1. Se a te fakamasinoga telā ko pili o fai?

 KO OLA nei tatou i te taimi telā ka ‵tupu i ei ‵fuliga ‵lasi e uke! Ko pili fua nei o fakamasino ne Iesu a tino katoa e ‵nofo i te lalolagi. Ne fakamatala mai ne Iesu a mea kolā ka ‵tupu ke oko atu ki te taimi tenā. Ne fai atu ne ia ki ana soko a te “fakailoga” o tena fakatasi mai i se auala sē lavea mo te taimi o te “gataga o te olaga tenei.” (Mata. 24:3) A te valoaga tenei ne fakamau i te Mataio mataupu 24 mo te 25 penā foki mo te Maleko mataupu 13 mo te Luka mataupu 21.

2. Ne a mea ka sau‵tala tatou ki ei i te mataupu tenei, kae kaia ka aoga ei ki a tatou?

² Ne tuku mai ne Iesu a fakailoaga ke fakaeteete tatou, e auala i tala fakatusa e tolu. Ko te tala fakatusa o mamoe mo kouti, tamafine ‵ma ‵poto mo tamafine ‵ma va‵lea, mo taleni. Ka fesoasoani mai a tala fakatusa takitasi konei ke malama‵lama tatou me ka fakamasino ne Iesu a tino taki tokotasi e ‵tusa mo ana mea ne fai. I te taimi e suke‵suke ei tatou ki tala fakatusa konei, onoono ki akoakoga e mafai o maua mai i ei mo te auala e mafai o fakagalue aka ne tatou. Ka sau‵tala muamua nei tatou ki te tala fakatusa e uiga ki mamoe mo kouti.

MAMOE MO KOUTI

3. Ka fakamasino mafea ne Iesu a tino?

³ I te tala fakatusa ki mamoe mo kouti, ne fai mai a Iesu me ka fakamasino ne ia a tino e ‵tusa mo te auala ne ‵saga atu ei latou ki te tala ‵lei penā foki mo te ‵lago atu o latou ki ana taina fakaekegina. (Mata. 25:​31-46) I te taimi o te “fakalavelave lasi,” ka fai ne ia a te fakamasinoga tenei mai mua malie o Amaketo. (Mata. 24:21) E pelā loa mo te tausi mamoe telā e ‵vae kea‵tea ne ia a mamoe mai kouti, ka ‵vae kea‵tea ne Iesu a latou kolā e ‵lago fakamaoni atu ki ana soko fakaekegina mai i a latou kolā e se fai penā.

4. E ‵tusa mo te Isaia 11:​3, 4, kaia e mafai ei o mautinoa i a tatou me ka fakamasino ne Iesu a tino e aunoa mo te fapito? (Onoono foki ki te ata i te ‵kava.)

 ⁴ E fakaasi mai i valoaga i te Tusi Tapu me e pelā me ko te Famasino ne ‵tofi aka ne Ieova, ka fakamasino ne Iesu a tino mo te fai mea tonu. (Faitau te Isaia 11:​3, 4.) Ka onoono faka‵lei a ia ki faifaiga, uiga, mo pati e fai ne tino—e aofia i ei olotou faifaiga ki ana taina fakaekegina. (Mata. 12:​36, 37; 25:40) Ka iloa ne Iesu a latou kolā ne ‵lago atu ki ana taina fakaekegina mo te lotou galuega. a Tasi o auala e ‵lago atu ei a nisi mamoe ki taina o Keliso, ko te fesoasoani atu ki a latou i te faiga o te galuega talai. A latou kolā e ‵lago atu ki ei ka fakamasino e pelā me e “amio‵tonu” kae ka maua ne latou a te fakamoemoega ko te “ola se-gata-mai” i te lalolagi nei. (Mata. 25:46; Faka. 7:​16, 17) Se taui gali ‵ki mō latou kolā e tumau i te fakamaoni! Kafai e tumau latou i te fakamaoni i te taimi o te fakalavelave lasi penā foki mo aso mai mua, ka tumau eiloa a olotou igoa i te “tusi o te ola.”—Faka. 20:15.

