1. Ne pefea tou olaga a koi tuai o sukesuke koe ki te Tusi Tapu?

 NE PEFEA tou olaga a koi tuai o suke‵suke koe mo Molimau a Ieova ki te Tusi Tapu? E se fia mafau‵fau a tino e tokouke i a tatou e uiga ki ei. Kāti ne fakamalosi aka ‵tou kilokiloga mo uiga ne mea kolā e fakatāua ne tino i te olaga tenei—ko tulaga o te lalolagi ki te mea tonu mo te mea ‵se. Kafai e penā loa, ne “seki ai se [‵tou] fakamoemoega kae ne ‵nofo i te lalolagi e aunoa mo te Atua.” (Efe. 2:12) Kae ne ‵fuli a mea katoa konā i te taimi ne fai ei ‵tou akoga faka-te-Tusi Tapu!

2. Ne a au mea ne maua i te taimi ne sukesuke ei koe ki te Tusi Tapu?

² I te taimi ne sukesuke koe ki te Tusi Tapu, ne iloa aka ne koe me e isi sou Tamana faka-te-lagi telā e alofa malosi ki a koe. Ne iloa ne koe me kafai e manako koe o fakafiafia a Ieova kae aofia i tena kāiga o tino tapuaki, e ‵tau mo koe o fai a ‵fuliga ‵lasi i tou olaga, tau kilokiloga, mo ou mafaufauga. E ‵tau o fakamasani koe ke ola e ‵tusa mo ana tulaga ma‵luga.—Efe. 5:3-5.

3. E pelā mo te Kolose 3:9, 10, se a te mea e manako a Ieova ke fai ne tatou, kae ne a mea ka sau‵tala tatou ki ei i te suā mataupu?

³ E maua ne Ieova, te ‵tou Mafuaga mo te Tamana faka-te-lagi, a te aiā ke fakaiku aka ne ia a amioga e ‵tau o fai ne tino o tena kāiga. Kae koi tuai tatou o papatiso, e manako a ia ke “‵pei kea‵tea [ne tatou] a uiga mua mo olotou faifaiga ma‵sei.” * (Faitau te Kolose 3:9, 10.) Ka fesoasoani mai te mataupu tenei ki a latou kolā e ma‵nako ke papatiso ke tali aka a fesili e tolu konei: (1) Ne a “uiga mua”? (2) Kaia e fakamalosi mai a Ieova ke ‵pei keatea ne tatou a uiga konā? (3) E mafai pefea ne tatou o  fai te mea tenā? Ka fesoasoani mai a te sukesukega tenei ki a tatou kolā ko oti ne papatiso, ke ‵kalo keatea mai te ‵toe fakamalosi aka o uiga mua penā.

4. Ne a faifaiga a te tino telā e pule atu ki ei ana “uiga mua”?

⁴ A te tino telā e pule ne “uiga mua” e masani o mafaufau kae gasuesue i se auala faka-te-foitino. Kāti e uiga kaimanako, kaitaua vave, se loto fakafetai, kae fakamatamata. E mafai o onoono sāle a ia ki ata mo vitio ma‵sei kae fakasaua. E mautinoa me e isi ne ana uiga ‵lei kae kāti e se fiafia a ia ki ana pati io me ko ana amioga ma‵sei. Kae e se lasi tena manakoga ke ‵fuli ana mafaufauga mo ana amioga.—Kala. 5:19-21; 2 Timo. 3:2-5.

5. Se a te kilokiloga ‵lei e ‵tau o maua ne tatou māfai ko ‵pei keatea a uiga mua? (Galu. 3:19)

⁵ A tatou e se ‵lei katoatoa, tela la, e seai se tino i a tatou e mafai o tapale katoatoa keatea ne ia a mafaufauga mo manakoga ma‵sei mai i ‵tou loto mo ‵tou mafaufau. I nisi taimi, e fai atu ne tatou a pati kolā ka sala‵mo fakamuli tatou i ei. (Iele. 17:9; Iako. 3:2) Kae kafai ko ‵pei keatea ne tatou a uiga mua, ko se toe pule mai ei ki a tatou a uiga mo faifaiga faka-te-foitino. Ko fai ei ke momea aka te ‵gali o ‵tou uiga.—Isa. 55:7; faitau te Galuega 3:19.

