Ko Ieova eiloa ne fakamalosi ne ia a tino talai loto fia‵fia konei. I te tausaga tenā ne gasolo aka te aofaki o paenia mai te 225 ki te 350. Kae tenei foki loa te taimi muamua ke silia atu i te toko 8,000 tino talai ne lipoti mai te lotou galuega talai ki te laumua. Ne fakamanuia ne Ieova latou e auala i te ‵saga malosi mai o tino.

I a Mati 21 1920, ne faipati a Joseph F. Rutherford, telā ne takitaki ne ia a Tino A‵koga ki te Tusi Tapu i te taimi tenā, ki te mataupu “E Lau i Miliona a Tino e Ola Nei ka se Toe ‵Mate.” Ne fai ne Tino A‵koga ki te Tusi Tapu a te ‵toe mea e mafai ne latou o fai ke ‵kami mai a tino fia‵fia ki te lāuga tenei. Ne ‵togi ne latou se fale lasi e fai sāle i ei a faigāmea i New York City kae tufa ne latou a pepa ‵kami e 320,000.

Ne seki fakamoe‵moe latou ke tokouke ‵ki a tino e ‵kau mai. E silia atu mo te toko 5,000 tino ne mafai o ofi ki loto i te fale tenā, kae nofo ki se 7,000 tino ne ‵foki me ko se ofi. Ne taku ne The Watch Tower a te taimi tenā me “se tasi o fakatasiga tafasili i te gali ke fai ne te International Bible Students.”

Ne lauiloa a Tino A‵koga ki te Tusi Tapu ona ko te fekau ne folafola ne latou me “e lau i miliona a tino e ola nei ka se toe ‵mate.” Ne seki malamalama latou i te taimi tenā me e ‵tau o folafola atu ne latou te fekau o te Malo ki koga ‵mao. Kae ko te lotou loto finafinau ne tumau eiloa. Ne fai mai a Ida Olmstead, telā ne kamata o kau ki fakatasiga i te 1902 penei, “Ne iloa ne matou me uke a fakamanuiaga ka maua ne tino katoa, kae ne seki fakata‵mala eiloa matou o folafola atu te tala ‵lei tenei ki tino e fetaui mo matou i te galuega talai.”

Ke fakamautinoa aka me e isi ne meakai faka-te-agaga, ne kamata o ‵lomi ne taina i te Peteli a tusi. Ne ‵togi ne latou a mea faigaluega kae fakapikipiki i se fale ‵togi telā e tu i te 35 Myrtle Avenue, Brooklyn, New York, e se ‵mao mai te Peteli.

Ne kamata a Leo Pelle mo Walter Kessler o ga‵lue i te Peteli i a Ianuali 1920. “I te mā okoatuga,” ko pati a Walter, “ne kilo mai a te ovasia o te koga ‵lomi tusi ki a māua kae fai mai, ‘E toe tasi mo te āfa itula kae ta te taimi ‵kai.’ Ne fakaga‵lue ne ia māua ke tali a pokisi tusi mai te potu tafa ki lalo.”

 Ne masaua ne Leo a mea kolā ne ‵tupu i te suā aso: “Ne ‵tau o ‵fulu ne māua a ‵pui o te fola muamua o te fale tenā. Tenā loa te ‵toe galuega lailai ke fai ne au. Kae ko te galuega tenā i a te Aliki kae aoga eiloa.”

I se fia vaiaso mai tua ifo, ne ‵lomi The Watch Tower ne volenitia loto finafinau. E onosefulu afe ‵kopi o The Watch Tower i a Fepuali 1, 1920 ne ‵lomi aka i te mea ‵lomi tusi i te fola i te lua. I te taimi eiloa tenā, ne fakapikipiki ne taina te suā masini ‵lomi tusi e taku ko te Battleship i te potu tafa ki lalo. Ne ‵lomi foki The Golden Age kamata mai i te lomiga i a Apelila 14, 1920. E mautinoa me ne fakamanuia ne Ieova a galuega ne fai ne tino loto finafinau konei.