5. Se a te akoakoga e maua mai te tala fakatusa e uiga ki mamoe mo kouti, kae ko oi ka aoga ki a latou?

⁵ Ke fakatalitonu atu a tou fakamaoni mo tou alofa tumau. A te tala fakatusa a Iesu ki mamoe mo kouti e fakasino tonu atu eiloa ki a latou kolā e fakamoe‵moe ke ola i te lalolagi nei. E fakaasi atu ne latou a te fakatuanaki e se mai te fesoasoani fua ki taina o Keliso i te faiga o te galuega talai, kae mai te talia foki ne latou mo te fakamaoni a te takitakiga a se potukau foliki o taina fakaekegina telā ne ‵tofi aka ne Iesu. (Mata. 24:45) Kae e ‵tau foki mo latou kolā e fakamoe‵moe ke ola i te lagi o faka‵logo ki te fakailoaga i te tala fakatusa tenā. Kaia? Me e iloilo ne Iesu a olotou faifaiga, uiga mo olotou pati e fai. E ‵tau foki o fakatalitonu atu ne latou a te lotou fakamaoni. E tonu, ne fakamatala mai ne Iesu i nisi tala fakatusa e lua a fakailoaga fakapito mō te kau fakaekegina. E maua foki ne tatou a tala fakatusa konei i te Mataio mataupu 25. Ke sau‵tala nei tatou ki te tala fakatusa e uiga ki tamafine ‵ma ‵poto mo tamafine ‵ma va‵lea.

TAMAFINE ‵MA ‵POTO MO TAMAFINE ‵MA VA‵LEA

6. Ne fakaasi mai pefea ne tamafine ‵ma e tokolima a te lotou ‵poto? (Mataio 25:​6-10)

⁶ I tena tala fakatusa e uiga ki tamafine ‵ma, ne faipati a Iesu ki tamafine ‵ma e toko sefulu kolā ne olo atu o fakafetaui ki te tagata ka fakaipoipo. (Mata. 25:​1-4) Ne fakamoe‵moe latou ke olo fakatasi atu mo te tagata ka fakaipoipo ki te ‵kaiga o tena avaga. Ne fakamatala mai ne Iesu te suā tokolima o latou me “‵poto” kae ko te suā tokolima me e “va‵lea.” A tamafine ‵ma ‵poto ne fakatoka faka‵lei kae matapula‵pula. Ne toka latou o faka‵tali ki te tagata ka fakaipoipo faitalia foki loa me oko mai a ia i te valuapo. Tela la, ne avatu ne latou a olotou moli mo fakamaina māfai ko pouli, fakatasi foki mo olotou sinu fakaleoleo, i te mea ma oko tuai mai te tagata ka fakaipoipo. Tela la, ne toka eiloa latou o faka‵ka a olotou moli. (Faitau te Mataio 25:​6-10.) I te okomaiga o te tagata ka fakaipoipo, olo fakatasi ei mo tamafine ‵ma ‵poto ki loto i te ‵kaiga o te avaga. I se auala tai ‵pau, a Kelisiano fakaekegina kolā e fakatalitonu atu a te lotou toka ‵lei mai te tumau i te matapula‵pula kae fakamaoni ke oko ki te taimi e vau ei a Keliso, ka maua te lotou taui ke ‵kau fakatasi mo te tagata ka fakaipoipo, ko Iesu, i tena Malo i te lagi. b (Faka. 7: 1-3) Kae pefea a tamafine ‵ma va‵lea e tokolima?

7. Se a te mea ne tupu ki tamafine ‵ma va‵lea e tokolima, kae kaia?

⁷ E se pela mo tamafine ‵ma ‵poto, ne seki toka a tamafine ‵ma va‵lea i te okomaiga o te tagata ka fakaipoipo. Ne seki ave ne latou ne sinu fakaleoleo, kae ko tai ‵mate aka eiloa a olotou moli. I te iloaga ne latou me ko pili o oko mai te tagata ka fakaipoipo, ne ‵tau mo latou o olo o ‵togi olotou sinu. Ne seki ‵nofo atu latou i konā i te okomaiga o te tagata ka fakaipoipo. I te taimi tenā, “ne ulu atu a tamafine ‵ma kolā ko toka fakatasi mo te tagata ka fakaipoipo ki loto i te ‵kaiga o te avaga kae ‵pono te mataloa.” (Mata. 25:10) E se leva, kae oko atu a tamafine ‵ma va‵lea kae ne ma‵nako o ulu atu ki loto, kae ne fai atu te tagata ka fakaipoipo ki a latou: “E se iloa ne au koutou.” (Mata. 25:​11, 12) Ne seki toka eiloa a tamafine ‵ma konā o fakatalitali ki te tagata ka fakaipoipo, faitalia te leva ne faka‵tali ei latou. Se a te akoakoga mō te kau fakaekegina?

