1. Kaia e mafai ei ne tatou o tauloto mai tino ma‵tua?

 E MANAKOGINA ne tatou katoa se takitakiga i te faiga o fakaikuga tāua i te olaga. E mafai o maua ne tatou te takitakiga tenā mai toeaina mo nisi Kelisiano ma‵tua ‵lei. Kafai latou e ma‵tua fakafia i a tatou, e se ‵tau o mafau‵fau tatou me ko se aoga olotou manatu fakatonutonu. E manako a Ieova ke tauloto tatou mai tino ma‵tua. E lasi atu te lotou iloa, te malamalama mo te poto i lō tatou.—Iopu 12:12.

2. Ne a mea ka sau‵tala tatou ki ei i te mataupu tenei?

² I taimi o te Tusi Tapu, ne fakaaoga ne Ieova a tino ma‵tua fakamaoni ke fakamalosi kae takitaki ana tino. Mafaufau ki a Mose, Tavita mo te apositolo ko Ioane. Ne ola latou i taimi kese‵kese, kae ‵kese ‵ki olotou fakanofonofoga. I te taimi ko pili o ‵mate, ne tuku atu ne latou a manatu fakatonutonu ‵poto ki talavou. Ne fai‵pati eiloa a tāgata ma‵tua fakamaoni konei ki te tāua ke fakalogo ki te Atua. Ne tausi ne Ieova a pati konei o te poto mō tatou i aso nei. Faitalia me koi fo‵liki io me ko ma‵tua tatou, e mafai o aoga a te ‵toe mafaufau ‵loto ki olotou pati fakatonutonu. (Loma 15:4; 2 Timo. 3:16) Ka sau‵tala tatou i te mataupu tenei ki toe pati a tāgata ma‵tua konei e tokotolu, mo akoakoga e tauloto ne tatou mai ei.

“KA NOFO LEVA KOE”

3. E pefea te uke o galuega ne fai ne Mose?

³ I tena olaga kātoa, ne galue malosi a Mose mō Ieova. Ne tavini a ia pelā me se pelofeta, famasino, tino fakatonutonu, mo se tino tusitala. Ne tauloto ne Mose a mea e uke mai mea ne ‵tupu i  tena olaga! Ne ‵taki ne ia ki tua te fenua o Isalaelu kolā ne ‵nofo fakapagota i Aikupito, kae ne lavea ne ia a vavega e uke ne fai ne Ieova. Ne fakaaoga a ia ne Ieova ke tusi a tusi e lima o te Tusi Tapu, e aofia ei te Salamo 90 mo te 91. Kāti ko ia foki ne tusi ne ia te tusi ko Iopu.

4. Ko oi ne fakamalosi ne Mose, kae kaia?

⁴ Mai mua malie o mate a ia, kae kāti ko 120 ana tausaga, ne fakamaopoopo ne Mose te kau Isalaelu ke fakamasaua atu a mea ne lavea ne latou ne fai ne Ieova mō latou. I se fia tausaga mai mua, ne lavea ne nisi tino Isalaelu a vavega ne fai ne Ieova mo ana fakamasinoga ki tino Aikupito. (Eso. 7:3, 4) Ne sa‵sale latou i loto i te Tai Kula telā ne ‵vae lua kae lavea ne latou te fakaseaiga o te kautau a te Falao. (Eso. 14:29-31) I te koga lavaki, ne lavea ne latou i ei te puipuiga mo te tausiga a Ieova. (Teu. 8:3, 4) Nei la, ko pili o ulu atu latou ki te Fenua o te Folafolaga, ne toe maua ne Mose te ‵toe avanoaga tenei ke fakamalosi atu a tino Isalaelu. a

5. Se a te fakatalitonuga ne fai atu ne Mose ki te kau Isalaelu i ana toe pati i te Teutelonome 30:19, 20?

⁵ Ne a pati a Mose? (Faitau te Teutelonome 30:19, 20.) Ne fakamasaua atu ne ia ki te fenua o Isalaelu e uiga ki te lotou fakamoemoega gali i aso mai mua. Fakatasi mo te fakamanuiaga a Ieova, e mafai ne tino Isalaelu o ola mō se taimi leva i te fenua telā ne tauto a ia mō latou. Kae ko te fenua tenā e gali kae ‵fonu i lakau kaina! Ne fakamatala atu ne Mose ki a latou, penei: “Ne fakai ‵lasi kae ‵gali kolā ne seki faite ne koutou, ko fale kolā e ‵fonu i vaegā mea ‵lei valevale kolā ne seki ga‵lue koutou ki ei, ko vaikeli kolā ne seki keli ne koutou, mo togavine mo lakau ko olive kolā ne seki ‵toki ne koutou.”—Teu. 6:10, 11.

