1-2. Kaia e fia‵fia ei a tavini a te Atua? (Iakopo 1:​22-25)

 E MANAKO a Ieova mo tena Tama fagasele ke fia‵fia tatou. E fai mai te tino ne tusi ne ia te Salamo 119:2 penei: “E fia‵fia a latou kolā e tausi ki ana fakamasauaga, kolā e ‵sala ki a ia mo olotou loto kātoa.” Ne toe fakamautinoa mai a Iesu penei: “E fia‵fia a latou kolā e lagona ne latou te muna a te Atua kae tausi ki ei!” —Luka 11:28.

² E pelā me ne tino tapuaki a Ieova, a tatou ne tino fia‵fia. Kaia? E uke a pogai, kae tasi te pogai tāua ona ko tatou e fai‵tau faeloa ki te Muna a te Atua kae taumafai o fakagalue a mea e tauloto ne tatou.—Faitau te Iakopo 1:​22-25.

3. E aoga pefea ki a tatou māfai e fakagalue ne tatou a ‵tou mea e fai‵tau i te Muna a te Atua?

³ E uke a mea aoga e maua ne tatou māfai e fai tatou pelā mo “tino kolā e fakagalue a te muna.” E iloa ne tatou me tenei te auala tāua ke fakafiafia ne tatou a Ieova, kae fai ne te mea tenā ke fia‵fia tatou. (Fai. 12:13) I te taimi e fakagalue ne tatou a ‵tou mea e faitau i te Muna fakaosofia a te Atua, ka gasolo o ‵lei atu ‵tou olaga i te kāiga kae ‵pili atu ‵tou va mo taina tali‵tonu. Kāti ko oti ne lavea ne koe te ‵tonu o te mea tenā i tou olaga. E se gata i ei, ko se pokotia foki tatou i fakalavelave kolā e fe‵paki mo tino kolā e se tau‵tali i auala o Ieova. Ko tonu ei a pati a te tupu ko Tavita. I te otiga o tena pese e uiga ki tulafono, fakatonuga, mo fakamasinoga a Ieova, ne fai mai ana pati fakaoti penei: “Mai te tausi ki ei, ka maua ne latou se taui lasi.”—Sala. 19:​7-11.

4. Kaia e faigata ei ke fai tatou mo tino kolā e fakagalue te Muna a te Atua?

 ⁴ Se mea tonu, me e sē se mea faigofie ke fai tatou mo tino kolā e fakagalue te Muna a te Atua. Faitalia te fakalave‵lave o tatou, e ‵tau eiloa o fakaavanoa a taimi ke fai‵tau kae suke‵suke ki te Tusi Tapu ko te mea ke malamalama tatou i mea kolā e manako a Ieova ke fai ne tatou. Tela la, ke na onoono tatou ki nai manatu kolā e mafai o fesoasoani mai ke fai‵tau faeloa ki ei. Ka onoono foki tatou ki mea kolā ka fesoasoani mai ke mafau‵fau tatou ki ‵tou mea e faitau kae ke lavea ne tatou a auala e mafai o fakagalue a mea kolā ne tauloto ne tatou i ‵tou olaga.

FAKAAVANOA A TAIMI KE FAITAU TE MUNA A TE ATUA

5. Ne a tiute o tatou kolā e fai ei ke fakalave‵lave malosi tatou?

⁵ E fakalave‵lave malosi a te tokoukega o tino o Ieova. E uke a taimi e fakamāumāu ne tatou ki ‵tou tiute faka-te-Tusi Tapu. E pelā mo te tokoukega o tatou e ga‵lue i galuega ‵togi ke tausi ki a tatou eiloa pelā foki mo ‵tou kāiga. (1 Timo. 5:8) E tokouke a Kelisiano e tausi atu ki olotou kāiga kolā e ma‵saki io me ko ma‵tua. Kae e ‵tau mo tatou katoa o tausi faka‵lei ki ‵tou ola ‵lei, se mea telā e manakogina i ei a taimi e uke. I tafa o tiute konei, e isi foki ne ‵tou tiute i te fakapotopotoga. Tasi o tiute tāua ko te faiga o te ‵toe mea e mafai ke kau atu ki te galuega talai. I tafa o tiute e uke kolā e ‵tau o saga atu koe ki ei, e maua pefea ne koe te taimi ke faitau ki te Tusi Tapu i aso katoa, mafaufau ‵loto ki au mea e faitau, kae fakagalue ne koe?

6. E mafai pefea o fai a te faitauga ki te Tusi Tapu e pelā me se mea e ‵tau o fakamuamua ne koe? (Onoono foki ki te ata.)