8-9. Se a te akoakoga e mafai o tauloto ne tino fakaekegina mai te tala fakatusa e uiga ki tamafine ‵ma? (Onoono foki ki te ata.)

⁸ Fakatalitonu atu i a koe ko toka kae matapulapula. Ne seki fai mai a Iesu me e lua a potukau o tino fakaekegina—tasi te potukau telā e toka o fakatalitali ki te gataga o te olaga tenei kae ko te suā potukau e se toka. I lō te fai penā, ne fakamatala mai ne ia a mea ka ‵tupu māfai e se toka a tino fakaekegina o kufaki mo te fakamaoni ke oko ki te gataga. Kafai e seki toka latou, ka se maua eiloa ne latou a te lotou taui. (Ioa. 14:​3, 4) E ‵tau eiloa o mafau‵fau faka‵lei ki te mea tenei! Faitalia me fakamoe‵moe tatou ke ola i te lagi io me i te lalolagi, e ‵tau o ‵saga tonu atu tatou ki te fakailoaga tenei mai te tala fakatusa e uiga ki tamafine ‵ma. E ‵tau mo tatou taki tokotasi o tumau i te matapula‵pula kae ke toka o kufaki ke oko atu ki te gataga.—Mata. 24:13.

⁹ I te otiga ne fakamatala mai ne ia a te tala fakatusa e uiga ki tamafine ‵ma ke faka‵mafa mai ei a te tāua ke toka kae matapulapula, ne toe fai mai ne Iesu a te tala fakatusa ki taleni.  E faka‵mafa mai i te tala fakatusa tenā a te tāua o te galue malosi.

TALENI

10. Ne fakaasi atu pefea ne tavini e tokolua a te fakamaoni? (Mataio 25:​19-23)

¹⁰ I te tala fakatusa e uiga ki taleni, ne faipati a Iesu ki tavini e tokolua kolā ne fakamaoni ki te lā matai mo te suā tavini telā ne seki fai penā. (Mata. 25:​14-18) Ne fakatalitonu atu a te fakamaoni o tavini e tokolua mai te ga‵lue malosi o fakagalue a tupe a te lā matai. A koi tuai o faimalaga a ia ki se fenua ‵mao, ne tuku atu ne ia ki a lāua a taleni—se aofaki lasi o tupe. Ne ga‵lue malosi a tavini fakamaoni e tokolua kae ne fakaaoga ne lāua i se auala poto a tupe. Te ikuga? I te fokimaiga o te lā matai, ne tapolo ne lāua a te aofaki telā ne tuku atu ke fakagalue ne lāua. Ne fakamālō atu a te matai ki a lāua—tenā ne ulu atu ei lāua “o fia‵fia fakatasi mo te [lā] matai.” (Faitau te Mataio 25:​19-23.) Kae e a te tavini i te tokotolu? Ne a ana mea ne fai ki tupe a tena matai kolā ne tuku atu ki a ia?

11. Se a te mea ne tupu ki te tavini “paie”, kae kaia?

¹¹ Ne maua ne te tavini i te tokotolu a te taleni e tasi kae e “paie.” Ne fakamoemoe a te matai me ka fakagalue ne ia i se auala poto a te taleni ne tuku atu ki a ia. I lō te fai penā, ne tanu fua ne ia ki lalo i te laukele. I te fokimaiga o tena matai, ne seki ai se taleni fakaopoopo ne tuku atu ne ia ki tena matai. Ne seki maua ne te tavini tenā se kilokiloga ‵lei. I lō te fakatoese ona ko te sē mafai o fakagalue ne ia a tupe a tena matai, ne taku ne te tavini i se auala sē ‵tau a te matai me se “tagata faigata.” Tenā, ne seki maua ei ne te tavini tenā a te taliaga a tena matai. E se gata i ei, ne ‵fao te taleni mai i a ia kae ‵pei atu a ia ki tua mo te fale o tena matai.—Mata. 25:​24, 26-30.