6. Kaia ne talia ei ne te Atua ke fakatakavale ne nisi fenua a Isalaelu?

⁶ Ne tuku atu foki ne Mose ki te kau Isalaelu se fakailoaga ke fakaeteete latou. Ke tumau i te fenua gali kae ola ‵lei tenā, ne ‵tau o faka‵logo latou ki fakatonuga a Ieova. Ne fakamalosi atu a Mose ki a latou ke “filifili a te ola” mai te faka‵logo ki a Ieova kae “‵piki ‵mau ki a ia.” Kae ne ‵teke atu a tino Isalaelu ki a Ieova. Tela la, fakamuli ifo, ne talia ne te Atua ke fakatakavale ne te kau Asulia kae fakamuli ko tino Papelonia a Isalaelu kae ave fakapagota latou.—2 Tupu 17:6-8, 13, 14; 2 Nofo. 36:15-17, 20.

7. Ne a mea e mafai o tauloto ne tatou mai pati a Mose? (Onoono foki ki te ata.)

⁷ Se a te akoakoga mō tatou? A te fakalogo e iku atu ki te ola. E pelā mo tino Isalaelu kolā ne ‵tu atu i te mataloa ki loto i te Fenua o te Folafolaga, ko ‵tu atu nei tatou i kaugutu o te lalolagi fou telā ne folafola mai ne te Atua, telā ka lavea i ei ne tatou te taimi ka ‵fuli ei a te lalolagi ke fai mo fai se palataiso. (Isa. 35:1; Luka 23:43) Ka ‵galo atu a te Tiapolo mo ana temoni. (Faka. 20:2, 3) Ka seai ne lotu ‵se ke takitaki ei a tino kea‵tea mai a Ieova. (Faka. 17:16) Ka se fakasaunoa ne malo o tāgata a tino kolā e ‵nofo mai lalo i olotou pulega. (Faka. 19:19, 20)  Ka se talia ne Ieova so se tino ‵teke ke nofo i te Palataiso. (Sala. 37:10, 11) Ka faka‵logo a tino i koga katoa ki tulafono amio‵tonu a Ieova, kolā e fakamalosi aka i ei a te ‵kau fakatasi mo te filemu. A tino katoa ka fakatau a‵lofa kae talitonu te suā tino ki te suā tino. (Isa. 11:9) Tasi o fakamoemoega gali tenā! Kae kafai e faka‵logo tatou ki a Ieova, ka se ola fua tatou i te lalolagi palataiso mō se fia selau tausaga, kae ki te se-gata-mai eiloa.—Sala. 37:29; Ioa. 3:16.

8. Ne fesoasoani atu pefea ki se misionale e tokotasi a te tautoga e uiga ki te ola se-gata-mai? (Iuta 20, 21)

⁸ Kafai e mafaufau ‵loto tatou ki te tautoga a te Atua ki te ola se-gata-mai, ka ma‵nako tatou o ‵piki ‵mau ki a ia faitalia a fakalavelave e fe‵paki mo tatou. (Faitau te Iuta 20, 21.) E mafai ne te tautoga tenā o fakamalosi tatou ke taua atu ki ‵tou vāivāiga totino. Ne fai mai penei se misionale telā ko leva ne tavini i Afelika kae ne taua atu faeloa ki se vāivāiga o ia: “Mai te iloa atu me e se mafai o ola au ki te se-gata-mai māfai au se fakalogo, ne fesoasoani mai ke taua atu faeloa au ki toku vāivāiga tenā kae ‵talo faeloa ki a Ieova. Mai tena fesoasoani, ne mafai o manumalo au i ei.”

