Paul: Ne fia‵fia ‵ki eiloa māua! Ko Novema 1985, i te mā auala ki te mā tofiga fakamisionale muamua eiloa—i Liberia, i te feitu ki togala o Afelika. Ne tu te motou vakalele i Senegal. Ne fai mai a Anne, “Toe tasi fua te itula, ko oko tāua ki Liberia!” Kae ne fai mai se faka‵pulaga: “A pasese katoa ki Liberia e ‵tau o olo ifo ki lalo mo te vakalele. E isi se potukau o tino e taumafai o puke te malo, tela la, ko se mafai o tu te vakalele i konā.” Ne ‵nofo atu māua mō se sefulu aso fakatasi mo misionale i Senegal, o fakalogo‵logo ki tala e uiga ki foitino ‵mate o tino e ave i luga i motoka, mo fakatonuga a te malo ko tino ke ‵nofo i olotou fale, me ka maua atu latou i auala, ka fana latou.

Anne: A māua ne tino kolā e fakaeteete malosi. A te ‵tonuga loa, i taku folikiga, ne lauiloa au e pelā me ko Annie matakutaku. Ne mataku foki au ma sasale ki te suā feitu o te auala! Kae ne ma‵nako eiloa māua ke olo atu ki te mā tofiga fou.

Paul: A māua mo Anne ne fa‵nau kae ‵tupu aka i te koga e tasi i te feitu ki togala o Egelani. Ne kamata māua o paenia mai tua o akoga lasaga lua, ona ko fakamalosiga a oku mātua mo te mātua o Anne. Ne ‵lago katoatoa latou ki te mā manakoga ke ‵kau atu ki te taviniga tumau. I te taimi ko 19 oku tausaga, ne maua ne au te tauliaga ke fanatu ki te Peteli, kae ko Anne ne vau fakamuli i te otiga māua ne avaga i te 1982.

Anne: Ne fia‵fia māua o ‵nofo i te Peteli, kae ne ma‵nako faeloa māua o tavini atu i te koga e lasi i ei te manakoga mō tino talai. Ne fakamalosi aka te mā manakoga tenā i te taimi ne ga‵lue fakatasi mo tino i te Peteli kolā ne fai muamua pelā me ne misionale. Ne ‵talo māua e uiga ki ei i po katoa mō se tolu tausaga, tela la, ne fia‵fia malosi māua i te mauaga o se ‵kamiga i te 1985 ke ‵kau atu ki te vasega 79 o te Akoga i Kiliata! Tenā ne ‵tofi ei māua ke olo atu ki Liberia, i Afelika ki Togala.

Paul: Ne olo atu māua i te vakalele muamua eiloa telā ne fatoa talia ke fanatu ki Liberia. A tino i konā ko oko loa i te ma‵taku kae seki talia loa ke olo ki tua mo olotou fale. Ne ma‵taku ‵ki a tino, tela la, kafai ko pakē te exhaust o se motoka, e paka‵laga latou kae ‵tele kea‵tea! E fakafeoloolo aka ne māua te mā ma‵taku mai te fai‵tau tasi ki vaega o te tusi ko Salamo i po katoa. Kae ne fia‵fia eiloa māua ki te  mā galuega. A Anne ne fano o talai i aso katoa, kae ne galue au i te Peteli fakatasi mo John Charuk. a Ne tauloto ne au a mea e uke mai mea ne ‵tupu ki a ia mo tena loto malamalama i fakanofonofoga o ‵tou taina mo tuagane i konā.

Anne: Kaia ne fia‵fia vave ei māua ki te mā galuega i Liberia? Ona ko ‵tou taina mo tuagane. A latou e a‵lofa, e mata kata‵kata, kae fakamaoni. Ne kamata o ‵pili māua ki a latou; ne fai latou e pelā me ko te mā kāiga fou. Ne ma‵losi māua i te feitu faka-te-agaga ona ko olotou fakamalosiga. Ne gali ‵ki te faiga o te galuega talai i konā. A tino e se fia‵fia māfai e tiakina fakavave ne koe latou! A tino e fia‵fia o sau‵tala ki fesili mai te Tusi Tapu i auala. E mafai fua o kau atu koe ki sau‵talaga konā. Ona ko te uke o mā akoga faka-te-Tusi Tapu, ne faigata ‵ki ke maua a taimi ke fai olotou akoga. Kae ko te fakalavelave tenā se fakalavelave gali!

