1-2. E gasolo pefea o ‵lei atu te olaga mai tua o te papatisoga?

 SE MEA fakafiafia ke papatiso se tino kae fai mo vaega o te kāiga o Ieova. Ka lotoma‵lie eiloa a tino kolā e maua ne latou te tauliaga tenā ki pati a te faisalamo ko Tavita, telā ne fai mai: “E fiafia a te tino telā e filifili kae fakapilipili mai ne koe [Ieova] ke nofo i ou koga ateatea.”—Sala. 65:4.

² E se aumai ne Ieova so se tino ki ana koga ateatea. E pelā mo mea ne sau‵tala ki ei i te mataupu mai mua, e filifili a ia ke fakapilipili atu ki a latou kolā e fakamaoni mai me e ma‵nako ke maua ne latou se va fakataugasoa ‵pili mo ia. (Iako. 4:8) Kafai e tuku atu koe ki a Ieova kae papatiso, ko fakapilipili atu eiloa koe ki a Ieova i se auala fakapito. E mautinoa i a koe me fakamuli ifo, ka “‵ligi atu [ne ia] ki luga i a [koe] a fakamanuiaga ke oko eiloa ki te taimi ko seai se mea koi manakogina”—Mala. 3:10; Iele. 17:​7, 8.

3. Se a te tiute tāua e tauave ne Kelisiano kolā ne tukugina atu kae papatiso? (Failauga 5:​4, 5)

³ E tonu, a te papatisoga ko te kamataga fua. Kafai ko oti koe ne papatiso, ka manako eiloa koe o fai te ‵toe mea e mafai ke ola e ‵tusa mo tau tautoga ne fai i tau tukuatuga, faitalia foki loa a tofotofoga o te fakatuanaki e fepaki mo koe. (Faitau te Failauga 5:​4, 5.) E pelā me se soko o Iesu, ka taumafai koe o tautali i tena fakaakoakoga kae fakalogo ki ana tulafono. (Mata. 28:​19, 20; 1 Pe. 2:21) Ka fesoasoani mai te mataupu tenei ke fai ne koe te mea tenā.

 “TUMAU I TE TAUTALI” I A IESU FAITALIA A FAKALAVELAVE MO TOFOTOFOGA

4. I te auala fea e amo ei ne soko o Iesu se “pou fakasaua”? (Luka 9:23)

⁴ Kafai ko oti koe ne papatiso, e se fakauiga i ei me ka seai ne fakalavelave e fepaki mo koe i tou olaga. Ne fakaasi faka‵lei mai ne Iesu me e ‵tau mo ana soko o amo se “pou fakasaua.” A te ‵tonuga loa, ka fai ne latou te mea tenā “i aso takitasi.” (Faitau te Luka 9:23.) E mata, ne fai atu a Iesu me ka logo‵mae faeloa ana soko? Ikai. Ne faka‵mafa mai ne ia me i tafa o fakamanuiaga kolā ka maua ne latou, ka fe‵paki latou mo tulaga faiga‵ta. A nisi tulaga faiga‵ta konei e fakalogo‵mae ‵ki.—2 Timo. 3:12.

5. Ne a fakamanuiaga ne tauto mai a Iesu me ka maua ne tino kolā e talia ne latou a mea faiga‵ta?

⁵ Kāti ko oti ne fepaki koe mo ‵tekemaiga mai ou kāiga, io me kāti ko oti ne tiakina ne koe tau galuega ‵togi telā e uke a tupe e maua mai ei ko te mea ke fakamuamua a manakoga o te Malo o te Atua. (Mata. 6:33) Kafai e penā loa, e mautinoa i a koe me e lavea eiloa ne Ieova au galuega ne fai mo te fakamaoni. (Epe. 6:10) Kāti ko oti ne lavea ne koe te ‵tonu o pati a Iesu konei: “So se tino e tiaki ne ia tena fale, ana taina, ana tuagane io me ko tena tamana io me ko tena mātua io me ko ana tama‵liki io me ko ana manafa ona ko au mo te tala ‵lei, ka uke faka-100 atu ana mea e maua i te vaitaimi tenei—ko fale, taina, tuagane, mātua, tama‵liki, mo manafa, fakatasi mo fakasauaga—kae ka maua foki ne ia i taimi mai mua, a te ola se-gata-mai.” (Male. 10:​29, 30) A fakamanuiaga kolā ne maua ne koe e sili fakafia atu i lō mea faiga‵ta ne fakafesagai mo koe.—Sala. 37:4.

