1-2. Kafai seki toka koe mō te papatisoga, kaia e se ‵tau ei o loto vāivāi koe? (Onoono ki te ata i te ‵kava.)

 KAFAI e manako koe o papatiso, ko fakatoka eiloa ne koe se fakamoemoega gali mō koe. E a, ko toka nei koe o papatiso? Kafai ko toka koe, kae ko talia foki ne te kau toeaina, sa taofi aka ne koe te avanoaga tenā. Ka maua eiloa ne koe se olaga fakamalie loto i te taviniga ki a Ieova.

² I te suā feitu, e mata, e isi se tino ne fai atu me e manakogina ke fai ne koe ne fakama‵fuliga e uke a koi tuai o papatiso? Io me fatoa iloa fua ne koe? Kafai e penā loa, sa loto vāivāi. E mafai o gasolo koe ki mua kae kausaki atu ki te lasaga tāua tenā faitalia me koi foliki io me ko matua koe.

3. Se a te fesili a te ofisa maluga mai Aitiope ki a Filipo, kae se a te fesili e mafai o sae aka? (Galuega 8:36, 38)

³ Faitau te Galuega 8:36, 38. Ne fesili atu se ofisa maluga mai Aitiope ki te tino talai ko Filipo: “E isi se pogai e se ‵tau ei au o papatiso?” Ne manako te tagata Aitiope o papatiso, kae e mata, ko toka ‵lei a ia mō te lasaga tāua tenā?

4. Ne fakaasi atu pefea ne te tagata Aitiope a tena manakoga ke tumau i te tauloto?

⁴ Ne fano te tagata Aitiope tenei “ki Ielusalema o tapuaki i ei.” (Galu. 8:27) Kāti a ia se tino telā ne ‵fuli ki te lotu Iutaia. Seai se fakalotolotolua me ne tauloto a ia e uiga ki a Ieova mai tusitusiga tapu o te Tusi Tapu i te ‵gana Epelu. Kae koi manako malosi tou tagata o tauloto ki mea e uke atu. Tela la, i te taimi ne fetaui ei a Filipo mo te ofisa tenā i te auala, ne a mea ne lavea ne Filipo e fai ne te tagata tenā? Ne faitau ki peluga tusi o tusitusiga a te pelofeta ko Isaia. (Galu. 8:28) Ko mea‵kai faka-te-agaga ma‵keke. Ne seki lotomalie fua te ofisa tenā ke tauloto  ki nāi akoakoga fakavae; ne manako faeloa a ia o tauloto ki mea e uke atu.

5. Ne fakagalue aka pefea ne te tagata Aitiope a mea ne tauloto ne ia?

⁵ A te tagata tenei se ofisa maluga a te Kanake, te tupu fafine o Aitiope; a ia e “pule i koloa katoa a te tupu.” (Galu. 8:27) Tela la, e fakalavelave a ia i tiute e uke. Kae ui ei, ne fakaavanoa ne ia se taimi ke tapuaki ki a Ieova. Ne seki lotomalie fua a ia o tauloto ki te munatonu; ne fakagalue ne ia ana mea ne tauloto. Tela la, ne faimalaga atu a ia mai Aitiope ko te mea ke tapuaki ki a Ieova i te faletapu i Ielusalema. Ne manakogina a taimi e lava mo tupe i te malaga tenā, kae ne fakamuamua eiloa ne te tagata tenei a te tapuakiga ki a Ieova i lō so se mea.

6-7. Ne momea aka pefea te lasi o te alofa o te tagata Aitiope ki a Ieova?

⁶ Ne tauloto ne te tagata Aitiope tenei a nisi muna‵tonu ‵fou kae tāua mai i a Filipo, e aofia i ei a te tulaga o Iesu e pelā me ko te Mesia. (Galu. 8:34, 35) E mautinoa eiloa me ne otia te ofisa tenei ke tauloto ki mea ne fai ne Iesu mō ia. Ne saga atu pefea a ia ki ei? Ne mafai fua o tumau a ia e pelā eiloa me se tino telā ne ‵fuli ki te lotu Iutaia. I lō te fai penā, ne gasolo aka tena alofa ki a Ieova mo tena Tama. Ne fakamalosi ne te mea tenā ke fai tena fakaikuga ke ‵fuli tena olaga kae ke papatiso e pelā me se soko o Iesu Keliso. I tena kiloatuga me ko toka te tagata tenā, papatiso ei ne Filipo a ia.

