1-2. Kaia e gali ei ke suke‵suke tatou ki te tala o Samasoni?

 SE A te mea ka mafaufau koe ki ei māfai ko lagona ne koe te igoa Samasoni? E mafai eiloa o mafaufau koe ki se tagata telā ne tu ‵kese a tena malosi. E tonu. Kae ne fai ne Samasoni se fakaikuga sē ‵lei telā ne iku atu ki logo‵maega. Kae ui i ei, ne saga atu a Ieova ki mea katoa ne fai ne Samasoni ke fakaasi atu ei tena fakamaoni, telā ne aofia ei ne Ia a te tala o tou tagata i te Tusi Tapu ke maua ei ne tatou a mea aoga mai i ei.

² Ne fakaaoga ne Ieova a Samasoni ke fai a mea fakaofoofogia ke fesoasoani atu ei ki Ana tino filifilia, ko tino Isalaelu. I se fia selau tausaga mai tua o te matega a Samasoni, ne fakaosofia ne Ieova a te apositolo ko Paulo ke fakaaofia ne ia a te igoa o Samasoni i te fakasologa o tāgata fakatuanaki. (Epe. 11:​32-34) E mafai o fakamalosi mai a te fakaakoakoga a Samasoni. Ne fakalagolago a ia ki a Ieova, faitalia foki loa a tulaga faiga‵ta. Ke na suke‵suke nei tatou ki auala e mafai ei ne tatou o maua a fakamalosiga kae ke tauloto ki nisi akoakoga aoga mai i tena tala.

3. Se a te galuega ne tuku atu ki a Samasoni?

³ I te fanauga a Samasoni, ne pule atu te kau Filisitia ki te fenua o Isalaelu kae fakasaunoa latou. (Fama. 13:1) Ne puapuaga eiloa te kau Isalaelu ona ko olotou pulega fakasaua. Ne filifili ne Ieova a Samasoni ke “takitaki ne ia te faka‵saoga o tino Isalaelu mai lima o tino Filisitia.” (Fama. 13:5) Kae se galuega faigata ‵ki tenā! Ke fakataunu te galuega faigata tenā, ne ‵tau o fakalagolago a Samasoni ki a Ieova.

4. Ne fesoasoani atu pefea a Ieova ke fakasao ne Samasoni a ia eiloa mai te kau Filisitia? (Famasino 15:​14-16)

 ⁴ Mafaufau ki se fakaakoakoga o te talitonu o Samasoni ki a Ieova kae fakalagolago ki tena fesoasoani. I te taimi e tasi, ne o‵mai se kautau Filisitia o puke a Samasoni i Lehi, kāti i Iuta. Ne ma‵taku a tāgata o Iuta, tenā ne fakaiku aka ke tuku atu ne latou a Samasoni ki lima o te fili. Ne saisai ne ana tino a Samasoni ki lōpu ‵fou e lua kae avatu ne latou ki te kau Filisitia. (Fama. 15:​9-13) Kae ne maua ne Samasoni “te malosi mai te agaga o Ieova” kae ne ‵motu ne ia a lōpu konā i ana lima. Ne “maua ne ia se ivi kauvae koi ‵mata o te asini,” puke aka ne ia, kae fakaaoga mo ‵ta ki ei a tāgata Filisitia e toko 1,000!—Faitau te Famasino 15:​14-16.

5. Ne fakaasi atu pefea ne Samasoni a tena talitonu ki a Ieova i te fakaaogaga ne ia a te ivi kauvae o se asini?

⁵ Kaia ne fakaaoga ei ne Samasoni a te ivi kauvae o se asini? A te mea tenā e sē se meatau telā e masani o fakaaoga sāle! E mautinoa me iloa ne Samasoni me ne fakalagolago a tena manuia ki a Ieova, kae e se ko te meatau ne fakaaoga ne ia. Ao, ne fakaaoga ne te tagata fakamaoni tenei so se mea ne maua ne ia ke fakataunu i ei a te loto o Ieova. E manino ‵lei, me mai tena fakalagolago ki a Ieova, ne manumalo ei a ia i ana fili!

