1. Se a te mea e fesoasoani atu ki tino o Ieova ke tumau i te tapuaki atu ki a ia faitalia a fakalavelave e fe‵paki mo latou?

 “TOE taimi faiga‵ta”—tenā te auala e fakamatala mai ne te Tusi Tapu a aso ko ola nei tatou i ei. (2 Timo. 3:1) E se gata i mea faiga‵ta e fe‵paki mo tino katoa i te olaga tenei, e fakafesagai eiloa a tino o Ieova mo ‵tekemaiga mo fakasauaga. Se a te mea e fesoasoani mai ke tumau tatou i te tapuaki atu ki a Ieova faitalia a fakalavelave konei? A te pogai tāua e tasi me ko iloa ‵lei ne tatou a Ieova e pelā me ko “te Atua ola.”—Iele. 10:10; 2 Timo. 1:12.

2. I te auala fea e fai ei a Ieova e pelā me ko te Atua ola?

² E lavea ne Ieova a fakalavelave katoa e fe‵paki mo tatou kae manako faeloa a ia o fesoasoani mai. (2 Nofo. 16:9; Sala. 23:4) Kafai e masaua ne tatou me i te ‵tou Atua e atafai kae toka faeloa o fesoasoani mai, e mafai eiloa o maua ne tatou te malosi ke kufaki i so se fakalavelave. Ke mafaufau ki te tupu ko Tavita, telā ne fakamaoni ne ia te ‵tonu o te mea tenā.

3. Se a te mea ne fakauiga a Tavita ki ei i ana pati me i a “Ieova e ola”?

³ Ne iloa ‵lei ne Tavita a Ieova kae ne fakalagolago ki a Ia. I te taimi ne lamalama a ia ne ana fili ke tamate, e aofia ei te tupu ko Saulo, ne ‵talo a Tavita ki a Ieova mō se fesoasoani. (Sala. 18:6) I te otiga ne tali ne te Atua tena ‵talo kae fakasao a ia, ne fai atu a Tavita: “A Ieova e ola!” (Sala. 18:46) Mai pati konei, ne seki fai fua pelā me ne iloa ne Tavita i te Atua e ola. E fai mai se fakamatalaga e tasi me ne fakaasi atu ne Tavita tena loto talitonu ki a Ieova “e pelā me se atua ola telā e tu faeloa mō ana tino.” E tonu, ne iloa ne Tavita mai mea ne ‵tupu ki a ia me i tena Atua e ola, kae ne fakamalosi aka ei a tena fakaikuga ke tavini kae ‵viki atu ki a Ieova.—Sala. 18:​28, 29, 49.

4. E aoga pefea ki a tatou a te ‵kilo atu ki a Ieova e pelā me ko te Atua ola?

 ⁴ A te ‵tou tali‵tonu i a Ieova se Atua e ola, e fesoasoani mai ke tavini atu tatou ki a ia mo te loto finafinau. Ka maua ne tatou a te malosi ke kufaki i mea faiga‵ta mo te manakoga ke tumau i te ga‵lue malosi i tena galuega. Ka fakaiku aka foki ne tatou ke tumau i te fakapili‵pili atu ki a Ieova.

KA FAKAMALOSI KOE NE TE ATUA OLA

5. Se a te mea e fakatalitonu mai ki a tatou māfai ko fe‵paki mo mea faiga‵ta? (Filipi 4:13)

⁵ Ka mafai eiloa o kufaki tatou i so se mea faigata, faitalia me foliki io me lasi, māfai e masaua ne tatou i a Ieova e ola kae e toka faeloa o fesoasoani mai. A te ‵tonuga loa, e seai se fakalavelave e tō faigata ki a ia. A ia ko te Atua Malosi Katoatoa, kae e mafai o tuku mai ne ia te malosi ke kufaki tatou. (Faitau te Filipi 4:13.) Tela la, e maua ne tatou a te loto talitonu māfai ko fe‵paki mo mea faiga‵ta. Kae kafai e lavea ne tatou a tena fesoasoani ki ‵tou tamā fakalavelave, ka mautinoa eiloa me ka fesoasoani mai a ia i taimi e fe‵paki tatou mo fakalavelave tai ‵lasi atu.