⁷ Kafai e tautali koe i te fakaakoakoga a te tagata Aitiope, e mafai eiloa o toka koe mō te papatisoga. Ka fai atu foki koe mo te loto talitonu penei, “E isi se pogai e se ‵tau ei au o papatiso?” Ke na sau‵tala nei tatou ki te auala e mafai o tautali koe i mea ne fai ne ia: Ne tumau a ia i te tauloto, fakagalue ana mea ne tauloto, kae momea aka te lasi o tena alofa ki te Atua.

8. Ne a mea e ‵tau o fai ne tatou telā e fakaasi mai i te Ioane 17:3?

⁸ Faitau te Ioane 17:3. E mata, ne fesoasoani atu a pati konei a Iesu ke fai tau fakaikuga ke sukesuke ki te Tusi Tapu? E tokouke a tino ne fai penā. Kae e mata, e fakaasi mai foki i pati konei ke tumau tatou i te tauloto? Ao. Ka se mafai eiloa o gata te ‵tou tauloto ke “iloa tonu . . . te Atua tonu e tokotasi.” (Fai. 3:11) Ka tumau eiloa tatou i te tauloto ki te se-gata-mai. Ko te uke o ‵tou mea e tauloto, ko te ‵pili malosi o tatou ki a Ieova.—Sala. 73:28.

9. Ne a mea e ‵tau o fai ne tatou māfai ko isi se tamā iloa e uiga ki te munatonu?

⁹ E manino ‵lei me i te tauloto e uiga ki a Ieova e aofia i akoakoga kamata. I tena tusi ki te kau Epelu, ne fakasino atu te apositolo ko  Paulo ki akoakoga konā e pelā me ne “akoakoga fakavae.” Ne seki kilo atu a ia ki “akoakoga kamata” e pelā me e se tāua; i lō te fai penā, ne fakatusa ne ia ki te susu telā e fainu ki ei se pepe. (Epe. 5:12; 6:1) Kae ne fakamalosi foki ne ia a Kelisiano katoa ke se tauloto fua ki akoakoga fakavae konā kae penā foki a muna‵tonu ‵loto mai te Muna a te Atua. E mata, kai ati aka ne koe se manakoga ke tauloto ki akoakoga ‵loto i te Tusi Tapu? E mata, e manako koe o gasolo ki mua, kae tumau i te tauloto e uiga ki a Ieova mo ana fuafuaga?

10. Kaia e faigata ki nisi tino ke fai a sukesukega?

¹⁰ Kae e faigata ki te tokoukega o tatou ke fai a sukesukega. E pefea ou lagonaga e uiga ki te faiga o sukesukega? I te akoga, e mata e tauloto koe ke faitau kae sukesuke faka‵lei? E mata, e kilo atu koe ki te faiga o sukesukega e pelā me se mea fakafiafia kae gali? Io me ne fakaiku aka ne koe me e se ‵lei tau tauloto mai tusi? Masaua me e se ko koe fua e mafaufau penā. Kae e mafai o fesoasoani atu a Ieova ki a koe. A ia e ‵lei katoatoa kae ko te ‵toe Faiakoga tafasili i te ‵lei.

11. E fakamaoni mai pefea ne Ieova i a ia ko te “Faiakoga Tafasili i te Maluga”?

¹¹ E taku ne Ieova a ia eiloa ki te “Faiakoga Tafasili i te Maluga.” (Isa. 30:20, 21) A ia se Faiakoga kufaki, atafai kae loto malamalama. E kilo atu a ia ki mea ‵lei i ana tino a‵koga. (Sala. 130:3) Kae e se fakamoemoe a ia ke fai ne tatou a mea e uke atu i lō mea e mafai ne tatou o fai. Masaua me ne faite ne ia tou faiai, se meaalofa gali. (Sala. 139:14) Se mea masani eiloa ke fia‵fia tatou o tauloto. E manako te ‵tou Mafuaga ke tumau tatou i te tauloto ki te se-gata-mai—kae ke fia‵fia ki ei. Tela la, se mea poto ke “fai ke fiainu” tatou ki muna‵tonu i te Tusi Tapu i te taimi nei. (1 Pe. 2:2) Fakatoka a fakamoemoega kolā e mafai o kausaki koe ki ei kae ‵piki ‵mau ki tau polokalame faitau kae sukesuke ki te Tusi Tapu. (Iosua 1:8) Mai te fakamanuiaga a Ieova, ka fiafia eiloa koe o faitau kae tauloto ki mea e uke atu e uiga ki a ia.

