1-2. Ne a mea masani e ‵tupu māfai ko papatiso a tino, kae ne a mea e ‵tau o mafaufau koe ki ei?

 E MATA, kai lavea aka eiloa ne koe se potukau o tino kolā ka papatiso? E lagona ne koe i olotou leo a te loto talitonu i te taimi e tali ne latou a fesili e lua a koi tuai o papatiso. E lavea ne koe olotou kāiga mo taugasoa e fakamisi‵kata ona ko te fia‵fia. Kafai ko ‵sae aka latou mai te vai, e lagona ne koe a tino e pati‵pati olotou lima kae mata fia‵fia. I vaiaso takitasi, e lau i afe o tino e fai olotou tukuatuga kae papatiso e pelā me ne Molimau a Ieova te Atua.

² Kae pefea koe? Kafai e mafaufau koe o papatiso, ka tu ‵kese eiloa koe mai te lalolagi masei tenei kae fai pelā me se tino telā e “salasala ki a Ieova.” (Sala. 14:1, 2) Ne fakatoka fakapitoa eiloa te mataupu tenei mō koe faitalia me koi foliki io me ko matua koe. Kae e ma‵nako foki tatou kolā ko oti ne papatiso ke fakamalosi aka a te ‵tou fakaikuga ke tavini atu ki a Ieova ki te se-gata-mai. Tela la, ke na sau‵tala nei ki pogai e tolu mai te ukega o pogai e ‵tau ei o tavini tatou ki a Ieova.

3. Kaia e a‵lofa ei a tavini a Ieova ki te munatonu mo te amiotonu? (Salamo 119:128, 163)

³ Ne fakatonu atu a Ieova ki ana tino ke a‵lofa io me ke “fia‵fia ki te mea tonu.” (Saka. 8:19) Ne fakamalosi atu a Iesu ki ana soko ke kausaki atu ki te amiotonu. (Mata. 5:6) Ko tena uiga, e ‵tau o ati aka ne te tino a te manakoga ke fai te mea tonu, ‵lei kae ‵ma i te kilokiloga a te Atua. E a, e alofa koe ki te munatonu mo te amiotonu? E tali‵tonu matou me e alofa eiloa koe ki ei. E takalialia koe ki loi mo mea ‵se kae ma‵sei. (Faitau te Salamo 119:128, 163.) A te loi e fakaata mai ne ia a uiga o Satani, te pule o te lalolagi tenei. (Ioa. 8:44; 12:31) Tasi o fakamoemoega o Satani  ke fakamasei ne ia te igoa tapu o Ieova te Atua. Ko oti ne fakasalalau atu ne Satani a loi e uiga ki te ‵tou Atua talu mai te ‵tekeatuga i Etena. Ne taumafai a ia o fai a tino ke mafau‵fau i a Ieova se Pule kaimanako kae sē fakamaoni, telā e taofi ne ia a mea ‵lei mai tino. (Kene. 3:1, 4, 5) A loi a Satani e uiga ki a Ieova koi tumau eiloa i te fakapoisini ne ia a mafaufau mo loto o tino. Kafai e filifili aka ne tino ke sē a‵lofa io me “fia‵fia ki te mea tonu,” e mafai o takitaki ne Satani a latou ki so se faifaiga masei kae sē amiotonu.—Loma 1:25-31.