KA “MANUIA EI KOE”

9. Ne a fakalavelave ne fepaki mo Tavita i tena olaga?

⁹ Ne fai a Tavita e pelā me se tupu sili. A ia foki se tino tātā kitala, se tino ‵fatu kupu, se ‵toa, mo se pelofeta. Ne fepaki a ia mo fakalavelave e uke. I tausaga e uke, ne ola a ia pelā me se tino maumausolo, i te ‵telega kea‵tea mai te tupu loto masei ko Saulo. I te otiga ne fai mo tupu, ne ‵tau foki o ‵muni a ia, me ne taumafai tena tama tagata ko Apisaloma o ‵fao te tulaga tupu mai i a ia. Faitalia a fakalavelave mo mea ‵se ne fai ne Tavita, ne fakamaoni eiloa a ia ki te Atua ke oko ki tena mate. Ne taku ne Ieova a ia e pelā me “se tagata e loto [a Ia] ki ei.” E aoga eiloa ke faka‵logo tatou ki manatu fakatonutonu ‵poto o Tavita!—Galu. 13:22; 1 Tupu 15:5.

10. Kaia ne tuku atu ne Tavita a pati fakatonutonu ki tena tama ko Solomona, tena sui?

¹⁰ Mafaufau ki pati fakatonutonu ne tuku atu ne Tavita ki tena tama ko Solomona, telā ko tena sui. Ne filifili ne Ieova a te tamataene tenei ke tumau i te fakamalosi aka ne ia a te tapuakiga ‵ma kae faite a te faletapu ke mafai o tapuaki atu i ei a tino ki a Ieova. (1 Nofo. 22:5) Ka isi eiloa ne fakalavelave ka fepaki mo Solomona. Ne a pati a Tavita ki a ia? Ke onoono aka tatou.

11. E ‵tusa mo te 1 Tupu 2:2, 3, ne a pati fakatonutonu ne fai atu ne Tavita ki a Solomona, kae ne fakamaoni aka pefea ne ia te ‵tonu o pati konā? (Onoono foki ki te ata.)

¹¹ Ne a pati a Tavita? (Faitau te 1 Tupu 2:2, 3.) Ne fai atu a Tavita ki tena tama me kafai e fakalogo a ia ki a Ieova, ka manuia tena olaga. Kae ne maua eiloa ne Solomona a fakamanuiaga i te ukega o tausaga. (1 Nofo. 29:23-25) Ne faite ne ia te faletapu fakaofoofogia, tusi ne ia a nisi tusi o te Tusi Tapu, kae ne fakamau ana pati i nisi tusi i ei. Ne lauiloa a ia ona ko tena poto mo tena maumea. (1 Tupu 4:34) Kae pelā mo te fakamatalaga a Tavita, ka manuia eiloa a Solomona māfai fua e fakalogo a ia ki a Ieova te Atua. Se mea fakafanoanoa me fakamuli ifo, ne ‵fuli atu a Solomona o tapuaki ki nisi atua. Ne seki toe talia ne Ieova a ia, kae ne galo atu i a Solomona a te poto ke pule atu i te amiotonu mo te fai mea tonu.—1 Tupu 11:9, 10; 12:4.

12. Ne a mea e mafai o tauloto ne tatou mai pati a Tavita?

 ¹² Se a te akoakoga mō tatou? A te fakalogo e iku atu ki te manuia. (Sala. 1:1-3) E tonu, ne seki tauto mai a Ieova me ka fai ne ia tatou ke mau‵mea kae takutakua e pelā mo Solomona. Kae kafai e faka‵logo tatou ki te ‵tou Atua, ka tuku mai ne ia te poto ke mafai ne tatou o fai a fakaikuga ‵lei. (Faata. 2:6, 7; Iako. 1:5) E mafai o fesoasoani mai a fakatakitakiga a Ieova māfai ko fai ‵tou fakaikuga ki galuega ‵togi, akoga, tupe mo fakafiafiaga. Kafai e faka‵logo tatou ki tena takitakiga, ka puipui eiloa ‵tou fesokotakiga mo ia kae ka maua ne tatou a te ola se-gata-mai. (Faata. 2:10, 11) Ka ati aka ne tatou a va fakataugasoa ma‵losi, kae ka fia‵fia eiloa a ‵tou kāiga.