12. Kaia e ‵tau ei o suke‵suke faka‵lei tatou ki te olaga mo te galuega talai a Iesu?

¹² Ke fakaaoga faeloa ou taimi o mafaufau ‵loto ki te olaga mo te galuega talai a Iesu. A te ‵tou tau‵tali fakapilipili atu i kalafaga o Iesu, ko te kī tāua ke tavini atu ki a Ieova, maise loa i taimi faiga‵ta konei. (1 Pe. 2:21) Ne fakaasi ‵tonu atu ne Iesu a mea faiga‵ta kolā ka fe‵paki mo ana soko. (Luka 14:27, 28) Kae ne talitonu a ia me e mafai eiloa o tumau ana soko ‵tonu i te fakamaoni e pelā mo ia. (Ioa. 16:33) Ke suke‵suke ki fakamatalaga liki‵liki o te olaga o Iesu kae fakatoka ne fakamoemoega ke fakaakoako ki a ia i tou olaga i aso takitasi.

13. Se a te mea e ‵tau o fakamolemole faeloa koe ki a Ieova ke tuku mai ne ia, kae kaia?

¹³ E se ‵tau mo tatou o lotoma‵lie fua ki mea ko iloa ne tatou. A mea ko iloa ne tatou, ka fai ei ke fia tauloto malosi tatou ki mea e uke atu e uiga ki a Ieova, kae ati aka a uiga e pelā mo te alofa mo te fakatuanaki ki a ia. (1 Koli. 8:1-3) I te taimi e tumau koe i te tauloto e uiga ki a ia, ke fakamolemole atu faeloa ki a Ieova ke fesoasoani atu ke fakalasi aka tou fakatuanaki. (Luka 17:5) E tali mai ne ia mo te kaimalie a vaegā ‵talo penā. A te fakatuanaki tonu telā e fakavae ki te iloaga tonu e uiga ki te ‵tou Atua, ka fesoasoani atu ke gasolo koe ki mua.—Iako. 2:26.

14. Ne faka‵mafa mai pefea ne te apositolo ko Petelu a te tāua ke fakagalue a mea e tauloto ne tatou? (Onoono foki ki te ata.)

¹⁴ Ne faka‵mafa mai ne te apositolo ko Petelu a te tāua ke fakagalue ne soko o Keliso a olotou mea e tauloto. Ne fakasino atu a ia ki te tala o Noa i te Tusi Tapu. Ne fai atu a Ieova ki  a Noa me e auala i se Lolo, ka fakaseai ne Ia a tino ma‵sei katoa. Ko te mea ke ‵sao a Noa mo tena kāiga, ne seki ‵tau fua o iloa ne latou me ka poko se Lolo. Ne fakasino atu a Petelu ki te vaitaimi mai mua o te Lolo “i te taimi koi faite ei te vaka.” (1 Pe. 3:20) Ao, ne fakagalue ne Noa mo tena kāiga a mea ne tauloto ne latou mai te Atua, mai te faitega o se vaka lasi ‵ki. (Epe. 11:7) Kae ne fakatusa ne Petelu a mea ne fai ne Noa ki te papatisoga, i tena tusi, penei: “A te papatisoga telā e ‵pau mo te mea tenei, e faka‵sao foki i ei koutou.” (1 Pe. 3:21) Ko tena uiga, e mafai o fakatusa a te galuega e fai nei ne koe ke fakatoka mō te papatisoga ki te galuega ne fai ne Noa mo tena kāiga i se fia tausaga ke faite te vaka. Se a te galuega e ‵tau o fai ne koe ko te mea ke toka koe mō te papatisoga?

