1. Se a te ‵kamiga e tuku mai ne Ieova ki ana tino tapuaki? (Onoono foki ki te ata.)

 KO OI te tino e mafai o fakamolemole tatou ki ei ke maua se fakamafanafanaga mo se takitakiga? E iloa ne tatou te tali ki te fesili tenā. E mafai o fakapili‵pili atu tatou ki a Ieova te Atua i ‵talo. E ‵kami ne ia tatou ke fakapili‵pili atu ki a ia. E manako a ia ke ‵talo faeloa tatou—ke “‵talo i taimi katoa.” (1 Tesa. 5:17) E mafai o fakapili‵pili atu tatou ki a ia i ‵talo e aunoa mo se ‵togi kae ‵sala atu ki tena takitakiga i feitu katoa o ‵tou olaga. (Faata. 3:5, 6) Ona ko ia se Atua kaimalie, e se fakatapula ne Ieova a taimi e mafai o ‵talo atu tatou ki a ia.

2. Ne a mea ka sau‵tala tatou ki ei i te mataupu tenei?

² E fakatāua ne Ieova te meaalofa ko te ‵talo. Kae mai mea katoa e fai ne tatou, kāti e taumafai eiloa tatou o ‵sala se taimi ke ‵talo. E mafai foki o iloa ne tatou a te manakoga ke momea aka te ‵lei o ‵tou ‵talo. E loto fakafetai tatou, me e mafai o maua ne tatou a fakamalosiga e uke mo se takitakiga mai te Tusi Tapu. I te mataupu tenei, ka sau‵tala tatou ki te auala e mafai o fakaavanoa ‵tou taimi ke ‵talo, mai te suke‵suke ki te fakaakoakoga a Iesu. Ka onoono foki tatou ki auala e mafai o momea aka te ‵lei o ‵tou ‵talo mai te aofia ne tatou a mea tāua e lima.

3. Se a te mea ne iloa ne Iesu e uiga ki ‵talo?

³ Ne malamalama a Iesu i te tāua o te ‵talo ki a Ieova. A koi tuai o vau ki te lalolagi nei, ne lavea ne Iesu a tena Tamana e tali ne ia a ‵talo a tāgata mo fāfine fakamaoni. E pelā me se  fakaakoakoga, ne nofo atu a Iesu i tafa o tena Tamana i te taimi ne tali ne Ia a ‵talo a ana tavini fakamaoni ko Hana, Tavita, Elia mo nisi tino fakamaoni. (1 Samu. 1:10, 11, 20; 1 Tupu 19:4-6; Sala. 32:5) E setioa eiloa o akoako ne Iesu ana soko ke ‵talo atu mo te loto tali‵tonu i taimi katoa!—Mata. 7:7-11.

4. Ne a mea e tauloto ne tatou mai ‵talo a Iesu?

⁴ E auala i ana ‵talo totino ki a Ieova, ne tuku atu ne Iesu se fakaakoakoga ke tau‵tali ki ei ana soko. I tena galuega talai, ne ‵talo a Iesu i taimi katoa. Ne ‵tau o fakaavanoa ne ia se taimi ke ‵talo, me ne fakalavelave faeloa a ia kae tokouke a tino e olo atu faeloa ki a ia. (Male. 6:31, 45, 46) Ne alausu a ia i tafataeao ko te mea ke mafai o isi sena taimi ke ‵talo atu i a ia eiloa. (Male. 1:35) Kae i se taimi e tasi, ne ‵talo a ia i te po kātoa a koi tuai o fai ne ia se fakaikuga tāua. (Luka 6:12, 13) Kae i tena toe po a koi tuai o mate, ne ‵talo faeloa a Iesu ko te mea ke fakataunu a te ‵toe vaega faigata o tena galuega i te lalolagi.—Mata. 26:39, 42, 44.

