1-2. E pokotia pefea a tatou katoa i faifaiga sē ‵tonu?

 NE FAI atu ne Iesu se tala fakatusa e uiga ki se fafine ko mate tena avaga telā ne fakamolemole atu faeloa ki se famasino ke fai ne ia se fakamasinoga tonu mō tou fafine. E mautinoa me ne malamalama ‵lei a soko o Iesu i lagonaga o te fafine tenā me tokouke a tino i aso konā ne fai fakamasei ne nisi tino. (Luka 18:1-5) E aoga foki te tala tenā ki a tatou i aso nei, me ko oti ne fe‵paki a tatou katoa mo faifaiga fakamasei penei i nisi taimi.

² E tokouke a tino i aso nei e fakailoga tino, e se a‵lofa, kae kaima‵nako, tela la, e se ‵poi tatou māfai e fai mai a uiga konā ki a tatou. (Fai. 5:8) Kae kāti ka fanoa‵noa malosi tatou māfai e fakaasi mai ne se taina io me se tuagane a faifaiga sē ‵tonu ki a tatou. E tonu, e se ‵teke atu a ‵tou taina mo tuagane ki te munatonu. Kae ko latou e se ‵lei katoatoa. Tela la, e uke a mea e mafai o tauloto ne tatou mai te auala ne saga atu a Iesu ki faifaiga sē ‵tonu mai tino ‵teke. Kafai e mafai o kufaki ne tatou a mea ma‵sei e fai mai ne tino ‵teke, e ‵tau o lasi atu te ‵tou kufaki i ‵tou taina tali‵tonu! E pefea a lagonaga o Ieova ona ko faifaiga sē ‵tonu e fai mai ne tino mai tua o te fakapotopotoga io me ko tino i loto i te fakapotopotoga? E mata, e saga mai a ia?

3. E mata, e saga mai a Ieova ki a tatou māfai ko fe‵paki mo faifaiga sē ‵tonu, kae kaia?

³ E saga tonu mai eiloa a Ieova ki faifaiga e fai ki a tatou. “A Ieova e fiafia ki te fakamasinoga tonu.” (Sala. 37:28)  E fai mai a Iesu me i a Ieova “ka fai fakavave eiloa ne ia te fakamasinoga tonu” i te taimi tonu. (Luka 18:7, 8) Kae ko pili o fakaseai ne ia a mea kolā e fakalogo‵mae mai ki a tatou mo faifaiga sē ‵tonu katoa.—Sala. 72:1, 2.

4. Se a te fesoasoani e maua ne tatou mai i a Ieova i aso nei?

⁴ I te taimi koi faka‵tali tatou ke manumalo te amiotonu, ka fesoasoani mai a Ieova ke fa‵ki tatou i faifaiga sē ‵lei. (2 Pe. 3:13) E akoako mai ke mo a ma fai ne tatou se mea valea māfai ko fai mai ne faifaiga sē ‵tonu ki a tatou. E auala i tena Tama, e tuku mai ne Ieova te ‵toe fakaakoakoga ‵lei ki te auala ke fakafesagai atu ki faifaiga sē ‵tonu. Kae tuku mai ne ia a pati fakatonutonu aoga ke fakagalue māfai ko fe‵paki mo faifaiga sē ‵tonu.

KE FAKAETEETE I TE AUALA E SAGA ATU KOE KI FAIFAIGA SĒ ‵TONU

5. Kaia e ‵tau o fakaeteete tatou i te auala e ‵saga atu ei ki faifaiga sē ‵tonu?

⁵ Kāti ka logo‵mae malosi tatou kae mafatia foki ona ko faifaiga sē ‵tonu. (Fai. 7:7) Konā foki a lagonaga ne maua ne tavini fakamaoni e pelā mo Iopu mo Sapakuka. (Iopu 6:2, 3; Sapa. 1:1-3) A mea konei ne lagonaga masani, kae e ‵tau mo tatou o fakaeteete i te auala e ‵saga atu ki ei ko te mea ke mo a ma fai ne tatou se mea valea.

6. Se a te akoakoga e tauloto ne tatou mai te tala o Apisaloma? (Onoono foki ki te ata.)

⁶ E mafai o ‵saga atu tatou ki faifaiga sē ‵tonu mai te taumafai o toe taui atu a mea ma‵sei ne fai mai ki a tatou. A te fai penā ka fai fua i ei ke lasi atu te fakalavelave. Mafaufau ki te tala o Apisaloma te tama tagata a te tupu ko Tavita. Ne kaitaua malosi a ia i tena logoga me ne pukemālō tena tuagane ko Tamala ne tena āfa taina ko Amanono. E ‵tusa mo te Tulafono a Mose, ne ‵tau eiloa o tamate a Amanono ona ko tena mea ne fai. (Levi. 20:17) E tiga loa e malamalama tatou i te kaitaua o Apisaloma, kae e se i o ia te tiute ke taui atu a te mea masei ne fai ne tena taina.—2 Samu. 13:20-23, 28, 29.

