1. Mai mua malie o mate te apositolo ko Petelu, se a te mea ne fakamalosi atu ke fai ne ia?

 NE ILOA ne te apositolo ko Petelu me ko pili o mate a ia. I te fia sefulu tausaga ne tavini fakamaoni ei a ia, ne ola fakatasi a ia mo Iesu, ‵tala a koga talai ‵fou, kae tavini atu e pelā me se sui o te potukau pule. Kae ne seki gata i konā te taviniga a Petelu. Kāti ko te 62-64 T.A., ne fakaosofia a ia ke tusi a tusi e lua—ko tusi i te Tusi Tapu ko te 1 mo te 2 Petelu. Ne fakaasi mai ne ia tena fakamoemoega ke mafai o aoga a tusi konei ki Kelisiano mai tua o tena mate.—2 Pe. 1:​12-15.

2. Kaia ne manakogina malosi ei a tusi a Petelu?

² Ne tusi ne Petelu ana tusi konei i te taimi ne mafatia ei ana taina tali‵tonu i “tofotofoga kese‵kese.” (1 Pe. 1:6) Ne taumafai a tāgata ma‵sei o akoako atu a akoakoga ‵se mo amioga sē ‵ma i loto i te fakapotopotoga. (2 Pe. 2:​1, 2, 14) Ko pili o fe‵paki a Kelisiano i Ielusalema mo te “gataga o mea katoa”—ko te fakamaseiga o te fakai tenā mo te olaga masani o tino Iutaia ne te kautau Loma. (1 Pe. 4:7) E mautinoa me ne fesoasoani atu a tusi a Petelu ki Kelisiano ke lavea ne latou a mea e mafai ne latou o fai ke kufaki i tofotofoga i te taimi tenā kae ke fakatoka mō tofotofoga i aso mai mua. b

3. Kaia e ‵tau o iloilo ne tatou a tusitusiga a Petelu?

³ E tiga loa ne tusi fakapitoa atu a Petelu ki Kelisiano i te senitenali muamua, ne aofia ne Ieova a tusi konei e pelā me se vaega o Tena Muna. Tela la, ko mafai o maua ne tatou a mea aoga mai tusi konā. (Loma 15:4) Ona ko tatou e ola i se lalolagi telā e fakamalosi aka i ei a amioga sē ‵ma, e fe‵paki foki tatou mo tofotofoga kolā e mafai o fai ei ke faigata te ‵tou taviniga ki a  Ieova. E se gata i ei, ko pili foki o tupu se fakalavelave telā e sili fakafia atu i lō te fakalavelave telā ne fakaseai atu i ei te olaga o tino Iutaia. E isi ne fakamasauaga tāua e maua ne tatou i tusi e lua a Petelu. Ka fesoasoani mai a mea konei ke ‵nofo fakamoemoe tatou ki te aso o Ieova, ke manumalo i te mataku ki tino, kae ati aka te alofa tonu te suā tino ki te suā tino. A vaegā fakamasauaga penā e mafai foki o fesoasoani atu ki toeaina ke manuia i te tausi atu ki manakoga o te lafu mamoe.

4. E ‵tusa mo te 2 Petelu 3:​3, 4, se a te mea e mafai o fakavāivāi mai ki ‵tou fakatuanaki?

⁴ E sikomia tatou ne tino kolā e se tali‵tonu ki valoaga i te Tusi Tapu. E mafai o fakatauemu mai a tino ‵teke ki a tatou ona ko te ‵nofo fakatalitali o tatou ki te gataga i tausaga e uke. E fai mai nisi tino me ka se oko mai eiloa. (Faitau te 2 Petelu 3:​3, 4.) Kafai e lagona ne tatou a manatu penā mai se tino i te fale, i te galuega, io me se tino i te kāiga, e mafai eiloa o fakavāivāi mai ki ‵tou fakatuanaki. Ne fakamatala mai ne Petelu a mea kolā e mafai o fesoasoani mai.