Paul: Ne filemu a te fenua i loto i se fa tausaga, kae i te 1989 ne ma‵fuli a mea kae tupu te taua. Ne puke ne tino ‵teke ki te malo a kogā koga e ‵pili ki te Peteli i a Iulai 2, 1990. E tolu masina ne seki mafai o fesokotaki atu matou ki fenua mai tua atu, e aofia i ei a mā kāiga mo te ‵tou laumua. Ne uke ‵ki a fakasauaga, oge mea‵kai, mo fāfine ne pukemālō. Ne tumau a fakalavelave konā mō se 14 tausaga kae ne pokotia i ei a te fenua kātoa.

Anne: A nisi tino i nisi matakāiga ko fakatau taua kae tamate a tino i nisi matakāiga. Ne ‵fonu te auala i tino mo olotou meatau kolā e fai fakaa‵tea olotou tēuga, kae olo atu ki fale takitasi o puke a mea e ma‵nako ki ei. Ne taku ne nisi tino a te tamatega o tino tenei e pelā me se “tamatega o moa.” Ne tafola valevale a foitino ‵mate i auala kolā e ‵pono ne sotia, kae penā foki i koga ‵pili atu ki te ofisa lagolago. Ne tamate a Molimau fakamaoni, e aofia i ei ‵tou misionale pele e tokolua.

Ne ‵tu a ola o nisi Molimau i se tulaga fakamataku ko te mea ke faka‵muni fua ne latou a nisi taina mai matakāiga kolā ne ‵sala ki ei a sotia ke tamate. Ne faka‵muni foki ne misionale mo te kāiga Peteli a taina konā. I te Peteli, a nisi Molimau kolā ne ‵sola mai i nisi koga, ne ‵moe i te fata i lalo o te fale a ko nisi tino ne ‵nofo mo māua i te mā potu i te fata mai luga. Ne ‵nofo fakatasi māua mo se kāiga e tokofitu a tino i ei.

Paul: I aso takitasi, ne taumafai a sotia o ‵mai ki te Peteli ke onoono aka me isi ne tino e faka‵muni ne matou. E tokofa a taina e ‵tu o leoleo te Peteli: tokolua e onoono mai i se famalama kae ko te suā tokolua e olo atu ki tua i te gate. Kafai a lima  o taina i te gate e tuku loa i la mua, ko tena uiga e ‵lei a mea katoa. Kae kafai ko tuku lā lima ki lā tua, ko tena uiga a sotia e kaitāua, tenā ko ‵tele ei a lāua kolā e onoono mai loto i te famalama o faka‵muni a ‵tou taina.

Anne: Mai tua o se fia vaiaso, ne ulu mālō mai se potukau o sotia ki loto i te Peteli. Ne ‵muni māua mo se tuagane i se fale koukou telā e isi se tamā potu foliki ke ‵muni i ei se tino. Ne fakaofiofi te tuagane tenā ki loto i ei. Ne ‵mai a sotia konā ki luga mo fana loa i olotou lima. Ne tukituki ne latou te mataloa mo te kaitāua. Ne fakamolemole atu a Paul, “Taku avaga e fakaaoga ne ia te fale foliki.” Ne pakē te koga telā ne ‵muni i ei te tuagane tenā, kae ne tai leva loa te fakafoki‵fokiga ne au a nisi mea ki luga i te sefe, tenā ne polepole valevale au i te mataku. Kafai e ‵tala te mataloa kae lavea ne latou toku mataku ka mafai loa o isi ne olotou mafaufauga. Tenā ne ‵talo lemū ei au ki a Ieova ke fesoasoani mai. Oti aka, ‵tala ei ne au te mataloa kae fakatalofa atu ki a latou i se leo filemu. Ne ‵tule ne se sotia au ki te feitu kae fanatu ‵tonu ki te sefe, ‵tala ne ia kae fakaga‵sue a mea katoa i ei. Ne seki talitonu a tou tagata me seai sena mea ne maua i ei. Ne olo atu latou ki nisi potu o suke a mea i ei mo te potu e pili ki te tuafale. Kae ne seai foki ne olotou mea ne maua i ei.