⁶ A te faitau ki te Tusi Tapu se mea e tasi i “mea kolā e sili atu i te tāua” mō tatou Kelisiano, tela la, e ‵tau eiloa o fakamuamua ne tatou. (Fili. 1:10) Te mataupu muamua eiloa o te tusi ko salamo e fai mai i ei e uiga ki te tagata telā e fiafia: “E fiafia a ia ki te tulafono a Ieova, kae e faitau a ia ki Tena tulafono i se leo malalo i te ao mo te po.” (Sala. 1:​1, 2) E manino ‵lei, me e ‵tau o fakaavanoa ne tatou se taimi ke fai ei a faitauga konei. Se a te ‵toe taimi ‵lei ke  faitau ki te Tusi Tapu? Kāti ka kese‵kese a tali a tatou ki ei. Kae ko te mea tāua, ke filifili se taimi telā e avanoa i ei tatou ke mafai o fai faeloa ‵tou faitauga. Ne fai mai te taina ko Victor penei: “E gali ki a au te faitau ki te Tusi Tapu i tafataeao. E tiga loa e se fiafia au o ala vave kae e gali te tafataeao me e se uke a mea e fakalavelave mai. E seki uke a mea i toku mafaufau kae mafai o saga tonu au.” E mata, e penā foki koe? Ke fesili ifo, ‘Se a te ‵toe taimi ‵lei ki a au ke faitau ki te Tusi Tapu?’

MAFAUFAU ‵LOTO KI AU MEA E FAITAU

7-8. Se a te mea e mafai o taofi ne ia a mea aoga e ‵tau o maua mai ‵tou faitauga? Fakamatala mai.

⁷ A te tonuga loa, e mafai tatou o fai‵tau ki mea e uke kae sē mafaufau faka‵lei ki ei. Kai faitau aka loa koe ki se tusi kae oti aka ko se masaua ne koe au mea ne faitau? Ko oti ne tupu te mea tenā ki a tatou katoa. Se mea fakafanoanoa, me mafai foki o tupu te mea tenā ki ‵tou faitauga ki te Tusi Tapu. Kāti e fakaiku aka ne tatou ke faitau ki nai mataupu o te Tusi Tapu i aso takitasi. Ko oko loa i te gali ke fai penā. E ‵tau mo tatou o fai ne fakamoemoega penā kae ‵piki ‵mau ki ei. (1 Koli. 9:26) Kae ko te faitauga ki te Tusi Tapu ko te kamataga—se kamataga ‵lei, kae ko te kamataga fua. E uke a mea e manakogina ke fai māfai e fia maua ne tatou a mea aoga e uke mai te faitauga ki te Muna a te Atua.

⁸ Mafaufau ki te fakatusaga tenei: A vai, kafai e ‵to mai pelā me se vaiua, e aoga ‵ki eiloa ki te ola. Kae kafai ko tō uke a vaiua e ‵to i se taimi toetoe fua, ka mafai o lofia te laukele. Kafai ko tupu te mea tenā, ko se aoga ei a nisi vaiua kolā e ‵to ifo. E manakogina ne te laukele a taimi ke ‵miti faka‵lei a vaiua kolā ne ‵to ko te mea ke aoga ki lakau. I se auala tai ‵pau, ke ‵kalo kea‵tea mai te faitau fakavave fua ki te Tusi Tapu, ko se lava ei te taimi ke mafaufau faka‵lei, ke masaua, kae fakagalue a ‵tou mea ne faitau.—Iako. 1:24.

9. Ne a ‵tou mea e ‵tau o fai māfai ko masani tatou o fai‵tau fakavave ki te Tusi Tapu?

⁹ Kai iloa aka loa ne koe me i nisi taimi e faitau fakavave fua koe ki te Tusi Tapu? Ne a au mea e ‵tau o fai? Faitau malie. Taumafai malosi o mafaufau ‵loto ki au mea e faitau io me ne fatoa  oti ne faitau. E se ‵tau o faigata te mea tenei. Kafai e foliga faigata ki a koe a te fakamalosiga ke mafaufau ‵loto, kāti se mea gali ke kilo atu koe ki te mafaufau ‵loto e pelā me ko te mafaufau fua ki au mea ne faitau. Kāti e mafai o fakaiku aka ne koe ke tai fakaleva atu a taimi e fai ei au sukesukega ko te mea ke aofia i ei a taimi ke mafaufau ‵loto. I te suā feitu, e mafai o filifili aka ke faitau ki nai fuaiupu kae fakaaoga te ‵toega o taimi ke mafaufau ‵loto ki au mea ne faitau. “E fakamu‵tana fua ne au aku mea e faitau i taku Tusi Tapu, kāti e tasi fua te mataupu,” ko pati a Victor, telā ne sae muamua mai. “Ona ko au e faitau i te tafataeao, e mafai o mafaufau au ki aku mea ne faitau i te aso kātoa.” Faitalia me se a te auala e fakaaoga ne koe, e tāua ke faitau koe i te makini telā e mafai o maua i ei ne koe a mea aoga mai tau faitauga.—Sala. 119:97; onoono ki te pokisi “ Fesili ke Mafau‵fau ki ei.”

