; Efe. 2:4, 5) Kae ne alofa malosi foki a ia ki a Ieova. Ne fakaasi atu ne Paulo tena alofa ki a Ieova e auala i tena “taviniga mo te tumau i te taviniga ki tino tapu.”—Epe. 6:10.

7. Se a te auala e tasi e mafai o tupu aka te ‵tou a‵lofa ki a Ieova?

⁷ E mafai o tupu aka te ‵tou a‵lofa ki te Atua mai te sukesuke malosi ki tena Muna. I te taimi e faitau koe ki te Tusi Tapu, taumafai ke malamalama koe i mea e fakaasi mai i tusi fai‵tau konā e uiga ki a Ieova. Fesili ifo ki a koe eiloa: ‘E fakaasi mai pefea i te tala tenei me alofa mai te Atua ki a au? Ne a pogai e fakamalosi mai ke fakaasi atu te alofa ki a Ieova?’

8. E fesoasoani mai pefea a ‵talo ke fai ei ke tupu aka te ‵tou a‵lofa ki te Atua?

⁸ A te suā auala e mafai ei o tupu aka te ‵tou a‵lofa ki a Ieova ko te ‵tala atu faeloa ‵tou loto ki a ia i ‵talo. (Sala. 25:4, 5) Kae ka tali mai ne Ieova ‵tou ‵talo. (1 Ioa. 3:21, 22) Ne fai mai a Khanh, se tuagane i Asia, penei: “Muamua la, ne alofa au ki a Ieova ona ko mea ko iloa ne au, kae ne gasolo o malosi te alofa tenā i te taimi ne lavea ne au te auala e tali mai a ia ki aku ‵talo. Ne fai i ei ke manako au o fai a mea kolā e fiafia a ia ki ei.” b

9. Ne fakaasi mai pefea ne Timoteo a tena gasolo ki mua i te fakaasiatuga o te alofa?

⁹ I nai tausaga mai tua o tena ‵fuliga, ne fetaui a Paulo mo te tamataene gali ko Timoteo. Ne alofa a Timoteo ki a Ieova, kae alofa foki ki tino. Ne fai atu a Paulo ki tino i Filipi: “E seai aka foki se isi tino i konei e ‵pau ana faifaiga mo [Timoteo], telā ka saga faka‵lei atu ki mea e uiga ki a koutou.” (Fili. 2:20) Ne seki fakauiga a pati a Paulo konei ki te atamai o Timoteo i te fakatokaga o mea io me ki tena apo i te faiga o ana lāuga i mua o tino, kae ne fiafia malosi a Paulo ki te lasi o te alofa o Timoteo ki taina mo tuagane. E mautinoa me ne olioli faeloa a fakapotopotoga ne tavini i ei a Timoteo ki ana asiga ki a latou.—1 Koli. 4:17.

10. Ne fakaasi atu pefea ne Anna mo tena avaga te lā a‵lofa ki taina mo tuagane?

¹⁰ E ‵sala foki tatou ki auala ke fesoasoani  atu ki ‵tou taina mo tuagane Kelisiano. (Epe. 13:16) Mafaufau ki te tala o Anna, telā ne sae mai i te mataupu mai mua. Mai tua o se matagi malosi, ne asi atu lāua mo tena avaga ki se kāiga Molimau kae lavea ne lāua te tuafale o latou ko maofa. Kae ko seai foki ne gatu ‵ma o latou mo ‵pei. Ne fai mai a Anna: “Ne puke ne māua olotou gatu, ave o ‵ta, auli, fetufetu kae faka‵foki ki a latou. Ki a māua loa, te mea tenā se tamā galuega fua, kae ne fai i ei ke pili malosi te motou va fakataugasoa ke oko mai ki te aso nei.” Ne fakamalosi aka a Anna mo tena avaga ne te lā a‵lofa ki taina mo tuagane ke ga‵sue o fesoasoani atu ki a latou.—1 Ioa. 3:17, 18.

11. (a) E mafai pefea o aoga ki nisi tino a ‵tou taumafaiga ke fakaasi atu te alofa? (e) E ‵tusa mo te Faataoto 19:17, e saga mai pefea a Ieova ki a tatou māfai e fakaasi atu ne tatou te alofa?