6. Kaia e manakogina ei ke tumau koe i te taua atu ki “manakoga o te foitino” mai tua o te papatisoga?

⁶ Koi manakogina loa ke taua atu koe ki “manakoga o te foitino” mai tua o te papatisoga. (1 Ioa. 2:16) E fai penā ona ko te mea ne tupu mai eiloa koe i te gafa agasala o Atamu. Kāti e tai ‵pau ou lagonaga i nisi taimi mo te apositolo ko Paulo. Ne tusi mai a ia: “Kae ko toku ‵kano loto tonu eiloa e fiafia ki te tulafono a te Atua, kae e lagona ne au i toku foitino a te suā tulafono telā e taua atu ki te tulafono i toku mafaufau kae e takitaki ne ia au ke pologa ki te tulafono o te agasala telā e nofo i toku foitino.” (Loma 7:​22, 23) E mafai o loto vāivāi koe ona ko au taumafaiga ke ‵teke atu ou vāivāiga. Kae kafai e mafaufau koe ki tau tautoga ne fai ki a Ieova i te taimi ne fai ei tau tukuatuga ki a ia, ka fakamalosi aka ei tau fakaikuga ke ‵teke atu a tofotofoga. A te ‵tonuga loa, a tau tautoga ne fai i tau tukuatuga ka fakafaigofie i ei tou olaga māfai ko fepaki mo tofotofoga. E pefea la?

7. E fesoasoani atu pefea a te tukuatuga ki a Ieova ke tumau koe i te fakamaoni ki a ia?

⁷ Kafai ko fai tau tukuatuga ki a Ieova, ko fakafiti ne koe a koe eiloa. Ko tena uiga ko fakaiku ne koe ke se talia ou manakoga mo ou fakamoemoega kolā e se fiafia ki ei a Ieova. (Mata. 16:24) Tela la, kafai ko fepaki koe mo se tofotofoga, e se manakogina ke fakamāumāu ou taimi o mafaufau me se a tau mea ka fai. Ko oti eiloa ne ‵pono ne koe te mataloa ki so se mea kae ko te mea fua e tasi—ko te fakamaoni ki a Ieova. Ka fakaiku katoatoa aka ne koe ke fakafiafia a Ieova. Mai te fai penā ko fai eiloa koe e pelā mo Iopu. E tiga eiloa ne fepaki a ia mo tofotofoga faiga‵ta ‵ki, ne fai ‵tonu mai a ia: “Ka se tiaki eiloa ne au toku fakamaoni!”—Iopu 27:5.

8. E fesoasoani atu pefea a te mafaufau ‵loto ki te ‵talo o tau tukuatuga ke ‵teke ne koe a tofotofoga?

⁸ Mai te mafaufau ‵loto ki ‵talo ne fai i tau tukuatuga ki a Ieova, ka maua ei ne koe te malosi ke ‵teke so se tofotofoga. E pelā me se fakaakoakoga, e mata, e mafai o fiafai koe ki te avaga a te suā tino? Ikai! Ko leva ne ‵teke atu  koe ki te mea tenā. Kafai e ‵teke ne koe a lagonaga se ‵lei konā, ka se logo‵mae koe fakamuli i te taumafaiga ke tapale kea‵tea. Ka “‵fuli kea‵tea” eiloa koe mai “te ala o tino amio ma‵sei.”—Faata. 4:​14, 15.

