1-2. Se a te mea e ‵tau o fai ne se tino a koi tuai o papatiso?

 I TE lima tausaga ko ‵teka, e lau i te fia miliona tino ko oti ne papatiso ke fai pelā me ne Molimau a Ieova. E tokouke i a latou konei, ne akoako ki te munatonu mai te “folikiga,” e pelā mo te soko ko Timoteo, i te senitenali muamua. (2 Timo. 3:​14, 15) Nisi tino ne tauloto e uiga ki a Ieova i te taimi ko ma‵tua ei, io me ko toeaina kae loma‵tua foki. Fakamuli nei, ne papatiso se fafine telā ne fai tena akoga faka-te-Tusi Tapu mo Molimau a Ieova kae ko 97 ana tausaga!

² Kafai koe e fai tau akoga faka-te-Tusi Tapu io me ne puti aka ne mātua kolā e Molimau, e mata, e mafaufau koe o papatiso? A te mea tenā se fakamoemoega gali eiloa! Kae koi tuai koe o papatiso, e ‵tau o fai muamua tau tukuatuga ki a Ieova. Ka fakamatala mai i te mataupu tenei a mea e aofia i te faiga o se tukuatuga. Ka fesoasoani atu foki ke lavea ne koe me e seai eiloa se pogai e ‵tau o fakatalave koe i te faiga o te mea tenā, e pelā foki mo te papatisoga, māfai ko toka koe ki ei.

SE A TE TUKUATUGA?

3. Taku mai ne fakaakoakoga o tino i te Tusi Tapu kolā ne tukugina atu ki a Ieova.

³ I te Tusi Tapu, a te tino telā e fai tena tukuatuga, se tino telā ne ‵vae kea‵tea mō se pogai fakapito. A tino Isalaelu se fenua telā ne tukugina atu ki a Ieova. Kae e isi ne nāi tino mai te fenua kātoa ne tukugina atu ki a Ieova i se auala fakapito. E pelā mo Alona, ne pei a ia ki se pulou laugatu telā e faka‵piki mai mua i ei se mea malipolipo aulo, ko te “fakailoga tapu o te tukuatuga.” E fakaasi mai i te mea malipolipo aulo tenā me ko oti ne ‵vae kea‵tea a ia ke tavini atu i se auala fakapito—e pelā me se  faitaulaga sili i Isalaelu. (Levi. 8:9) E penā foki a te kau Naseli ne tukugina atu foki latou ki a Ieova i se auala fakapito. A te pati “Naseli,” telā ne vau mai te pati Epelu ko te nazirʹ, e fakauiga ki te “Se Tino ne ‵Vae Kea‵tea,” io me “Se Tino ne Tukugina Atu.” E ‵tau o ola a te kau Naseli e ‵tusa mo tulafono ne fakatoka mō latou i Tulafono a Mose.—Nume. 6:​2-8.

4. (a) Kafai ko tukugina atu se tino ki a Ieova se a te ‵toe mea tāua i tena olaga? (e) Se a te uiga o te “se toe mafaufau” ki a koe eiloa? (Onoono foki ki te ata.)