Ko mafai nei o toe ‵kau fakatasi a tino fakamaoni o Ieova kae fai fakatasi olotou mea. Kae e isi ne Tino A‵koga ki te Tusi Tapu ne tiaki ne latou te fakapotopotoga i taimi faiga‵ta konei, mai te 1917 ke oko ki te 1919. Ne a mea e mafai o fai ke fesoasoani atu ki a latou?

The Watch Tower o Apelila 1, 1920 e maua i ei te mataupu tenei “Ke ‵Nofo Fakatasi Tatou i te Filemu.” E maua i ei te fakamalosiga gali tenei: “E tali‵tonu matou . . . me i tino kolā e maua ne latou te agaga o te Aliki . . . e toka o fakapuli a mea i olotou tua, . . . kae ke ‵nofo fakatasi i te ‵kau fakatasi kae ke fai pelā me se foitino e tasi.”

E tokouke a tino ne ‵saga tonu atu ki pati a‵lofa konei. Ne tusi mai se tauavaga penei: “E iloa ne māua me ne fai ne māua se mea ‵se i te tausaga ko teka mo nisi tausaga e uke atu me ne seki ‵kau māua ki te galuega [talai]. . . . E fakamoe‵moe māua ke mo a eiloa e toe takitaki‵segina.” A tino ga‵lue konei, kolā ne toe fakamalosi aka, e uke ‵ki a galuega koi ‵tau o fai ne latou.

I a Iuni 21, 1920, ne kamata ne Tino A‵koga ki te Tusi Tapu se galuega fakapito ke tufatufa atu a te tusi ko te “ZG,” telā ko te tusi ko te The Finished Mystery, * telā e malūlū tena ‵kava. E uke ‵ki a tusi konei koi ‵toe i te taimi ne fakatapu i ei i te 1918.

 A tino talai katoa ne ‵kami ke ‵kau ki te galuega tenei, kae e se ko paenia fua. “A tino papatiso katoa i fakapotopotoga katoa kolā e mafai o ‵kau ki ei e ‵tau o ‵kau ki ei mo te loto fia‵fia. Tenei te munatuku mō tino taki tokotasi i te taimi nei: ‘E tasi fua te mea e fai ne au’—tufa atu te ZG.” Ne fai mai a Edmund Hooper me i te galuega tenei ko te galuega mai fale ki fale ke ‵kau ki ei a tino e tokouke mō te taimi muamua. Ne toe fai mai a ia, “Ne kamata o malamalama faka‵lei matou i mea e aofia i te galuega telā ka salalau atu ki koga e seki fakamoe‵moe matou ki ei.”

Ona ko te faigata ke fesokotaki atu ki Tino A‵koga ki te Tusi Tapu i nisi fenua i te Taua Muamua a te Lalolagi, ne manako te Taina ko Rutherford o fakamalosi a taina konei kae toe fakatoka te faiga o te galuega talai. Tela la, i a Aokuso 12, 1920, ne olo atu a ia mo nisi taina e tokofa o āsi atu ki Peletania, Eulopa, mo te Middle East.

I te āsiga a Rutherford ki Peletania, ne fai ne Tino A‵koga ki te Tusi Tapu a fono e tolu mo fakatasiga mō tino katoa e 12. A te aofaki o tino ne ‵kau ki ei e nofo ki se 50,000. Ne fakamatala mai ne The Watch Tower a te āsiga tenā penei: “Ne maua ne taina a fakamalosiga. Ne ‵kau fakatasi faeloa latou kae ga‵lue fakatasi ona ko te a‵lofa, kae ne toe fakamalosi aka a tino kolā ne vāi‵vai.” I Paris, ne toe fai foki ne te Taina ko Rutherford a tena lāuga “E Lau i Miliona a Tino e Ola Nei ka se Toe ‵Mate.” I te taimi ne kamata ei te lāuga, ne ‵fonu eiloa te koga tenā. E toko toluselau a tino ne fakamolemole ke maua ne fakamatalaga fakaopoopo.

