Ne fai a te fakaosoga e pelā me se vaega o te auala ki loto i te potu Tapu o te faletapu. E fai mai a lōmiga o te New World Translation of the Holy Scriptures kolā ne ‵lomi mai mua o te 2023, “a te fakaosoga i te feitu ki mua e 20 kupita te loa, telā e ‵pau mo te lauefa o te fale, kae ko tena maluga e 120.” (2 Nofo. 3:4) E fai mai a nisi ‵fuliga me i te fakaosoga e “120 kupita” te maluga, ko tena uiga se taoa telā e 53-mita (175-futu) te maluga!

Kae ne fai mai te lōmiga i te 2023 o te New World Translation e uiga ki te fakaosoga o te faletapu o Solomona: “A tena maluga e 20 kupita,” io me kāti se 9 mita (30 ft) te maluga. a Mafaufau ki nai pogai ne fai ei te fakamafuliga tenei.

E se taku mai i te 1 Tupu 6:3 a te maluga o te fakaosoga. I te fuaiupu tenā, ne fakamau fua ne Ielemia, te tino ne tusi ne ia te tusi tenā, a te loa mo te ‵poko o te fakaosoga tenā, e se ko tena maluga. Kae i te mataupu mai tua, ne fakamatala fakalikiliki mai ne ia a nisi vaega tāua o te faletapu, e aofia i ei te Tai kopa, kā e sefulu, mo pou kopa e lua kolā e ‵tu i tua i te fakaosoga. (1 Tupu 7:​15-37) Kafai e tonu loa me 50 tupu mita te maluga o te fakaosoga kae loa atu i te faletapu kātoa, kaia la ne seki taku mai ei ne Ielemia a tena maluga? Ke oko foki loa ki te fia senitenali ki tua ifo, ne lipoti mai a tino tusitala Iutaia me e se oko te maluga o te fakaosoga ki te maluga o te faletapu kātoa o Solomona.

E fakalotolotolua a tino ‵poto ki te mafai ne ‵pui o te faletapu o taofi ne latou se fakaosoga telā e 120-kupita te maluga. A fatu mo puliki ma‵luga ‵ki i aso mua, e pelā mo ‵pui mataloa o te faletapu i Aikupito, e lauefa ‵ki tena fakavae i lalo ko fano ei o lauliki te feitu ki luga. Kae ne ‵kese te faletapu o Solomona. Ne iloa ne tino ‵poto me i ana ‵pui e 6 kupita, io me 2.7 mita (9 futu), te lauefa. Tenā ne fai ei ne Theodor Busink, se tagata poto i te ‵lomi a ata o fale a te fakaikuga tenei: “E ‵tusa mo te lauefa o te ‵pui [o te mataloa ki loto o te faletapu], ailoga e 120 kupita te [maluga] o te fakaosoga.”

Kāti ne tai ‵se malie a pati ne ‵kopi mai i te 2 Nofoaiga Tupu 3:4. E tiga loa e sae mai i nisi lōmiga mua a te “120” i te fuaiupu tenei, kae e sae mai foki i nisi lōmiga fakatuagagina, e pelā mo te Codex Alexandrinus i te lima senitenali mo te Codex Ambrosianus i te ono senitenali, a te “20 kupita.” Kaia ne mafai ei o tusi ‵se ne se tino laga tusi a te “120”? E tai ‵pau eiloa te auala e tusi i ei a te pati “selau” mo te “kupita” i te ‵gana Epelu. Tela la, kāti ne mafai ne te tino laga tusi o tusi ne ia te pati “selau” i lō te pati “kupita.”

E tonu, e tiga loa e taumafai tatou ke malamalama i fakamatalaga konei kae ke maua foki te ata tonu o te faletapu o Solomona, kae e sili atu te tāua ke ‵saga tonu tatou ki te mea e fakaata mai ne te faletapu tenā—ko te faletapu sili faka-te-agaga. E loto fakafetai eiloa tatou me ne ‵kami mai ne Ieova ana tavini katoa ke tapuaki atu ki a ia i loto i te faletapu tenā!—Epe. 9:​11-14; Faka. 3:12; 7:​9-17.