Ne ga‵lue malosi a taina i te Peteli mō se tausaga ke faite te lotou koga fakasalalau ko te WBBR i Staten Island, i New York. I te otiga ne ‵kati a lakau ‵lasi kae ‵teu faka‵lei te laukele tenā, faite ei ne latou se fale lasi mo ‵nofo a tino ga‵lue mo se suā fale mo tuku a mea faigaluega. I te otiga o te galuega tenei, ne aumai ne taina a mea fakasalalau e manakogina mō fai te galuega. Kae koi isi loa ne nisi fakalavelave e ‵tau o ‵saga ki ei.

Ne iloa aka ne taina me faigata ‵ki ke faka‵piki a te antenna i konā. Ne ‵tau o nā a te antenna telā e 91 mita (300 futu) te loa i te vāsia o pou ‵lasi kolā e nofo ki se 61 mita (200 futu) te ‵loa. Ne seki ‵lei te faiga muamua. Kae mai te talitonu ki te fesoasoani o Ieova, tenā ne manuia ei olotou taumafaiga. Ne fai mai a Calvin Prosser, telā ne galue i te galuega tenā, “Moi ne manuia te motou taumafaiga muamua, penei ko fai atu matou mo te fakamata‵mata, ‘Kilo ki te mea ne fai ne matou!’” I lō te fai penā, ne tavae ne taina a Ieova, kae ne seki oti atu i konā olotou fakalavelave.

Koi fou eiloa a te koga fakasalalau, kae ne seki mauagofie a mea faigaluega e manakogina. Tenā ne fakaaoga ei ne taina se transmitter mua telā e 500-watt tena malosi kae e maua i konā. I lō te ‵togi o se microphone, ne fakaaoga ne latou se telefoni masani. I se po e tasi i a Fepuali, ne ‵tofo ne taina a mea faigaluega konei. Ne ma‵nako latou o fakatoka se polokalame ke fakasalalau atu, tenā ne usu ei ne taina a pese o te Malo. Ne fai mai ne te taina ko Ernest Lowe te tala faka‵kata i te taimi ne usu ei a taina, kae telefoni atu a  te famasino ko Rutherford, b telā ne fakalogologo ki tena letio i Brooklyn, telā e nofo ki se 25 kilomita (15 mai) te ‵mao mai konā.

Ne fai atu te taina ko Rutherford, “Fakagata te logoa tenā. Koutou e logoa loa pelā mo pūsi!” Ne ma‵vale a taina kae tamate fakavave te lotou polokalame. Kae ‵lei me ko iloa ne latou me ola loa te letio kae ko toka foki mō te fakasalalauga muamua.

I a Fepuali 24, 1924, i te fakasalalauga muamua eiloa, ne ofo atu ne te taina ko Rutherford a te fale fakasalalau tenei “mō fai te galuega telā ne tuku mai ne Keliso te Tupu” ke fai ne tatou. Ne fai mai a ia me i te pogai ne fakatu aka ei te koga fakasalalau tenei, ko te mea “ke fesoasoani atu ki tino ke malama‵lama i te Tusi Tapu mo te taimi tāua ko ola i ei tatou.”

Ne manuia eiloa a te fakasalalauga muamua tenā. Ne fakaaoga a te koga fakasalalau tenei ko te WBBR mō se 33 tausaga, ke fakasalalau atu i ei a polokalame a tino o Ieova.

I a Iulai 1924, ne fai te Fono Lasi a Tino A‵koga ki te Tusi Tapu i Columbus, Ohio. Ne o‵mai a tino ‵kami mai fenua e uke o te lalolagi, kae ne fakalogo‵logo ki lāuga i te ‵gana Alapi, Palagi, Falani, Siamani, Eleni, Hungary, Italia, Lithuania, Polani, Lusia, ‵gana Scandinavia, mo te ‵gana Ukraine. Nisi vaega o te polokalame ne fakasalalau atu i te letio, kae ne fakamolemole atu a taina ki se tino tusitala o te nusipepa ko te Ohio State Journal ke tusi olotou lipoti e uiga ki te polokalame o te fono lasi i aso takitasi.

I te Aso Fa, Iulai 24, e silia atu mo te toko 5,000 tino ne ‵kau ki te galuega talai i te koga e fai ei te fono. Ne tufatufa atu ne latou a tusi toeitiiti ko kātoa te 30,000 kae kamata te fia afe o akoga faka-te-Tusi Tapu. Ne taku ne The Watch Tower a te aso tenei ki te “‵toe vaega fakafiafia o te fono.”