12. Ko oi i aso nei e fakasino atu ki ei a tavini fakamaoni e tokolua?

¹² A tavini fakamaoni e tokolua konā e fakasino atu ki Kelisiano fakaekegina kolā e fakamaoni. E ‵kami latou ne te lotou Matai ko Iesu ke ‘ulu ki loto o fia‵fia fakatasi mo [te lotou] matai.” Ko maua te lotou taui i te lagi, ko te toe‵tuga muamua. (Mata. 25:​21, 23;  Faka. 20:5e) I te suā feitu, e tuku mai i te fakaakoakoga a te tavini paie se fakailoaga ke fakaeteete i ei a te kau fakaekegina. Pefea la?

13-14. Se a te akoakoga e tauloto ne te kau fakaekegina mai te tala fakatusa e uiga ki taleni? (Onoono foki ki te ata.)

¹³ Ke fakatalitonu atu a tou galue malosi. I te tala fakatusa e uiga ki taleni, e pelā mo te tala fakatusa o tamafine ‵ma, ne seki ‵valo mai a Iesu me ka paie a te kau fakaekegina. Kae ne fakamatala mai ne ia a te mea e mafai o tupu māfai ko galo te lotou loto finafinau. Ka se mafai ne latou o fakamautinoa a te lotou “kalagaga mo te [lotou] filifiliga,” kae ka se talia latou ke ulu atu ki te Malo faka-te-lagi.—2 Pe. 1:10.

¹⁴ E manino ‵lei me e fakaasi mai i tala fakatusa a Iesu ki tamafine ‵ma mo taleni, me e ‵tau mo Kelisiano fakaekegina katoa o toka, matapula‵pula kae ga‵lue malosi. Kae e mata, ne fai atu ne Iesu se isi mea aka telā e ‵tau o fakaeteete i ei a te kau fakaekegina? Ao! A te fakailoaga tenā a Iesu ke fakaeteete i te Mataio 24:​40, 41 e fakasino atu foki ki te fakamasinoga fakaoti o te kau fakaekegina.

KO OI TE TINO KA “AVE”?

15-16. E faka‵mafa mai pefea i te Mataio 24:​40, 41 a te tāua ke tumau te kau fakaekegina i te matapula‵pula?

¹⁵ A koi tuai o fai mai ne ia ana tala fakatusa e tolu, ne fakamatala mai ne Iesu a te fakamasinoga fakaoti o te kau fakaekegina telā ka fakaasi mai i ei me ko oi te tino ka maua ne ia te taliaga a te Atua. Ne faipati a ia e uiga ki tāgata e tokolua e ga‵lue i se fatoaga mo fāfine e tokolua e ga‵lue i te koga tuki saito. E foliga mai me e ‵pau a galuega ne fai ne lāua, kae ne fai mai a Iesu me ka “tokotasi e ave kae tiaki te suā tino.” (Faitau te Mataio 24:​40, 41.) Tenā, ne fakamalosi atu ei a ia ki ana soko: “Ke tumau i te matapula‵pula, me e se iloa ne koutou a te aso e vau ei te otou Aliki.” (Mata. 24:42) E tai ‵pau a pati ne fai atu ne Iesu i te otiga ne fai atu ne ia a te tala fakatusa e uiga ki tamafine ‵ma. (Mata. 25:13) E mata, e isi se sokoga o fakamatalaga konei? E foliga mai me isi. Ko te kau fakaekegina fua kolā e fakamaoni tonu ka “ave,” ke pule fakatasi mo Iesu i te Malo faka-te-lagi.—Ioa. 14:3.

¹⁶ Fakatalitonu atu a tou matapulapula. So se tino fakaekegina telā e se tumau i te matapulapula i te feitu faka-te-agaga, ka se ‵kau fakatasi mo “tino filifilia.” (Mata. 24:31) E se gata i ei, faitalia me se a tou fakamoemoega, e ‵tau mo tino katoa o te Atua o ‵kilo atu ki pati a Iesu e pelā me se fakailoaga ke tumau i te matapula‵pula kae tumau foki i te fakamaoni.

17. Kaia e se manava‵se ei tatou māfai e filifili ne Ieova a tino fakaekegina i aso nei?

¹⁷ Ko iloa ‵lei nei ne tatou a Ieova, telā la, e tali‵tonu tatou ki tena fakamasinoga. E se manava‵se tatou māfai e filifili ne Ieova ke fakaeke a nisi tino fakamaoni i ‵tou aso nei. c Ke masaua ne tatou a pati a Iesu e uiga ki tino kolā ne ga‵lue i te 11 o itula i tena tala fakatusa e uiga ki te togavine. (Mata. 20:​1-16) A latou kolā ne ‵kami ke ga‵lue i te togavine i te fakaotiga o te aso ne ‵pau olotou peofuga mo latou kolā ne kamata o ga‵lue i te taeao. I se auala tai ‵pau, faitalia me kese‵kese a taimi ne filifili i ei a te kau fakaekegina, ka maua katoa ne latou a te taui i te lagi māfai latou e tumau i te fakamaoni.

