1-2. Kaia ne faite ei ne Ieova tatou i se auala ke fia‵fia o tuku atu ‵tou mea ki nisi tino?

 I TE faitega ne Ieova a tino, ne faite ne ia latou mo te manakoga ke maua ne latou a te fiafia sili mai te tuku atu o mea i lō te maua. (Galu. 20:35) E mata, e fakauiga i ei me e se fia‵fia tatou māfai e maua ne tatou a mea? Ikai. E maua ne tatou a lagonaga fia‵fia māfai ko maua ne tatou se meaalofa. Kae e sili atu la te ‵tou fia‵fia māfai ko tuku atu ne tatou a mea. Kae ko oko eiloa i te ‵lei me ne faite ne Ieova tatou i te auala tenei. Kaia?

² Mai te faitega ne ia tatou i te auala tenei, ko fai ne Ieova ke maua ne tatou a te fiafia. Ka gasolo aka tatou o fia‵fia māfai e mafau‵fau ki auala ke tuku atu ‵tou mea ki nisi tino. Ko oko eiloa i te gali o te auala ne faite ei tatou ne Ieova.—Sala. 139:14.

3. Kaia e taku ei a Ieova e pelā me ko “te Atua fiafia”?

³ E fakatalitonu mai te Tusi Tapu me ka maua ne tatou te fiafia mai te tuku atu o mea, e se tioa eiloa o fakamatala mai a Ieova i te Tusi Tapu e pelā me ko “te Atua fiafia.” (1 Timo. 1:11) A ia ko te Tino muamua ne tuku mai ne ia a mea ki tino kae sili fakafia atu a mea ne tuku mai ne ia i lō so se tino. Ona ko ia, “ko maua ei ne tatou a te ola, e gasue‵sue, kae e iai foki tatou,” e pelā mo pati a te apositolo ko Paulo. (Galu. 17:28) E tonu, “a meaalofa ‵lei katoa mo mea ‵lei katoatoa” e maua mai i a Ieova.—Iako. 1:17.

4. Se a te mea ka fesoasoani mai ke maua ne tatou te fiafia sili mai te tuku atu o mea?

⁴ E mautinoa eiloa me e ma‵nako tatou ke maua te fiafia sili mai te tuku atu o mea. E mafai o fai tatou penā mai te fakaakoako ki te kaimalie o Ieova. (Efe. 5:1) I te taimi e sau‵tala tatou ki tena fakaakoakoga, onoono me ne a mea e mafai ne tatou o fai māfai e se fakaasi mai ne nisi tino te loto fakafetai  ki mea ne fai ne tatou mō latou. Ka fesoasoani mai a fakamasauaga konei ke fakatumau kae ke momea aka te lasi o te ‵tou fia‵fia mai te tuku atu o mea.

FAKAAKOAKO KI TE KAIMALIE O IEOVA

5. Ne a mea faka-te-foitino e tuku mai ne Ieova?

⁵ Ne a nisi auala e fakaasi mai ne Ieova tena kaimalie? Mafaufau ki nai fakaakoakoga. E tuku mai ne Ieova a mea faka-te-foitino. Kāti e se maua ne tatou a koloa e uke kae ‵togi ‵mafa, kae fakafetai ki a Ieova me e maua eiloa a mea e manakogina ne tatou. E pelā mo te mauaga ne tatou o mea‵kai, gatu mo se fale. (Sala. 4:8; Mata. 6:​31-33; 1 Timo. 6:​6-8) E mata, e tuku mai ne Ieova a mea konei ona me se tiute e ‵tau o fai ne ia? Ikai! Kaia e fai ei ne Ieova te mea tenei mō tatou?

6. Se a te mea e tauloto ne tatou mai te Mataio 6:​25, 26?

⁶ E tuku mai ne Ieova a mea e manakogina ne tatou ona ko tena alofa ki a tatou. Mafaufau la ki pati a Iesu i te Mataio 6:​25, 26. (Faitau.) Ne fakaaoga ne Iesu a te fakaakoakoga a manu kae fai atu: “E se ‵toki fuaga io me tau fuataga io me fakaputu meakai ki olotou fale koloa.” Kae onoono aka la ki ana pati ne toe fai atu: “Kae e fagai eiloa latou ne te otou Tamana i te lagi.” Oti aka, fesili atu ei a Iesu: “E a, e se sili atu la te tāua o koutou i lō latou?” Se a te akoakoga? E kilo atu a Ieova ki ana tino tapuaki me tāua fakafia atu i lō a manu. Kafai e tausi atu a Ieova ki manakoga o manu, e mautinoa eiloa me ka tausi mai foki ne ia tatou! E pelā me se tamana atafai, e tausi mai a Ieova ki manakoga o tena kāiga ona ko te alofa.—Sala. 145:16; Mata. 6:32.