5. Se a te mea ka fesoasoani mai ke maua ne tatou te kilokiloga tonu e uiga ki te gataga o te olaga tenei? (2 Petelu 3:​8, 9)

⁵ Ki nisi tino, e foliga mai me e tuai a Ieova o fakaoko mai te gataga ki te olaga masei tenei. E mafai o fesoasoani mai a pati a Petelu ke maua ne tatou se kilokiloga tonu, kae ke masaua foki me ‵kese ‵ki te kilokiloga a Ieova mo te kilokiloga a tino ki te taimi. (Faitau te 2 Petelu 3:​8, 9.) A te afe tausaga ki a Ieova e ‵pau mo se aso e tasi. A Ieova e kufaki, e se manako ke fakaseai atu se tino. Kafai ko oko mai tena aso, ko oko mai ei te gataga o te olaga tenei. Ko oko loa te gali te tauliaga ko maua ne tatou ke fakaaoga a te taimi koi ‵toe ke molimau atu ki tino i atufenua katoa.

6. I te auala fea e “olioli faeloa” tatou ki te aso o Ieova? (2 Petelu 3:​11, 12)

⁶ E fakamalosi mai a Petelu ke “olioli faeloa” tatou ki te aso o Ieova. (Faitau te 2 Petelu 3:​11, 12.) E pefea la? Se mea ‵lei ke mafaufau ‵loto tatou—i aso katoa, māfai e mafai—ki fakamanuiaga ka maua i te lalolagi fou. Fakaataata i tou mafaufau me ko tu atu koe o mānava ki se ea ‵ma pakipaki, e kai ki meakai aoga, e fakafetaui atu ki tino pele kolā ko toe faka‵tu aka, kae akoako a tino kolā ne ola i se fia senitenali ko ‵teka e uiga ki valoaga kolā ne fakataunu. Ka fesoasoani atu a te vaegā mafaufau ‵loto penā ke nofo fakatalitali koe kae ke mautinoa i a koe me ko ola eiloa tatou i aso fakaoti. Ona ko te “mea ko leva ne iloa ne koutou” a mea ka ‵tupu i aso mai mua, ka se “takitaki‵segina” tatou ne faiakoga ‵se.—2 Pe. 3:17.

7. Ne a mea e mafai o ‵tupu ki a tatou ona ko te mataku ki tino?

⁷ I te taimi e olioli faeloa tatou ki te aso o Ieova, e fakamalosi mai ei ki a tatou ke folafola atu te tala ‵lei ki nisi tino. Kae i nisi taimi, ko ma‵taku tatou ma fai‵pati atu. Kaia? Kāti ona ko te ma‵taku ki tino. Tenā te mea ne tupu ki a Petelu. I te po ne fakamasino ei a Iesu, ne mataku a Petelu ma fakaasi atu i a ia se soko o Iesu kae fakafiti faeloa me e se iloa ne ia Iesu. (Mata. 26:​69-75) Kae ne mafai o fai atu fakamuli te apositolo eiloa tenei mo te loto talitonu: “Ke mo a koutou e ma‵taku ki mea kolā e ma‵taku latou ki ei, io me e manava‵se ki ei.” (1 Pe. 3:14) E fakamautinoa mai i pati a Petelu me e mafai o manumalo tatou i te mataku ki tino.

8. Ne a mea e mafai o fesoasoani mai ke manumalo tatou i te mataku ki tino? (1 Petelu 3:15)

⁸ Ne a mea e mafai o fesoasoani mai ke manumalo tatou i te mataku ki tino? Ne fai mai a Petelu ki a tatou: “Faka‵malu a Keliso e pelā  me ko te Aliki i otou loto.” (Faitau te 1 Petelu 3:15.) E aofia i ei a te mafaufau ‵loto ki te tulaga mo te malosi pule a te ‵tou Aliki mo te Tupu, ko Keliso Iesu. Kafai koe e manavase io me mataku māfai ko sae aka se avanoaga ke talai atu te tala ‵lei ki nisi tino, ke masaua te ‵tou Tupu. Fakaataata i tou mafaufau a ia e pule i te lagi fakatasi mo te fia miliona o agelu. Ke masaua me ko oti ne tuku atu ki a ia “te pule i mea katoa i te lagi mo te lalolagi” kae ko ia ka “fakatasi faeloa mo koutou i aso katoa ke oko eiloa ki te gataga o te olaga tenei.” (Mata. 28:​18-20) Ne fakamalosi mai Petelu ki a tatou ke “toka faeloa” o ‵pulu te ‵tou fakatuanaki. E mata, e manako koe ke talai atu i te galuega, i te akoga, io me i se isi koga aka? Ke na nofo o mafaufau ki taimi e mafai o fai koe penā, ko fakatoka ei au pati ka fai atu. ‵Talo ke maua te loto malosi, mo te talitonu me ka fesoasoani atu a Ieova ke manumalo koe i te mataku ki tino.—Galu. 4:29.