9. E fesoasoani atu pefea a te mafaufau ‵loto ki te ‵talo o tau tukuatuga ke fakamuamua ne koe a polokalame faka-te-agaga?

⁹ Kae pefea māfai ko maua ne koe se galuega telā ka fakalavelave atu ki tou kau ki fakatasiga faka-Kelisiano? Ka iloa ‵lei ne koe te mea e ‵tau o fai. A koi tuai o tuku atu te avanoaga tenā ki a koe, ko leva ne fakaiku aka ne koe ke se talia se vaegā galuega penā. Tela la, ka se tofotofogina eiloa koe ke fai se fakaikuga se ‵lei penā mo te mafaufauga me mafai eiloa o kau atu koe ki fakatasiga. Kafai e masaua ne koe te fakaikuga a Iesu ke fakafiafia faeloa tena Tamana, ka ‵teke fakavave eiloa koe ki so se mea telā ka fakafanoanoa ei te Atua, telā ne fai ki ei tau tukuatuga.—Mata. 4:10; Ioa. 8:29.

10. Ka fesoasoani atu pefea a Ieova ki a koe mai tua o te papatisoga ke “tumau i te tautali” i a Iesu?

¹⁰ E tonu, a fakalavelave mo tofotofoga e tuku mai ei se avanoaga ke fakaasi atu me ko oti ne fakaiku aka ne koe ke “tumau i te tautali” i a Iesu. Kafai e fai koe penā, ke talitonu me ka fesoasoani atu a Ieova ki a koe. E fai mai te Tusi Tapu: “Te Atua e fakamaoni, kae ka se talia ne ia ke tofotofogina koutou ke silia atu i te mea telā e mafai o fa‵ki ne koutou, kae kafai ko oko mai a tofotofoga ka tuku mai ne ia a te auala e ‵sao ei koutou ko te mea ke mafai ne koutou o kufaki.”—1 Koli. 10:13.

MEA E MAFAI NE KOE O FAI KE TUMAU I TE TAUTALI ATU I A IESU

11. Se a te auala ‵lei e tasi ke tumau koe i te tautali atu i a Iesu? (Onoono foki ki te ata.)

¹¹ Ne tavini atu a Iesu mo te loto kātoa, kae ne fakapilipili faeloa a ia ki a Ieova i ‵talo. (Luka 6:12) E tonu, tasi o toe auala ‵lei ke tumau  koe i te tautali atu i a Iesu mai tua o tau papatisoga, ko te tumau i te faiga o mea kolā ka fai ei ke pili malosi koe ki a Ieova. E fai mai te Tusi Tapu: “Ke na sa‵sale faka‵lei tatou e ‵tusa mo te ‵tou ga‵solo ki mua i te auala eiloa tenei.” (Fili. 3:16) I nisi taimi ka lagona ne koe a tala o taina mo tuagane kolā ne fakaiku aka ke uke olotou mea e fai i te taviniga ki a Ieova. Kāti ne ‵kau atu latou ki te Akoga mō Tino Talai o te Malo io me olo atu o tavini i se koga e manakogina a tino talai i ei. Kafai e mafai o kausaki atu koe ki fakamoemoega penā, ke na kausaki atu eiloa ki ei. E ma‵nako a tino o Ieova ke uke atu olotou mea e fai i te galuega talai. (Galu. 16:9) Kae pefea la māfai e se mafai o fai koe penā i te taimi nei? Ke mo a ma mafaufau me e se ‵lei koe e pelā mo latou kolā e mafai o fai penā. E manakogina a te kufaki i te fakatau‵telega faka-Kelisiano. (Mata. 10:22) Ke mo a ma manatu māmā ki te tāua o te tavini atu ki a Ieova e ‵tusa mo ou fakanofonofoga mo au mea e mafai o fai. A te mea tenā se auala ‵lei e tasi ke tumau koe i te tautali atu i a Iesu mai tua o te papatisoga.—Sala. 26:1.