SAGA TONU KI FAKAILOAGA

18-19. Ne a akoakoga mo fakailoaga ke fakaeteete i ei ne sau‵tala tatou ki ei?

¹⁸ Ne a mea ko oti ne sau‵tala tatou ki ei? Mō latou kolā e fakamoe‵moe ke ola ki te se-gata-mai i te lalolagi, e faka‵mafa mai i te tala fakatusa e uiga ki mamoe mo kouti a te tāua ke tumau i te fakamaoni kae alofa tumau ki a Ieova—i te taimi nei penā foki i te fakalavelave lasi i  aso mai mua. I te taimi tenā, ka fakamasino ne Iesu a tino fakamaoni e pelā me ne tino kolā e ‵tau o maua ne latou a te “ola se-gata-mai.”—Mata. 25:46.

¹⁹ Ne suke‵suke foki tatou ki tala fakatusa e lua kolā e maua i ei a fakailoaga ki te kau fakaekegina. I te tala fakatusa a Iesu e uiga ki tamafine ‵ma ‵poto mo tamafine ‵ma va‵lea, e tokolima i a latou e taku pelā me e ‵poto. Ne toka kae matapula‵pula latou o faka‵tali ki te oko mai o te tagata ka fakaipoipo faitalia te leva e manakogina ke faka‵tali ei latou. Kae ne seki toka eiloa a tamafine ‵ma va‵lea. Tela la, ne seki talia ne te tagata ka fakaipoipo a latou ki loto i te ‵kaiga o tena fakaipoipoga. E penā foki tatou, e ‵tau o toka tatou o faka‵tali faitalia te leva e manakogina ei ke faka‵tali tatou ki te taimi e fakaoko mai ei ne Iesu te gataga ki te olaga tenei. E se gata i ei, i te tala fakatusa a Iesu ki taleni, ne sau‵tala tatou ki tavini fakamaoni e tokolua kolā ne ga‵lue malosi. Ne ga‵lue malosi lāua mō te lā matai kae ne maua ne lāua a tena taliaga. Kae ne seki talia a te tavini paie. Se a te akoakoga? E ‵tau o fakalave‵lave malosi tatou i te galuega a Ieova ke oko loa ki te gataga. Kae ko te ‵toe mea, ne sau‵tala tatou ki te auala e ‵tau ei mo te kau fakaekegina o tumau i te matapula‵pula ko te mea ke “ave” io me ke maua ne latou a te lotou taui faka-te-lagi mai a Iesu. E olioli malosi eiloa ke “fakamaopoopo fakatasi” latou ki a Iesu i te lagi. Kafai ko oti te taua o Amaketo, ka fai latou e pelā me ko te avaga a Iesu i te fakaipoipoga a te Tama Mamoe.—2 Tesa. 2:1; Faka. 19:9.

20. Ne a mea ka fai ne Ieova ki a latou kolā e faka‵logo ki ana fakailoaga ke fakaeteete i ei?

²⁰ E tiga eiloa ko pili mai a te aso o te fakamasinoga, e seai se pogai ke ma‵taku ei tatou. Kafai e tumau tatou i te fakamaoni, ka tuku mai eiloa ne te ‵tou Tamana alofa i te lagi a “te malosi telā e sili atu i te malosi masani” ko te mea ko tatou ke “mafai o ‵sao . . . ko ‵tu atu ei [tatou] i mua o te Tama a te tagata.” (2 Koli. 4:7; Luka 21:36) Faitalia me e fakamoe‵moe tatou ke ola i te lagi io me i te lalolagi, ka fakafiafia eiloa ne tatou a te ‵tou Tamana māfai e faka‵logo tatou ki fakailoaga mai tala fakatusa a Iesu. E auala i te alofa tauanoa o Ieova, ka “tusi a [‵tou] igoa i te tusi” o te ola.—Tani. 12:1; Faka. 3:5.