9. I te auala fea ne fakatamala ei a Petelu o fakaasi atu te alofa i se taimi? (Onoono foki ki te ata.)

⁹ Ne tauloto a Petelu ke iloa ne ia o fakaasi atu te alofa. Ne nofo atu a ia i te taimi ne fai ei ne Iesu a pati konei: “Ko tuku atu ne au ki a koutou se fakatonuga fou, ke fakatau a‵lofa koutou; e pelā eiloa mo au ne alofa ki a koutou, ke fakatau a‵lofa foki koutou.” (Ioa. 13:34) Kae ui ei, ne tō a Petelu mai lalo i se  tofotofoga kae ita ma ‵kai fakatasi mo taina mo tuagane mai Fenua Fakaa‵tea. Ne taku ne te apositolo ko Paulo te faifaiga a Petelu tenā me se “uiga fakaloiloi.” (Kala. 2:​11-14) Ne talia ne Petelu a pati fakatonutonu konā kae tauloto se akoakoga tāua mai ei. I ana tusi e lua, ne faka‵mafa mai ne ia me e se ‵tau fua o maua ne tatou a lagonaga alofa ki ‵tou taina mo tuagane kae ‵tau foki o fakaasi atu ne tatou te alofa tenā.

10. E māfua mai pefea a te “tinā alofa fakataina”? Fakamatala mai. (1 Petelu 1:22)

¹⁰ Ne fai mai Petelu me e ‵tau mo tatou o fakaasi atu te “tinā alofa fakataina” ki taina tali‵tonu. (Faitau te 1 Petelu 1:22.) Te vaegā alofa tenā e maua fua ona ko te “faka‵logo ki te munatonu.” E aofia i te munatonu tenei a te akoakoga me i “te Atua e se fakailoga tino.” (Galu. 10:​34, 35) E se mafai o faka‵logo tatou ki te fakatonuga a Iesu e uiga ki te alofa māfai e a‵lofa fua tatou ki nisi tino i te fakapotopotoga kae e se ko nisi tino. E tonu, e mafai o ‵pili atu tatou ki nisi tino i lō nisi tino, e pelā mo Iesu. (Ioa. 13:23; 20:2) Kae ne fakamasaua mai a Petelu me e ‵tau o taumafai tatou ke fakaasi atu te “alofa fakataina”—ko te alofa fakakāiga—ki ‵tou taina mo tuagane katoa.—1 Pe. 2:17.

11. Se a te uiga o te ‘alofa malosi i otou loto’?

¹¹ Ne fakamalosi mai Petelu ke “fakatau a‵lofa malosi la koutou i a koutou eiloa i otou loto.” I te mataupu kātoa, a te alofa “malosi” e aofia i ei te fakaasiatuga o te alofa ki se tino faitalia me faigata ke fakaasi atu ne koe te alofa ki a ia. E pelā me se fakaakoakoga, e a, māfai ne fai ne se taina ke kaitaua io me logo‵mae koe? Kāti te lagonaga muamua e oko mai ko te taui ma sui i lō te fakaasi atu te alofa. Kae ne tauloto ne Petelu mai i a Iesu me i te Atua e se fiafia ki te taui ma sui. (Ioa. 18:​10, 11) Ne tusi mai a Petelu: “Ke se taui atu te masei ki te masei io me ko pati fakama‵sei ki pati fakama‵sei. I lō te fai penā, toe taui atu ki se fakamanuiaga.” (1 Pe. 3:9) Ke na fakamalosi eiloa koe ne te alofa malosi ke fakaasi atu te atafai mo te saga tonu atu ke oko foki loa ki a latou kolā ne fakalogo‵mae ne latou koe.