A te suā mea gali ne sae mai i te Fono i te Aso Lima, Iulai 25, ko te taimi ne faitau mai ei ne te taina ko Rutherford mo te loto toa se faka‵pulaga telā e taku fakamasei i ei a takitaki lotu. Ne fai mai a ia me i tino kolā e aofia i mea fakapolitiki, mea fakalotu, mo tino faipisinisi, e “taofi ne latou a tino ke mo a e tauloto ki te munatonu e uiga  ki te Malo o te Atua telā ka aumai ne ia a fakamanuiaga ki olaga o tino.” Ne fai mai foki ne ia te ‵se o tāgata konei me ne ‵lago latou ki “te Malo ‵Kaufakatasi kae fakaiku aka ne latou me tenā te auala e fakaaoga ne te Atua ke pule mai ki te lalolagi.’” Ka manakogina ne Tino A‵koga ki te Tusi Tapu a te loto toa ke talai atu te fekau tenei ki tino.

Ne fakamatala mai i se mataupu o The Watch Tower a ikuga ne maua mai te fono: “A te kautau foliki tenei o te Aliki kolā ne maopoopo i te Fono i Columbus ne fakamalosigina olotou fakatuanaki i te lotou ‵fokiga . . . , kae ko maua ne latou te loto malosi ke fakafesagai atu ki ‵tekemaiga mai te fili kolā e fai pelā me ne afi ‵ka.” Ne fai mai a Leo Claus, telā ne kau ki te fono: “I te otiga o te fono, ne fia‵fia matou o talai atu te fekau tenei i te motou koga talai.”

I a Oketopa, ne kamata o tufatufa atu ne Tino A‵koga ki te Tusi Tapu te fia miliona o ‵kopi o te tamā pepa ko te Ecclesiastics Indicted, telā e aofia i ei te fekau a te taina ko Rutherford ki takitaki lotu. I te tamā fakai o Cleveland, i Oklahoma, ne tufatufa atu ne te taina ko Frank Johnson a tamā pepa konā i se 20 minute a koi tuai o oko atu a nisi tino talai o puke a ia. Ne seki mafai o faka‵tali a ia i se koga me ne kaitāua a tāgata o te fakai ki tena galuega talai kae ne salasala ki a ia. Tenā ne fanatu te taina ko Johnson o ‵muni i se falesa pili mai. Ne lavea ne ia me seai ne tino i ei, tuku ei ne ia a ‵kopi o te Ecclesiastics Indicted ki loto i te Tusi Tapu mo nofoga takitasi. Ne ulu fakavave a ia ki tua mo te falesa kae fanatu ki nisi falesa e lua o fai foki te mea tenā.

Ne foki fakavave atu a Frank ki te koga telā ne ‵tau o puke ne taina a ia i ei. Ne ‵muni a ia mai tua o te koga utu penitini, kae kilokilo atu ki tāgata kolā ne salasala ki a ia. Ne ‵tele mai a tāgata konā i tafa o te koga tenā, kae e se lavea ne latou a ia. I te ‵sekega, kae oko atu a taina kolā ne talai i nisi fakai ‵pili o puke tou tagata, mea loa ko ‵tele.

Ne fai mai se taina, “I te tiakinaga ne matou te fakai, ne ‵tele matou i tua o falesa e tolu. Kāti e nofo ki se 50 tino e ‵tu i mua o falesa takitasi konā. Nisi tino e fai‵tau a te tamā pepa, kae ko nisi e fakaasi atu ne latou ki te faifeau. Toeitiiti eiloa kae ‵poa matou ne tino konei! Kae fakafetai matou ki a Ieova te ‵tou Atua mō tena fesoasoani ke iloa a mea e ‵tau o fai ke fakailoa atu a te fekau tenā o te Malo kae ke se ‵poa ne omotou fili.”

I nisi fenua, ne talai atu foki mo te loto ‵toa a nisi Tino A‵koga ki te Tusi Tapu. I te feitu ki mātū o Falani, ne talai atu a Józef Krett ki tino keli aulo kolā ne o‵mai mai Polani. Ne fakatoka ne ia se lāuga i te matua “The Resurrection of the Dead Soon.” I te taimi ne tufa atu a pepa ‵kami, ne fai atu se faifeau ki ana tino ‵lotu ke mo a ma ‵kau ki ei. Kae ne ‵kese te mea ne iku mai i ei. E silia atu mo te toko 5,000 tino ne ‵kau atu o fakalogo‵logo ki te lāuga tenā, e aofia ei te faifeau! Ne ‵kami ne te taina ko Krett a te faifeau ke fakaasi atu a mea e talitonu a ia ki ei, kae ne seki talia ne ia. I te otiga o tena lāuga, ne tufa atu ne te taina ko Krett ana tusi katoa ki tino, me e lavea ne ia me fia iloa ne latou a mea e uke atu mai te Muna a te Atua.—Amo. 8:11.