13. Ne maua pefea ne Carmen a te auala ke manuia i te olaga?

¹³ A Carmen, telā e nofo i Mozambique, ne mafaufau me i akoga ma‵luga ko te kī ki te manuia. Tenā ne fano ei a ia ki te iunivesiti kae akoga pelā me se tino ‵lomi ata o fale. “Au ne fiafia ki aku mea ne tauloto,” ne tusi mai a ia. “Kae lasi ‵ki toku taimi mo toku malosi ne fakamāumāu ki ei. Ne nofo atu au i te akoga mai te 7:30 i te taeao ki te 6:00 i te afiafi. Ne faigata ke kau au ki fakatasiga, kae ne vāivāi au i te feitu faka-te-agaga. I toku ‵kanoloto loa, ne iloa ne au me ko taumafai au o tavini atu ki matai e tokolua.” (Mata. 6:24) Ne ‵talo atu a ia e uiga ki tena tulaga kae ne fai ana sukesukega ki ‵tou tusi. Ne toe fai mai a ia: “I te otiga ne maua ne au a pati fakatonutonu aoga mai taina ma‵tua ‵lei mo toku mātua, fakaiku aka ei ne au ke tiakina te iunivesiti ke tavini katoatoa atu ki a Ieova. Ne fesoasoani mai te mea tenei ke fai ne au a toe filifiliga ‵lei i toku olaga, kae ne seki salamō lele au i ei.”

14. Se a te fekau tāua a Mose mo Tavita?

¹⁴ A Mose mo Tavita ne a‵lofa ki a Ieova kae ne iloa ‵lei ne lāua te tāua o te faka‵logo ki a ia. I lā toe pati, ne fakamalosi ne lāua a lā tino fakalogo‵logo ke tau‵tali i lā fakaakoakoga mai te ‵piki ‵mau ki a Ieova te lotou Atua. Ne fakailoa atu foki ne lāua me ka galo atu i tino kolā e tiaki ne latou a Ieova a tena taliaga mo ana fakamanuiaga kolā ne folafola mai ne ia. E tāua ‵ki a lā manatu fakatonutonu ki a tatou i aso nei. I se fia selau tausaga fakamuli ifo, ne fakamatala mai ne te suā tavini a Ieova te tāua ke tumau tatou i te fakamaoni ki te Atua.

 “SEAI SE MEA E SILI ATU I TOKU FIAFIA”

15. Ne a mea ne fakafesagai mo te apositolo ko Ioane i tena olaga?

¹⁵ A Ioane se apositolo e pele ki a Iesu Keliso. (Mata. 10:2; Ioa. 19:26) Ne fakamāumāu ne Ioane ana taimi e uke mo Iesu i te galuega talai, matea ne ia ana vavega, kae ‵kau fakatasi mo Iesu i taimi faiga‵ta. Ne kilokilo atu a ia i te taimi ne tamate ei a Iesu, kae ne lavea ne tou tagata a ia mai tua o tena toetuga. Ne molimau foki ne ia a te salalauatuga o te Lotu Kelisiano i te senitenali muamua mai se potukau foliki o tino fakamaoni ki te taimi ne “talai atu” ei te tala ‵lei “ki tino katoa mai lalo o te lagi.”—Kolose 1:23.

16. Ko oi ne aoga ki a latou a tusi a Ioane?

¹⁶ I te taimi ko toeaina ‵ki ei a Ioane, ne maua ne ia te tauliaga ke tusi ne ia te tusi ko Fakaasiga. (Faka. 1:1) Ne tusi ne Ioane te tusi Evagelia telā e fakaigoa ki tena igoa. Ne tusi foki ne ia a nisi tusi fakaosofia e tolu. Ne tusi atu ne ia te tolu o ana tusi ki te Kelisiano fakamaoni e igoa ki a Kaio, telā ne alofa a ia ki ei e pelā eiloa me ko tena tama pele faka-te-agaga. (3 Ioa. 1) Mai te taimi tenā, e tokouke eiloa a latou kolā ne kilo atu ki ei a Ioane e pelā me ne ana tama‵liki faka-te-agaga. A mea katoa kolā ne tusi ne te toeaina fakamaoni tenei, ne fakamalosi atu ki soko o Iesu i te taimi tenā ke oko mai loa ki ‵tou aso nei.