6. Ne a mea e mafai o tauloto ne tatou mai i a Samasoni māfai e isi ne tiute i te fakapotopotoga e tuku mai ki a tatou?

⁶ E mafai foki o fakamalosi tatou ne Ieova ke fakataunu ‵tou tiute i te fakapotopotoga, faitalia me foliga faigata ke fai penā. E mafai o fesoasoani mai a Ieova i se auala fakaofoofogia ki a tatou. Ke talitonu me i a Ieova, telā ne fakamalosi ne ia a Samasoni, ka fesoasoani atu ki a koe ke fai Tena loto māfai fua e fakalagolago koe ki Tena fesoasoani.—Faata. 16:3.

7. Se a te fakaakoakoga e fakaasi mai i ei te tāua o te ‵sala atu ki te takitakiga a Ieova?

⁷ Ne fakaasi atu ne taina mo tuagane e tokouke i galuega fakatū‵tu a te fakapotopotoga a te talitonu ki a Ieova. I aso mua, ne masani o ‵lomi kae faite ne taina a te ukega o Fale Tapuaki ‵fou mo nisi fale. Kae fakamuli ifo, ko manakogina ke fai a fakama‵fuliga ona  ko te gasolo ki luga te aofaki o tino i te fakapotopotoga a Ieova. Ne ‵sala atu a taina tōfia ki te takitakiga a Ieova kae ‵tofo aka a auala ‵fou, pelā mo te ‵togi o nisi fale ‵lasi kae faka‵fou. “I te taimi muamua, ne seki faigofie ki nisi taina ke talia te auala fou tenei,” ko pati a Robert, telā ne galue i tausaga fakamuli nei i galuega fakatū‵tu i te lalolagi kātoa. Ne toe fai mai a ia: “Ne ‵kese ‵ki eiloa mai mea ne masani o fai ne matou i se fia tausaga. Kae ne loto fia‵fia a taina o fakamasani ki ei, kae ne fakamaoni aka ei ne matou me ne fakamanuia ne Ieova a fakama‵fuliga konei.” A te mea tenei se fakaakoakoga fua e tasi o te auala e takitaki ei ne Ieova ana tino ke fakataunu tena loto. I te gasologa o taimi, e ‵tau o fesili ifo tatou penei, ‘E mata, e ‵sala atu au ki te takitakiga a Ieova kae loto fiafia o fai a fakama‵fuliga ke tavini atu ki a ia i te ‵toe auala ‵lei?’

8. I se taimi e tasi ne fiainu malosi a Samasoni, se a tena mea ne fai?

⁸ Kāti ne faitau koe ki tala e uiga ki mea fakaofoofogia ne fai ne Samasoni. Ne ta tokotasi loa ne ia se leona kae fakamuli ifo ne tamate ne ia a tāgata e toko 30 i te fakai o Filisitia ko Asekelona. (Fama. 14:​5, 6, 19) Ne iloa ne Samasoni me e se mafai ne ia o fai a mea konā e aunoa mo te fesoasoani o Ieova. Ne lavea atu te ‵tonu o te mea tenā i te taimi ne fia inu ‵ki ei a tou tagata mai tua o te tamatega ne ia a tāgata Filisitia e toko 1,000. Ne a ana mea ne fai? I lō te fakalagolago ki a ia eiloa ona ko te fiainu malosi, ne kalaga atu a ia ki a Ieova mō se fesoasoani.—Fama. 15:18.