5. E mafai pefea o fakaakoako tatou ki a Iesu māfai e ‵talo?

⁵ E akoako mai a Iesu me faitalia te fakalave‵lave o tatou, e ‵tau o fakaavanoa a ‵tou taimi ke ‵talo. E pelā mo Iesu, kāti e manakogina ke ‵sala ne tatou se taimi ke ‵talo—ke ala aka i te vaveao io me tai ‵pula malie i se taimi o te po. Kafai e fai penā, ko fakaasi atu ei ne tatou a te loto fakafetai ki a Ieova mō te meaalofa tenā. E masaua ne te tuagane e igoa ki a Lynne a te auala ne fakaasi atu ne ia te loto fakafetai i te taimi muamua ne iloa ne ia o ‵talo. Ne fai mai a ia, “I te taimi ne iloa ne au me e mafai o faipati atu au ki a Ieova i so se taimi, ne fesoasoani mai te mea tenā ke kilo atu au ki a ia e pelā me ko toku Taugasoa pili kae manako ke momea aka te ‵lei o aku ‵talo.” E mautinoa eiloa me e tokouke a tino e penā olotou lagonaga. Tela la, ke na sau‵tala nei tatou ki mea tāua e lima kolā e mafai o aofia i ‵tou ‵talo.

6. E ‵tusa mo te Fakaasiga 4:10, 11, ne a mea e ‵tau o maua ne Ieova?

⁶ Ke avatu a vikiga ki a Ieova. I se fakaasiga fakaofoofogia, ne lavea ne te apositolo ko Ioane a toeaina e toko 24 i te lagi e tapuaki ki a Ieova. E tavae ne latou a te Atua, kae fai atu me e ‵tau o maua ne ia a “te vikiga mo te  ‵malu mo te malosi.” (Faitau te Fakaasiga 4:10, 11.) E uke foki a pogai e ‵tau ei o avatu ne agelu fakamaoni a vikiga mo te ‵malu ki a Ieova. E ‵nofo fakatasi latou mo ia i te lagi kae e iloa faka‵lei ne latou a ia. E lavea faka‵lei ne latou ana uiga e auala i ana mea e fai. Kafai e lavea ne latou a galuega ‵gali a Ieova, e fakamalosi ei latou ke ‵viki atu ki a ia.—Iopu 38:4-7.

7. Ne a vikiga o Ieova e mafai o fai atu ne tatou?

⁷ E ma‵nako foki tatou o aofia a vikiga ki a Ieova i ‵tou ‵talo, mai te fakaasi atu a mea ‵gali e uiga ki a ia. I te taimi e faitau kae sukesuke koe ki te Tusi Tapu, taumafai ke lavea a uiga ‵gali o Ieova kolā e ‵gali ‵ki ki a koe. (Iopu 37:23; Loma 11:33) Ko fai atu ei ki a Ieova a ou lagonaga e uiga ki ei. E mafai foki o avatu ne tatou a vikiga ki a Ieova ona ko tena fesoasoani ki a tatou mo ‵tou kāiga faka-te-agaga katoa. E atafai kae puipui faeloa ne ia tatou.—1 Samu. 1:27; 2:1, 2.

8. Ne a nisi pogai e fakafetai ei tatou ki a Ieova? (1 Tesalonia 5:18)

⁸ Fakafetai atu ki a Ieova. E maua ne tatou a pogai e uke ke fakafetai atu ki a Ieova i ‵talo. (Faitau te 1 Tesalonia 5:18.) E mafai o fakafetai atu tatou ki a ia mō so se mea ‵lei e maua ne tatou; me i meaalofa ‵lei katoa e aumai i a ia. (Iako. 1:17) E pelā me se fakaakoakoga, e mafai o fakaasi atu ne tatou a te loto fakafetai ona ko te gali o te lalolagi mo mea fakaofoofogia kolā ne faite ne ia. E mafai foki o fakaasi atu te ‵tou loto fakafetai mō ‵tou ola, ‵tou kāiga, taugasoa mo te ‵tou fakamoemoega. Kae e ma‵nako tatou o fakafetai ki a Ieova mō te talia mai ke maua ne tatou se va fakataugasoa tāua mo ia.