⁴ Kafai ko tuku atu koe ki a Ieova, ko filifili koe ke fai mo soko o Iesu Keliso kae ke fai te loto o te Atua e pelā me ko te ‵toe mea tāua i tou olaga. Ne a mea e aofia i te tukuatuga e pelā me se Kelisiano? Ne fai mai a Iesu: “So se tino e fia tautali mai i a au, ke se toe mafaufau ki a ia eiloa.” (Mata. 16:24) A te tugapati Eleni telā ne ‵fuli ki te “ke se toe mafaufau ki a ia eiloa” e mafai foki o ‵fuli penei “ke se toe ola mō ia eiloa.” E pelā me se tavini tukugina atu ki a Ieova, e se ‵tau o talia ne koe so se mea telā e se fetaui mo tena loto. (2 Koli. 5:​14, 15) E aofia i ei te sē talia ne koe a “galuega o te foitino,” e pelā mo amioga fakatauavaga sē ‵tau. (Kala. 5:​19-21; 1 Koli. 6:18) E mata, e faigata ke fakalogo koe ki tulafono penā? E se faigata, māfai koe e alofa ki a Ieova kae talitonu katoatoa me ka aoga ki a koe ana tulafono. (Sala. 119:97; Isa. 48:​17, 18) Ne fai mai te taina ko Nicholas, “E mafai o kilo atu koe ki tulaga o Ieova e pelā mo fiti o te falepuipui telā e taofi ne ia koe mai te faiga o te mea e manako koe ki ei io me ko fiti o se pā leona kolā e puipui ei koe mai mea fakama‵taku.”

5. (a) E fai pefea tau tukuatuga ki a Ieova? (e) Se a te ‵kese o te tukuatuga mo te papatisoga? (Onoono foki ki te ata.)

⁵ E fai pefea tau tukuatuga ki a Ieova? E tauto koe ki a ia e auala i se ‵talo me ka tapuaki fua koe ki a ia tokotasi kae ka fakamuamua ne koe a te faiga o tena loto i tou olaga kātoa. E  tauto koe ki a Ieova me ka tumau koe i te alofa ki a ia “mo tou loto kātoa mo tou ola kātoa mo tou mafaufau kātoa mo tou malosi kātoa.” (Male. 12:30) A tau tukuatuga tenā, se mea telā e fai tokotasi eiloa ne koe i te va o koe mo Ieova. E ‵kese mo te papatisoga telā se mea e fai i mua o tino e tokouke; se fakaasiga tenā ki tino me ko oti ne fai ne koe tau tukuatuga. A tau tukuatuga se tautoga ‵malu, kae fakamoemoe a Ieova ke ola koe e ‵tusa mo tau tautoga, e pelā eiloa mo te mea e fakamoemoe koe ki ei.—Fai. 5:​4, 5.

KAIA E ‵TAU EI O TUKU ATU KOE KI A IEOVA?

6. Se a te pogai tāua e fai ei ne se tino a tena tukuatuga ki a Ieova?

⁶ A te pogai tāua e fai ei tau tukuatuga ki a Ieova ona ko tou alofa ki a ia. E se fakavae fua a tou alofa ki ou lagonaga. Kae e fakavae ki te “iloaga tonu” mo te “malamalama i mea faka-te-agaga”—ko mea ne tauloto ne koe e uiga ki a Ieova kolā ne fai ei ke gasolo o alofa malosi koe ki a ia. (Kolose 1:9) Ona ko tau sukesukega ki te Tusi Tapu, ko talitonu katoatoa koe (1) me i a Ieova se tino tonu, (2) me i te Tusi Tapu ko tena Muna fakaosofia, mo te (3) e fakaaoga ne ia tena fakapotopotoga ke fakataunu tena loto.

7. Ne a mea e ‵tau o fai ne tatou a koi tuai o fai ‵tou tukuatuga ki te Atua?

⁷ A tino kolā e fai olotou tukuatuga ki a Ieova, e ‵tau o iloa ne latou a akoakoga fakavae i te Muna a te Atua kae ke ola e ‵tusa mo tulaga i ei. E fai ne latou te ‵toe mea e mafai ke fakailoa atu ki nisi tino a olotou mea ne tauloto. (Mata. 28:​19, 20) Ka gasolo o a‵lofa malosi latou ki a Ieova, kae ma‵nako tonu ke tapuaki atu fua ki a ia tokotasi. E mata, e penā foki  koe? Kafai e maua ne koe te vaegā alofa tenei, ka se kilo atu koe ki tau tukuatuga mo te papatisoga e pelā me se mea telā e fai ne koe ke fakafiafia tou faiakoga i te Tusi Tapu io me ko ou mātua; io me se mea telā e ‵tau o fai ke talia koe ne ou taugasoa.