I vaiaso ki tua ifo, ne āsi atu a nisi taina ki Atenai, Cairo mo Ielusalema. Ke fakatumau a te fia‵fia o tino kolā ne maua i koga konei, ne fakatu ne te Taina ko Rutherford se koga e maua i ei a tusi i te fakai o Ramallah, e pili ki Ielusalema. Ne foki a ia ki Eulopa kae fakatu ne ia te Ofisa i Eulopa ki te Kogaloto kae fakatoka ke ‵lomi a tusi i konā.

I a Setema 1920, ne ‵tala mai ne Tino A‵koga ki te Tusi Tapu a te The Golden Age Napa 27, se lōmiga fakapito telā e fakaasi faka‵sau atu i ei a fakasauaga ne fai ki Tino A‵koga ki te Tusi Tapu i te 1918. Ne ‵lomi i te Battleship, telā ne taku mai muamua, a ‵kopi e fa miliona o te mekesini tenei i te ao mo te po.

Ne iloa aka ne tino kolā ne fai‵tau ki te mekesini tenā a te tala fakaofoofogia o Emma Martin. A te Tuagane ko Emma se paenia i San  Bernardino, California. I a Mati 17, 1918, ne ‵kau atu tou fafine mo nisi taina e tokotolu ko E. Hamm, E. J. Sonnenburg, mo E. A. Stevens, ki se maopoopoga a Tino A‵koga ki te Tusi Tapu.

E tokotasi te tagata ne kau atu ki ei ne seki fanatu ke tauloto a ia ki te Tusi Tapu. “Au ne fano ki te fakatasiga tenei . . . i te fakatonuga a te Ofisa o te Tulafono,” ko ana pati ne fai fakamuli mai. “Au ne fano ke maua ne au ne fakamaoniga.” Ne maua ne ia a te “fakamaoniga” ne ‵sala a ia ki ei, ko te ‵kopi o The Finished Mystery. I nai aso ki tua ifo, ne ‵loka ei a te Tuagane ko Emma mo taina e tokotolu. Ne fakasala latou me ne ofa ne latou se tulafono a te malo mai te tufatufaatuga ne latou a ‵kopi o te tusi telā ne fakatapu.

Ne maua aka me i a Emma mo ana taugasoa e ‵se kae ne fakasala ki tausaga e tolu i te falepuipui. I a Me 17, 1920, ne seki toe mafai o fai olotou tagi, tenā ne ‵pei ei latou ki te falepuipui. Kae ne ma‵fuli a mea ki se tulaga tai ‵lei atu.

I a Iuni 20, 1920, ne fakamatala atu ne te Taina ko Rutherford a te tala o latou i se fono i San Francisco. Ne ‵poi a tino fakalogo‵logo i mea ne fai ki Kelisiano konei, ave ei ne latou se fekau ki te pelesitene o te Iunaite Sitete. Ne tusi atu latou: “A te fakasalaga . . . o Mrs Martin . . . mai lalo i te tulafono se faifaiga sē tonu . . . A te faifaiga ne fai ne ofisa o te malo ke fakaaoga te lotou malosi . . . ke fai ne ‵losiga . . . ki a Mrs Martin . . . kae oti aka ko ave ki te fono kae fakasala ki te ‵pei ki te falepuipui e taku ne matou me se . . . faifaiga masei ‵ki.”

I te aso mai tua, ne ‵fuli fakavave ne te Pelesitene ko Woodrow Wilson a fakasalaga o te Tuagane ko Emma mo Taina ko Hamm, Sonnenburg, mo Stevens. Ne ‵tala mai ei latou ki tua mo te falepuipui.

I te fakaotiotiga o te 1920, e uke ‵ki a pogai ne ‵tau ei o fia‵fia a Tino A‵koga ki te Tusi Tapu. Ne gasolo aka ki mua a te galuega i te laumua, kae sili atu i ei, ne ga‵lue malosi a Kelisiano ‵tonu o folafola atu a te Malo o te Atua me ko te auala fua ka faka‵lei aka ei a fakalavelave o tino. (Mata. 24:14) A te tausaga mai tua ifo ko te 1921 se tausaga tafasili foki i te gali ke folafola atu i ei a te munatonu o te Malo.