9. Kaia e manakogina ke ati aka ne tatou te loto fakafetai ki a Ieova?

⁹ Kāti e manakogina ke fai ne tatou se taumafaiga fakapito ke mafau‵fau ki pogai e ‵tau ei o loto fakafetai tatou ki a Ieova. E ola tatou i se lalolagi e seai se loto fakafetai. A tino e ‵saga faeloa ki mea e ma‵nako latou ki ei i lō mea e mafai ne latou o fai ke fakaasi atu te lotou fakafetai ki mea ko maua ne latou. Kafai ko kamata o fakaakoako tatou ki uiga konā, e mafai eiloa o fai ‵tou ‵talo e pelā me se fakasologa fua o fakamolemole e fai atu. Ke ‵kalo kea‵tea mai te faifaiga tenā, e ‵tau o tumau tatou i te ati aka kae fakaasi atu te loto fakafetai ki mea katoa ne fai ne Ieova mō tatou.—Luka 6:45.

10. Ne fesoasoani atu pefea a lagonaga loto fakafetai ke mafai ne se tuagane o kufaki? (Onoono foki ki te ata.)

¹⁰ A te uiga loto fakafetai e mafai o fesoasoani mai ke kufaki ne tatou a mea faiga‵ta. Mafaufau ki te tala o Kyung-sook, telā e maua i te lōmiga o Te Faleleoleo Maluga i a Ianuali 15, 2015. Ne pokotia a ia ne te kenisa o te māmā. “Ne pokotia malosi au i te tala e uiga ki toku masaki,” ne fai mai a ia. “Ne mafaufau au me ko seai soku fakamoemoega, kae ne mataku ‵ki eiloa au.” Se a te mea ne fesoasoani atu ke kufaki a ia? Ne fai mai a ia me  i po katoa a koi tuai a ia o moe, ne fanaka a ia ki luga i te tuafale o tena fale kae ‵talo atu i se leo maluga e uiga ki mea e lima kolā e loto fakafetai a ia ki ei i te aso tenā. Ne fai ei ke sē manavase a ia kae fakamalosi aka ei a tena alofa ki a Ieova. Ne iloa ne ia te auala ne fesoasoani atu a Ieova ki ana tavini fakamaoni māfai ko fe‵paki mo tulaga faiga‵ta, kae ne kamata o lavea ne ia me sili atu te uke o fakamanuiaga e maua ne tatou i lō mea faiga‵ta. E pelā mo Kyung-sook, e uke ‵ki a pogai e ‵tau o loto fakafetai tatou ki a Ieova, faitalia foki loa me fakafesagai atu tatou ki se fakalavelave. A te fakaasi atu o te loto fakafetai ki a ia i ‵talo e mafai o fesoasoani mai ke kufaki kae fakatumau te ‵tou paleni ‵lei i mea tau lagonaga.

11. Kaia ne manakogina ei ne soko o Iesu a te loto toa mai tua o te fokiatuga a Iesu ki te lagi?

¹¹ Fakamolemole atu ki a Ieova ke maua te loto toa i te galuega talai. Mai mua malie o foki atu ki te lagi, ne fakamasaua atu ne Iesu ki ana soko a te lotou galuega ke tuku atu se molimau e uiga ki a ia “i Ielusalema, i Iuta kātoa mo Samalia, ke oko eiloa ki toe koga ‵mao i te lalolagi.” (Galu. 1:8; Luka 24:46-48) E se leva, kae puke ne takitaki Iutaia a te apositolo ko Petelu mo Ioane kae avatu ki mua o te Sanetulini, kae fakatonu atu ke fakagata te galuega talai a tāgata fakamaoni konei, kae fakamatakutaku atu foki lāua. (Galu. 4:18, 21) Ne ‵saga atu pefea a Petelu mo Ioane ki ei?

12. E ‵tusa mo te Galuega 4:29, 31, ne a mea ne fai ne soko?

¹² I te lā tali ki fakamatakutakuga a takitaki lotu Iutaia, ne fai atu a Petelu mo Ioane: “Kafai e tonu i te kilokiloga a te Atua ke faka‵logo māua ki a koutou i lō te Atua, fakamasino aka eiloa ne koutou. Kae e pelā mo māua, e se mafai eiloa o fakagata te mā fai‵pati ki mea ko oti ne lavea kae lagona ne māua.” (Galu. 4:19, 20) I te ‵talaga o Petelu mo Ioane, ne ‵talo atu a soko konei ki a Ieova e uiga ki te faiga o tena loto. Ne ‵talo atu lāua, penei: “Talia mai au tavini ke fai‵pati atu faeloa ne latou tau muna mo te loto ‵toa.” Ne tali eiloa ne Ieova a te ‵talo tenā.—Faitau te Galuega 4:29, 31.