4. Ne fakamaoni mai pefea i a Ieova ko “te Atua o te munatonu”? (Onoono foki ki te ata.)

⁴ A Ieova ko “te Atua o te munatonu,” kae e akoako ne ia mo te kaimalie a te munatonu ki a latou kolā e a‵lofa ki a ia. (Sala. 31:5) Mai te fai penā, e fesoasoani atu a ia mai te fakasaoloto latou mai loi a Satani. E akoako foki ne Ieova ana tavini ke fakamaoni kae amio‵tonu. E fesoasoani atu te mea tenā ke maua ne latou se tulaga fakaaloalogina mo te filemu o te mafaufau. (Faata. 13:5, 6) E mata, ne fai ne ia te mea tenā ki a koe i tau sukesukega ki te Tusi Tapu? Ne tauloto koe me i auala o Ieova ko te ‵toe mea ‵lei ki tino katoa penā foki ki a koe. (Sala. 77:13) Tela la, e manako koe o ‵lago atu ki te amiotonu o te Atua. (Mata. 6:33) E manako koe o ‵pulu te munatonu kae fesoasoani ke fakamaoni atu ei a te sē ‵tonu o pati fakamasei e uiga ki te ‵tou Atua ko Ieova. E fai pefea ne koe te mea tenā?

5. E puke ‵mau pefea koe ki te munatonu mo te amiotonu?

⁵ E mafai o filifili ne koe se vaegā olaga mai te fai atu penei: “E ‵teke ne au a loi o Satani kae puke ‵mau ki te munatonu. Au e manako ke fai a Ieova mo fai toku Pule, kae ke fai ne au a mea kolā e fai mai a ia me e ‵tonu.” E fai pefea ne koe te mea tenā? ‵Talo atu ki a Ieova kae tuku atu koe ki a ia, ko fakaasi atu ei i mua o tino katoa a tau tukuatuga tenā e auala i te papatisoga. A te alofa ki te munatonu mo te mea tonu e fakamalosi ne ia koe ke fai tau filifiliga ke papatiso.

6. Ne a pogai i te Salamo 45:4 e fai ei ke alofa koe ki a Iesu Keliso?

⁶ Kaia e alofa ei koe ki a Iesu Keliso? Onoono ki nisi pogai ‵lei e maua i te Salamo 45:4. (Faitau.) Ne puke ‵mau a Iesu ki te munatonu, te loto maulalo mo te amiotonu. Kafai e alofa koe ki te munatonu mo te amiotonu, e manino ‵lei me e alofa foki koe ki a Iesu Keliso. Mafaufau  ki te loto malosi o Iesu ke ‵pulu ne ia a te munatonu mo te mea tonu. (Ioa. 18:37) Kae e fakamalosi aka pefea ne Iesu a te loto maulalo?

7. Kaia e gali ei ki a koe a te loto maulalo o Iesu?

⁷ E fakamalosi ne Iesu a te loto maulalo e auala i tena fakaakoakoga. E pelā mo te avatu ne ia a vikiga katoa ki tena Tamana kae e se ki a ia. (Male. 10:17, 18; Ioa. 5:19) E pefea ou lagonaga e uiga ki te vaegā loto maulalo tenā? E mata, e se fakamalosi ne ia koe ke alofa ki te Tama a te Atua kae tautali atu ki a ia? E mautinoa eiloa me ka fakamalosi atu ki a koe. Kaia e loto maulalo ei a Iesu? Me e alofa kae fakaakoako a ia ki tena Tamana telā e loto maulalo. (Sala. 18:35; Epe. 1:3) E a, e se fia fakaakoako koe ki a Iesu telā e fakaata mai ne ia a uiga o tena Tamana i se auala ‵lei katoatoa?

8. Kaia e a‵lofa ei tatou ki a Iesu e pelā me ko te ‵tou Tupu?

⁸ E a‵lofa tatou ki a Iesu e pelā me ko te ‵tou Tupu me i a ia ko te ‵toe Pule ‵lei. Ne akoako eiloa ne Ieova a tena Tama kae ‵tofi aka a ia ke pule mai. (Isa. 50:4, 5) Mafaufau foki ki te alofa sē fakapito telā ne fakaasi mai ne Iesu. (Ioa. 13:1) E pelā me ko tou Tupu, e ‵tau eiloa o katoatoa tou alofa ki a Iesu. Ne fakamatala mai ne ia me i a latou kolā e a‵lofa tonu ki a ia—latou kolā e taku ne ia ko ana taugasoa—e fakaasi atu te lotou a‵lofa mai te faka‵logo ki ana fakatonuga. (Ioa. 14:15; 15:14, 15) Se tauliaga eiloa ke fai mo taugasoa o te Tama a Ieova!