6. Ne a mea ne ‵tupu ki a Tavita i te taimi koi foliki ei, telā ne fai ei ke talitonu malosi a ia ki a Ieova?

⁶ Mafaufau ki mea e lua ne ‵tupu kolā ne fakamalosi aka i ei te loto talitonu o Tavita ki a Ieova. I te taimi koi foliki ei a Tavita e pela me se tausi mamoe, ne puke ne se pea mo se leona se mamoe e tasi a tena tamana. I taimi konā, ne afuli ne Tavita mo te loto malosi a manu konā kae fakasao a te mamoe. Kae ne seki mafaufau a ia me ne mafai o fai ne ia te mea tenā ona ko tena malosi. Ne iloa ne ia me ko Ieova ne tuku atu ne ia te malosi ke fai ne ia te mea tenā. (1 Samu. 17:​34-37) Ne seki puli i a Tavita a mea konei. Mai te mafaufau ‵loto ki ei, ne maua ne ia te loto talitonu me ka fakamalosi aka ne te Atua ola a ia i aso mai mua.

7. Ne fesoasoani atu pefea a te kilokiloga tonu ne maua ne Tavita ke taua atu a ia ki a Koliata?

⁷ Fakamuli ifo, kāti i te taimi ko tai kātoa ei tena 20 tausaga, ne asi atu a Tavita ki te koga e ‵nofo i ei te kautau Isalaelu. Ne iloa aka ne ia me ne ma‵taku a sotia konā i te toa Filisitia ko Koliata e vau ki tua kae “fakaitaita mai ki tino Isalaelu.” (1 Samu. 17:​10, 11) Ne ma‵taku a sotia me ko tō ‵saga latou ki te lasi o Koliata mo ana pati fakaitaita kolā e fai atu ki a latou. (1 Samu. 17:​24, 25) Kae e ‵kese te auala ne kilo atu ei a Tavita ki te mea tenā. Ne iloa ne Tavita me ne seki fakaitaita atu fua a Koliata ki te kautau Isalaelu kae ki “te kautau a te Atua ola.” (1 Samu. 17:26) Ne mafaufau a Tavita ki a Ieova. Ne talitonu a ia me i te Atua telā ne fesoasoani ki a ia i te taimi koi fai a ia mo tausi mamoe ka fesoasoani atu foki ki a ia i te taimi tenei. Mai te talitonu ki te fesoasoani o te Atua, ne taua atu a Tavita ki a Koliata, kae ne manumalo a ia!—1 Samu. 17:​45-51.

8. E mafai pefea o masaua ne tatou a Ieova māfai e fe‵paki mo mea faiga‵ta? (Onoono foki ki te ata.)

⁸ E mafai foki ne tatou o fakafesagai atu ki fakalavelave mo te manuia māfai e masaua ne tatou me e toka a te Atua ola o fesoasoani mai. (Sala. 118:6) E mafai o fakamalosi aka te ‵tou loto tali‵tonu i te feitu tenā mai te mafaufau ‵loto ki mea ne fai ne ia i aso ko ‵teka. Faitau ki tala i te Tusi Tapu kolā e fakamasaua mai ei ki a tatou a te auala ne faka‵sao ne Ieova ana tino tapuaki. (Isa. 37:​17, 33-37) E se gata i ei, faitau ki lipoti i te jw.org kolā e fakamatala mai ei a te fesoasoani o Ieova ki ‵tou taina mo tuagane i aso nei. E se gata i ei, mafaufau ki taimi ne fesoasoani atu a Ieova ki a koe. Sa manavase māfai e seki fakafesagai koe ki se fakalavelave e pelā mo te taua atu ki se pea io me se leona. Kaia? A te ‵tonuga loa, ko  oti ne fai ne Ieova a mea e uke i tou olaga! Ko oti ne ‵kami ne ia koe ke maua se fesokotakiga mo ia. (Ioa. 6:44) I te taimi foki tenei, e fakafetai tatou me ona ko tena fesoasoani, koi mafai eiloa o tavini atu tatou ki a ia. Kaia e se fakamolemole atu ki a ia mō tena fesoasoani ke masaua ne koe a taimi ne tali ne ia au ‵talo, ‵lago atu ki a koe i te taimi tonu, io me fakamalosi ne ia koe i se taimi faigata? A te mafaufau ‵loto ki vaegā taimi penā, ka fakamalosi aka ei tou loto talitonu me ka fesoasoani atu faeloa a Ieova ki a koe.