6. Kaia e fakamalosi mai ei a Ieova ke ‵pei keatea a mafaufauga mo faifaiga sē ‵lei o uiga mua?

⁶ E fakamalosi mai a Ieova ki a tatou ke ‵kalo keatea mai i mafaufauga mo faifaiga ma‵sei me i a ia e alofa malosi mai kae manako foki ke fia‵fia tatou i te olaga. (Isa. 48:17, 18) E iloa ne ia me i tino kolā e se ‵teke ki manakoga ma‵sei, e fakalogo‵mae ne latou a latou eiloa mo tino i olotou tafa. E logo‵mae a ia māfai e kilo mai ki te logo‵mae o tatou mo nisi tino.

7. E ‵tusa mo te Loma 12:1, 2, ne a filifiliga e mafai o fai ne tatou?

⁷ Kāti ka fakatauemu mai a nisi taugasoa mo kāiga māfai ko taumafai tatou o ‵fuli ‵tou uiga. (1 Pe. 4:3, 4) E mafai o fai mai latou me e maua ne tatou te saolotoga ke fai so se mea e ma‵nako tatou ki ei, kae ke mo a ma talia a nisi tino ke fai mai a mea e ‵tau o fai ne tatou. Kae ko tino kolā e ‵teke ki tulaga o Ieova, e se fakauiga i ei me ko ‵tu tokotasi latou. A te ‵tonuga loa, ko talia ne latou te lalolagi telā e pule ne Satani ke fakamalosi atu ki a latou. (Faitau te  Loma 12:1, 2.) E ‵tau mo tatou katoa o fai se filifiliga: Ke puke ‵mau ki ‵tou uiga mua, kolā e fakamalosi aka ne te agasala mo te lalolagi a Satani, io me talia ke ‵fuli tatou ne Ieova ki te ‵toe tino ‵lei i te taimi nei.—Isa. 64:8.

8. Ne a mea ka fesoasoani mai ke ‵kalo keatea tatou mai i mafaufauga mo faifaiga ma‵sei?

⁸ E iloa ne Ieova me e manakogina a taimi mo taumafaiga ke ‵kalo keatea mai i mafaufauga mo faifaiga ma‵sei. (Sala. 103:13, 14) Kae e auala i tena Muna, tena agaga, mo tena fakapotopotoga, e tuku mai ne Ieova a te poto, te malosi mo te fesoasoani e manakogina ke ‵fuli tatou. E mautinoa me ko oti ne fesoasoani atu a ia ki a koe. Ke mafau‵fau nei tatou ki nisi faifaiga aoga kolā ka fesoasoani atu ke mafai ne koe o ‵pei keatea a uiga mua kae ke fetaui ‵lei mō te papatisoga.

9. Se a te mea e mafai o fesoasoani atu te Muna a te Atua ke fai ne koe?

⁹ Fakaaoga te Tusi Tapu ke iloilo faka‵lei aka ne koe a koe eiloa. A te Muna a te Atua e fai pelā me se kilo; e mafai o fesoasoani atu ke iloilo aka ne koe a te auala e mafaufau, faipati, kae gasuesue ei koe. (Iako. 1:22-25) E mafai ne tou faiakoga faka-te-Tusi Tapu io me ko nisi Kelisiano ma‵tua ‵lei o tuku atu ne pati fakatonutonu. E mafai o fakaaoga ne latou te Tusi Tapu ke fesoasoani atu ke iloa ne koe ou feitu ma‵losi mo ou vāivāiga. E mafai o akoako koe ne latou ki te auala ke mafai o maua a fakamatalaga faka-te-Tusi Tapu aoga ke manumalo i faifaiga ma‵sei. Kae e toka faeloa a Ieova o fesoasoani atu ki a koe. E iloa ne ia te ‵toe auala ‵lei ke fesoasoani atu ki a koe; e iloa ne ia a mea i tou loto. (Faata. 14:10; 15:11) Tenā la, ke fakamasani o ‵talo faeloa ki a ia kae sukesuke ki tena Muna i aso katoa.

