1. Ne a lagonaga e mafai o maua ne nisi tavini fakamaoni a Ieova?

 KO OKO eiloa i te fakamafanafana mai ke iloa atu me e talia ne Ieova ana tino e pelā me se potukau! E fai mai te Tusi Tapu: “A Ieova e fiafia ki ana tino.” (Sala. 149:4) Kae i nisi taimi, e loto vāi‵vai malosi a nisi tino ko ala ei o mafau‵fau ifo penei, ‘E mata, e talia ne Ieova a au?’ E tokouke a tino tapuaki fakamaoni a Ieova i aso o te Tusi Tapu, ne maua ne latou a manatu fakalotolotolua penā.—1 Samu. 1:​6-10; Iopu 29:​2, 4; Sala. 51:11.

2. Ko oi a tino e talia ne Ieova?

² E fakaasi manino mai i te Tusi Tapu me e mafai eiloa o talia ne Ieova a tino sē ‵lei katoatoa. Pefea la? E ‵tau o fakatuanaki tatou ki a Iesu Keliso kae papatiso. (Ioa. 3:16) I te auala tenei, e fakaasi atu ei ne tatou i mua o tino me ko sala‵mo tatou ki ‵tou agasala, kae ko oti ne fai ‵tou tautoga ki te Atua ke fai tena loto. (Galu. 2:38; 3:19) E fiafia a Ieova māfai e fakagalue ne tatou a auala konei ke ati aka ei se fesokotakiga mo ia. Kafai e tumau tatou i te faiga o te ‵toe mea e mafai ke ola e ‵tusa mo ‵tou tukuatuga, ka talia tatou ne Ieova kae kilo mai ki a tatou e pelā me ne ana taugasoa ‵pili.—Sala. 25:14.

3. Ne a fesili ka sau‵tala nei tatou ki ei?

³ Kae kaia e mafau‵fau ei a nisi tino me e se talia ne te Atua latou? E fakaasi mai pefea ne Ieova me e talia ne ia tatou? Kae e mafai pefea o fakamalosi aka ne se Kelisiano a tena loto talitonu me e talia a ia ne te Atua?

POGAI E MAFAU‵FAU A NISI TINO ME SE TALIA LATOU NE IEOVA

4-5. Kafai e maua ne tatou a lagonaga me ko seai ne ‵tou aoga, se a te mea e mafai o tali‵tonu tatou ki ei?

⁴ E tokouke tatou ne ‵nofo mo lagonaga me ko seai ne ‵tou aoga talu mai te ‵tou fo‵likiga. (Sala. 88:15) Ne fai mai te taina  e igoa ki a Adrián penei: “Ne nofo faeloa au mo te mafaufauga me ko seai soku aoga. Koi masaua eiloa ne au i taku folikiga me ne ‵talo sāle au ke ‵sao atu te motou kāiga ki loto i te Palataiso, e tiga eiloa ne mautinoa i a au me e se mafai o ola au i konā.” A Tony, telā ne seki puti aka i se kāiga Kelisiano, ne fai mai: “Ne seki fai mai aka loa oku mātua i a lāua e a‵lofa io me fia‵fia mai ki a au. Ne fai i ei ke mafaufau au me e seai se mea e fai ne au ka fakafiafia atu ki a lāua.”

⁵ Kafai e oko mai ki a tatou i nisi taimi a lagonaga me ko seai ne ‵tou aoga, ke masaua me ko Ieova eiloa e ‵taki atu ne ia tatou ki a ia. (Ioa. 6:44) E lavea ne ia a ‵tou uiga ‵lei kolā kāti e se lavea ne tatou, kae iloa ‵lei ne ia a mea i ‵tou loto. (1 Samu. 16:7; 2 Nofo. 6:30) Tela la, kafai e fai mai a ia me e tāua tatou ki a ia, ke na tali‵tonu eiloa tatou ki ei.—1 Ioa. 3:​19, 20.