13. Ne a mea e mafai o tauloto ne tatou mai te fakaakoakoga a Jin-hyuk?

¹³ E mafai o fakaakoako tatou ki soko konei mai te tumau i te talai faitalia loa me fakatonu mai a tino pule o malo ke taofi. Mafaufau ki te fakaakoakoga a Jin-hyuk, se taina telā ne falepuipui ona ko tena sē kau ki se feitu i mea fakapolitiki. I te falepuipui, ne ‵tofi a ia ke tausi atu ki nisi pagota i se tamā potu, kae e se talia ke faipati a ia ki a latou e uiga ki so se mea telā e se fetaui mo tena galuega, e aofia ei mea faka-te-Tusi Tapu. Ne ‵talo atu a ia ke maua te loto toa mo te poto ke faipati a ia ki te munatonu i so se avanoaga e maua ne ia. (Galu. 5:29) Ne fai mai a ia: “Ne tali ne Ieova aku ‵talo mai te tukumaiga ne ia te loto malosi mo te poto ke kamata ne au ne akoga faka-te-Tusi Tapu i mataloa o potu takitasi mō se leva e lima minute. Kae i te po, e tusi aku tusi ko te mea ke tufa ne au ki nisi pagota i te suā aso.” E mafai foki o loto tali‵tonu tatou me ka fesoasoani mai a Ieova ke fakaoti faka‵lei a te ‵tou galuega talai. E pelā mo Jin-hyuk, e mafai o ‵talo atu tatou ke maua te loto toa mo te poto.

14. Se a te mea e mafai o fesoasoani mai māfai e fakafesagai tatou mo fakalavelave? (Salamo 37:3, 5)

¹⁴ Fakamolemole ki a Ieova ke fesoasoani mai ke kufaki tatou i ‵tou fakalavelave. E tokouke tatou e logo‵mae i se masaki io me ko mea tau lagonaga, te galo atu o se tino pele, se fakalavelave i te kāiga, fakasauaga, io me  se isi fakalavelave aka. Kae e fai ne vaegā fakalavelave pelā mo famai ‵pisi mo taua ke na faigata aka eiloa o kufaki i tulaga penā. ‵Ligi atu ki tua a mea i tou loto ki a Ieova. Fakaasi atu ki a ia tou tulaga e pelā eiloa me fakaasi atu ne koe ki sou taugasoa pili. Ke loto talitonu me ka “gasuesue a [Ieova] mō koe.”—Faitau te Salamo 37:3, 5.

15. E fesoasoani mai pefea te ‵talo ki a tatou ke “kufaki i puapuaga”? Taku mai se fakaakoakoga.

¹⁵ A te tumau faeloa i te ‵talo ka fesoasoani mai ke “kufaki i puapuaga.” (Loma 12:12) E iloa ne Ieova a mea e fe‵paki mo ana tino tapuaki—“e lagona ne ia te lotou ‵tagi mō se fesoasoani.” (Sala. 145:18, 19) Ne lavea ne Kristie, se paenia ko 29 ana tausaga a te ‵tonu o te mea tenā. Se mea fakapoi me ne kamata o masaki ‵ki tou fafine. Ona ko te mea tenā, ne loto mafatia ‵ki a ia. Fakamuli ifo, ne iloa aka ne ia me ne maua ne tena mātua se masaki telā e mafai o iku atu ki te mate. Ne fai mai a Kristie: “Ne ‵talo malosi au ki a Ieova ke tuku mai te malosi e manakogina i aso takitasi. Ne taumafai au o fakatumau taku polokalame faka-te-agaga mai te kau ki fakatasiga kae fai aku sukesukega totino.” Ne toe fai mai a ia: “Ne fesoasoani mai te ‵talo ke kufaki au i taimi faiga‵ta. Ne iloa ne au me e fakatasi mai faeloa a Ieova, kae ne fai te mea tenā e pelā me se fakamafanafanaga sili ki a au. E tiga eiloa ne seki ‵lei fakavave au, ne tali ne Ieova aku ‵talo e auala i te tukumaiga o te filemu o te mafaufau mo se loto tokagamalie.” Ke mo a ma puli i a tatou me e “iloa ne Ieova o faka‵sao a tino kolā e tapuaki fakamaoni ki te Atua mai i olotou tofotofoga.”—2 Pe. 2:9.