Paul: E uke taimi ne seki ai ne motou meakai mō inu ‵ti i taeao, kae ne fai a tapuakiga i taeao e pelā me ne meakai a matou. Ne iloa ne matou katoa me i te fai‵tau kae suke‵suke ki te Tusi Tapu, ka maua i ei a te malosi ke kufaki matou i aso takitasi.

Ne iloa ne matou me moi ne olo matou o ‵sala mai a mea‵kai mo vai, ka se mafai eiloa o puipui ne matou a latou kolā e ‵muni, kae e mafai o tamate katoa latou. Kae e fakaofoofogia eiloa te auala e tuku mai ne Ieova a mea e manakogina ne matou i te taimi tonu. Ne tausi mai a ia ki omotou manakoga kae fesoasoani mai ke mo a ma tō ma‵taku.

Ne gasolo o masei atu te tulaga o te fenua, kae ne gasolo aka eiloa o maina atu a te munatonu. E uke taimi ne ‵tele a ‵tou taina mo tuagane ke ‵sao latou, kae ne tu‵mautakitaki eiloa te lotou fakatuanaki mo te lotou uiga filemu faitalia a fakalavelave katoa e fe‵paki mo latou. Ne fai mai nisi tino me i te kufaki o latou i te taimi o te taua, ko “fakatoka” i ei latou mō te fakalavelave lasi.” Ne fai ne toeaina mo taina talavou te ‵toe mea e mafai o fai ke fesoasoani atu ki taina mo tuagane. Kafai ko ‵tele atu ki nisi koga, ne fakatau fesoasoani a taina kae ‵nofo tasi faeloa, kae ne kamata o talai atu i koga ‵fou konā, kae fakaaoga so se mea i te vao mo faite olotou Fale Tapuaki mō fai olotou fakatasiga. Ne fai a fakatasiga e pelā me se fakamalosiga lasi ‵ki i taimi faiga‵ta, kae ne fesoasoani atu te galuega talai ke kufaki latou. I te tufatufaatuga ne matou a mea‵kai, gatu mo nisi mea, ne otia omotou loto me tokouke a taina ne ‵sala mai ki ato talai i lō a gatu. Ne fia fakalogo‵logo ki te tala ‵lei a tino loto fanoa‵noa mo tino loto mafatia. Ne ofo latou i te mata fia‵fia mo te a‵lofa o tino Molimau faitalia mea faiga‵ta; ne maina atu latou e pelā me se mainaga i se koga pouli tagataga! (Mata. 5:​14-16) Ne fai ne te loto finafinau o te kautaina ke fai a nisi sotia kaitāua mo fai ‵tou taina.

Paul: E isi ne taimi ne ‵tau ei o tiakina ne māua a te fenua. E tolu taimi ne tiakina ne māua mō se taimi toetoe fua, kae fakalua taimi ne tiakina ne māua mō se tausaga. Ne fakamatala faka‵lei mai ne se tuagane misionale omotou lagonaga ‵tonu: “I Kiliata, ne akoako matou ke a‵lofa ki ‵tou taina mo tuagane mo te loto kātoa i koga e ‵tofi ki ei, kae tenā te mea ne fai ne matou. Tela la, kafai ko ‵tau o tiakina ne matou a ‵tou taina i taimi faiga‵ta penei, e fai i ei ke fati‵fati omotou loto i te fanoa‵noa!” Kae ne fia‵fia eiloa māua me ne mafai o fesoasoani atu ki te galuega talai a taina mo tuagane Liberia i fenua kolā e ‵pili atu ki ei.

Anne: I a Me 1996, e tokofa matou ne olo atu i se motoka a te Peteli mo pepa tāua e uke kolā e manakogina mō te galuega i Liberia. Ne ma‵nako matou o ‵tele atu ki se koga telā e ‵lei i te suā feitu o te fakai mō se 16 kilomita (10 mai). I te motou auala ki konā, ne fetaui matou mo se potukau o sotia. Ne fana ne sotia kaitāua konei a olotou fana ki te ea, taofi te motou motoka, kae faka‵tu te tokotolu o matou ki tua, kae ‵tele atu i te motoka fakatasi mo Paul i loto i ei. Ne ‵tu atu matou i konā mo te pole‵pole. E se leva, kae matea atu ne matou a Paul e sasale mai loto i se potukau o tino mo toto e ‵sali ifo i tena lae. Muamua la, ne leake matou me ne fana tou tagata, kae oti aka ko masaua ne matou me moi ne fana, penei e se mafai o sasale! E tokotasi te sotia ne pago ne ia tou tagata kae ‵tule ki tua mo te motoka. Fakafetai me se tamā pakiaga fua.