12. (a) Se a te suā mea e fakamalosi aka ne te alofa ke fai ne tatou? (e) Se a te mea e manako malosi koe o fai, e ‵tusa mo te vitio Preserve the Precious Gift of Unity?

¹² I tena tusi muamua, ne fakaaoga ne Petelu te tugapati tai ‵pau ko te “fakatau a‵lofa.” A te vaegā alofa tenā e ‵tao ne ia a “agasala e uke,” kae e se ko nai agasala fua. (1 Pe. 4:8) Kāti ne masaua ne Petelu a te akoakoga e uiga ki te alofa fakamagalo telā ne akoako atu ne Iesu i se fia tausaga mai mua. I te taimi tenā, kāti ne mafaufau a Petelu me ko oko loa a ia i te kaimalie i te faiatuga me ka fakamagalo ne ia tena taina “fakafitu taimi.” Kae ne akoako ne Iesu a ia—mo tatou—ke fakamagalo atu “faka-77 taimi,” e fakauiga i ei me seai se tapula ki ei. (Mata. 18:​21, 22) Kafai e faigata ki a koe ke fakagalue a pati fakatonutonu konei, ke loto malosi! Ne faigata ki tavini sē ‵lei katoatoa a Ieova ke fakaasi atu te loto fakamagalo i nisi taimi. A te ‵toe mea tāua i te taimi nei ko te fai o mea e ‵tau o fai ke fakamagalo tou taina kae ke maua se va filemu mo ia. c

13. Kaia e mafai ei o faigata ki toeaina ke fakamalosi atu a taina mo tuagane?

¹³ E mautinoa me ko se toe puli eiloa i a Petelu a pati a Iesu ki a ia mai tua o tena toetuga: “Tausi aku tamā mamoe.” (Ioa. 21:16) Kafai koe se toeaina, e iloa ne koe me fakasino atu foki a fakatonuga konā ki a koe. E mafai o faigata, ke maua ne se toeaina te taimi ke tausi faka‵lei ki tena tiute tāua tenei. Muamua la, e  ‵tau mo toeaina o tausi atu ki olotou kāiga i te feitu faka-te-foitino, feitu tau lagonaga, mo te feitu faka-te-agaga. E ‵tau o fai latou mo fakaakoakoga ‵lei i te faiga o te galuega talai e pelā foki mo te faiga o olotou tofiga i fakatasiga, tamā fono, mo fono ‵lasi. E tavini atu a nisi toeaina e pelā me ne sui o te Komiti mō Fakaimasaki io me talia ne latou a tiute i te Local Design/Construction Department. A toeaina ne tāgata fakalave‵lave eiloa!

14. Se a te mea e mafai o fakamalosi atu ki toeaina ke tausi faka‵lei te lafu mamoe? (1 Petelu 5:​1-4)

¹⁴ “Tausi faka‵lei te lafu mamoe a te Atua,” ko te fakamalosiga a Petelu ki ana taina toeaina. (Faitau te 1 Petelu 5:​1-4.) Kafai koe se toeaina, e iloa ne matou me alofa koe ki ou taina mo tuagane kae manako o tausi faka‵lei ki a latou. Kae i nisi taimi ko mafaufau ifo koe me i a koe ko tō fakalavelave io me ko tō fi‵ta telā ko se mafai ei o fakataunu tou tiute. Se a tau mea e mafai o fai? ‵Ligi atu ki a Ieova a mea e manavase koe ki ei. Ne tusi mai a Petelu: “Kafai e tavini atu se tino, ke tavini atu e ‵tusa mo te malosi telā e tuku atu ne te Atua.” (1 Pe. 4:11) Kāti e fe‵paki ou taina mo tuagane mo fakalavelave kolā e se mafai o faka‵lei aka i te olaga tenei. Kae masaua me e sili fakafia atu te fesoasoani e mafai o maua mai i “te tausi mamoe sili,” ko Iesu Keliso, i lō te mea e mafai ne koe o fai. E mafai o fesoasoani mai a ia i te taimi nei pelā foki mo te lalolagi fou. E fakamolemole atu a te Atua ki toeaina ke a‵lofa ki olotou taina, ke tausi faka‵lei a taina, kae ke fai pelā me ne “fakaakoakoga ‵lei ki te lafu mamoe.”