9. I te auala fea e tai ‵pau ei te papatisoga a Kelisiano mo te papatisoga a Keliso?

⁹ Tasi o fakatonuga a Iesu ko ana soko ke papatiso. (Mata. 28:19, 20) Ne tuku mai ne ia se fakaakoakoga. E tai ‵kese tena papatisoga mo te papatisoga o ana soko. (Onoono ki te pokisi “ Te Papatisoga a Iesu mo te Papatisoga a Ana Soko—Te Auala e ‵Kese i ei.”) Kae e ‵pau loa i nisi feitu. I tena papatisoga, ne tuku atu ne Iesu a ia eiloa ke fai te loto o tena Tamana. (Epe. 10:7) I se auala tai ‵pau, e papatiso a soko o Keliso ke fakaasi atu ei me ko oti ne tukugina atu latou ki a Ieova te Atua. A te ‵toe mea tāua i olotou olaga i te taimi nei, ko te faiga o te loto o Atua kae e se ko olotou loto. Tela la, ko tau‵tali latou i te fakaakoakoga a te lotou Matai.

10. Kaia e fakamalosi aka ei koe ne te alofa ki a Iesu ke papatiso?

¹⁰ E talia ne koe a Iesu e pelā me ko te Tama tokotasi eiloa a Ieova mo te Tupu ne filifili ne te Atua ke pule mai ki a tatou. E kilo atu koe ki a Iesu e pelā me se fakaakoakoga ‵lei katoatoa o te loto maulalo o tena Tamana. Ne tauloto koe me ne fagai ne ia a tino fia‵kai, fakamafanafana atu a tino loto vāi‵vai, kae faka‵lei foki ne ia a masaki. (Mata. 14:14-21) Ko lavea nei ne koe a te auala e takitaki ei ne ia a tena fakapotopotoga i aso nei. (Mata. 23:10) Kae e iloa ne koe me ka uke atu a mea ka fai ne ia i aso mai mua e pelā me ko te Tupu i te Malo o te Atua. E fakaasi atu pefea ne koe a te alofa ki a ia? Mai te tautali i tena fakaakoakoga. (Ioa. 14:21) Tasi o mea e mafai ne koe o fai ke tautali atu i tena fakaakoakoga, ko te tuku atu o tou ola ki a Ieova kae papatiso.

11. Se a te ‵toe pogai tāua e papatiso ei se tino, kae kaia e tāua ei ke fai penā?

¹¹ Se a te ‵toe pogai tāua e papatiso ei se tino? Ne fakaasi mai ne Iesu a te ‵toe fakatonuga sili a te Atua i ana pati: “E ‵tau mo koe o alofa ki a Ieova tou Atua mo tou loto kātoa mo tou ola kātoa mo tou mafaufau kātoa mo tou malosi kātoa.” (Male. 12:30) E mata, e fakamatala atu i pati konā a tou alofa ki te Atua?

12. Kaia e alofa ei koe ki a Ieova? (Onoono foki ki te ata.)

¹² E uke ‵ki a pogai ke a‵lofa ki a Ieova. E pelā me se fakaakoakoga, ko kamata o malamalama koe me i a ia ko “te pogai o te ola” mo te Tino telā e tuku mai ne ia a “meaalofa ‵lei katoa mo  mea ‵lei katoatoa.” (Sala. 36:9; Iako. 1:17) A mea ‵lei katoa kolā e maua ne koe e aumai mai te ‵tou Atua kaimalie kae alofa.