7. Ne pokotia pefea se faisalamo i faifaiga sē ‵tonu e fai ne tino?

⁷ Kafai e foliga mai me e seai se fakasalaga e maua ne tino ma‵sei, kāti ka mafaufau koe me e mata koi tāua ke fai ne tatou te mea tonu io me ikai. Mafaufau ki te faisalamo telā ne lavea ne ia te olaga gali o tino amio ma‵sei kolā e fai ne latou a faifaiga sē ‵tonu ki tino amio‵tonu.  “Konei a tino amio ma‵sei kolā e faigofie ki a latou a mea katoa,” ko ana pati. (Sala. 73:12) Ne mafatia malosi foki a ia i faifaiga sē ‵tonu ne lavea ne ia, tenā toeitiiti ko galo tena loto talitonu ki mea ‵gali e maua ne ia i tena taviniga ki a Ieova, i ana pati: “Kafai e taumafai au ke malamalama i ei, e fakalavelave mai faeloa te mea tenā ki a au.” (Sala. 73:14, 16) A te ‵tonuga loa, ne fai ‵tonu mai a ia: “E pelā mo au, a oku vae ko pili eiloa o takasē‵se; a oku vae ko pili o ‵mole.” (Sala. 73:2) Ne tupu foki se mea penā ki se taina telā ka fakaigoa ne tatou ki a Alberto.

8. Ne pokotia pefea se taina i faifaiga sē ‵tonu ne fai ki a ia?

⁸ E isi ne ‵losiga ‵se ne fai me ne ‵galo i a Alberto a tupe a te fakapotopotoga. Ona ko te mea tenā, ne tapale kea‵tea ana tauliaga kae ko se āva foki ki a ia a tino e tokouke kolā ne ‵logo i te mea ne tupu. “Ne kaitaua malosi au kae fanoanoa foki,” ko ana pati. Ne pokotia tena feitu faka-te-agaga ona ko ana lagonaga logo‵mae konā, kae ne seki toe kau atu ki te fakapotopotoga mō se lima tausaga. E fakaasi mai i te tala tenei a te mea e mafai o tupu māfai ko kaitāua tatou ki faifaiga sē ‵tonu ne fai ki a tatou.

FAKAAKOAKO KI TE AUALA NE FAKAFESAGAI ATU A IESU KI FAIFAIGA SĒ ‵TONU

9. Ne a faifaiga sē ‵tonu ne kufaki i ei a Iesu? (Onoono foki ki te ata.)

⁹ Ne fakaasi mai ne Iesu te ‵toe fakaakoakoga ‵lei katoatoa ke fakafesagai atu ki faifaiga sē ‵tonu. Mafaufau ki faifaiga sē ‵tonu ne fepaki mo ia mai tino i loto i tena kāiga mo tino mai tua. Ne fai atu ana kāiga sē tali‵tonu me i a ia ko fakavalevale, kae ‵losi  atu a takitaki lotu i a ia e ga‵lue tasi mo temoni, kae ne fakatauemu atu a sotia Loma ki a ia, fakasaua, kae tamate ne latou a ia. (Male. 3:21, 22; 14:55; 15:16-20, 35-37) Kae ne kufaki ne Iesu a faifaiga sē ‵tonu katoa konā mo nisi mea aka e aunoa mo te taui atu ki a latou. Ne a mea e tauloto ne tatou mai te tala tenei?

10. Ne fakafesagai atu pefea a Iesu ki faifaiga sē ‵tonu? (1 Petelu 2:21-23)

¹⁰ Faitau te 1 Petelu 2:21-23. a Ne tuku mai ne Iesu se fakaakoakoga ‵lei katoatoa ke tau‵tali i ei māfai ko isi ne faifaiga sē ‵tonu e fe‵paki mo tatou. Ne iloa ne ia te taimi ke se faipati mo te taimi ke faipati ei. (Mata. 26:62-64) Ne seki ai sena tali ne fai atu ki so se ‵losiga ‵se ne fai atu ki a ia. (Mata. 11:19) Kae kafai ko faipati atu a ia, e se fakamasei io me fakamatakutaku ne ia a tino fakasaua. Ne loto pulea a Iesu me “ne tuku atu ne ia a ia eiloa ki te Atua telā e fai ne ia a te fakamasinoga amiotonu.” Ne iloa ne Iesu me e tāua atu te kilokiloga a Ieova ki mea. Ne talitonu a ia me ka fai ne Ieova te fakamasinoga tonu i te taimi tonu.