15. Ne tausi faka‵lei atu pefea se toeaina ki te lafu mamoe? (Onoono foki ki te ata.)

¹⁵ A William, telā ko leva ne fai pelā me se toeaina, e malamalama ‵lei i te tāua ke tausi atu ki te lafu mamoe. I te kamataga o te famai ‵pisi ko te COVID-19, ne fakatāua ne ia mo ana taina toeaina ke fesokotaki atu ki tino taki tokotasi i te lotou potukau i vaiaso katoa. Ne fakamatala mai ne ia te pogai: “E tokouke a taina e ‵nofo i a latou eiloa i olotou fale kae uke a mea e mafau‵fau ki ei, kae faigofie fua o ‵fuli olotou mafaufauga ki mea sē aoga.” Kafai ko isi se fakalavelave o se taina, e fakalogologo faka‵lei a William ke iloa ne ia te mea telā e manavase malosi ki ei te taina tenā io me manakogina ne ia. Ko ‵sala ei a ia ki se auala ke fesoasoani atu, e masani ko vitio mai i ‵tou  fakatuatusi i te neti. Ne fai mai a ia: “Ko sili atu te manakogina ke tausi faka‵lei atu ki te lafu mamoe i te taimi nei i lō taimi mua. E fai ne tatou te ‵toe mea e mafai ke fesoasoani atu ki tino ke tauloto e uiga ki a Ieova; e ‵tau foki o fai tatou penā ke tausi faka‵lei atu ki te lafu mamoe, ke fesoasoani ki mamoe a Ieova ke tumau i te munatonu.”

16. I auala fea e mafai ei o fakagalue ne tatou a akoakoga ne tauloto ne tatou mai tusi a Petelu?

¹⁶ Ne sau‵tala tatou ki nai akoakoga mai tusi fakaosofia e lua a Petelu. Kāti ne lavea ne koe a nisi feitu kolā e manakogina ke galue koe ki ei. E pelā me se fakaakoakoga, e mata, e manako koe o mafaufau ‵loto faeloa ki fakamanuiaga ka maua i te lalolagi fou? Kai fakatoka ne koe se fakamoemoega ke taumafai o talai atu i te galuega, akoga, io me i nisi koga aka? E mata, e lavea ne koe a nisi auala kolā e mafai o fakaasi atu te alofa malosi ki ou taina mo tuagane? Toeaina, e a, ko oti ne fakaiku aka ne koe ke tausi faka‵lei atu ki mamoe a Ieova mo te loto fiafia mo te loto fesoasoani? A te iloilo ne koe a koe eiloa mo te fakamaoni e mafai o fakaasi mai ei me e isi ne vāivāiga o koe, kae ke mo a ma loto vāivāi. ‘A te Aliki e atafai,’ kae ka fesoasoani atu a ia ke gasolo koe o ‵lei atu. (1 Pe. 2:3) Ne fakamautinoa mai a Petelu: “A te Atua . . . ka fakakatoatoa ne ia otou akoakoga. Ka faka‵mautakitaki ne ia koutou, ka fakamalosi ne ia koutou, ka tuku ne ia koutou i luga i se fakavae telā e ‵mautakitaki.”—1 Pe. 5:10.

17. Kafai e tumau tatou i te fakamaoni kae talia ke akoako tatou ne Ieova, ne a mea ka iku mai ei?

¹⁷ E isi se taimi ne maua ne Petelu a lagonaga me e se ‵tau o nofo atu a ia i tafa o te Tama a te Atua. (Luka 5:8) Kae mai te fesoasoani alofa o Ieova mo Iesu, ne tumau eiloa a Petelu i te tavini atu pelā me se soko o Keliso. Tenā ne talia ei a Petelu “ke ulu ki loto i te Malo se-gata-mai o te ‵tou Aliki mo te Fakaola ko Iesu Keliso.” (2 Pe. 1:11) Mafaga o taui gali! Kafai e tumau koe i te fakamaoni pelā mo Petelu kae talia ke akoako koe ne Ieova, ka maua foki ne koe te taui ko te ola se-gata-mai. Ka maua ne koe “te taui o te otou fakatuanaki, ko te otou fakaolataga.”—1 Pe. 1:9.