8. E aoga pefea te mauaga o se loto fakafetai ki tau fakaikuga ke tuku atu koe ki a Ieova? (Salamo 116:​12-14)

⁸ A te fakaikuga ke tuku atu koe ki a Ieova, se lagonaga telā e sae aka loa i a ia māfai e mafaufau ‵loto koe ki mea katoa ne fai ne ia mō koe. (Faitau te Salamo 116:​12-14.) E taku ‵tonu mai i te Tusi Tapu a Ieova e pelā me ko te Tino e tuku mai ne ia “a meaalofa ‵lei katoa mo mea ‵lei katoatoa.” (Iako. 1:17) A te ‵toe meaalofa sili i meaalofa konā ko te taulaga a tena Tama, ko Iesu. Mafaufau la! Ona ko te taulaga togiola, ko mafai ei o maua ne koe se fesokotakiga pili mo Ieova. Kae ko oti ne tuku atu ne ia ki a koe a te fakamoemoega ke ola ki te se-gata-mai. (1 Ioa. 4:​9, 10, 19) A tau tukuatuga ki a Ieova se auala e fakaasi atu ei tou loto fakafetai mō te ‵toe fakaasiga sili o te alofa tenā, fakatasi mo nisi fakamanuiaga mai i a Ieova. (Teu. 16:17; 2 Koli. 5:15) I te mataupu 46, manatu i te 4 o te tusi ko te Ke Ola ki te Se-Gata-Mai! e fakaasi mai i te vitio ko te Ofo Atu Au Meaalofa ki te Atua telā e 3 minute te loa, a te vaegā loto fakafetai tenā.

E MATA, KO TOKA KOE KE FAI TAU TUKUATUGA KAE PAPATISO?

9. Kaia e se ‵tau o faimālō atu ki se tino ke fai tena tukuatuga?

⁹ Kāti e mafaufau koe me seki toka koe ke fai tau tukuatuga kae papatiso. Kāti koi isi ne fakama‵fuliga e manakogina ke fai ne koe i tou olaga ke fetaui ‵lei mo tulaga o Ieova, io me kāti koi manakogina ne taimi e uke ke fakamalosi aka tou fakatuanaki. (Kolose 2:​6, 7) E se ‵pau a te ga‵solo ki mua o tino a‵koga taki tokotasi, kae e se ko talavou katoa e toka ke fai olotou tukuatuga kae papatiso i te taimi eiloa e tasi. Taumafai ke iloa ne koe a fakama‵fuliga e manakogina ke fai ne koe, ko fai ei e aunoa mo te fakatusa‵tusa au mea e fai ki nisi tino.—Kala. 6:​4, 5.

10. Ne a au mea e mafai o fai māfai ko iloa ne koe me seki toka koe ke fai tau tukuatuga kae papatiso? (Onoono foki ki te pokisi “ Ki a Latou Kolā ne Puti Aka i te Munatonu.”)

¹⁰ Kafai foki e iloa ne koe me seki toka koe o fai tau tukuatuga ki a Ieova, ke tumau i te fai ne koe a te mea tenā e pelā me se fakamoemoega ke kausaki ki ei. ‵Talo ke fakamanuia ne Ieova au taumafaiga ke fai so se fakamafuliga e manakogina. (Fili. 2:13; 3:16) E mafai eiloa o mautinoa i a koe me ka lagona ne ia au ‵talo kae ka tali atu ki a koe.—1 Ioa. 5:14.