11. Ne a nisi auala e mafai ei o pule faka‵lei tatou ki ‵tou pati? (Onoono foki ki ata.)

¹¹ E mafai o fakaakoako tatou ki a Iesu māfai e pule faka‵lei ki ‵tou pati i te taimi e fai mai ei a faifaiga sē ‵tonu ki a tatou. A nisi faifaiga sē ‵tonu ne tamā mea fua kae mafai fua o fakamagalo atu ne tatou. Io me e mafai o se fai‵pati tatou ke mo a ma lasi te fakalavelave. (Fai. 3:7; Iako. 1:19, 20)  I nisi taimi, e ‵tau eiloa o fai‵pati tatou māfai e fai mai ki a tatou a faifaiga sē ‵tonu io me māfai e ‵tau o ‵pulu ne tatou te munatonu. (Galu. 6:1, 2) Kafai ko fai‵pati tatou, taumafai ke fai‵pati atu i se auala ‵lei kae āva.—1 Pe. 3:15. b

12. E tuku atu pefea ne tatou a tatou eiloa ki “te Atua telā e fai ne ia a te fakamasinoga amiotonu”?

¹² E mafai foki o fakaakoako tatou ki a Iesu mai te tuku atu o tatou eiloa ki “te Atua telā e fai ne ia a te fakamasinoga amiotonu.” Kafai e se tonu te fakamasinoga io me fai mai ne faifaiga sē ‵tonu ki a tatou, e tali‵tonu tatou me iloa ‵lei ne Ieova te mea tonu. E mafai o fesoasoani mai te loto talitonu tenā ke kufaki tatou i faifaiga sē ‵tonu konā me iloa ne tatou me ka faka‵tonu aka ne Ieova a faifaiga konā. A te tuku atu ne tatou a mea ki a Ieova, ko puipui ei ne tatou a ‵tou loto mai te kaitaua io me ko te ita fakamoemoe. A lagonaga konā e mafai o fai ei ke fai ne tatou se mea masei, ke galo te ‵tou fiafia, kae fakamasei ‵tou fesokotakiga mo Ieova.—Sala. 37:8.

13. Ne a mea e mafai o fesoasoani mai ke fakafesagai atu ki faifaiga sē ‵tonu?

¹³ E tonu, ka se mafai ne tatou o tau‵tali ki te fakaakoakoga ‵lei katoatoa a Iesu. Nisi taimi, e fai ne tatou a mea kolā ka sala‵mo fakamuli tatou i ei. (Iako. 3:2) Kae ko nisi faifaiga sē ‵tonu ne fai mai ki a tatou e mafai o fakalogo‵mae mai i ‵tou olaga kātoa. Kafai e penā loa, ke talitonu me iloa ne Ieova tou tulaga. Kae e malamalama foki a Iesu i ou lagonaga me ne fepaki foki a ia mo faifaiga sē ‵tonu. (Epe. 4:15, 16) I tafa o te fakaasi mai ne ia te fakaakoakoga ‵lei katoatoa a Iesu, ne tuku mai foki ne Ieova a manatu fesoasoani aoga kolā e fesoasoani mai ke iloa ne tatou o fakafesagai atu ki faifaiga sē ‵tonu. Ke mafau‵fau tatou ki fuaiupu e lua mai te tusi ko Loma kolā e mafai o fesoasoani mai ki a tatou.

“TUKU ATU EILOA KI TE KAITAUA O TE ATUA”

14. Se a te uiga o te tugapati ke “tuku atu eiloa ki te kaitaua o te Atua”? (Loma 12:19)

¹⁴ Faitau te Loma 12:19. Ne fakamalosi atu te apositolo ko Paulo ki Kelisiano ke “tuku atu eiloa ki te kaitaua o te Atua.” E tuku ne tatou a mea ki te kaitaua o Ieova mai te tuku ke fai ne ia te fakamasinoga tonu i tena taimi tonu mo te auala e manako a ia ki ei. Mai tua o faifaiga sē ‵tonu ne fai ki te taina ko John, ne fai mai a ia: “Ne ‵tauo ‵teke ne au a te manakoga ke faka‵tonu ne au te mea ‵se tenā i oku auala eiloa. Ne fesoasoani mai te Loma 12:19 ke nofo fakatalitali au ki a Ieova.”

