E mata, e faigata ki a koe ke masaua au mea ne fatoa oti ne sukesuke ki ei? Tenā eiloa te mea e tupu ki a tatou katoa i nisi taimi. Ne a au mea e mafai o fai? Ke toe onoono ki manatu tāua.

I te taimi e fai ei au sukesukega, ke mānava faeloa o tusi ki lalo a manatu tāua. Onoono ki te mea ne fai atu ne Paulo ki tino kolā e sukesuke ki tena tusi ke fai ne latou, i ana pati konei: “Tenei te manatu tāua.” (Epe. 8:1) Mai pati konā, ne fesoasoani atu a ia ki ana tino fakalogo‵logo ke malamalama i te uiga o ana pati, kae ke lavea ne latou te sokoga o manatu konā ki te manatu tāua.

E mafai o fakaavanoa ne koe se taimi, kāti se sefulu minute ma oti au sukesukega, ke mafaufau ‵loto ki manatu tāua mai au sukesukega ne fai. Kafai e se masaua ne koe, toe onoono ki ulutala fo‵liki io me ko te laina muamua o palakalafa takitasi ke fesoasoani atu ke masaua ne koe se mea mai i ei. Kafai ne tauloto ne koe se mea fou, taumafai ke fakamatala ne koe i au pati totino. I te taimi e toe onoono koe ki manatu tāua, ka fai ei ke masaua ne koe a manatu konā kae ke malamalama foki i te aoga o te mataupu tenā ki tou olaga.