16. Kaia e manakogina ei ne tatou te fesoasoani o Ieova ke ‵teke atu se tofotofoga?

¹⁶ Fakamolemole ki a Ieova ke fesoasoani mai ke ‵teke atu a tofotofoga. E pelā me ne tino sē ‵lei katoatoa, e taumafai faeloa tatou o ‵teke atu se tofotofoga ke fai se mea ‵se. E fai ne Satani a mea katoa e mafai ne ia o fai ke se mafai ne tatou o fakafesagai atu ki tofotofoga.  Tasi o auala e taumafai a ia o fakalailai ‵tou mafaufauga, ko fakafiafiaga sē ‵ma. E mafai ne vaegā fakafiafiaga penā o faka‵fonu ‵tou mafaufau ki manatu lai‵lai—mafaufauga kolā e fakamasei ne ia ‵tou loto kae mafai o iku atu ki te faiga o se agasala matagā.—Male. 7:21-23; Iako. 1:14, 15.

17. E mafai pefea o ola tatou e ‵tusa mo ‵tou fakamolemole ke ‵teke atu a tofotofoga? (Onoono foki ki te ata.)

¹⁷ E manakogina ne tatou a te fesoasoani o Ieova ke manumalo i se tofotofoga ke fai se mea ‵se. Ne aofia ne Iesu a te fakamolemole tenā i tena ‵talo fakaakoako: “Kae sa takitakigina matou ki se tofotofoga, kae faka‵sao mai matou mai te tino masei.” (Mata. 6:13) A Ieova e manako o fesoasoani mai, kae e ‵tau o fakamolemole atu tatou ki a ia mō se fesoasoani. E ‵tau foki o ola tatou e ‵tusa mo ‵tou ‵talo. Ke taumafai tatou o ‵kalo kea‵tea mai te fai‵tau kae fakalogo‵logo ki manatu ‵se kolā ko salalau i te lalolagi a Satani. (Sala. 97:10) E mafai o faka‵fonu ‵tou mafaufau ki mafaufauga aoga mai te fai‵tau kae suke‵suke ki te Tusi Tapu. A te ‵kau ki fakatasiga mo te galuega talai ka puipui foki ne ia ‵tou mafaufauga. E tauto mai a Ieova me kafai e fai tatou penā, ka se talia ne ia ke tofotofogina tatou ke silia atu i te mea telā e mafai o fa‵ki ne tatou.—1 Koli. 10:12, 13.

18. Ne a mea e manakogina ke fai ne tatou māfai ko ‵talo?

¹⁸ E ‵tau mo tatou taki tokotasi o ‵talo faeloa ke tumau i te fakamaoni ki a Ieova i taimi faiga‵ta konei o aso fakaoti. Fakaavanoa se taimi i aso takitasi ke ‵talo atu mo te loto kātoa. E manako a Ieova ke ‘‵ligi atu ki tua a mea i ‵tou loto ki a ia’ i ‵talo. (Sala. 62:8) Ke avatu a vikiga ki a Ieova kae fakafetai atu mō mea katoa ne fai ne ia. Fakamolemole atu ki a ia ke fesoasoani mai ke loto malosi koe i te galuega talai. Akai atu ki a ia mō se fesoasoani ke mafai o fakafesagai atu koe ki so se fakalavelave kae ke ‵teke atu so se tofotofoga e mafai o fepaki mo koe. Ke mo a ma talia so se mea io me se tino ke taofi ne ia koe mai te ‵talo atu faeloa ki a Ieova. Kae i te auala fea ka tali mai ne Ieova au ‵talo? Ka sau‵tala eiloa tatou ki te fesili tāua tenā i te suā mataupu.