I Afelika, ne fakasalalau atu ne Claude Brown a te tala ‵lei ki te Gold Coast, telā ko Ghana i aso nei. Ne fesoasoani atu ana lāuga mo tusi ne tufatufa atu ne ia ke fakasalalau fakavave atu a te munatonu i te fenua tenā. A John Blankson, telā koi akoga pelā me se tokita palu vailakau, ne fakalogologo foki ki se lāuga e tasi a te taina  ko Brown. Ne fatoa iloa aka ne ia me ko te munatonu eiloa tenā. Ne fai mai a John, “Ne fai ne te munatonu ke maua ne au se lagonaga fiafia, kae ne fakailoa atu ne au ki tino e tokouke i te akoga.”

I te aso e tasi, ne fanatu a John ki te faifeau o te lotu Anglican o fesili atu ki a ia e uiga ki te Tolutasi, se akoakoga telā ko iloa ne ia me e se fakavae ki te Tusi Tapu. Ne ‵tuli a ia ne te faifeau, kae pakalaga atu: “A koe e sē se Kelisiano; koe kau mo te Tiapolo. Fano kea‵tea!”

I tena okoga ki te fale, ne tusi atu a John ki te faifeau, kae ‵kami ke sau‵tala lāua ki te mataupu ko te Tolutasi i se maopoopoga e tasi. Ne fai atu te faifeau ke fano a John ki te pule o te akoga, telā ne fesili atu ei te faiakoga me isi eiloa sena tusi ne tusi io me ikai.

Ne tali atu a John, “Ao, e isi.”

Ne fakatonu atu ei te faiakoga ki a John ke tusi o fakatoese ki te faifeau. Tenā ne tusi atu ei a John:

“Tou ‵malu, ne fakamolemole mai toku faiakoga ke tusi atu saku tusi fakatoese, kae ko toka au o tusi atu māfai fua e fai ‵tonu mai koe me e ‵se a akoakoga konā e akoako ne koe.”

Ne poi a te faiakoga kae fesili atu, “Blankson, e mata, konei a pati e manako koe o tusi ki lalo?”

“Ao, e tou ‵malu. Konā loa aku pati e mafai o tusi ki lalo.”

“Koe ka fakatea ne au. Kaia e faipati ‵teke ei koe penā ki te faifeau o te lotu o te malo kae manako o akoga i konei?”

“Tou ‵malu, . . . kafai e akoako ne koe matou kae e isi ne manatu e se malama‵lama matou i ei, e mata, e se ‵tau o fai a omotou fesili?”

“E mafai.”

“Ia, tou ‵malu, tenā te mea ne tupu. Ne akoako mai ne te tagata tenā a te Tusi Tapu ki a matou, kae ne fai atu ne au se fesili ki a ia. Kafai e se maua ne ia o tali te fesili, kaia fua la e ‵tau ei o tusi atu saku tusi fakatoese ki a ia?”

Ne seki fakatea a Blankson. Ne seki ai foki sena tusi fakatoese ne ave.

E uiga ki galuega ne fai i te tausaga tenā, ne fai mai The Watch Tower: “E mafai o fai atu ne matou a pati konei a Tavita: ‘Ka fakatoka ne koe toku malosi mō te taua.’ (Sala. 18:39) Ne uke eiloa fakamalosiga ne maua i te tausaga tenā, me ne lavea ne matou a te lima o te Aliki . . . Ne talai atu eiloa ana tavini fakamaoni . . . mo te loto fia‵fia.”

Fakamuli ifo i te tausaga tenā, ne fai a palani a taina ke fakalauefa atu a te lotou galuega talai e auala i letio. Ne kamata o fai a galuega ki te suā koga telā e pili ki Chicago. Ne fakaigoa a te koga fakasalalau fou tenei ki te WORD. Mai te fakaaogaga o te transmitter telā e 5,000-watt te malosi, ne mafai o fakaoko atu ne te WORD a te fekau o te Malo ki koga kolā e nofo ki te fia selau maila te ‵mao, ke oko atu foki loa ki te feitu ki mātū o Kanata.

I te tausaga 1925, ne fesoasoani atu a Ieova ki taina ke malama‵lama i te mainaga fou i te Fakaasiga mataupu 12. Ona ko te mainaga fou tenei, ne seki tumau a nisi tino i te tavini atu ki a Ieova. Kae ko te tokoukega ne fia‵fia ke iloa faka‵lei ne latou a mea kolā ne ‵tupu i te lagi mo tena aoga ki tino o te Atua i te lalolagi.