9. Ne tali atu pefea a Ieova ki te fakamolemole a Samasoni mō se fesoasoani? (Famasino 15:19.)

⁹ Ne tali ne Ieova te akai a Samasoni mō se fesoasoani mai te faiga o se vavega ke maua a vai. I te inuga a Samasoni ki ei, “ne toe foki mai tena malosi.” (Faitau te Famasino 15:19.) E manino ‵lei me i te vai fou tenā ne oko atu loa ki tausaga fakamuli i te taimi ne fakaosofia ei a te pelofeta ko Samuelu ke tusi ne ia te tusi o Famasino. A tino Isalaelu kolā ne lavea ne latou a te vai tenā, kāti ne masaua ne latou me e mafai ne tino tapuaki fakamaoni o Ieova o fakalago‵lago ki a ia i taimi e ma‵nako ei latou ki tena fesoasoani.

10. Ne a mea e ‵tau o fai ne tatou ke maua te fesoasoani o Ieova? (Onoono foki ki te ata.)

¹⁰ E ‵tau foki mo tatou o ‵sala atu ki a Ieova mō se fesoasoani faitalia ‵tou taleni mo atamai io me ko mea e mafai o fakataunu ne tatou i tena taviniga. E ‵tau o talia ne tatou mo te agamalu a te manatu me e mafai fua o maua te manuia tonu māfai e fakalago‵lago tatou ki a Ieova. E pelā mo Samasoni telā ne toe malosi i te inuga ki te vai ne tuku atu ne Ieova, ka ma‵losi eiloa tatou i te feitu faka-te-agaga māfai e fakaaoga faka‵lei ne tatou a fakatokaga katoa e tuku mai ne Ieova ki a tatou.—Mata. 11:28.

11. E mafai pefea o fakaaoga faka‵lei ne tatou a te fesoasoani o Ieova? Fakamatala mai.

¹¹ Mafaufau ki te tala o Alesky, se tokotasi o taina mai Lusia telā ne fepaki mo fakasauaga matagā. Ne a mea ne fesoasoani ki tou tagata ke tumau i te malosi mai lalo i tulaga faiga‵ta? Ne fakatoka ne lāua mo tena avaga se polokalame faka-te-agaga ‵lei. Ana muna: “E taumafai au o fakatumau taku polokalame faka-te-agaga o sukesukega totino mo te faitauga ki te Tusi Tapu i aso katoa. I taeao katoa, e sau‵tala māua mo taku avaga ki te tusi siki o te aso kae ‵talo fakatasi atu ki a Ieova.” Se a te mea e akoako mai i ei ki a tatou? I lō te fakalago‵lago ki a tatou eiloa, e ‵tau o fakalago‵lago tatou ki a Ieova. Pefea la? Mai te fakamalosi aka ‵tou fakatuanaki e auala i se polokalame ‵lei o sukesukega totino ki te Tusi Tapu mo mea faka-te-agaga.  Ka fakamanuia eiloa ne Ieova a ‵tou taumafaiga ke tavini atu ki a ia. Ne fakamalosi ne ia a Samasoni, tela la, e mautinoa eiloa me e mafai o fakamalosi ne Ia tatou.

12. Se a te fakaikuga sē ‵lei ne fai ne Samasoni, kae ne ‵kese pefea a tena fakaikuga tenā mo mea ne ‵tupu mai mua atu?

¹² A Samasoni e se ‵lei katoatoa e penei mo tatou, tela la, i nisi taimi ne fai ne ia a filifiliga sē ‵lei. Tasi o fakaikuga ne fai ne ia ne iku atu ki ikuga sē ‵lei. I te otiga ne tavini a Samasoni e pelā me se famasino mō se vaitaimi, ne “fiafai a ia ki se fafine i te Vanu o Soleka telā e fakaigoa ki a Talila.” (Fama. 16:4) Mai mua atu, ne ‵sai feagaiga a Samasoni mo se fafine Filisitia, kae ko “Ieova ne fai ne ia” ke tupu te mea tenei me “e salasala a Ia ki se avanoaga ke taua atu ki tino Filisitia.” Fakamuli ifo, ne nofo atu a Samasoni i te fale o te fafine talitāgata tenā i te fakai o Filisitia ko Kasa. I te taimi tenā, ne tuku atu ne te Atua te malosi ki a Samasoni ke sau ne ia a mataloa o ‵pui o te fakai, telā ne fai ei ke sē malosi te fakai. (Fama. 14:​1-4; 16:​1-3) Kae ‵kese a Talila me kāti a ia se tino Isalaelu.