17. E ‵tusa mo te 3 Ioane 4, se a te mea e aumai ne ia te fiafia sili?

¹⁷ Ne a mea ne tusi ne Ioane? (Faitau te 3 Ioane 4.) I tena tusi i te tolu, ne fai mai a Ioane me ne fiafia a ia ke lavea atu ana taina mo tuagane e faka‵logo ki te Atua. I te taimi ne tusi ei ne Ioane tena tusi i te tolu, kae ko nisi tino ne fakasalalau atu ne latou a akoakoga ‵se kae faka‵tupu a mavae‵vaega. Kae ne tumau eiloa a nisi tino i te “sa‵sale i te munatonu.” Ne faka‵logo latou ki a Ieova kae ne “sa‵sale e ‵tusa mo ana fakatonuga.” (2 Ioa. 4, 6) Ne fai ne Kelisiano fakamaoni konei ke fia‵fia a Ioane mo Ieova.—Faata. 27:11.

18. Ne a mea e mafai o tauloto ne tatou mai pati a Ioane?

¹⁸ Se a te akoakoga mō tatou? A te fakamaoni e iku atu ki te fiafia. (1 Ioa. 5:3) E pelā me se fakaakoakoga, e fia‵fia tatou ona ko te mea e fakafiafia ne tatou a Ieova. E fiafia a ia ke kilo mai ki a tatou e ‵teke a tofotofoga o te lalolagi nei kae talia te  munatonu. (Faata. 23:15) A agelu foki i te lagi e fia‵fia. (Luka 15:10) E mafai foki o fia‵fia tatou ke ‵kilo atu ki ‵tou taina mo tuagane e tumau i te fakamaoni i taimi o fakalavelave mo tofotofoga. (2 Tesa. 1:4) Tela la, kafai ko fakaseai atu te olaga tenei, ka lotoma‵lie eiloa tatou me ne tumau ‵tou fakamaoni ki a Ieova i te lalolagi telā ne pule ki ei a Satani.

19. Ne a pati a te tuagane ko Rachel e uiga ki te akoako atu o te munatonu ki nisi tino? (Onoono foki ki te ata.)

¹⁹ E sili atu foki ‵tou fia‵fia māfai e fakailoa atu ne tatou te munatonu ki nisi tino. Ne iloa aka ne Rachel, telā e nofo i Dominican Republic, me i te akoako atu o se tino e uiga ki te Atua gali telā e tavini tatou ki ei, se tauliaga telā e se mafai o fakamatalagina. Mai te mafaufau ki ana tamaliki faka-te-agaga, ne fai mai a ia: “E faigata ke fakamatala atu toku fiafia māfai ko kilo atu ki a latou kolā ne akoako ne au, ko gasolo o a‵lofa malosi ki a Ieova, fakalago‵lago katoatoa ki a ia, kae ‵fuli olotou olaga ko te mea ke fakafiafia atu ki a ia. E sili atu te fiafia tenā i lō so se taumafaiga io me ko so se mea ne fai ne au ke akoako latou.”

MEA AOGA MAI TOE PATI A TĀGATA FAKAMAONI

20. Ne a mea e ‵pau i ei tatou mo Mose, Tavita, mo Ioane?

²⁰ Ne ola eiloa a Mose, Tavita mo Ioane i taimi mo fakanofonofoga kolā e ‵kese ‵ki mo tatou i aso nei. Kae e uke a mea e ‵pau i ei tatou mo latou. Ne tavini latou ki te Atua tonu, kae penā foki tatou. E pelā mo latou, e ‵talo tatou ki a Ieova, fakalago‵lago ki a ia, kae ‵sala atu ki tena takitakiga. Kae e pelā mo tāgata konei i aso mua, e tali‵tonu tatou me ka fakamanuia ne Ieova a tino kolā e faka‵logo ki a ia.

21. Ne a fakamanuiaga ka maua ne latou kolā e faka‵logo ki pati fakatonutonu a toeaina fakamaoni ko Mose, Tavita, mo Ioane?

²¹ Tela la, ke na faka‵logo tatou ki toe pati a tāgata ma‵tua konei, mai te faka‵logo ki fakatonuga a Ieova. Kafai e fai tatou penā, ka maua ne tatou a te manuia tonu i mea katoa e fai ne tatou. Ka maua ne tatou a te ola kae “‵nofo leva,” ao, ki te se-gata-mai! (Teu. 30:20) Kae ka maua ne tatou a te fiafia ona ko te mea e fakafiafia ne tatou a te ‵tou Tamana i te lagi, telā e fakataunu ne ia ana tautoga katoa i auala kolā e se mafai ne tatou o fakaataata.—Efe. 3:20.