15. Kaia e ‵lei atu ei ke ‵nofo fakatalitali tatou ki a Ieova ke faka‵lei ne ia a mea?

¹⁵ Ka aoga eiloa ki a tatou māfai e fakatalitali tatou ki a Ieova ke faka‵tonu ne ia a mea. A te fai penā ka ‵kalo keatea tatou mai te taumafaiga ke faka‵lei te fakalavelave tenā i ‵tou auala eiloa. A Ieova e toka o fesoasoani mai. E pelā eiloa me ne fai mai a ia, ‘Tuku mai ki a au a faifaiga sē ‵tonu konā; ka faka‵lei ne au a mea katoa.’ Kafai e talia ne tatou te folafolaga a Ieova tenei “Ka toe ‵togi atu ne au,” ka fai ei ke se fia ‵saga tatou ki te fakalavelave mo te tali‵tonu me ka faka‵lei aka ne Ieova i te ‵toe auala ‵lei. Tenā eiloa te mea ne fesoasoani atu ki a John, telā ne sae muamua mai. Ana muna, “Kafai e faka‵tali au ki a Ieova, ka sili atu te ‵lei o te auala ka faka‵lei ei ne ia te fakalavelave tenei.”

“KE FAKATAKAVALE FAELOA A TE MASEI KI TE ‵LEI”

16-17. E fesoasoani mai pefea a ‵talo ki a tatou “ke fakatakavale faeloa a te masei ki te ‵lei”? (Loma 12:21)

¹⁶ Faitau te Loma 12:21. Ne fakamalosi atu foki a Paulo ki Kelisiano “ke fakatakavale faeloa a te masei ki te ‵lei.” I te Lāuga a Iesu i te Mauga, ne fai mai a ia: “Tumau i te a‵lofa ki otou fili kae ‵talo mō latou kolā e fakasaua atu ki a koutou.” (Mata. 5:44)  Tenā eiloa te mea ne fai ne ia. Kāti ko oti ne mafau‵fau tatou ki te logo‵mae ne kufaki ne Iesu i te taimi ne ‵tuki a ia ki te pou fakasaua ne sotia Loma. E mafai fua o fakaataata ne tatou tena logo‵mae kae e se mafai eiloa o malamalama faka‵lei tatou i te masiasi mo faifaiga sē ‵tonu ne kufaki ne ia.

¹⁷ Ne seki takavale eiloa a Iesu i faifaiga sē ‵tonu ne logo‵mae a ia i ei. I lō te taku fakamasei ne ia a sotia konā, ne ‵talo atu a ia: “Toku Tamana, fakamagalo atu latou, me e se iloa ne latou te lotou mea tenei e fai.” (Luka 23:34) Kafai e ‵talo tatou mō tino kolā e fai fakamasei mai ki a tatou, ka mafai o fakafeoloolo aka i ei a lagonaga ita kae kaitāua kae ‵fuli foki ei a ‵tou kilokiloga ki tino kolā ne fai ne latou ke kaitāua tatou.

18. Ne fesoasoani atu pefea a ‵talo ki a Alberto mo John ke fakafesagai atu ki faifaiga sē ‵tonu ne fai ki a lāua?

¹⁸ Ko ‵talo ne fesoasoani atu ki taina e tokolua kolā ne ‵sae muamua mai i te mataupu tenei ke fa‵ki i faifaiga sē ‵tonu ne fe‵paki mo lāua. Ne fai mai Alberto: “Ne ‵talo au mō taina kolā ne fai fakamasei ne latou au. Ne fakamolemole au ki a Ieova i taimi e uke ke fesoasoani mai ke mo a ma saga au ki te mea ne tupu.” Se mea fakafiafia me ko toe tavini atu nei a Alberto mo te fakamaoni ki a Ieova. Ne fai mai a John: “E uke taimi ne ‵talo au mō te taina telā ne fakalogo‵mae ne ia au. Ne fesoasoani mai a ‵talo konā ke mo a ma kaitaua au ki a ia io me fakamasino ne au. Kae ne maua foki ne au te filemu o te mafaufau ona ko ‵talo konā.”

19. Ne a mea e ‵tau o fai ne tatou i te taimi koi ola ei i te olaga masei tenei? (1 Petelu 3:8, 9)

¹⁹ E se iloa ne tatou me ne a faifaiga sē ‵tonu ka fe‵paki mo tatou mai mua o palele atu te olaga masei tenei. Faitalia me ne a mea e fe‵paki mo tatou, ke mo a ma fakagata te ‵tou ‵talo atu ki a Ieova mō se fesoasoani. Ke na fakaakoako foki tatou ki te auala ne saga atu a Iesu ki fakamaseiga ne fai ki a ia kae ke tumau i te fakagalue aka a fakatakitakiga i te Tusi Tapu. Kafai e fai tatou penā, e mautinoa me ka fakamanuia eiloa ne Ieova tatou.—Faitau te 1 Petelu 3:8, 9.