E mafai o fakamagalo a ‵tou agasala e auala fua i te taulaga togiola telā ne ‵togi ne Iesu ki tena toto. (Efe. 1:7) Kae e fai mai te Tusi Tapu: “Ne fa‵ki te Atua kae fakamagalo foki ne ia a agasala kolā ne fai i aso ko ‵teka,” ko tena uiga, ko aso mai mua o ‵togi mai ne Iesu a te togiola. (Loma 3:25) Ne mafai pefea o fai ne Ieova a te mea tenei kae fakatumau a te tulaga ‵lei katoatoa o tena fai mea tonu?

Mai te taimi eiloa ne fakaiku aka ne Ieova ke vau se “fanau” telā ka faka‵sao ne ia a tino fakatuanaki, ne kilo atu a ia ki ei e pelā eiloa me ko oti ne ‵togi atu a te togiola. (Kene. 3:15; 22:18) Ne mautinoa eiloa i te Atua me ka loto fiafia a tena Tama fagasele e tokotasi o ‵togi atu a te togiola i te taimi tonu telā e manako a ia ki ei. (Kala. 4:4; Epe. 10:​7-10) I te nofoga a Iesu i te lalolagi nei, ne tuku atu ne Ieova ki a ia a te malosi ke mafai o fakamagalo a agasala a tino mai mua o ofo mai ne ia te togiola. Ne fai ne ia te mea tenā me iloa ne ia me i te taulaga telā ka ofo mai ne ia i aso fakamuli, ka mafai o fakamagalo ki ei a agasala a tino fakatuanaki.—Mata. 9:​2-6.