E isi se motoka a te kautau e tu i konā kae ‵fonu i tino kolā e foliga ma‵taku kae ka fai o tele. Tenā ne ‵sopo matou i kaokao o te motoka, kae toeitiiti ko seai se koga e ‵piki motou lima ki ei. Ne fakatele makini ne te tulaiva a te motoka kae toeitiiti ko ‵to matou. Ne paka‵laga matou ki ei ke tu, kae ne mataku a ia ma tu. Kae ne mafai eiloa o ‵piki matou ki te motoka ke oko ki te koga e tu i ei, kae ne pole‵pole valevale motou foitino i te ‵tuga ki lalo, ona ko te ma‵taku.

Paul: Ne fakatau ‵kilo matou te suā tino ki te suā tino mo omotou gatu lai‵lai kae ko masae‵sae, kae mafau‵fau me ne mafai pefea o ‵sao matou. Ne ‵moe matou i se malae e tu i ei se vakalele telā ko pūpū valevale i polofana kae ko pili fua o ‵to, telā ka ave i ei matou ki Sierra Leone i te suā aso. I te motou okoga ki konā, ne loto fakafetai eiloa matou me koi tumau i te ola kae ne manava‵se matou ki ‵tou taina i Liberia.

Anne: Ne taunu faka‵lei atu matou ki te Peteli i Freetown, i Sierra Leone, kae ne fai faka‵lei matou ne taina i konā. Kae ne kamata o ‵sae aka i toku mafaufau a mea sē ‵lei kolā ne ‵tupu i Liberia. I aso katoa, ne mataku faeloa au māfai e isi se mea masei e tupu kae seki mafai o mafaufau faka‵lei au. A mea katoa i oku tafa ne foliga se ‵tonu katoa. Ne ala faeloa au i po ona ko te mataku mo te polepole i te mea ma tupu se mea masei. Ne seki mafai ne au o mānava faka‵lei. Ne ‵sai au ne Paul kae ‵talo fakatasi māua. Ne usu ne māua a pese o te Malo ke oko ki te taimi ko galo ei toku polepole. Au ne mafaufau i au ko fakavalevale kae ko se mafai o tavini atu pelā me se misionale.

Ka se toe puli i a au a mea ne ‵tupu mai tua. I te vaiaso loa tenā ne maua ne māua a mekesini e lua. Tasi ko te Awake! o Iuni 8, 1996. E aofia i ei te mataupu ko te “Coping With Panic Attacks.” Ko malamalama nei au i te mea e tupu ki a au. Te lua ko The Watchtower o Me 15, 1996, telā e aofia ei te mataupu “Where Do They Get Their Strength?” E isi se ata o te manu ko te pepe e pakia tena kapakau i te Watchtower tenā. E fakamatala mai i te mataupu tenā, me e pelā mo te pepe telā koi mafai loa o lele faitalia me e pa‵kia ana kapa‵kau, e auala i te agaga o Ieova, koi mafai eiloa o fesoasoani atu tatou ki nisi tino faitalia te logo‵mae o tatou i mea tau lagonaga. Ne fai a mea konei e pelā me ne mea‵kai i te taimi tonu mai i a Ieova. (Mata. 24:45) A sukesukega ne fai ne au ki te mataupu tenei mo nisi mataupu ne tausi ne au kolā e faipati ki te mataupu tenei ne fesoasoani mai eiloa ki a au. Fakamuli loa, ne kamata o galo malielie atu a toku masaki tenei.

Paul: I so se taimi e ‵foki māua ki te mā fenua ko Liberia, e fia‵fia eiloa māua. I te fakaotiga o te 2004, toeitiiti ko kātoa te 20 tausaga o māua i te  mā tofiga tenā. Ko oti atu te taua. Ne fai a palani ke toe faite faka‵lei te ofisa lagolago. Kae seki leva, ne maua ne māua se tofiga fou.