6. Ne pefea a lagonaga o te apositolo ko Paulo ki ana agasala i aso mua?

⁶ Mai mua o tauloto ki te munatonu, ne fai ne nisi tino i a tatou a mea kolā kāti koi fai loa i ei ke se ‵lei a ‵tou loto lagona. (1 Pe. 4:3) Ke oko foki loa ki Kelisiano fakamaoni, koi taua atu eiloa latou ki olotou vāivāiga. Kae ko koe? E mata, e mafaufau koe i nisi taimi me e se mafai o fakamagalo ne Ieova a koe? Kafai e penā loa, e fakamafanafana loto ke iloa atu me ne penā foki a lagonaga o nisi tavini fakamaoni a Ieova. E pelā mo te apositolo ko Paulo, ne mafaufau me ko oko loa a ia i te fakaalofa ona ko ana vāivāiga. (Loma 7:24) E tonu, ne salamō a Paulo ki ana agasala kae papatiso. Kae ui ei, ne kilo ifo a ia ki a ia eiloa e pelā me ko te “‵toe apositolo fatauva” mo te “tino agasala tafasili i te masei.”—1 Koli. 15:9; 1 Timo. 1:15.

7. Se a te mea e ‵tau o masaua ne tatou e uiga ki ‵tou agasala ne fai i aso mua?

⁷ E tauto mai te ‵tou Tamana faka-te-lagi me ka fakamagalo ne ia tatou māfai e sala‵mo tatou. (Sala. 86:5) Tela la, kafai e sala‵mo tonu tatou ki ‵tou agasala ne fai, e mafai o tali‵tonu tatou me e ‵tonu eiloa a pati a Ieova—ko fakamagalo ne ia tatou.—Kolose 2:13.

8-9. E mafai pefea o manumalo tatou i te lagonaga me e se mafai o lava ‵tou mea e fai ke fakafiafia a Ieova?

⁸ E ma‵nako tatou o fai te ‵toe mea e mafai ke tavini katoatoa atu ki a Ieova. Kae e mafau‵fau a nisi tino me e se mafai o lava olotou mea e fai ke maua ne latou tena taliaga. Ne fai mai se tuagane e igoa ki a Amanda: “Ne mafaufau sāle au me i te tuku atu o te ‵toe mea ‵lei ki a Ieova, e manakogina ke uke atu aku mea e fai. Tenā ne fai sāle ne au a mea e uke atu i lō mea e mafai ne au o fai. Kafai ko se ‘‵kafi’ ne au, ko mafaufau ei au i a Ieova ko se fiafia mai e pelā mo toku se fiafia ki a au eiloa.”

⁹ E mafai pefea o manumalo tatou i te lagonaga me e se mafai o lava ‵tou mea e fai ke fakafiafia a Ieova? Masaua i a Ieova e loto malamalama. E se fakamoemoe a ia ke fai ne tatou a mea e uke atu i lō mea e mafai ne tatou o fai. E fiafia a ia ki te ‵toe mea ‵lei e fai ne tatou mō ia. E se gata i ei, ke mafaufau ‵loto ki tala i te Tusi Tapu o latou kolā ne tavini atu ki a Ieova mo te loto kātoa. Mafaufau ki a Paulo. Ne galue malosi a ia i tausaga e uke, faimalaga atu i se fia afe o maila kae faka‵tu aka a fakapotopotoga e uke. Kae i te taimi ko ma‵fuli ana fakanofonofoga kae ko se uke ana mea e fai i te galuega talai, e mata, ko se talia a ia ne te Atua? Ikai. Ne tumau a ia i te faiga o te ‵toe mea e mafai, kae ne fakamanuia ne Ieova a ia. (Galu. 28:​30, 31) E penā foki tatou, e kese‵kese a mea e mafai o tuku atu ne tatou ki a Ieova i nisi taimi. Kae ko te mea telā e tāua ki a ia, ko te pogai tonu e tavini atu ei tatou ki a ia. Ke sau‵tala nei tatou ki nai auala e fakaasi mai ne Ieova me e talia ne ia tatou.

 E FAKAASI MAI PEFEA NE IEOVA A TENA TALIAGA?

