1. Se a te mea e fakamalosi aka ei a ‵tou uiga?

 FAITALIA me ko oti ne papatiso tatou mō nai aso fua io me se fia sefulu tausaga, e ma‵nako tatou ke maua a uiga kolā e fiafia a Ieova ki ei. Ko te mea ke fai penā, e ‵tau o pule faka‵lei atu tatou ki ‵tou mafaufauga. Kaia? Me i uiga o tatou e fakamalosi aka ne ‵tou mafaufauga. Kafai e mafau‵fau faeloa tatou ki mea kolā e fia‵fia ki ei tatou, ka fai eiloa ne tatou a pati mo mea ma‵sei. (Efe. 4:17-19) I te suā feitu, kafai e faka‵fonu ne tatou a ‵tou mafaufau ki mafaufauga ‵lei, ka fai‵pati kae fai eiloa ne tatou a mea kolā e fakafiafia atu ki te ‵tou Tamana, ko Ieova.—Kala. 5:16.

2. Ne a fesili ka mafau‵fau tatou ki ei i te mataupu tenei?

² E pelā mo te mea ne fakaasi mai i te mataupu mai mua, e se mafai o fakagata ne tatou a mafaufauga ma‵sei katoa. Kae e mafai o fakaiku aka ne tatou ke se gasue‵sue e ‵tusa mo mafaufauga konā. A koi tuai o papatiso tatou, e ‵tau o fakagata te faipati kae fai a mea kolā e takalialia ki ei a Ieova. Tenā te mea tāua muamua e ‵tau o fai ke ‵pei keatea a uiga mua. Kae ke fakafiafia katoatoa ne tatou a Ieova, e ‵tau foki o faka‵logo tatou ki te fakatonuga tenei: “Fakapei ki luga i a koutou a uiga ‵fou.” (Kolose 3:10) I te mataupu tenei, ka tali aka ne tatou a fesili konei: Ne a “uiga ‵fou”? E mafai pefea o fakapei ki luga i a tatou a uiga ‵fou kae ke mo a ma toe tapale keatea?

3. E pelā mo te Kalatia 5:22, 23, ne a “uiga ‵fou,” kae pei pefea se tino ki ei?

³ “A uiga ‵fou” ko te fakaakoako atu ki a Ieova i te auala e mafaufau kae gasuesue ei se tino. E pei se tino ki uiga ‵fou, mai te fakaasi atu o fuataga o te agaga o te Atua, kae talia ke  fakamalosi aka ne te agaga tapu ana mafaufauga, lagonaga, mo faifaiga. (Faitau te Kalatia 5:22, 23.) E pelā eiloa mo te alofa o se tino ki a Ieova mo Ana tino. (Mata. 22:36-39) E tumau a te tino tenā i te fiafia faitalia tena fakafesagai atu ki tulaga faiga‵ta. (Iako. 1:2-4) A ia se tino tausi te filemu. (Mata. 5:9) E kufaki kae atafai a ia i ana faifaiga ki nisi tino. (Kolose 3:13) E fiafia ki te mea ‵lei kae fai ne ia. (Luka 6:35) E fakamaoni mai ne ia i ana faifaiga me e malosi tena fakatuanaki ki tena Tamana faka-te-lagi. (Iako. 2:18) E tumau i te agamalu māfai ko fai ne se tino ke kaitaua a ia kae loto pulea foki māfai ko tofotofogina.—1 Koli. 9:25, 27; Tito 3:2.

4. Ke pei ki uiga ‵fou, e mata, e mafai fua o ati aka ne tatou i taimi kese‵kese a uiga takitasi i te Kalatia 5:22, 23? Fakamatala mai.

⁴ Ke pei ki uiga ‵fou, e ‵tau mo tatou o ati aka a uiga katoa i te Kalatia 5:22, 23 mo nisi tusi fai‵tau i te Tusi Tapu. * E se fai a uiga konei e pelā mo gatu kese‵kese kolā e mafai o ‵pei ki ei i taimi kese‵kese. A te ‵tonuga loa, e maua a nisi vaega o uiga konei i nisi uiga. E pelā mo te mea tenei, kafai e alofa tonu koe ki tou tuakoi, ka kufaki kae atafai koe ki a ia. Kae ke fakaasi ‵tonu atu a tou ‵lei, e ‵tau mo koe o agamalu kae loto pulea.