A te mea tenei se tofotofoga lasi ‵ki. Ne ‵pili ‵ki māua ki te mā kāiga faka-te-agaga i Liberia kae ne seki fia tiaki ne māua a latou? Ona ko te mea ne lavea ne māua te fakamanuiaga a Ieova ki a māua i te tiakinaga ne māua a mā kāiga pele ke olo atu ki Kiliata, tenā ne talia ei ne māua a te ‵kamiga tenā. Ne avatu māua ki Ghana, se fenua pili ki konā.

Anne: I te tiakinaga ne māua a Liberia, ne ‵tagi ‵ki māua. Ne ‵poi māua i te faimaiga a Frank, se taina poto kae matua penei: “E ‵tau o fakapuli ne koulua a matou!” Oti aka, fai mai ei a ia: “E iloa ne au me ka se puli i a koulua matou, kae e ‵tau o tuku katoatoa lua loto ki te lua tofiga fou. Se tofiga mai i a Ieova, tela la, ‵saga tonu ki taina mo tuagane i konā.” Ne fakamalosi mai ana pati ke toka māua o fakamasani ki taugasoa ‵fou i se fenua telā e se tokouke a tino e iloa ne latou māua kae e fou foki ki a māua.

Paul: E se leva, kae kamata o a‵lofa māua ki mā kāiga faka-te-agaga i Ghana. Ne tokouke ‵ki a Molimau i konā! E uke ‵ki mā mea ne tauloto mai te fakamaoni mo te ma‵losi faka-te-agaga o mā taugasoa ‵fou. Kae mai tua o se 13 tausaga ne tavini atu i Ghana, ne toe maua ne māua se suā tala fakapoi, ke olo atu o tavini i te ofisa lagolago i Kenya, i Afelika ki Saegala. E tiga loa ko ‵misi malosi ne māua a mā taugasoa i koga muamua ne tavini i ei, ne kamata foki o masani māua mo taina fakamaoni i Kenya. Kae koi tavini atu nei eiloa māua i se koga talai telā e lasi ‵ki te manakoga i ei.

Anne: I toku olaga kātoa, ne fakafesagai au ki tulaga faiga‵ta, kolā ne fai ei ke mataku ‵ki au. E mafai ne tulaga fakama‵taku io me fakafi‵ta o fai ke pokotia ‵tou mafaufau kae ma‵saki. E se mafai o puipui fakavavega tatou mai te mea tenei. Ke oko mai nei, kafai ko lagona ne au a fana mo pomu e ‵pa, mea loa ko logologosala toku tinae kae ‵mu oku lima. Kae ne tauloto au ke fakalagolago katoatoa ki te fesoasoani e tuku mai ne Ieova ke fakamalosi tatou, e aofia i ei te fesoasoani o ‵tou taina mo tuagane. Kae ne lavea ne au me kafai e tumau tatou i ‵tou polokalame faka-te-agaga, e mafai eiloa o fesoasoani mai a Ieova ke tumau tatou i ‵tou galuega.

Paul: E fai mai nisi tino, “E mata, e fiafia koe ki tau galuega?” A fenua e mafai o ‵gali, kae e mafai foki o mafuli‵fuli a mea e ‵tupu i ei kae fakama‵taku. Tela la, se a te mea e gali atu ki a tatou i lō te fenua? Ko ‵tou taina mo tuagane pele, ‵tou kāiga. Faitalia te kese‵kese o koga ne ‵mai ei tatou, e ‵pau eiloa a mea e mafau‵fau tatou ki ei. Ne mafau‵fau māua me ne uga atu māua ke fakamalosi latou, kae ko te ‵tonuga loa, ko latou ne fakamalosi mai.

I taimi takitasi e ga‵sue tatou ki se koga, e lavea ne tatou se vavega mai i a Ieova: ko te kautaina. Kafai e tumau tatou i loto i te fakapotopotoga, e fai faeloa tatou pelā me se kāiga i se fale e tasi. E tali‵tonu tatou me kafai e tumau tatou i te fakalago‵lago ki a Ieova, ka fakamalosi eiloa ne ia tatou e ‵tusa mo ‵tou manakoga.—Fili. 4:13.