10. Ne a au mea ne tauloto mai te tala o Elie?

¹⁰ Ke loto talitonu me i tulaga o Ieova ko te ‵toe mea ‵lei eiloa. E mafai o maua ne tatou a mea aoga i so se mea e fai mai a Ieova ke fai ne tatou. E maua ne tino kolā e ola e ‵tusa mo ana tulaga a te āva ki a ia eiloa, te pogai tonu o te ola, mo te fiafia tonu. (Sala. 19:7-11) E ‵kese mai i ei, a tino kolā e ‵teke ne latou a tulaga o Ieova ka logo‵mae i ikuga sē ‵lei kolā e māfua mai i galuega o te foitino. Onoono ki pati ne fai mai ne Elie e uiga ki te ‵teke atu ki tulaga o te Atua. Ne puti aka tou tagata ne mātua kolā e a‵lofa ki a Ieova. Kae i te taimi koi talavou tamaliki ei a ia, ne filifili ne Elie a taugasoa ma‵sei. Ne ola a ia i se vaegā olaga telā e fakaaoga i ei a vailakau tapu, amioga faivalevale, mo te kaisoa. Ne fai mai a Elie me ne gasolo aka a ia o kaitaua kae uiga fakasaua malosi. Ne fai ‵tonu mai a ia: “A te ‵tonuga loa, ne fai ne au a mea katoa kolā ne akoako mai ke se fai e pelā me se Kelisiano.” Kae ne seki puli i a Elie ana mea ne tauloto i te taimi koi foliki ei a ia. Fakamuli ifo, ne toe kamata o sukesuke a ia ki te Tusi Tapu. Ne galue malosi a ia ke fakagata ana faifaiga ma‵sei kae ne papatiso i te tausaga ko te 2000. Ne aoga pefea ki a ia a te ola e ‵tusa mo tulaga o Ieova? Ne fai mai a Elie: “Ko maua nei ne au se loto lagona filemu kae ‵ma.” * E pelā mo te tala tenei, a tino kolā e ‵teke atu ki tulaga o Ieova e fakalogo‵mae ne latou a latou eiloa. Kae e loto fiafia eiloa a Ieova o fesoasoani atu ke ‵fuli latou.

11. Ne a mea e takalialia ki ei a Ieova?

¹¹ Ke takalialia ki mea e takalialia ki ei a Ieova. (Sala. 97:10) E fakaasi mai i te Tusi Tapu me e takalialia a Ieova ki “mata fakamaualuga, se alelo fakaloiloi, mo lima kolā e fakamaligi i ei a toto o tino e seai ne olotou ‵se.” (Faata. 6: 16, 17) E “takalialia [foki] a Ieova ki tino amio fakasaua kae amio fakaloiloi.” (Sala. 5:6) E takalialia malosi a Ieova ki amioga mo faifaiga konei telā ne fakaseai ei ne ia a tino ma‵sei katoa i aso o Noa, me ne faka‵fonu ne latou a te lalolagi ki amioga fakasaua. (Kene. 6:13) Mafaufau ki te suā fakaakoakoga. E auala i te pelofeta ko Malaki, e fai mai a Ieova me e takalialia a ia ki tino kolā e ‵tala olotou avaga i auala faitogafiti. E ‵teke ne te Atua olotou tapuakiga kae ka fakamasino ne ia a latou e ‵tusa mo olotou amioga.—Mala. 2:13-16; Epe. 13:4.

12. Se a te uiga ke “takalialia ki mea ma‵sei”?

¹² E manako a Ieova ko tatou ke “takalia‵lia ki mea ma‵sei.” (Loma 12:9) A te pati “takalialia” e fakamatala mai i ei a te ma‵losi o lagonaga ki se mea; e fakauiga i ei ke takainoino ki se mea, ke kilo fakatakalialia ki ei. Mafaufau ki ou lagonaga māfai ko tuku atu se tifa e ‵fonu i mea‵kai ma‵sei ke kai koe i ei. A te mafaufau fua ki ei e fai ei ke taitailua koe. I se auala tai ‵pau, a te mafaufau ke fai fua se mea telā e fai mai a Ieova me e masei e ‵tau o fai pelā me se mea fakatakalialia ki a tatou.