9. Ne a mea e ‵tau o masaua ne tatou māfai e fakafesagai atu ki fakalavelave? (Faataoto 27:11)

⁹ A te ‵kilo atu ki a Ieova e pelā me se Tino tonu telā e ola, ka fai ei ke maua ne tatou se kilokiloga tonu ki ‵tou fakalavelave. Pefea la? Ka ‵kilo tatou ki ‵tou fakalavelave e pelā me se vaega o te kinauga lasi i te va o Ieova mo Satani. E ‵losi mai te Tiapolo me kafai e logo‵mae tatou i fakalavelave, ka tiakina ne tatou a Ieova. (Iopu 1:​10, 11; faitau te Faataoto 27:11.) Kae kafai e fakafesagai atu tatou ki ‵tou fakalavelave mo te manuia, ko fakaasi atu ei te ‵tou a‵lofa ki a Ieova kae fakamaoni atu i te Tiapolo se tino loi. E mata, e fakafesagai koe mo ‵tekemaiga mai te malo, fakalavelave i mea tau tupe, te sē fia‵fia o tino ki tau galuega talai, io me ko nisi fakalavelave aka? Kafai e penā loa, masaua me fai ne tou tulaga tenā ke maua ne koe se avanoaga ke fakafiafia te loto o Ieova. Masaua foki, me ka se talia ne ia so se tofotofoga telā e silia atu mo mea e mafai o kufaki ne koe. (1 Koli. 10:13) Ka tuku atu ne ia ki a koe a te malosi ke mafai o kufaki.

KA TUKU ATU NE TE ATUA OLA A TOU TAUI

10. Se a te mea ka fai ne te Atua ola ki a latou kolā e tapuaki ki a ia?

¹⁰ A Ieova ko te Tino telā e tuku atu ne ia te taui ki tino kolā e tapuaki ki a ia. (Epe. 11:6) E tuku mai ne ia ki a tatou a te filemu mo te lotomalie i te taimi nei, mo te ola se-gata-mai i aso mai mua. E mafai o fakamoe‵moe tatou ki a Ieova mo te loto tali‵tonu me e maua ne ia te manakoga mo te malosi ke tuku mai ne ia  te taui ki a tatou. Kae ona ko te pogai tenā, ka fai ei ke fakalave‵lave faeloa tatou i te ‵tou tapuakiga, e pelā mo mea ne fai ne ana tavini fakamaoni i aso mua. Tenā eiloa te mea ne fai ne Timoteo i te senitenali muamua.—Epe. 6:​10-12.

11. Se a te mea ne fakamalosi ne ia a Timoteo ke galue malosi i te fakapotopotoga? (1 Timoteo 4:10)

¹¹ Faitau te 1 Timoteo 4:10. Ne malosi te fakatuanaki o Timoteo me ka tuku atu ne te Atua te taui ki a ia. Tenā te pogai ne galue malosi a ia mō Ieova mo nisi tino. I auala fea? Ne fakamalosi ne te apositolo ko Paulo a ia ke gasolo ki mua e pelā me se faiakoga mo se failāuga. Ne fai foki a Timoteo e pelā me se fakaakoakoga ‵lei ki taina tali‵tonu, talavou mo tino ma‵tua. Kae ne ‵tofi aka a ia ki nisi tofiga tai faiga‵ta, e aofia ei te tukuatuga o pati fakatonutonu ki tino kolā e ma‵nako ki ei, i se auala alofa kae fai ‵tonu. (1 Timo. 4:​11-16; 2 Timo. 4:​1-5) Ne mafai o mautinoa i a Timoteo me tiga eiloa e se lavea io me se loto fakafetai a tino ki galuega ne fai ne ia, ka tuku atu ne Ieova a te taui ki a ia.—Loma 2:​6, 7.