10. E mafai pefea o “lagona” ne tatou a Ieova e faipati mai me ko talia ne ia tatou? (Ioane 16:27)

¹⁰ E auala i te Tusi Tapu. E fiafia a Ieova o fakaasi atu me talia ne ia a tino kolā e alofa a ia ki ei. E fakamatala mai i te Tusi Tapu a taimi e lua ne fai atu a Ieova ki a Iesu me i a ia ko Tena Tama fagasele, telā ko oti ne talia ne ia. (Mata. 3:17; 17:5) E mata, e fia lagona ne koe a Ieova e fai ‵tonu atu ki a koe me ko talia ne ia koe? E se mafai o faipati ‵tonu mai a Ieova ki a tatou mai te lagi, kae e faipati mai a ia e auala i tena Muna. Kafai e fai‵tau tatou ki pati a‵lofa a Iesu ki ana soko, e fai eiloa pelā me ko “lagona” ne tatou a Ieova e faipati mai me ko talia ne ia a tatou. (Faitau te Ioane 16:27.) Ne fakaata mai ne Iesu a uiga o tena Tamana i se auala ‵lei katoatoa. Tela la, kafai e fai‵tau tatou ki pati a Iesu me ko talia ne ia ana soko fakamaoni faitalia te lotou se ‵lei katoatoa, ko fakaataata eiloa ne tatou a Ieova e fai mai ne ia a pati konā ki a tatou.—Ioa. 15:​9, 15.

11. Kafai e fe‵paki tatou mo mea faiga‵ta, e mata, e fakauiga i ei me ko se talia tatou ne Ieova? (Iakopo 1:12)

¹¹ E auala i ana faifaiga. A Ieova e manako o fesoasoani mai, e auala i te tukumaiga o mea faka-te-foitino e manakogina ne tatou. I nisi taimi, e talia ne Ieova ke fe‵paki tatou mo logo‵maega, e pelā mo mea ne talia ne ia ke ‵tupu ki te tagata amiotonu ko Iopu. (Iopu 1:​8-11) Kafai e fe‵paki tatou mo mea faiga‵ta, e se fakauiga i ei me ko se talia tatou ne te Atua. I lō te fai penā, e tuku mai i ei se avanoaga ke fakamaoni atu a te ‵poko o te ‵tou a‵lofa mo te ‵tou loto tali‵tonu ki te Atua. (Faitau te Iakopo 1:12.) Ka lavea ne tatou a tena alofa atafai mo tena ‵lago mai i te taimi e fesoasoani mai ei ke kufaki tatou.

12. Ne a mea e tauloto ne tatou mai te tala o Dmitrii?

¹² Mafaufau ki se taina i Asia e igoa ki a Dmitrii. Ne seai sena galuega ‵togi kae ne seki maua sena galuega mō se fia masina. Tenā, ne fakaiku aka ei ne ia ke fakaasi atu te lasi o tena loto talitonu ki a Ieova mai te fakauke ana taimi i te galuega talai. Ne ‵teka atu a masina e uke kae seki maua loa sena galuega. Ne masaki malosi a ia kae ne fai ei ke takato fua a ia i tena moega e aunoa mo se mea e mafai o fai. Ne kamata o mafaufau a ia me ko seai sena aoga ona ko te mea ko se mafai ne ia o fai ana tiute e pelā me se avaga mo se tamana, kae ne fakalotolotolua foki me koi talia a ia ne Ieova io me ikai. Kae i se afiafi e tasi, ne ‵lomi ne tena tama fafine se pepa telā e tusi i ei a pati i  te Isaia 30:15: “A te malosi o koutou ko te otou ‵nofo filemu kae fakaasi atu te loto talitonu.” Ne tuku ne tou fafine i tafa o tena moega kae fai atu ki a ia, “Teti, kafai ko kamata o se ‵lei ou lagonaga, ke masaua te tusi faitau tenei.” Fakafetai ki a Ieova me ne masaua aka ne Dmitrii me koi maua eiloa ne tena kāiga a mea‵kai mo gatu e lava, mo se koga ke ‵nofo i ei latou. “A te mea fua telā ne manakogina ke fai ne au,” ko ana pati, “ko te nofo filemu kae tumau i te talitonu ki toku Atua.” Kafai e fepaki koe mo se fakalavelave tai ‵pau, ke loto talitonu me ka tausi koe ne Ieova kae ka fesoasoani atu a ia ke kufaki koe.