12-13. Ne a au mea e mafai o fai māfai ko gasolo ifo ki lalo tou loto finafinau? (1 Kolinito 9:​16, 17) (Onoono foki ki te pokisi “ Ke Tumau i te Fakatau‵telega.”)

¹² Kae pefea la māfai ko iloa ne koe me ko se ‵talo atu koe mo tou loto kātoa kae ko se fiafia foki koe ki tau galuega talai? E pefea la māfai ko se gali ki a koe a te faitau faeloa ki te Tusi Tapu e pelā mo aso mua? Kafai ko ‵tupu a mea penā mai tua o tau papatisoga, ke mo a ma fakaiku fakavave aka me ko galo i a koe te agaga tapu o Ieova. A koe se tino sē ‵lei katoatoa, kae e mafai fua o mafuli‵fuli ou lagonaga. Kafai ko kamata o galo atu tou loto finafinau, ke mafaufau ‵loto ki te fakaakoakoga a te apositolo ko Paulo. E tiga loa ne taumafai a ia o fakaakoako ki a Iesu, ne iloa ne ia me isi ne taimi ka se lasi tena loto finafinau e pelā mo  nisi taimi. (Faitau te 1 Kolinito 9:​16, 17.) Ana muna: “Kafai e fai fitoi ne au, koi maua eiloa ne au te galuega fakasituati telā ne tuku mai ki a au.” I nisi tugapati, ne fakaiku aka ne Paulo ke fakataunu te faiga o tena galuega talai faitalia ana lagonaga i te taimi tenā.

¹³ Ke mo a foki ma talia ne koe ke fakavae au fakaikuga ki ou lagonaga sē ‵lei katoatoa. Ke na fakaiku aka ke fai ne koe te mea tonu faitalia ou lagonaga i te taimi tenā. Kafai e fai faeloa ne koe te mea tonu, e mafai eiloa o ma‵fuli ou lagonaga fakamuli ifo. Ke oko atu ki te taimi tenā, a te tumau i au polokalame ‵lei faka-te-agaga ka fesoasoani atu ke tumau koe i te tautali i a Iesu mai tua o te papatisoga. A tou tumau i te tavini atu mo te kufaki ki a Ieova, ka fai eiloa pelā me se fakamalosiga lasi ki ou taina tali‵tonu.—1 Tesa. 5:11.

“KE TUMAU I TE TOFOTOFO AKA . . . KE TUMAU FAELOA I TE FAKAMAONI AKA”

14. Ne a mea e ‵tau o iloilo ifo faeloa ne koe, kae kaia? (2 Kolinito 13:5)

¹⁴ Ka aoga foki ki a koe māfai e iloilo faeloa ne koe a koe eiloa mai tua o te papatisoga. (Faitau te 2 Kolinito 13:5.) I nisi taimi, se mea ‵lei ke onoono ifo koe ki tou olaga mo au faifaiga ke iloa aka me ko koe koi ‵talo i aso katoa, faitau kae sukesuke ki te Tusi Tapu, kau atu ki fakatasiga, e pelā foki mo te galuega talai. ‵Sala ki auala kolā e mafai o fai ei ke fiafia kae aoga ki a koe a vaega konei o te tapuakiga. E pelā me se fakaakoakoga, ke fesili a vaegā fesili penei ki a koe: ‘E mata, e mafai o fakamatala atu ne au a akoakoga fakavae i te Tusi Tapu ki nisi tino? E mata, e isi ne auala e mafai o fai ei ke fiafia au ki taku galuega talai? E pefea te ‵loto o aku ‵talo, kae e mata e fakaasi atu i ei me e fakalagolago katoatoa au ki a Ieova? E mata, e kau atu faeloa au ki fakatasiga Kelisiano? E mafai pefea o momea aka te ‵lei o toku saga atu mo toku kau ki fakatasiga?’

15-16. Ne a au mea ne tauloto mai te tala o se taina e uiga ki te ‵teke atu ki se tofotofoga?