POGAI E FAKATALAVE EI A NISI TINO

11. Ka fesoasoani mai pefea a Ieova ki a tatou ke tumau i te fakamaoni ki a ia?

¹¹ E isi ne tino kolā ko toka ke fai olotou tukuatuga kae papatiso koi fakatalave eiloa. Kāti e mafau‵fau ifo latou penei, ‘Kae pefea la māfai ko fai ne au se agasala matagā kae fakatea au?’ Kafai tenā te mea e manavase koe ki ei, ke talitonu me ka tuku atu ne Ieova a mea katoa e manakogina ‘ko te mea ke sasale koe i te auala telā e talia ne ia kae ke fakafiafia katoatoa atu ki a ia.’ (Kolose 1:10) Ka tuku atu foki ne ia ki a koe a te malosi ke fai te mea tonu. Ko oti ne fakamaoni aka me mafai o fai ne ia te mea tenā e auala i ana mea ne fai ki tino e tokouke. (1 Koli. 10:13) Tenā te pogai e tasi e se tokouke ei a tino e faka‵tea mai te fakapotopotoga Kelisiano. E fakatoka ne Ieova ana tino ki auala ke tumau latou i te fakamaoni.

12. E ‵kalo kea‵tea pefea tatou mai te faiga o se agasala matagā?

¹² A tino sē ‵lei katoatoa katoa e tofotofogina  faeloa ke fai a mea ma‵sei. (Iako. 1:14) Kae ko koe eiloa e fai ne koe te filifiliga ki au mea ka fai ki te tofotofoga tenā. A te ‵tonuga loa, ko koe eiloa e pule katoatoa ki au mea e fai ki tou olaga. E tiga loa e fai mai a nisi tino me e se mafai o taofi aka ne tatou a ‵tou lagonaga mo mea e ma‵nako tatou o fai, kae e mafai eiloa o fakamasani koe ke tataofi aka ou manakoga ma‵sei. Kae kafai foki loa e ‵sae aka a nisi manakoga ma‵sei, e mafai eiloa o ‵teke atu koe ki ei. Tela la, ko te mea ke se agasala koe, ke ‵talo faeloa i aso katoa. Fakatumau se polokalame ‵lei o sukesukega totino ki te Muna a te Atua. Kau ki fakatasiga Kelisiano. Fakailoa atu ou talitonuga ki nisi tino. Kafai e fai faeloa ne koe a mea konei, ka maua ne koe i ei te malosi ke ola e ‵tusa mo tau tautoga ne fai i tau tukuatuga. Kae ke mo a eiloa ma puli i a koe me ka fesoasoani atu a Ieova ke fai ne koe a mea konā.—Kala. 5:16.

13. Se a te fakaakoakoga ‵lei ne fakaasi mai ne Iosefa mō tatou?

¹³ Ka faigofie atu ki a koe ke ola e ‵tusa mo tau tukuatuga māfai e fakaiku aka ne koe mai mua au mea ka fai māfai ko fepaki mo tofotofoga. E fakaasi mai i te Tusi Tapu a tala o nāi tino kolā ne fai penā, faitalia me e se ‵lei katoatoa foki latou. E pelā mo Iosefa, ne taumafai faeloa te avaga a Potifala o fakakolekole a ia ke ‵moe lāua. Kae ko leva ne iloa ne tou tagata a tena fakaikuga e ‵tau o fai. E fai mai te Tusi Tapu me ne “ita” tou tagata kae fai atu: “E mafai pefea ne au o fai te matugā mea masei tenei ke agasala ei au i mua o te Atua?” (Kene. 39:​8-10) E manino ‵lei, me ko leva ne iloa ne Iosefa a te mea e ‵tau o fai ne ia mai mua foki loa o tofotofo ne tou fafine a ia. Tela la, i te taimi ne fepaki ei mo te tofotofoga, ne faigofie fua ki a ia ke ‵teke atu ki ei.

