Ke fakafiafia a Ieova, e ‵tau mo tatou o fakatuanaki. Kae e fai mai te Tusi Tapu i te “fakatuanaki e sē se mea e maua ne tino katoa.” (2 Tesa. 3:2) Ne faipati te apositolo ko Paulo e uiga ki tino “fakasaua kae amio ma‵sei,” kolā ne fakasaunoa ne latou a ia. Kae ko ana pati e uiga ki te fakatuanaki e aoga foki ki nisi tino. Nisi tino e se fia tali‵tonu ki fakamaoniga matea me e isi se Mafuaga​—ko te Atua. (Loma 1:20) E fai mai nisi tino i a latou e fakatuanaki me tali‵tonu latou me isi se mea io me se tino e malosi atu fakafia. Kae ko te talitonuga tenā e se ko te fakatuanaki tonu telā e manakogina ko te mea ke fakafiafia atu a Ieova.

E ‵tau o tali‵tonu tatou me i a Ieova e ola kae ka “tuku atu ne ia a te taui” ki a latou kolā e ma‵losi olotou fakatuanaki. (Epe. 11:6) A te fakatuanaki se vaega o fuataga o te agaga tapu. A te ‵fuli atu ki a Ieova i ‵talo e mafai o fesoasoani atu ki se tino ke maua ne ia a te agaga tapu. (Luka 11:9, 10, 13) A te kī tāua ke maua te agaga tapu ko te faitau ki te Muna tusia a te Atua. Ko mafaufau ei tatou ki ‵tou mea ne fai‵tau kae taumafai o fakagalue aka ne tatou. Tenā ko mafai ei o galue te agaga o Ieova i ‵tou olaga, mai te fesoasoani mai ke maua ne tatou a te fakatuanaki telā e fakafiafia atu ki a ia.