13. Se a te togafiti ne fai ne Talila ki a Samasoni?

¹³ Ne talia ne Talila se aofaki tupe lasi mai te kau Filisitia ke fakatogafiti a Samasoni. Kāti ko tena talitonu mo tena alofa ki tou fafine ne faka‵kivi ei ana mata ke se lavea ne ia a te mea ka fai ne Talila ki a ia. Faitalia me se a te mea ne tupu, ne fakamalosi atu faeloa a Talila ki a Samasoni ke fakaasi atu a te māfuaga o tena malosi, kae i te fakaotiga ne talia ne ia a te fakamolemole a Talila. Se mea fakafanoanoa, me ne talia ne Samasoni ke tosina atu a ia ki se tulaga telā ne iku atu ki te galo o tena malosi mo te taliaga a Ieova mō se vaitaimi.—Fama. 16:​16-20.

14. Ne a ikuga sē ‵lei ne maua ne Samasoni ona ko te talitonu ki a Talila?

 ¹⁴ Ne maua ne Samasoni a ikuga fakalogo‵mae ona ko te talitonu ki a Talila i lō a Ieova. Ne puke ne te kau Filisitia a Samasoni kae fai ne latou ke ‵kivi. Ne falepuipui a ia i Kasa, ko tino kolā ne fakamasiasi ne ia i te taimi muamua, kae ne fakagalue ne latou a ia pelā me se pologa tuki saito. Kae ne fakamasiasi a ia i te taimi ne fai ei ne te kau Filisitia se ‵kaiga fiafia. Ne ofo atu ne latou se taulaga sili ki te lotou atua ‵se ko Takono, me mafau‵fau latou me ne tuku atu ne ia a Samasoni ki olotou lima. Ne puke ne latou a Samasoni mai te falepuipui ki te ‵kaiga ke “fakafiafia ne ia latou”—ke fakaitaita ne latou a ia.—Fama. 16:​21-25.

15. Ne fakaasi mai pefea ne Samasoni me ne toe fakalagolago a ia ki a Ieova? (Famasino 16:​28-30) (Onoono ki te ata i te ‵kava.)

¹⁵ Ne fai ne Samasoni se mea ‵se matagā, kae ne seki ‵fiu vave a ia i te tavini atu ki a Ieova. Ne ‵sala a ia ki se avanoaga ke fakataunu a tena tōfiga mai te Atua ke fakatakavale a te kau Filisitia. (Faitau te Famasino 16:​28-30.) Ne fakamolemole atu a Samasoni ki a Ieova: “Tuku mai ke taui atu ne au a te mea ne fai ne tino Filisitia.” Ne tali ne te Atua tonu a te fakamolemole a Samasoni kae ne toe tuku atu ne ia i se auala fakavavega a tena malosi. Ona ko te mea tenā, ne tamate ne Samasoni a tino Filisitia e tokouke atu i te taimi tenei i lō taimi mua.

16. Ne a mea e mafai o tauloto ne tatou mai te mea ‵se a Samasoni?

¹⁶ E tiga eiloa ne fakafesagai atu a Samasoni ki ikuga fakalogo‵mae o tena mea ‵se ne fai, ne seki gata tena taumafai o fai a te loto o Ieova. Kafai foki loa e fai ne tatou se mea ‵se kae polopoloki ‵mafa tatou io me galo atu se tauliaga, e se ‵tau eiloa mo tatou o ‵fiu vave. Masaua, e se ‵fiu vave a Ieova i a tatou. (Sala. 103:​8-10) Faitalia ‵tou mea ‵se, koi mafai loa o aoga tatou ki a Ieova, e pelā eiloa mo Samasoni.