12. Ne a mea e mafai o fakamalosi aka ei a toeaina ke fakalave‵lave i olotou galuega? (Onoono foki ki te ata.)

¹² E mautinoa foki i toeaina i aso nei me e lavea kae fakatāua ne Ieova a olotou galuega ‵lei. E se gata i asiga a tausi mamoe, akoako, mo te talai, e tokouke a toeaina e ‵lago atu ki galuega fakatū‵tu mo galuega fesoasoani mō fakalavelave ‵tupu. Nisi tino e tavini atu i Potukau Asiasi Tino Ma‵saki io me i te Komiti Fesokotaki mo Fakaimasaki. A toeaina kolā e fakaavanoa olotou taimi mō vaegā galuega penā, e iloa ne latou me i te fakapotopotoga i a Ieova kae ne seki fakatu aka ne tino. Ona ko te mea tenā, e ga‵lue malosi latou i te fakapotopotoga kae tali‵tonu katoatoa me ka tuku atu ne te Atua a te taui mō mea e fai ne latou.—Kolose 3:​23, 24.

13. E pefea a lagonaga o Ieova ki au taumafaiga e fai i tena galuega?

¹³ E se ko tino katoa e mafai o fai pelā me ne  toeaina. Kae e mafai ne tatou katoa o tuku atu se mea ki a Ieova. E fiafia te ‵tou Atua māfai e fai ne tatou a te ‵toe mea e mafai ke tavini ki a ia. E lavea ne ia a ‵tou meaalofa e fai ki te galuega i te lalolagi kātoa, faitalia me foliki te mea e tuku atu ne tatou. E fiafia a ia māfai e ga‵lue malosi tatou ke manumalo i te mā māfai e fai se tali i fakatasiga, penā foki māfai e fakamagalo ne tatou a tino kolā e fakalogo‵mae ne latou a tatou. Kafai foki loa e mafaufau koe me e se mafai ne koe o fai a mea e uke atu, ke talitonu me e fakatāua ne Ieova au mea e mafai o fai. E alofa a ia ki a koe ona ko au mea e mafai o fai, kae ka tuku atu ne ia a tou taui.—Luka 21:​1-4.

TUMAU I TE FAKAPILIPILI MALOSI ATU KI TE ATUA OLA

14. E fesoasoani mai pefea a te fakapili‵pili faeloa ki a Ieova ke tumau tatou i te fakamaoni? (Onoono foki ki te ata.)

¹⁴ Kafai a Ieova se tino tonu ki a tatou, ka faigofie o fakamaoni tatou ki a ia. Tenā te mea ne tupu ki a Iosefa. Ne ‵mautakitaki a ia ke kalo kea‵tea mai faifaiga fakatauavaga sē ‵tau. Ne kilo atu a ia ki te Atua e pelā me se tino tonu ki a ia, kae ne seki manako tou tagata o fakafanoanoa a Ia. (Kene. 39:9) Ke fai a Ieova e pelā me se tino tonu ki a tatou, e ‵tau o fakaavanoa ‵tou taimi ke ‵talo ki a ia kae suke‵suke ki tena Muna. Ka gasolo aka o ‵pili ‵tou va fakataugasoa mo ia. Kae pelā mo Iosefa, kafai e maua ne tatou se va fakataugasoa ‵pili mo Ieova, ka sē ma‵nako lele tatou o fai se mea ke fakafanoanoa ei a Ia.—Iako. 4:8.