5. Se a te uiga ke “maua ne tatou a te mafaufau o Keliso,” kae kaia e ‵tau o suke‵suke tatou ki te olaga o Iesu? (1 Kolinito 2:16)

⁵ Faitau te 1 Kolinito 2:16. Ke ‵pei tatou ki uiga ‵fou, e ‵tau o maua ne tatou a “te mafaufau o Keliso.” I nisi tugapati, e ‵tau o tauloto tatou ki te auala e mafaufau ei a Iesu, ko fakaakoako ei ki a ia. Ne fakaasi mai ne Iesu i se auala ‵lei katoatoa a fuataga o te agaga o te Atua. E pelā me se kilo ‵lei katoatoa, ne fakaasi ‵tonu mai eiloa ne ia a uiga o Ieova. (Epe. 1:3) Ko te lasi o te mafau‵fau o tatou e pelā mo Iesu, ko te ‵pau foki o ‵tou faifaiga, kae ka faigofie foki ke fakaasi atu ne tatou ana uiga.—Fili. 2:5.

6. Ne a manatu ‵tonu e ‵tau o masaua ne tatou māfai ko taumafai o ‵pei ki uiga ‵fou?

⁶ E mata, e mafai eiloa o fakaakoako tatou ki a Iesu? Kāti ka mafau‵fau ifo tatou: ‘A Iesu e ‵lei katoatoa. Ka se mafai eiloa o ‵pau au mo ia!’ Kafai e penā eiloa ou lagonaga, ke masaua a manatu ‵tonu konei. Muamua, ne faite koe ke fai pelā mo Ieova mo Iesu. Tela la, e mafai o  fakaiku aka ne koe ke fakaakoako ki a lāua, kae e mafai eiloa o tai ‵pau koe mo lāua. (Kene. 1:26) A te lua, a te agaga tapu o te Atua, ko te ‵toe ‵mana malosi eiloa i te iunivesi. Ona ko tena fesoasoani, ka mafai ei ne koe o fakataunu a mea kolā e se mafai o fai ne koe i tou malosi eiloa. A te tolu, e se fakamoemoe a Ieova ke fakaasi atu nei ne koe a fuataga o te agaga i se auala ‵lei katoatoa. A te ‵tonuga loa, ne fakatoka ne te ‵tou Tamana alofa a te 1,000 tausaga mō latou kolā e fakamoe‵moe ki te lalolagi ke gasolo atu ki te tulaga ‵lei katoatoa. (Faka. 20:1-3) E manako fua a Ieova ke fai ne tatou te ‵toe mea e mafai o fai i te taimi nei kae fakalago‵lago ki tena fesoasoani.

7. Ne a mea ka mafau‵fau nei tatou ki ei?

⁷ E mafai pefea o fakaakoako faka‵lei atu tatou ki a Iesu? Ka mafau‵fau malie tatou ki vaega e fa o fuataga o te agaga o te Atua. I vaega takitasi konā, ka onoono tatou ki mea aoga mai te auala ne fakaasi atu ne Iesu a uiga konā. Kae ka mafau‵fau foki tatou ki nisi fesili kolā ka fesoasoani mai ke iloilo aka ei a te ‵lei o tatou i te ‵pei ki uiga ‵fou.