¹¹ Kafai e fakaasi atu ne tatou a faifaiga alofa mo te atafai ki nisi tino, e masani o lavea ne latou a ‵tou taumafaiga ke fakaakoako ki a Ieova. Kae e loto fakafetai latou ki te a‵lofa o tatou e aunoa mo te iloa ne tatou. E se mafai o puli i a Khanh, telā ne sae muamua mai, a tino kolā ne fesoasoani atu ki a ia. Ana muna: “E fakafetai eiloa au ki tuagane pele kolā ne ave sāle ne latou au ki te galuega talai. Ne ‵mai latou o puke au, ‵kami au ke inu tii io me ‵kai mo latou i tutonu, ko fakafoki ei au ki te fale. Ko iloa nei ne au me se galuega lasi ‵ki. Kae ne fai eiloa ne latou mo te a‵lofa.” E tonu, e se ko tino katoa ka fakafetai mai mō mea e fai ne tatou mō latou. Konei a pati a Khanh ne fai e uiga mō latou kolā ne fesoasoani atu ki a ia: “Aku muna loa ke mafai o toe taui atu ne au te lasi o te lotou a‵lofa ki a au, kae e se iloa ne au a koga e ‵nofo i ei latou. Kae e iloa ne Ieova, kae ‵talo au ke taui atu ne ia a mea ‵lei ne fai ne latou mō au.” E tonu eiloa a Khanh. E lavea ne Ieova a tamā mea fo‵liki e fai ne tatou mō nisi tino. I tena kilokiloga a te mea tenā se galuega tāua  ‵ki kae pelā foki me se kaitalafu telā e ‵tau o ‵tina ne ia.—Faitau te Faataoto 19:17.

12. E mafai pefea o fakaasi atu ne taina te lotou a‵lofa mō te fakapotopotoga? (Onoono foki ki ata.)

¹² Kafai koe se taina, e mafai pefea o fakaasi atu ne koe te alofa ki nisi tino kae kausaki atu ke fesoasoani ki a latou? Ne fesili atu te taina talavou ko Jordan ki se toeaina me ne a ana mea e mafai o fai ke fesoasoani atu ki te fakapotopotoga. Ne fakamālō atu te toeaina ki a ia mō tena gasolo ki mua kae tuku atu nisi manatu fesoasoani ki nisi mea e mafai ne ia o fai. E pelā mo te manatu ke taumafai a Jordan ke oko vave atu ki te Fale Tapuaki o fakatalofa ki nisi tino, fai ana tali i fakatasiga, kau faeloa ki te galuega talai, kae ‵sala ki auala ke fesoasoani a ia ki nisi tino. I te taimi ne fakagalue ne Jordan a manatu konā, ne tauloto i ei ne ia a atamai ‵fou kae gasolo aka foki o lasi tena alofa ki taina mo tuagane. Ne iloa ne Jordan me kafai ko fai se taina pelā me se tavini fesoasoani, e se tenā taimi e kamata ei a ia o fesoasoani ki nisi tino; kae e tumau eiloa a ia i te fesoasoani atu ki a latou.—1 Timo. 3:8-10, 13.

13. Ne fakamalosi aka pefea ne te alofa a te taina ko Christian ke mafai o toe tavini atu pelā me se toeaina?

¹³ Kae e a, māfai koe ne tavini muamua atu pelā me se tavini fesoasoani io me se toeaina? E masaua ne Ieova a galuega ne fai ne koe i aso mua mo te alofa telā ne fakamalosi atu ki a koe ke fai penā. (1 Koli. 15:58) E lavea foki ne ia te alofa telā koi fakaasi atu eiloa ne koe. Ne fanoanoa te taina ko Christian i te taimi ne tapale ei tena tofiga pelā me se toeaina. Kae ne fai mai a ia: “Ne fakaiku aka ne au ke fai ne au ‵toe mea e mafai ke tavini atu ki a Ieova ona ko te alofa—faitalia me isi io me seai soku tauliaga.” Fakamuli ifo, ne toe fakasopo a ia mo fai se toeaina. Ne fai ‵tonu mai a Christian: “Ne tai polepole au i te manavase ma toe tavini  atu pelā me se toeaina. Kae ne fakaiku aka ne au me kafai ne talia ne Ieova, e auala i tena alofa fakamagalo, ke toe tavini au pelā me se toeaina, e fai eiloa ne au ona ko toku alofa ki a ia mo taina mo tuagane.”