13. Kaia e ‵tau ei mo tatou o puipui ‵tou mafaufauga?

¹³ Puipui ou mafaufauga. A ‵tou faifaiga e fakamalosi aka ne ‵tou mafaufauga. Tenā te pogai ne akoako mai a Iesu ke ‵teke ne tatou a mafaufauga kolā e mafai o iku atu ki te faiga o se agasala matagā. (Mata. 5:21, 22, 28, 29) E ma‵nako tatou ke fakafiafia te ‵tou Tamana faka-te-lagi, ne? Tela la, se mea tāua eiloa ke ‵teke fakavave ne tatou so se mafaufauga masei e sae aka i ‵tou mafaufau!

14. Se a te mea e fakaasi mai i ‵tou pati, kae ne a fesili e ‵tau o tali aka ne tatou?

¹⁴ Mafaufau faka‵lei ki au pati. Ne fai mai a Iesu: “So se mea telā e vau ki tua mai te gutu e vau ‵tonu eiloa mai te loto.” (Mata. 15:18) E tonu, e fakaasi faka‵lei mai i ‵tou pati a mea i ‵tou loto. Tela la, ke fesili ifo penei: ‘E mata, ka se loi eiloa au, faitalia me e mafai o tupu se fakalavelave ki a au māfai ko faipati ‵tonu atu? E pelā me se tino avaga, e mata, ka fakaeteete au ke mo a ma fakaasi atu a lagonaga fia‵fai ki te suā tino? E mata, e ‵kalo katoatoa keatea au mai i pati ma‵sei? E mata, e tali atu au i se auala filemu māfai ko fai ne se tino ke kaitaua au?’ Ka aoga eiloa ke mafau‵fau faka‵lei ki fesili konā. E mafai o fakatusa au pati ki sokoga i se gatu.  Kafai e taumafai malosi koe ke se fakaaoga a pati ‵mafa, loi, kae ma‵sei i au sau‵talaga mo nisi tino, ka faigofie foki ki a koe ke ‵pei keatea a uiga mua.

15. Se a te uiga ke ‵tuki a ‵tou uiga mua ki luga “i te pou”?

¹⁵ Ke loto fiafia o fai so se mea e manakogina. Ne fakaaoga ne te apositolo ko Paulo se fakatusaga aoga ke akoako mai ei ki a tatou a te tāua ke ‵fuli ‵tou olaga. Ne tusi mai a ia me e ‵tau mo tatou o “‵tuki a uiga mua ki luga i te pou.” (Loma 6:6) I nisi tugapati, e ma‵nako tatou ke fakaakoako ki te Keliso. E ‵tau mo tatou o tapale keatea a kilokiloga mo faifaiga kolā e takalialia ki ei a Ieova. Kafai e fai fua ne tatou a mea konei, ka maua ei ne tatou se loto lagona ‵ma mo te fakamoemoega ke ola ki te se-gata-mai. (Ioa. 17:3; 1 Pe. 3:21) Masaua la, me ka se ‵fuli ne Ieova ana tulaga ke fetaui mo ‵tou manakoga. I lō te fai penā, e ‵tau o ‵fuli tatou kae fakafetaui aka ‵tou olaga ki ana tulaga.—Isa. 1:16-18; 55:9.