13. Ko oi e mafai o fakaaoga ne Ieova ke fakaasi mai me talia ne ia tatou, kae i auala fea?

¹³ E auala i ‵tou taina mo tuagane. E fakaaoga ne Ieova a ‵tou taina mo tuagane ke fakaasi mai me talia ne ia tatou. E pelā me se fakaakoakoga, e mafai o fakamalosi ne ia a nisi tino ke tuku mai ne latou a pati fakamalosi i te taimi tonu. Tenā te mea ne tupu ki se tuagane i Asia telā ne loto mafatia i se taimi e tasi. Ne galo atu tena galuega ‵togi kae ne masaki malosi a ia. Ne fai ne tena avaga se agasala matagā kae tapale tena tauliaga e pelā me se toeaina. “Ne seki malamalama au me kaia ne ‵tupu ei a mea konei,” ko ana pati. “Ne mafaufau au me kāti e isi saku mea ‵se ne fai kae ko se talia au ne Ieova.” Ne fakamolemole atu te tuagane tenei ki a Ieova ke fakamautinoa atu me koi talia eiloa ne ia tou fafine. Ne fai pefea ne Ieova te mea tenā? Ne fai mai tou fafine, “Ne fai‵pati au mo toeaina o te fakapotopotoga kae fesoasoani mai ke lavea ne au me koi alofa eiloa a Ieova ki a au.” Fakamuli ifo, ne toe fakamolemole a ia ki a Ieova mō se fesoasoani. “I te aso eiloa tenā, ne maua ne au se tusi mai se potukau o taina mo tuagane i te fakapotopotoga,” ko ana pati. “I te taimi ne faitau au ki olotou pati fakamalosi, ne iloa aka ne au me ne lagona eiloa ne  Ieova au.” Ao, e fakaasi mai faeloa ne Ieova me talia ne ia tatou e auala i pati atafai mai nisi tino.—Sala. 10:17.

14. Se a te suā auala e fakaasi mai ei ne Ieova me talia ne ia a tatou?

¹⁴ E fakaasi mai foki ne Ieova me talia ne ia tatou, mai te fakaaoga ne ia a taina tali‵tonu ke fakatonutonu tatou māfai e manakogina. E pelā mo te senitenali muamua, ne fakaaoga ne Ieova a te apositolo ko Paulo ke tusi ne ia a tusi fakamalosi e 14 ki taina tali‵tonu. I tusi konā, ne tuku atu i ei ne Paulo ki taina mo tuagane a polopolokiga ‵mafa i se auala alofa. Kaia ne fakamalosi ne Ieova a Paulo ke polopoloki atu latou? A Ieova se Tamana ‵lei, kae e polopoloki ne ia ana tama‵liki “kolā e fiafia a ia ki ei.” (Faata. 3:​11, 12) Tela la, kafai e fai mai ne se tino a pati fakatonutonu kolā e fakavae ki te Tusi Tapu, e se ko tena uiga me ko se fiafia mai a Ieova, kae se fakaasiga me koi alofa eiloa a ia ki a tatou. (Epe. 12:6) Ne a nisi fakamaoniga e fakaasi mai i ei me e talia ne Ieova a tatou?

NISI FAKAMAONIGA ME E TALIA NE IEOVA A TATOU

15. Ko oi a tino e tuku ne Ieova ki ei a tena agaga tapu, kae kaia e tali‵tonu ei tatou ki ei?

¹⁵ E tuku atu ne Ieova a tena agaga tapu ki a latou kolā e talia ne ia. (Mata. 12:18) E mafai o fesili ifo tatou penei, ‘E mata, e fakaasi atu ne au a nisi fuataga o te agaga o te Atua i toku olaga?’ E mata, e lavea ne koe me ko lasi atu tou kufaki i taimi nei i lō mai mua o iloa ne koe a Ieova? A te ‵tonuga loa, ko te lasi o tou fakamasani ke fakaasi atu a fuataga o te agaga o te Atua, ko te lasi foki o tou loto talitonu me e talia ne Ieova a koe!—Onoono ki te pokisi “ A Fuataga o te Agaga ko te . . .”