8. Ne fakaasi mai pefea ne Iesu te alofa?

⁸ Ona ko te lasi o te alofa o Iesu ki a Ieova, ne fai ei ne ia a mea e fakafiafia ki tena Tamana kae aoga ki a tatou, faitalia te faiga‵ta. (Ioa. 14:31; 15:13) Ne fakamaoni mai ne Iesu a te lasi o tena alofa mō tino i te auala ne ola ei a ia i te lalolagi. I aso takitasi, ne alofa kae alofa atafai a ia, faitalia me ne ‵teke atu foki a nisi tino ki a ia. A te auala tāua e tasi ne fakaasi atu tena alofa ki tino, ko te akoako atu o latou e uiga ki te Malo o te Atua. (Luka 4:43, 44) Ne fakaasi atu foki ne Iesu tena alofa sē fakapito ki te Atua mo tino mai te lotomalie ke logo‵mae kae tamate foki a ia ne tino agasala. Tenā ne ‵tala mai i ei ne ia te auala ke maua ne tatou katoa a te ola se-gata-mai.

9. E fakaakoako pefea tatou ki a Iesu i te fakaasiatuga o te alofa?

⁹ Ne fai ‵tou tukuatuga ki a Ieova kae papatiso ona ko te ‵tou a‵lofa ki te ‵tou Tamana faka-te-lagi. Tela la, e pelā mo Iesu, e ‵tau mo tatou o fakaasi atu te alofa ki a Ieova e auala i ‵tou faifaiga ki nisi tino. Ne tusi mai te apositolo ko Ioane: “A te tino telā e se alofa ki tena taina, telā ko oti ne matea ne ia, e se mafai o alofa ki te Atua, telā e seki matea ne ia.” (1 Ioa. 4:20) E mafai o fesili ifo tatou: ‘E mata, ko oti ne ati aka ne au a toku alofa ki nisi tino? E mata, e alofa atafai au i aku faifaiga ki nisi tino, faitalia me se āva mai latou ki a au? E mata, e fakamalosi aka au ne te alofa ke fakaaoga oku taimi mo oku kope ke fesoasoani atu ki nisi tino ke iloa ne latou a Ieova? E mata, e loto fiafia au o fai te mea tenei faitalia me e se fakaasi mai ne te tokoukega o tino a te loto fakafetai ki aku taumafaiga io me ‵teke mai latou ki a au? E mata, e ‵sala au ki auala ke mafai o uke atu oku taimi e fakamāumāu ki te galuega ko te faiga o soko?’—Efe. 5:15, 16.

10. I te auala fea ne fai a Iesu mo tino tausi te filemu?

¹⁰ A Iesu se tino tausi te filemu. Kafai ne fai fakamasei a ia ne tino, ne seki taui atu ne ia te masei ki te masei. Kae ne uke atu ana mea ne fai. Ne gasue muamua a ia o tausi te filemu kae fakamalosi a nisi tino ke fakatoka faka‵lei olotou fakalavelave. E pelā mo te mea tenei, ne akoako atu a ia me e ‵tau o maua ne latou se va filemu mo olotou taina māfai e ma‵nako ke talia ne Ieova te lotou tapuakiga. (Mata. 5:9, 23, 24) Kae ne fesoasoani atu faeloa a ia ki te kau apositolo ke fakatoka faka‵lei te lotou kinauga e uiga ki te ‵toe tino sili i a latou.—Luka 9:46-48; 22:24-27.

11. E fai pefea tatou mo tino tausi te filemu?

¹¹ Ke fai mo tino tausi te filemu, e uke a mea e ‵tau o fai ne tatou i lō te ‵kalo keatea fua mai te faka‵tupu fakalavelave. E ‵tau o ga‵sue  muamua tatou ke maua se va filemu mo nisi tino kae fakamalosi a ‵tou taina mo tuagane ke fakatoka faka‵lei foki olotou fakalavelave. (Fili. 4:2, 3; Iako. 3:17, 18) E mafai o fesili ifo tatou, penei: ‘Ne a mea faiga‵ta e loto fiafia au o fai ke maua se va filemu mo nisi tino? Kafai ko fakalogo‵mae au ne se taina io me se tuagane, e mata, ka ita fakamoemoe au? E mata, ka faka‵tali au ki te suā tino ke gasue muamua o fakatoka se va filemu io me ka gasue mua au faitalia me ne māfua mai i te tino tenā a te fakalavelave? Kafai e ‵lei, e mata, e fakamalosi atu au ki tino kolā e isi se lotou va sē ‵lei mo nisi tino, ke fakatoka faka‵lei olotou fakalavelave?’