16. Kaia e ‵tau o fakaiku ne koe ke tumau i te ‵teke atu ki manakoga ma‵sei?

¹⁶ Tumau i te ‵teke atu ki manakoga ma‵sei. Kafai foki loa ko oti koe ne papatiso, e ‵tau o tumau koe i te ‵teke atu ki manakoga ma‵sei. Onoono ki te tala o Maurício. I te taimi koi foliki ei, ne aofia a ia i amioga fakasotoma. Fakamuli ifo, ne fetaui a ia mo tino o Ieova kae kamata o sukesuke ki te Tusi Tapu. I te otiga ne ‵fuli tena olaga, ne papatiso a ia i te 2002. Faitalia me ko leva nei ne tavini atu a ia ki a Ieova i te fia o tausaga, ne fai mai a Maurício: “E fai ‵tonu atu au me ne faigata ‵ki ke ‵teke sāle ki manakoga sē ‵lei i nisi taimi.” Ne seki talia ne ia te mea tenei ke fakavāivāi atu ki a ia. I lō te fai penā, ne fai mai a ia: “E maua ne au te loto malosi i te iloa atu me kafai e filifili ne au ke se fai penā, ko fakafiafia eiloa ne au a Ieova.” *

17. Ne a mea fakamalosi loto ne maua ne koe mai te tala o Nabiha?

¹⁷ ‵Talo mō te fesoasoani o Ieova, kae fakalagolago ki tena agaga, e se ki tou malosi. (Kala. 5:22; Fili. 4:6) E ‵tau o ga‵lue malosi tatou māfai e ma‵nako ke ‵pei katoatoa keatea a uiga mua. Mafaufau ki te tala o Nabiha. Ne tiaki ne tena tamana a tou fafine i te taimi ko ono fua ei ana tausaga. “Ne logo‵mae malosi oku lagonaga i ei,” ko ana pati. I tena tupuakaga, ne gasolo aka o uiga kaitaua kae fakasaua a Nabiha. Ne aofia a ia i te fakatauatuga o  vailakau tapu, ne puke fakapagota kae ‵pei ki te falepuipui mō nai tausaga. Ne kamata o sukesuke a ia ki te Tusi Tapu mo Molimau kolā ne asi atu ki te falepuipui. Ne kamata o fai ne Nabiha a ‵fuliga ‵lasi. “Ne faigofie ki a au ke taofi aka aku nisi faifaiga ma‵sei,” ko ana pati. “Kae ne faigata ke ‵kati taku ‵pusi.” Ne taumafai a Nabiha mō se tausaga tupu kae fakamuli ifo, ne mafai ei o ‵kati katoatoa ne ia tena ‵pusi. Ne fai pefea ne ia te mea tenā? Ne fai mai tou fafine: “A te ‵toe mea tāua, ko te ‵talo faeloa ki a Ieova ne mafai ei ne au o ‵kati taku ‵pusi.” Ko fai atu nei a ia ki nisi tino: “E loto talitonu au me kafai ne mafai ne au o fai a ‵fuliga ke fakafiafia a Ieova, e mafai foki ne so se tino o fai penā!” *

18. E ‵tusa mo te 1 Kolinito 6:9-11, ne a mea ne mafai o fai ne tavini e tokouke a te Atua?

¹⁸ I te senitenali muamua, a nisi tāgata mo fāfine kolā ne filifili ne Ieova ke pule fakatasi mo Keliso, ne aofia foki latou muamua i faifaiga ma‵sei. E pelā mo te mulilua, amioga fakasotoma, mo te kaisoa. Mai te fesoasoani o te agaga tapu o te Atua, ne mafai ei o ‵fuli ne latou olotou uiga. (Faitau te 1 Kolinito 6:9-11.) I se auala tai ‵pau, ko oti ne fesoasoani atu a te Tusi Tapu ki te fia miliona o tino i aso nei ke ‵fuli olotou olaga. * Ko oti ne manumalo latou i faifaiga ma‵sei kolā ne faigata o tiaki ne latou. E fakamaoni mai i olotou tala me e mafai foki ne koe o ‵fuli ou uiga kae manumalo i faifaiga masani ma‵sei ko te mea ke fetaui ‵lei koe mō te papatisoga.

19. Ne a mea ka fakamatala mai i te suā mataupu?

¹⁹ I tafa o te galue malosi ke ‵pei keatea a uiga mua, e ‵tau mo tino fia papatiso o taumafai malosi ke fakapei ki luga i a latou a uiga ‵fou. Ka fakamatala mai i te suā mataupu a te auala e mafai ne tatou o fai penā mo te auala e mafai ei o fesoasoani mai a nisi tino.