10. Fakamatala mai te auala ke fakagalue au mea e tauloto. (1 Tesalonia 5:​17, 18)

¹⁰ Faitalia me se a te taimi e faitau ei koe ki tau Tusi Tapu mo te leva e fai ei tau faitauga, te mea tāua ko te taumafai ke fakagalue aka au mea ne faitau. Kafai e faitau koe ki se vaega o te Muna a te Atua, ke fesili ifo penei, ‘E fakagalue pefea ne au a te fakamatalaga tenei i te taimi nei io me i se taimi pili mai mua nei?’ E pelā me se fakaakoakoga, mafaufau me ne faitau koe ki te 1 Tesalonia 5:​17, 18. (Faitau.) Mai tua o te faitauga ki fuaiupu e lua konei, e mafai koe o mānava malie kae mafaufau ki te uke o taimi e ‵talo sāle ei koe e pelā foki mo te ‵loto o au ‵talo. E mafai foki o mafaufau koe ki mea kolā e loto fakafetai koe ki ei. E mafai o fakaiku aka ne koe ne mea e tolu ke ‵talo o fakafetai ki a Ieova e uiga ki ei. Mai tua o se fia minute ne mafaufau ‵loto ei koe penā, ka fesoasoani atu eiloa ke lagona kae fakagalue ne koe a te Muna a te Atua. Mafaufau la ki mea aoga ka maua ne koe māfai e fai faeloa koe penā i aso takitasi ki nisi vaega o te Tusi Tapu kolā e faitau koe ki ei! Ao, ka fai eiloa koe pelā me se tino e fakagalue malosi ne koe te Muna a te Atua. Kae pefea la māfai e foliga mai me e uke ‵ki a mea e ‵tau o galue koe ki ei?

FAKATOKA A FAKAMOEMOEGA KOLĀ E MAFAI O TAUNU

11. Kaia e mafai ei o loto vāivāi koe i nisi taimi? Taku mai se fakaakoakoga.

¹¹ Kafai e faitau koe ki te Tusi Tapu kae onoono ki auala ke fakagalue a pati fakatonutonu i ei, e mafai o loto vāivāi koe i nisi taimi. Mafaufau ki te mea tenei: I tau faitauga ki te Tusi Tapu i te aso nei, ne faitau koe ki pati fakatonutonu e uiga ki te fakailoga tino. (Iako. 2:​1-8) Ko lavea ne koe me e ‵tau o fai ne koe ne fakama‵fuliga ki au faifaiga e fai ki tino, tenā ko fakaiku ei ne koe ke fai a nisi fakama‵fuliga. Gali ‵ki! I te aso taeao ko faitau koe ki se vaega  telā e faka‵mafa mai te tāua ke fakaeteete koe i au pati e fai. (Iako. 3:​1-12) Ko iloa ne koe me i nisi taimi ne fai ne koe a pati sē a‵lofa kae faka‵tuka ki nisi tino. Tela la, ko fakaiku aka ne koe ke faipati ki pati aoga kae fakamalosi loto. I te aso mai tua atu, ko sae mai i tau faitauga ki te Tusi Tapu ke fakaeteete koe i te fai taugasoa mo tino o te lalolagi. (Iako. 4:​4-12) Ko tauloto ne koe me ‵tau o filifili faka‵lei a fakafiafiaga e kau koe ki ei. I te fa o aso, kāti ko tai loto vāivāi koe i te uke o mea e ‵tau o galue koe ki ei.

12. Kaia e se ‵tau mo koe o loto vāivāi māfai e fakaasi mai i tau faitauga ki te Tusi Tapu me e manakogina ke fai ne koe ne fakama‵fuliga? (Onoono foki ki te fakamatalaga mai lalo.)