12. Ne fakaasi atu pefea ne Iesu a te atafai?

¹² Ne uiga atafai a Iesu. (Mata. 11:28-30) Ne uiga atafai a ia mai te fakaasi atu o uiga agamalu mo uiga faigofie faitalia te faiga‵ta o ana fakanofonofoga. E pelā mo te taimi ne fakamolemole atu se fafine Foinikia ke faka‵lei aka tena tama, ne seki talia muamua ne ia tena fakamolemole, kae i te fakaasiatuga ne tou fafine a te lasi o tena fakatuanaki, ne faka‵lei eiloa ne Iesu mo te atafai a tena tama. (Mata. 15:22-28) E tiga eiloa ne uiga atafai a ia, kae ne seki fakaasi atu ne Iesu a te alofa valea. I nisi taimi, ne fakaasi atu ne ia a te atafai mai te faipati ‵tonu atu ki tino kolā ne alofa a ia ki ei. E pelā mo te taimi ne taumafai a Petelu o faka‵tuka a Iesu mai te faiga o te loto o Ieova, ne ‵liko ne Iesu a ia i mua o nisi soko. (Male. 8:32, 33) Ne seki fai ne ia te mea tenei ke fakamasiasi ei a Petelu kae ke akoako a ia kae fakailoa atu foki ki nisi soko ke mo a ma uiga fakamata‵mata latou. Kāti ne mavale a Petelu, kae ne aoga eiloa ki a ia a te polopolokiga tenā.

13. E fakaasi atu pefea ne tatou a te atafai tonu?

¹³ Ke fakaasi atu te atafai tonu ki a latou kolā e alofa koe ki ei, kāti e ‵tau o faipati ‵tonu atu koe ki a latou i nisi taimi. Kafai e fai koe penā, fakaakoako ki a Iesu mai te fakavae o au pati fakatonutonu ki akoakoga fakavae e maua i te Muna a te Atua. Ke uiga agamalu. Mafaufau me e ma‵nako latou o fai te mea tonu, kae talitonu me i a latou kolā e a‵lofa ki a Ieova mo koe, ka talia ne latou au pati fakatonutonu atafai. Ke fesili ifo penei: ‘E mata, e loto malosi au o faipati ‵tonu ki se tino telā e alofa au ki ei māfai ko fai ne ia se mea ‵se? Kafai e manakogina ke tuku atu ne au a pati fakatonutonu, e mata, ka faipati atu au mo te atafai io me ka faipati kaitaua atu au? Se a te pogai e tuku atu ei ne au a pati fakatonutonu? E mata, e fai atu ne au ona ko toku kaitaua io me ko te manavase tonu ki a ia?’

14. Ne fakaasi atu pefea ne Iesu a te aga‵lei?

¹⁴ E iloa kae fai foki ne Iesu a te mea ‵lei. E alofa a Iesu ki tena Tamana, tela la, e fai faeloa ne ia a te mea tonu mō te pogai tonu. E mafai o lavea faka‵lei a te aoga o te aga‵lei me e fakamalosi atu i ei ki nisi tino. Se uiga aoga telā e mafai o fakaasi atu ne tatou mai te faiga o galuega fesoasoani. E se lava fua ke iloa atu a te mea tonu e ‵tau o fai; e ‵tau o fai ne tatou a te mea tonu mō te pogai tonu. Kāti ka fesili ifo se tino, ‘E mata, e mafai o fai a te mea tonu mō se pogai ‵se?’ Ao, e mafai. E pelā mo te taimi ne faipati atu a Iesu ki tino kolā ne tuku atu olotou meaalofa ki tino ma‵tiva kae fakamautinoa aka ke iloa ne nisi tino olotou meaalofa konā. E tiga eiloa e foliga ‵lei mai a galuega konā, kae se tāua ki a Ieova.—Mata. 6:1-4.