15. Se a te akoakoga e tauloto ne tatou mai te mea ne tupu ki te kau Isalaelu i te koga lavaki? (Epelu 3:12)

¹⁵ A tino kolā e puli i a latou me i a Ieova ko te Atua ola, e faigofie o fulitua ki a ia. Mafaufau ki te mea ne tupu ki te kau Isalaelu i te ‵nofoga i te koga lavaki. Ne iloa ne latou me i a Ieova e ola, kae ne kamata o fakalotolotolua ki tena tausiga ki a latou. Ne fesili foki latou: “E mata, e ‵nofo fakatasi tatou mo Ieova io me ikai?” (Eso. 17:​2, 7) Ona ko te mea tenā, ne ‵teke ei latou ki te Atua. E mautinoa eiloa me e ma‵nako tatou o ‵kalo kea‵tea  mai te fakaakoakoga sē ‵lei tenā.—Faitau te Epelu 3:12.

16. Se a te mea e mafai o tofotofo aka i ei a te ‵tou fakatuanaki?

¹⁶ E fai ne te lalolagi ke faigata o fakapili‵pili malosi tatou ki a Ieova. E ‵teke ne tino e tokouke a te manatu i te Atua e ola. A latou kolā e masani o se fia ‵saga ki fakatonuga a te Atua e foliga mai me ‵lei olotou olaga. E mafai eiloa o tofotofogina ‵tou fakatuanaki māfai e lavea ne tatou a mea konā e ‵tupu. E tiga eiloa e tali‵tonu tatou i te Atua e ola, kāti ka fakalotolotolua tatou ki tena fesoasoani ki a tatou. Konā lagonaga ne oko ki te tino telā ne tusi ne ia te Salamo 73. Ne lavea ne ia me i tino kolā e se tau‵tali i tulafono a te Atua e fia‵fia eiloa i te olaga. Ona ko te mea tenā, ne kamata o fakafesili ne ia me e mata, e aoga ke tavini atu ki te Atua io me ikai.—Sala. 73:​11-13.

17. Se a te mea ka fesoasoani mai ke tumau tatou i te fakapili‵pili atu ki a Ieova?

¹⁷ Se a te mea ne fesoasoani fakamuli atu ki te faisalamo ke faka‵tonu aka tena kilokiloga? Ne mafaufau ‵loto a ia ki mea ka ‵tupu ki a latou kolā e puli i a latou a Ieova. (Sala. 73:​18, 19, 27) Ne mafaufau foki a ia ki mea aoga e maua mai te tavini atu ki te Atua. (Sala. 73:24) E mafai foki o mafau‵fau tatou ki fakamanuiaga ne tuku mai ne Ieova, kae faka‵pau mo te olaga o tatou māfai e se tavini atu ki a Ieova. A te faiga penā, e mafai eiloa o fesoasoani mai ke tumau i te auala fakamaoni, kae fai atu a pati kolā ne fai mai ne te faisalamo: “Pelā mo au, a te fakapilipili atu ki te Atua e ‵lei ki a a au.”—Sala. 73:28.

18. Kaia e mafai o fakafesagai atu tatou mo te loto tali‵tonu ki aso mai mua?

¹⁸ E mafai o fakafesagai atu tatou ki so se mea faigata e oko mai ki a tatou i aso fakaoti konei, me i a tatou e “pologa ki se Atua ola kae tonu.” (1 Tesa. 1:9) A te ‵tou Atua se Tino tonu telā e fesoasoani ki tino kolā e tapuaki ki a ia. E tali‵tonu tatou me ne fakatasi atu a ia ki ana tavini i aso mua, kae penā foki mo tatou i aso nei. Ko pili o fakafesagai atu tatou ki te ‵toe fakalavelave lasi i te lalolagi nei. Kae ka se tuku tiaki tatou. Ka fakatasi mai eiloa a Ieova. (Isa. 41:10) Tela la, ke na “loto ‵toa tatou o fai aka: ‘A Ieova ko toku fesoasoani; ka se mataku eiloa au.’”—Epe. 13:​5, 6.