13. Kaia e fai ei te togiola e pelā me se meaalofa gali?

¹³ A te togiola se meaalofa gali ne tuku mai ne Ieova ki a tatou. Kaia e fai atu ei tatou penā? Mafaufau ki te fesokotakiga i te va o Ieova mo tena Tama. Ne fai mai a Iesu: “E alofa mai . . . te Tamana ki a au” kae ko “Au e alofa ki te Tamana.” (Ioa. 10:17; 14:31) Ne gasolo aka eiloa o malosi a te fesokotakiga o lāua i se fia piliona tausaga. (Faata. 8:22, 23, 30) Mafaufau la ki te logo‵mae o te Atua ke talia ne ia tena Tama ke logo‵mae kae ke mate. E alofa malosi a Ieova ki tino katoa—aofia ei koe—ko ala ei o loto fiafia a ia o tuku mai tena Tama fagasele e pelā me se taulaga ke mafai o maua ne koe mo nisi tino a te ola se-gata-mai. (Ioa. 3:16; Kala. 2:20) Tenei eiloa te ‵toe pogai sili ke a‵lofa tatou ki te Atua.

14. Se a te ‵toe fakamoemoega ‵lei i te olaga e mafai o filifili ne koe?

¹⁴ Ka gasolo aka eiloa o lasi tou alofa ki a Ieova i te taimi e tauloto ei koe ki mea e uke e uiga ki a ia. E mautinoa eiloa me e manako koe o fakapilipili malosi atu ki a ia i te taimi nei ke oko ki te se-gata-mai. Kae e mafai eiloa koe o fai penā. E fakamalosi mai a ia mo te atafai ke fakafiafia ne koe a tena loto. (Faata. 23:15, 16) E mafai o fai koe penā e auala i au pati mo faiga. Ka fakaasi atu i te auala e ola ei koe  me e alofa tonu koe ki a Ieova. (1 Ioa. 5:3) Tenā eiloa te ‵toe fakamoemoega ‵lei i te olaga e mafai o filifili ne koe.

15. E mafai pefea o fakaasi atu tou alofa ki a Ieova?

¹⁵ E mafai pefea o fakaasi atu tou alofa ki a Ieova? Muamua la, mai te fai atu o se ‵talo fakapito ke tuku atu ei koe ki te Atua tonu e tokotasi. (Sala. 40:8) Ka oti, ko fakaasi atu ei ne koe tau tukuatuga tenā ki tino katoa mai te papatiso. E pelā mo te mea ne sau‵tala tatou ki ei i te mataupu tenei, e fai eiloa te mea tenā e pelā me se ‵fuliga gali kae fakafiafia i tou olaga. Ko kamata o se ola koe mō koe eiloa, kae mō Ieova. (Loma 14:8; 1 Pe. 4:1, 2) Kāti e foliga mai te mea tenā e pelā me se fakaikuga lasi ‵ki, kae e tonu eiloa. Kae e ‵tala mai i ei a te auala ki te ‵toe olaga ‵lei. I te auala fea?

16. E pelā mo te manatu i te Salamo 41:12, ka fakamanuia pefea ne Ieova a latou kolā e tuku katoatoa atu olotou ola ke tavini ki a ia?

¹⁶ A Ieova ko te ‵toe Tino kaimalie eiloa. Faitalia a mea e tuku atu ne koe ki a ia, kae ka tuku mai faeloa ne ia ki a koe a mea e uke atu. (Male. 10:29, 30) Faitalia te masei o te lalolagi tenei, kae ka tuku atu ne ia te ‵toe olaga gali, fakafiafia kae fakamalie loto. Kae ko te mea tenā, ko te kamataga fua. A te olaga telā e kamata i te taimi e papatiso ei koe e se ko te gataga tenā. E mafai o tumau koe i te tavini atu ki tou Tamana pele ki te se-gata-mai. Ka gasolo aka eiloa o lasi a te alofa i te va o koe mo tou Tamana, kae ka ola eiloa koe e pelā mo ia ki te se-gata-mai.—Faitau te Salamo 41:12.