¹² Kafai e lavea ne koe me manakogina ke fai ne koe ne fakama‵fuliga, ke mo a ma loto vāivāi. Te mea tenei se fakamaoniga me e ‵lei te tulaga o tou loto. A te tino loto maulalo kae fakamaoni e faitau ki te Tusi Tapu mo te kilokiloga ke maua a mea kolā e manakogina ke galue a ia ki ei. a Ke masaua foki me i te pei ki “uiga ‵fou” se faifaiga telā e ‵tau o fai faeloa. (Kolose 3:10) Se a te mea ka fesoasoani atu ke tumau koe i te fakagalue te Muna a te Atua?

13. E fakatoka pefea ne koe ne fakamoemoega kolā e mafai o taunu? (Onoono foki ki te ata.)

¹³ I lō te taumafai ke fakagalue au mea katoa ne faitau i te taimi e tasi, fakatoka ne nai fakamoemoega faigofie kolā e mafai o taunu. (Faata. 11:2) E mafai o ‵tofo koe ki te mea tenei: Fai se fakasologa o mea ke galue ki ei, ko fili ei se mea e tasi io me lua i mea konei ke galue koe ki ei, kae tuku a nisi mea o fai fakamuli. Tefea te koga e ‵tau o kamata koe i ei?

14. Ne a fakamoemoega e mafai o kamata koe ki ei?

¹⁴ E mafai o fakaiku aka ne koe ke kausaki ki se fakamoemoega telā e faigofie ke fakataunu.  Io me filifili se mea telā e manakogina malosi ke fai ne fakama‵fuliga ki ei. Kafai ko oti ne fakaiku aka te fakamoemoega tenā, ke fai au sukesukega totino ki ei mai te fakaaogaga o ‵tou tusi, pelā mo te Watch Tower Publications Index io me ko te Research Guide for Jehovah’s Witnesses. ‵Talo e uiga ki tou fakamoemoega, kae fakamolemole ki a Ieova ke tuku atu te ‘loto fiafia mo te ‵mana ke galue koe’ ki mea konā. (Fili. 2:13) Tenā ko fakagalue ei au mea ne tauloto. Kafai ko gasolo ki mua au taumafaiga ki te fakamoemoega muamua, ka fakamalosi atu eiloa ki a koe ke galue ki te suā fakamoemoega. E tonu, kafai ko momea aka te ‵lei o koe i se vaega e tasi o tou olaga pelā me se Kelisiano io me se uiga faka-Kelisiano, kāti ka faigofie ki a koe ke fai penā i nisi vaega.

FAI KE “GALUE I LOTO I A KOUTOU” A TE MUNA A TE ATUA

15. E ‵kese pefea a tino o Ieova mai tino e tokouke kolā e fai‵tau ki te Tusi Tapu? (1 Tesalonia 2:13)

¹⁵ E fai mai nisi tino me ko fai‵tau fakafia latou ki te Tusi Tapu. Kae e mata, e tali‵tonu katoatoa latou ki te Tusi Tapu? Kai taumafai latou ke ola e ‵tusa mo akoakoga i ei kae fai a ‵fuliga ki olotou olaga? E fakafanoanoa me i te tali masani ki ei ko te ikai. Ko oko loa i te ‵kese mo tino o Ieova! E pelā mo Kelisiano i te senitenali muamua, ne talia ne tatou te Tusi Tapu e pelā me “ko te muna eiloa a te Atua.” E se gata i ei, e taumafai malosi tatou o fakagalue a akoakoga i ei i ‵tou olaga.—Faitau te 1 Tesalonia 2:13.

16. Se a te mea ka fesoasoani mai ke fai tatou mo tino kolā e fakagalue te Muna?

¹⁶ E se faigofie ke faitau kae fakagalue a mea e fakaasi mai i te Muna a te Atua. Kāti e faigata ke maua se taimi ‵lei ke faitau. Io me taumafai ke faitau fakavave e aunoa mo te mafaufau ‵loto ki ei. Io me ko loto vāi‵vai tatou ona ko te uke o fakama‵fuliga e ‵tau o fai. Faitalia me se a te fakalavelave e fepaki mo koe, kae e se tō faigata. Mai te fesoasoani o Ieova, e mafai o manumalo koe i ei. Ke na fakaiku aka ne tatou ke talia tena fesoasoani, kae ke se fai tatou pelā me ne tino e lagona te Muna ko fakapuli atu ei, kae ke fai mo tino e fakagalue te Muna. E mautinoa me ko te uke o taimi e fai‵tau tatou ki te Muna a te Atua kae fakagalue aka i ‵tou olaga, ko te fia‵fia malosi foki o tatou.—Iako. 1:25.