15. E fakaasi atu pefea ne tatou a te salamō tonu?

¹⁵ Tasi o mea e ‵tau o fai ne tatou ko te sala‵mo tonu ki ‵tou agasala. (Galu. 2:37, 38) Kafai e sala‵mo tonu tatou ka fai ne tatou a ‵fuliga. E mata, ko oti ne fakagata aka ne koe so se faifaiga telā e fakafanoanoa atu ki a Ieova, e pelā mo te ola i se olaga masei, fakaaogaga o paka, io me ko pati ma‵sei? (1 Koli. 6:9, 10; 2 Koli. 7:1; Efe. 4:29) Kafai e seki fai ne koe a mea konā, ke taumafai faeloa o fai a ‵fuliga. Faipati ki tou faiakoga faka-te-Tusi Tapu, io me fakamolemole atu ki toeaina i te fakapotopotoga ke fesoasoani atu ki a koe. Kafai koe koi foliki kae ‵nofo tasi mo ou mātua, fakamolemole atu ki a lāua mō se fesoasoani ke fakagata ne koe so se faifaiga masei telā e mafai o taofi ne ia koe mai te papatiso.

16. Ne a mea e aofia i se polokalame faka-te-agaga ‵lei?

¹⁶ Se mea tāua foki ke ‵piki ‵mau ki se polokalame faka-te-agaga ‵lei. E aofia i ei a te kau ki fakatasiga Kelisiano kae fai ‵tou tusaga i ei. (Epe. 10:24, 25) Kae kafai ko fetaui ‵lei koe ke talai, taumafai ke kau atu faeloa koe ki ei. Ko te uke o taimi e aofia koe i te galuega faka‵sao tino tenā, ko te lasi foki o tou fiafia ki ei. (2 Timo. 4:5) Kafai koe koi foliki kae ‵nofo tasi mo ou mātua, fesili ifo ki a koe: ‘E mata, e manakogina ke fakamasaua mai faeloa oku mātua ke kau au ki fakatasiga io me ko te galuega talai? Io me gasue muamua eiloa au o fakatoka ki ei?’ Kafai e fakagalue ne koe a mea konā, ko fakaasi atu i ei a tou fakatuanaki, tou  alofa mo tou loto fakafetai ki a Ieova te Atua. A mea konei ko faifaiga o te “tapuaki fakamaoni ki te Atua,” ko meaalofa kolā e tuku atu ne koe ki a Ieova. (2 Pe. 3:11; Epe. 13:15) A meaalofa katoa kolā e tuku atu ne tatou ki a Ieova mo te loto kātoa e fakafiafia ki te ‵tou Atua. (Fakatusa ki te 2 Kolinito 9:7.) E fai ne tatou a mea konei me se mea fakafiafia eiloa ke tuku atu a ‵tou mea ‵lei ki a Ieova.

17-18. Se a te uiga tāua ka fesoasoani atu ke gasolo koe ki mua i te papatisoga, kae kaia? (Faataoto 3:3-6)

¹⁷ I te taimi e gasolo faeloa koe ki mua i te papatisoga, ka fepaki koe mo tofotofoga. Kāti ka fakatauemu atu a nisi tino ki tau talitonuga fou; e mafai foki o ‵teke io me fakasaua ne latou a koe. (2 Timo. 3:12) I te taimi e galue koe ke manumalo i se faifaiga masei, e mafai loa o toe fai ne koe te mea tenā i nisi taimi. Io me ka sē ‵kafi ne koe o kufaki kae kaitaua ona ko te fui fakataunu o tou fakamoemoega. Se a te mea ka fesoasoani atu ke kufaki koe? Ko te uiga tāua tenei—te alofa ki a Ieova.

¹⁸ A tou alofa ki a Ieova ko te ‵toe uiga gali eiloa telā e maua ne koe. (Faitau te Faataoto 3:3-6.) A te alofa malosi ki te Atua e mafai o fesoasoani atu ki a koe ke fakafesagai atu ki mea faiga‵ta mo te manuia. E fakasino atu faeloa te Tusi Tapu ki te alofa fakamaoni o Ieova ki ana tavini. E fakauiga i ei me ka se mafai eiloa o tuku tiaki ne Ieova ana tavini. (Sala. 100:5) Ne faite koe ki te fakatusa o te Atua. (Kene. 1:26) E mafai pefea o fakaasi atu ne koe a te vaegā alofa tenā?