17. Se a te mea e mafai o tuku atu ne koe ki a Ieova telā e seki maua ne ia?

¹⁷ Kafai ko tuku atu tou ola ki te Atua kae papatiso, ko maua eiloa ne koe te tauliaga ke tuku atu se mea telā e tāua ‵ki ki tou Tamana. Ne tuku atu ne ia ki a koe a mea ‵lei katoa mo taimi fakafiafia kolā ne maua ne koe. Ona ko te mea tenā, e mafai o tuku atu ne koe ki te Tino ne faite ne ia te lagi mo te lalolagi se mea telā e seki maua ne ia—ko tou loto fiafia o tavini fakamaoni atu ki a ia. (Iopu 1:8; 41:11; Faata. 27:11) Tenei eiloa te ‵toe auala ‵lei ke fakaaoga ne koe ki ei a tou olaga. E seai se fakalotolotolua, me i te alofa ki a Ieova ko te ‵toe pogai sili e papatiso ei koe.

18. Ne a fesili e mafai o fesili ifo ne koe ki a koe eiloa?

¹⁸ Se a tau tali ki te fesili, E a, ka papatiso koe? Ko koe fua e mafai o tali aka ne koe. Kae se mea aoga māfai e fesili ifo koe, penei, ‘Kaia e fakatalave ei au?’ (Galu. 8:36) Ke masaua a pogai e tolu kolā ne sau‵tala tatou ki ei. Te mea muamua, e alofa koe ki te munatonu mo te amiotonu. Fesili ifo ki a koe, ‘E mata, e manako au ke ola i te taimi telā ka fai‵pati a tino katoa ki te munatonu kae fai te mea tonu?’ Te lua, e alofa koe ki a Iesu Keliso. Fesili ifo ki a koe, ‘E mata, e manako au ke fai a te Tama a te Atua mo fai toku Tupu, kae tautali atu i tena fakaakoakoga?’ Te tolu, telā ko te ‵toe mea tāua, ko te alofa ki a Ieova. Fesili ifo, ‘E mata, e manako au o fakafiafia te loto o Ieova mai te tavini atu ki a ia e pelā me ko toku Atua?’ Kafai tau tali ki fesili konā ko te ao, kaia la e se papatiso ei koe? Kaia e fakatalave ei koe?—Galu. 16:33.

19. Kaia e se ‵tau ei o fakatalave koe o papatiso? Fakamatala mai. (Ioa. 4:34)

¹⁹ Kafai e fakatalave koe o papatiso, mafaufau ki te tala fakatusa ne fakaaoga ne Iesu. (Faitau te Ioane 4:34.) Ne fakatusa ne Iesu a te faiga o te loto o tena Tamana ki mea‵kai. Kaia? A mea‵kai e aoga ki a tatou. Ne iloa ne Iesu me i mea katoa kolā e fakamolemole mai a Ieova ke fai ne tatou, e aoga mō tatou. E se manako lele a Ieova ke fai ne tatou so se mea telā ka fakalogo‵mae ei tatou. E mata, e manako a Ieova ke papatiso koe? Ao. (Galu. 2:38) Tela la, e mafai o talitonu koe me i te fakalogo ki te fakatonuga ke papatiso ka aoga ki a koe. Kafai e se fakatalave koe o kai ki toe mea‵kai ‵lei, kaia e fakatalave ei koe o papatiso?

20. Se a te mea ka sau‵tala tatou ki ei i te suā mataupu?

²⁰ Kaia e fakatalave ei koe? Kāti ka tali mai te tokoukega penei, “Au seki toka.” A te ‵tonuga loa, a te fakaikuga ke tuku atu a koe eiloa ki a Ieova kae papatiso, ko te ‵toe fakaikuga tāua eiloa e ‵tau o fai ne koe. Tela la, e manakogina se taimi mo taumafaiga ke mafaufau kae fakatoka faka‵lei. Kae kafai ko manako tonu koe o papatiso, ne a mea e mafai nei ne koe o fai ke fakatoka koe ki ei? Ka sau‵tala tatou ki te tali o te fesili tenā i te suā mataupu.