15. E fakaasi faka‵lei atu pefea ne tatou a te aga‵lei?

¹⁵ E mafai fua o fakaasi faka‵lei atu ne tatou a te aga‵lei māfai e fai ne tatou a te mea tonu e aunoa mo se uiga kaimanako. Tela la, e mafai o fesili ifo koe penei: ‘E mata, e iloa ne au a te mea tonu e ‵tau o fai, kae fai foki ne au? Se a te pogai e fai ei ne au a mea ‵lei?’

16. Ne a mea e ‵tau o fai ne tatou i aso takitasi, kae kaia?

¹⁶ Ke mo a ma fakaiku aka ne tatou me i te galuega ki te fakapeiga o uiga ‵fou e gata fua i te taimi e papatiso ei. E ‵tau o tausi faka‵lei ne tatou a ‵tou “gatu ‵fou” ke tumau i te ‵lei. E tasi te auala ke fai penā, ko te ‵sala ki auala ke fakaasi atu a fuataga o te agaga o te Atua i aso takitasi. Kaia? Me i a Ieova se Atua fai mea mafai, kae ko tena agaga ko tena malosi galue. (Kene. 1:2) Tela la, a vaega takitasi o fuataga o te agaga, e mafai o fakamalosi aka ei tatou ke gasue‵sue malosi. E pelā mo mea ne tusi mai ne te soko ko Iakopo: “Te fakatuanaki e mate māfai e seai ne galuega.” (Iako. 2:26) E penā foki a nisi vaega katoa o fuataga o te agaga o te Atua. I so se taimi e fakaasi atu ne tatou, e fakamaoni atu ei a te malosi o te agaga o te Atua i a tatou.

17. Ne a mea e ‵tau o fai ne tatou māfai ne fakatamala o fakaasi atu a fuataga o te agaga?

¹⁷ Ne fakata‵mala foki a nisi Kelisiano kolā ko leva ne papatiso o fakaasi atu a fuataga o te agaga. A te mea tāua, ke mo a eiloa ma ‵fiu. Mafaufau ki te fakatusaga tenei. Kafai ne masae te gatu telā e fiafia malosi koe ki ei, e mata, ka ‵pei eiloa ne koe keatea i te taimi tenā? Ikai. Kāti ka taumafai koe o ‵sui faka‵lei a te koga telā ne masae. Kae ka sili fakamuli ifo tou fakaeteete. E penā foki, kafai ne fakatamala koe o fakaasi atu te atafai, te kufaki io me ko te alofa ki se tino, ke mo a ma loto vāivāi koe. A te fakatoese atu mo te loto kātoa e mafai o faka‵lei ei a te fakalavelave kae ke maua foki ne koulua se fesokotakiga ‵lei. Kae ke toe taumafai koe ki ei i aso mai mua.

18. Se a te mea e mafai o mautinoa i a tatou?

¹⁸ E loto fakafetai eiloa tatou ki te fakaakoakoga ne tuku mai ne Iesu! Ko te lasi o te ‵tou fakaakoako ki ana mafaufauga mo kilokiloga, ko te faigofie foki ke fai tatou pelā mo ia. Ko te lasi o te ‵tou fai pelā mo Iesu, ko te faigofie foki o te fakapei ki luga i a tatou a uiga ‵fou. I te mataupu tenei, ne onoono fua tatou ki nisi vaega e fa o fuataga o te agaga o te Atua. Kaia e se fakaaoga ei ne koe a nisi taimi ke iloilo a nisi vaega o fuataga o te agaga kae mafaufau ‵loto ki te auala e fakaasi atu ei ne koe a uiga konā? Ka mafai o maua ne koe se fakasologa o mea e uiga ki te mataupu tenei i te Research Guide for Jehovah’s Witnesses mai lalo i te ulutala “Christian Life” mo te “Fruitage of the Spirit.” E mautinoa me kafai e fai ne koe tou tusaga, ka fesoasoani atu eiloa a Ieova ki a koe ke pei ki uiga ‵fou kae ke se toe tapale.