16. Ko oi e fakaaoga ne Ieova ke talai atu te tala ‵lei, kae e pefea ou lagonaga e uiga ki ei? (1 Tesalonia 2:4)

¹⁶ A Ieova e fiafia o tuku atu te tala ‵lei ki tino kolā e talia ne ia. (Faitau te 1 Tesalonia 2:4.) Mafaufau ki mea aoga ne maua ne te tuagane e igoa ki a Jocelyn ona ko te fakailoa atu ne ia te tala ‵lei ki nisi tino. I te aso e tasi ne ala aka a Jocelyn mo te loto mafatia. “Ne mafaufau ifo au me ko seai soku malosi kae ko seai foki soku aoga,” ko ana pati. “Au e paenia, kae tenā te aso e ‵tau ei au o fano o talai. Tenā ne fai ei taku ‵talo kae fano ki te galuega talai.” Ne fetaui a Jocelyn i te taeao tenā mo Mary, se fafine alofa telā ne talia ne ia ke fai tena akoga faka-te-Tusi Tapu. I masina ki tua ifo, ne fai atu a Mary me ne ‵talo sāle a ia ki te Atua mō se fesoasoani, ke oko ki te taimi ne tukituki atu ei a Jocelyn i tena mataloa. Mai te mafaufau ‵loto ki te tala tenei, ne fai mai a  Jocelyn, “Ko pelā eiloa me ko fai mai a Ieova ki a au, ‘Ko talia ne au koe.’” E tonu, e se ko tino katoa ka fia fakalogo‵logo ki te fekau e talai atu ne tatou. Kae e mafai o mautinoa i a tatou, me e fiafia a Ieova māfai e fai ne tatou te ‵toe mea e mafai ke fakailoa atu a te tala ‵lei ki nisi tino.

17. Ne a au mea ne tauloto mai pati a Vicky e uiga ki te togiola? (Salamo 5:12)

¹⁷ E fakagalue ne Ieova a te aoga o te togiola ki a latou kolā e talia ne ia. (1 Timo. 2:​5, 6) Kae e a māfai koi mafau‵fau eiloa tatou me e se talia ne Ieova tatou, faitalia me e fakatuanaki tatou ki te togiola kae ko oti foki ne papatiso? Ke masaua, me e se ‵tau mo tatou o tali‵tonu faeloa ki ‵tou lagonaga, kae e mafai o tali‵tonu tatou ki a Ieova. E kilo atu a ia ki a latou kolā e fakatuanaki ki te togiola e pelā me amio‵tonu kae tauto mai me ka fakamanuia ne ia latou. (Faitau te Salamo 5:12; Loma 3:26) Ne aoga ki te tuagane ko Vicky a te mafaufau ‵loto ki te togiola. I te aso e tasi, i te otiga ne mafaufau ‵loto a ia ki te togiola, ne fai mai tou fafine: “Ne kufaki eiloa a Ieova i au mō se taimi leva. . . . Kae pelā eiloa me ne fai atu au ki a Ieova: ‘E se mafai o alofa koe ki se vaegā tino e penei mo au. E se mafai ne te taulaga a tau Tama o fakamagalo aku agasala.’” Mai te mafaufau ‵loto ki te meaalofa tenei ko te togiola, ne kamata ei o lavea ne ia te alofa o Ieova ki a ia. E mafai foki o lagona ne tatou a te alofa o Ieova mo tena taliaga, māfai e mafaufau ‵loto tatou ki te togiola.

18. Kafai e tumau tatou i te a‵lofa ki te ‵tou Tamana faka-te-lagi, se a te mea e mafai o mautinoa i a tatou?

¹⁸ E tiga eiloa e taumafai malosi tatou o fakagalue aka a manatu fesoasoani konei mai luga, kāti e mafai o loto vāi‵vai tatou i nisi taimi kae mafau‵fau me e mata, e talia ne Ieova tatou io me ikai. Kafai e tupu te mea tenā, masaua me e talia ne ia a “tino kolā e tumau i te a‵lofa ki a Ia.” (Iako. 1:12) Tela la, ke tumau i te fakapili‵pili atu ki a Ieova kae onoono ki auala katoa e fakaasi mai ei ne ia tena taliaga. Ke masaua faeloa me i a Ieova “e se ‵mao mai i a tatou taki tokotasi.”—Galu. 17:27.