¹⁵ Se mea ‵lei foki ke iloilo ne koe mo te fakamaoni ou vāivāiga. Ne fai mai ne te taina ko Robert se tala telā e faka‵mafa mai ei te manatu tenā: “I te taimi kāti ko 20 ei oku tausaga, ne isi saku galuega ‵togi sē tumau. I se aso e tasi i te malōlōga mai te galuega, ne ‵kami au ne se fafine e ga‵lue tasi māua ki tena fale. Ana muna me ko māua tokolua fua ka ‵nofo i te fale kae ka ‘fia‵fia māua i ei.’ Muamua la, ne fai atu ne au a nāi fakamasakoga, kae fakamuli ne fai atu au ikai kae fakamatala atu a pogai.” Ne ‵teke ne Robert te tofotofoga tenā, kae fakamālō eiloa ki ei. Fakamuli ifo,  ne toe mafaufau a ia ki te mea ne tupu kae lavea ne ia me ne mafai o tali atu a ia i se auala tai ‵lei atu. Ne fai ‵tonu mai a ia: “Ne seki ‵teke ne au te tofotofoga tenā e pelā mo Iosefa i te ‵tekeatuga ki te avaga a Potifala. (Kene. 39:​7-9) A te ‵tonuga loa, ne poi au me ne faigata ki a au ke ‵teke atu ki ei. Ne fesoasoani mai te fakalavelave tenei ke lavea ne au me ‵tau o toe fakamalosi aka toku fesokotakiga mo Ieova.”

¹⁶ Ka aoga eiloa ki a koe māfai e iloilo ifo ne koe a koe eiloa e pelā mo te mea ne fai ne Robert. Kafai foki loa ne manuia koe o ‵teke atu se tofotofoga, ke fesili ifo ki a koe eiloa penei, ‘E pefea te leva ne faka‵tali au ke fai atu ikai?’ Kafai e manakogina ke galue koe ki ei, ke mo a ma loto vāivāi. Ke fiafia me ko iloa nei ne koe tou vāivāiga tenā. ‵Talo e uiga ki ei, kae gasue o fakamalosi aka tau fakaikuga ke ola e ‵tusa mo tulaga o Ieova i mea tau amioga.—Sala. 139:​23, 24.

17. E aofia pefea a te igoa o Ieova i te tala o Robert?

¹⁷ Koi isi foki ne nisi mea e tauloto ne tatou mai te tala o Robert. Ne toe fai mai a ia: “Mai tua o te seki taliaga ne au te ‵kamiga a te fafine tenā, ne fai mai a ia, ‘Koe ko pāsi!’ Ne fesili atu au me se a te uiga o ana pati. Ne fai mai tou fafine me ne fai atu sena taugasoa telā se Molimau mua, me i talavou Molimau katoa e ola i se olaga magalua kae ka talia fua ne latou so se avanoaga ke gutugutulua latou. Tenā ne fai atu a ia ki tena taugasoa me ka ‵tofo ne ia te mea tenā ki a au. Ne fiafia au i te taimi tenā me ne fakaaloalo au ki te igoa o Ieova.”

18. Se a te mea ka fakaiku aka ne koe ke fai mai tua o te papatisoga? (Onoono foki ki te pokisi “ Se Fakasologa o Mataupu Telā ka Gali ki a Koe.”)

¹⁸ Kafai ko tuku atu a koe eiloa ki a Ieova kae papatiso, ko fakaasi atu ne koe me ko manako koe o faka‵malu tena igoa faitalia me ne a mea e ‵tupu. Kae e mafai o talitonu koe me iloa ne Ieova a fakalavelave e fepaki mo koe mo tofotofoga e ‵teke atu koe ki ei. Ka fakamanuia eiloa ne ia au taumafaiga ke tumau i te fakamaoni. Ke talitonu me e auala i tena agaga tapu, e mafai o tuku atu ne ia ki a koe a te malosi ke fai penā. (Luka 11:​11-13) Mai te fesoasoani o Ieova, ka mafai eiloa ne koe o tumau i te tautali i a Iesu mai tua o tau papatisoga.