14. E fakamasani pefea tatou o ‵teke fakavave atu ki mea ‵se?

¹⁴ E mafai pefea o fai ne koe se fakaikuga tai ‵pau pelā mo Iosefa? E mafai o na fakaiku nei ne koe au mea ka fai māfai ko fepaki mo se tofotofoga. Fakamasani o ‵teke fakavave atu ki mea kolā e takalialia ki ei a Ieova, kae ke mo a foki ma mafaufau ki ei. (Sala. 97:10; 119:165) Mai te fai penā, ka se mafai eiloa o fakalotolotolua koe māfai ko tofotofogina. Ka iloa ‵lei ne koe a tau tali ka fai mo te mea e ‵tau o fai.

15. E mafai pefea o fakaasi mai ne se tino me e “‵sala malosi” a ia ki a Ieova? (Epelu 11:6)

¹⁵ Kāti ko iloa ne koe me ko maua ne koe te  munatonu kae manako koe o tavini atu ki a Ieova mo tou loto kātoa, kae koi isi loa se mea e taofi ne ia koe ke mo a ma fai tau tukuatuga kae papatiso. E mafai o fai ne koe te mea ne fai ne te tupu ko Tavita. Ke fakamolemole atu ki a Ieova: “Iloilo mai au, e te Atua, kae fai ke iloa ne koe toku loto. Sukesuke mai au, kae fai ke iloa ne koe a mea e manavase au ki ei. Kae onoono māfai e isi se manakoga masei i loto i a au, kae takitaki atu au i te auala ki te se-gata-mai.” (Sala. 139:​23, 24) E fakamanuia ne Ieova a tino kolā e “‵sala malosi ki a ia.” A tou kausaki atu ke fai tau tukuatuga kae papatiso, se fakaasiga me e fai eiloa ne koe a te mea tenā.—Faitau te Epelu 11:6.

TUMAU I TE FAKAPILIPILI ATU KI A IEOVA

16-17. E mafai pefea ne latou kolā ne ‵tupu aka i te munatonu o fakapili‵pili atu ki a Ieova? (Ioa. 6:44)

¹⁶ Ne fai mai a Iesu me ko Ieova eiloa e aumai ne ia ana soko. (Faitau te Ioane 6:44.) Mafaufau ki te gali o te manatu tenā mo tena aoga ki a koe. E isi se mea ‵lei e lavea ne Ieova i tino kolā e aumai ne ia ki a ia. E kilo atu a ia ki tino taki tokotasi e pelā me ne ana “tino fakapito,” io me ne “kope tāua.” (Teu. 7:6; fml.) Tenā foki tena kilokiloga ki a koe.

¹⁷ Kāti a koe se talavou telā ne tupu aka i te munatonu. E mafai o mafaufau koe me e tautali atu fua koe i ou mātua. Kae e fai mai te Tusi Tapu: “Fakapilipili atu ki te Atua, kae ka fakapilipili mai a ia ki a koutou.” (Iako. 4:8; 1 Nofo. 28:9) Kafai e gasue muamua koe o fakapilipili atu ki a Ieova, ka saga mai a ia o fakapilipili atu ki a koe. E se kilo atu a Ieova ki a koe e pelā fua me se vaega o se potukau. E fakapilipili mai ne ia a tino taki tokotasi—e aofia i ei a tino taki tokotasi kolā ne ‵tupu aka i te munatonu. Kafai ko gasue muamua se tino o fakapilipili atu ki a Ieova, ka saga mai eiloa a Ia, e pelā mo te mea e fakaasi mai i te Iakopo 4:8.—Fakatusa ki te 2 Tesalonia 2:13.

18. Ne a mea ka sau‵tala tatou ki ei i te suā mataupu? (Salamo 40:8)

¹⁸ Kafai e tuku atu koe ki a Ieova kae papatiso, ko fakaasi atu ne koe a uiga o Iesu. Ne loto fiafia o ofo atu a ia eiloa ki tena Tamana ke fai so se mea e manako a ia ki ei. (Faitau te Salamo 40:8; Epe. 10:7) I te suā mataupu, ka sau‵tala tatou ki auala ke tumau i te tavini fakamaoni atu ki a Ieova māfai ko oti ne papatiso.