14. Ne a au mea ne tauloto mai i pati a se tuagane i Georgia?

¹⁴ E fakaasi atu foki ne tavini a Ieova te lotou a‵lofa ki olotou tuakoi. (Mata. 22:37-39) E pelā mo pati a Elena, se tuagane mai te fenua ko Georgia, ne fai mai: “Muamua la, a te mea e tasi fua telā ne fakamalosi mai ki a au ke fano o talai ko toku alofa mō Ieova. Kae i te taimi ne gasolo aka ei o lasi toku alofa ki toku Tamana i te lagi, ne gasolo aka foki toku alofa ki tino. E fakaataata ne au i toku mafaufau olotou fakalavelave mo mataupu kolā e mafai o otia i ei olotou loto. Ko te uke o taimi e mafaufau au ki mea konā, ko te lasi foki o toku manako ke fesoasoani ki a latou.”—Loma 10:13-15.

15-16. E pelā mo mea e fakaasi mai i ata, ne a fakamanuiaga e maua mai te fakaasiatuga o te alofa ki nisi tino?

¹⁵ Kafai e fakaasi atu ne tatou te alofa ki ‵tou taina, e se ko latou fua e aoga ki a latou. Mai tua o te pokoga o te masaki ‵pisi ko te COVID-19, ne fesoasoani atu te taina ko Paolo mo tena avaga ki tuagane lomatua e tokouke ke iloa ne latou o fakaaoga olotou tivaisi ke mafai latou o talai. Ne iku manuia a taumafaiga a se tuagane telā ne faigata ki a ia ke fakaaoga tena tivaisi. Ne fakaaoga ne ia ke ‵kami mai ana kāiga ki te Fakamanatuga. E toko onosefulu i a latou ne  ‵kau ki ei e auala i te neti! Ne maua ne te tuagane tenei mo ana kāiga a mea aoga mai taumafaiga a Paolo mo tena avaga. Fakamuli ifo, ne tusi atu te tuagane ki a Paolo: “Fakafetai mo te akoakoga ne koe matou loma‵tua. Ka se mafai o puli i a au a te saga tonu mai o Ieova e pelā foki mo au galuega e uke ne fai.”

¹⁶ A tala penei ne tauloto mai i ei ne Paolo se akoakoga tāua. Ne fakamasaua atu ki a ia me e sili atu a te alofa i lō au mea e iloa io me ko tou atamai. Ne fai mai a ia: “Ne tavini atu sāle au pelā me se ovasia o te seketi. Nei la, ko iloa ne au me kāti ko puli i tino talai aku lāuga ne fai, kae koi masaua loa ne latou te fesoasoani o oku ki a latou.”

17. Ko oi foki ka maua ne latou a mea aoga māfai e fakaasi atu ne tatou te alofa?

¹⁷ Kafai e fakaasi atu ne tatou te alofa ki nisi tino, e maua ne tatou a mea aoga i auala seki fakamoemoegina. Ne fakamaoni mai ne Jonathan, telā e nofo i Niu Sila, a te mea tenei. I se fakaafiafi ‵vela o te Aso Ono e tasi, ne lavea ne ia se paenia e talai i tafa o te auala. Ne fakaiku aka ne Jonathan ke ga‵lue lāua mo te paenia tenā i fakaafiafi o Aso Ono. Ne seki iloa ne ia i te taimi tenā a mea aoga ka maua ne ia mai tena faifaiga atafai tenā. “I te taimi tenā,” ne fai ‵tonu mai a Jonathan, “ne seki fiafia au ki te galuega talai. Kae i taku fakalogologoga ki te auala e akoako ei te paenia tenei mo te ‵fua malosi mai o tena galuega talai, ne fai ei ke fiafia malosi au ki te galuega tenei. Ne maua foki ne au se taugasoa gali telā ne fesoasoani mai ke gasolo au ki mua i te feitu faka-te-agaga, ke fiafia ki te galuega talai, kae ke fakapilipili atu ki a Ieova.”

18. Se a te mea e manako a Ieova ke fai ne tatou?

¹⁸ E manako a Ieova ke tupu aka faeloa te ‵tou a‵lofa ki a ia mo nisi tino. E pelā mo mea ne tauloto ne tatou, e mafai o fakamalosi aka te ‵tou a‵lofa ki a Ieova mai te faitau ki tena Muna kae mafaufau ‵loto ki ei kae faipati atu faeloa ki a ia e auala i ‵talo. E mafai o gasolo aka o a‵lofa malosi tatou ki ‵tou taina mo tuagane mai te fesoasoani atu ki a latou. Kafai ko tupu aka te ‵tou a‵lofa, ka gasolo foki o pili malosi tatou ki a Ieova mo ‵tou kāiga faka-te-agaga. Kae ka tumau eiloa a va fakataugasoa konā ke oko ki te se-gata-mai!