19. E mafai pefea o fakaasi atu te lasi o tou loto fakafetai ki mea katoa ne fai ne Ieova mō koe? (Kalatia 2:20)

¹⁹ Kamata ki te fakaasi atu o te loto fakafetai. (1 Tesa. 5:18) I aso takitasi, fesili ifo ki a koe, ‘Ne fakaasi mai pefea ne Ieova tena alofa ki a au?’ Kae sa puli o fakaasi atu ki a Ieova i au ‵talo a mea fakapito kolā ne fai ne ia mō koe. Kilo atu ki faifaiga o tena alofa e pelā me fai ‵tonu atu ki a koe tokotasi, e pelā eiloa mo te mea ne iloa aka ne te apositolo ko Paulo e uiga ki a Ieova. (Faitau te Kalatia 2:20.) Fesili ifo ki a koe, ‘E mata, e manako au o taui atu tena alofa ki a au?’ A te alofa ki a Ieova ka fesoasoani atu ke ‵teke faeloa ne koe a fakaosoosoga kae ke fakafesagai atu ki tulaga faiga‵ta mo te manuia. Ka fakamalosi atu ke ‵piki ‵mau koe ki au polokalame faka-te-agaga kae fakaasi atu faeloa tou alofa ki tou Tamana i aso takitasi.

20. Ne a mea e aofia i tau tukuatuga ki a Ieova, kae pefea te tāua o te fakaikuga tenei ki a koe?

 ²⁰ Fakamuli loa, ka fakamalosi aka ne tou alofa ki a Ieova ke fai atu ne koe se ‵talo fakapito ki a ia. Ka tuku atu ne koe a koe eiloa ki te Atua. Ke masaua me kafai ko oti ne tukugina atu koe ki a Ieova, ko maua eiloa ne koe te fakamoemoega gali tenei: Ka aofia eiloa koe i ana tino ki te se-gata-mai. Kafai ko tuku atu tou ola ki a Ieova, ko tauto atu koe ke tavini ki a ia i taimi ‵lei mo taimi sē ‵lei. E se manakogina ke toe fai ne koe te tautoga tenā. E tonu, i te taimi e fai ei ‵tou tukuatuga, ko fai ne tatou se fakaikuga tāua ‵ki. Kae mafaufau ki te mea tenei: Ka fai ne koe a fakaikuga e uke i tou olaga, nisi fakaikuga e ‵lei ‵ki, kae ka seai se fakaikuga e sili atu i te ‵lei i lō te fakaikuga ke tuku atu tou ola ki a Ieova. (Sala. 50:14) Ka taumafai eiloa a Satani o fakavāivāi tou alofa ki tou Tamana, mo te fakamoemoega me ka sē fakamaoni koe ki a ia. Sa talia ne koe ke manumalo a Satani! (Iopu 27:5) Ko tou alofa malosi ki a Ieova ka fesoasoani atu ke ola e ‵tusa mo tau tukuatuga kae ke gasolo faeloa o pili atu koe ki tou Tamana faka-te-lagi.

21. Kaia e mafai o fai atu tatou me i te papatisoga e se ko te fakaotiga kae ko te kamataga?

²¹ Kafai ko oti ne fai tau tukuatuga ki a Ieova, faipati atu ki toeaina i tau fakapotopotoga e uiga ki te suā mea tāua e ‵tau o fai ne koe. Ke masaua faeloa me i te papatisoga e se ko te fakaotiga tenā kae ko te kamataga. Ko te kamataga o se olaga tavini ki a Ieova ki te se-gata-mai. Tela la, ke na fakamalosi aka nei a tou alofa ki tou Tamana. Fakatoka ne fakamoemoega ke mafai o momea aka te malosi o tou alofa ki a ia i aso takitasi. Ka fakamalosi atu eiloa a te mea tenā ke papatiso koe. A te aso tenā ka fai eiloa e pelā me se aso fakafiafia ki a koe. Kae ko te mea tenei ko te kamataga fua. Ke na momea aka te lasi o tou alofa ki a Ieova mo tena Tama ki te se-gata-mai!