17-18. Kaia e fakamalosi loto ei a te tala o Michael ki a koe? (Onoono foki ki te ata.)

¹⁷ Mafaufau ki te fakaakoakoga a se taina talavou e igoa ki a Michael. Ne fakalavelave malosi a ia i te taviniga a Ieova, e pelā me se tavini fesoasoani mo se paenia tumau. Kae se mea fakafanoanoa, me ne fai ne ia se mea ‵se telā ne iku ki te ‵galo atu o ana tauliaga i te fakapotopotoga. “Ke oko mai ki te taimi tenei,” ne fai mai a ia, “ne fakalavelave malosi atu i taku taviniga ki a Ieova. Kae poi aka, me  ne fai eiloa pelā me ne ‵tui au ki luga i se ‵pui puliki. Ne seki mafaufau lele au me ka tiakina au ne Ieova, io me e se iloa me koi mafai o maua ne au se fesokotakiga ‵lei mo ia io me tavini katoatoa atu ki a ia i te fakapotopotoga pelā mo taimi mua.”

¹⁸ Se mea fakafiafia me ne seki ‵fiu vave a Michael. Ne toe fai mai a ia: “Ne saga tonu atu au o toe faka‵lei toku fesokotakiga mo Ieova mai te ‵tala atu faeloa toku loto ki a ia i ‵talo, fai a sukesukega kae mafaufau ‵loto.” Fakamuli loa, ne toe maua ne Michael se tulaga ‵lei i te fakapotopotoga. Ko tavini atu nei a ia pelā me se toeaina mo se paenia tumau. Ana muna: “A te fesoasoani mo fakamalosiga ne maua ne au, maise loa mai toeaina, ne fai ei ke masaua ne au me koi alofa mai loa a Ieova ki a au. Koi mafai eiloa o tavini atu au i te fakapotopotoga mo se loto lagona ‵ma. Ne akoako mai ki a au i te tala tenei me ka fakamagalo ne Ieova so se tino telā e salamō tonu.” Ao, e mafai o loto tali‵tonu tatou me ka fakaaoga kae fakamanuia ne Ieova tatou faitalia ‵tou mea ‵se ne fai i taimi mua, kae ke fai ne tatou ‵toe mea e mafai ke faka‵tonu aka ‵tou auala kae fakalago‵lago faeloa ki a ia.—Sala. 86:5; Faata. 28:13.

19. E fakamalosi aka pefea koe ne te fakaakoakoga a Samasoni?

¹⁹ I te mataupu tenei, ne suke‵suke tatou ki nāi mea fakaofoofogia ne ‵tupu i te olaga o Samasoni. A ia e se ‵lei katoatoa; kae ne seki ‵fiu vave a ia i ana taumafaiga ke tavini atu ki a Ieova, penā foki loa mai tua o tena mea ‵se ne fai mo Talila. Kae ne seki ‵fiu vave a Ieova i tou tagata. Ne toe fakaaoga ne te Atua a Samasoni i se auala lasi ‵ki. Koi kilo atu eiloa a Ieova ki a ia e pelā me se tagata e tu ‵kese tena fakatuanaki, telā e aofia i te fakasologa o tino fakamaoni kolā ne fakamau i te Epelu mataupu 11. Ko oko eiloa i te fakamalosi loto ke iloa atu me e tavini tatou ki se Tamana faka-te-lagi alofa telā e manako o fakamalosi tatou, maise loa māfai tatou e vāi‵vai! Tela la, e pelā mo Samasoni, ke na fakamolemole atu tatou ki a Ieova, penei: “Fakamolemole masaua mai au, kae fakamalosi aka ne koe au.”—Fama. 16:28.