7. Se a te auala e tasi e mafai o fakaakoako tatou ki te kaimalie o Ieova? (Onoono foki ki te ata.)

⁷ E pelā mo Ieova, e mafai foki o tuku atu ‵tou kope faka-te-foitino ki nisi tino ona ko te alofa. Pelā me se fakaakoakoga, e mata, e iloa ne se taina io me se tuagane telā e manako ki mea‵kai io me ko gatu? E mafai o fakaaoga ne Ieova a koe ke fesoasoani atu ki te taina io me ko te tuagane tenā. E lauiloa a tino o Ieova i te lotou kaima‵lie māfai ko tupu se fakalavelave. E pelā mo te taimi o te masaki ‵pisi ko te COVID-19, ne avatu ne taina mo tuagane a mea‵kai, gatu mo nisi mea aka ki a latou kolā e manakogina ne latou. Ne fai foki ne tino e tokouke a olotou meaalofa tupe ki te galuega i te lalolagi kātoa. Ne fesoasoani atu a meaalofa konā ke ‵lago atu ki taina i te lalolagi kātoa kolā e pokotia. Ne fakagalue ne latou a pati i te Epelu 13:16: “Ke mo a ma puli o fai a mea ‵lei kae tufa atu a mea kolā ko maua ne koutou ki  nisi tino, me i te Atua e fiafia malosi ki vaegā taulaga penā.”

8. E aoga pefea a te malosi o Ieova telā e tuku mai ne ia ki a tatou? (Filipi 2:13)

⁸ E tuku mai ne Ieova te malosi. E fiafia a Ieova o tuku mai a tena malosi telā e seai sena tapulā ki ana tino tapuaki fakamaoni. (Faitau te Filipi 2:13.) E mata, kai ‵talo aka eiloa koe ke tuku mai te malosi tenā ke ‵teke atu a fakaosoosoga io me ke kufaki i se fakalavelave faigata? Kāti ne ‵talo foki koe ke maua te malosi ke fai a mea e manakogina i te aso. Kafai ko tali mai a tau ‵talo akai mō se malosi, ko lotomalie eiloa koe ki pati a te apositolo ko Paulo telā ne tusi mai, penei: “Me e maua ne au a te malosi i mea katoa e auala i a ia telā ne tuku mai ne ia te ‵mana ki a au.”—Fili. 4:13.

9. E mafai pefea o fakaakoako tatou ki a Ieova mai te kaima‵lie o fakaaoga ‵tou malosi? (Onoono foki ki te ata.)

⁹ E tiga e se ‵lei katoatoa tatou, kae e mafai o fakaakoako tatou ki a Ieova mai te kaima‵lie o fakaaoga ‵tou malosi. E se mafai o tuku atu ne tatou a te malosi ki nisi tino. Kae e mafai o fakaaoga ‵tou malosi o fesoasoani atu ki a latou. E pelā mo te faiga o fekau io me ko galuega a se Kelisiano telā ko matua io me fakamasakisaki. E mafai o volenitia tatou o fesoasoani ki te ‵fuluga mo te faka‵leiga o te ‵tou Fale Tapuaki māfai e fetaui ‵lei mo ‵tou fakanofonofoga. A te fakaaoga o ‵tou malosi i auala penā ka aoga eiloa ki nisi o ‵tou taina kolā e tapuaki ki a Ieova.

10. E mafai pefea o fakamalosi ne tatou a nisi tino e auala i ‵tou pati?

¹⁰ Ke mo a foki ma puli, me isi se ma‵losi o pati kolā e fai atu ne tatou. E mata, e mafai o mafaufau koe ki se tino telā ka aoga ki a ia a pati fakamālō? E mata, e iloa ne koe se tino e manako ki fakamafanafanaga? Kafai e isi, kaia e se na gasue o ‵sala atu ki vaegā tino penā? E mafai o asi atu koe ki ei, telefoni atu, io me lafo atu se card, se meli io me se fekau ki ei. Sa manavase malosi ki au pati ka fai atu. A nai pati faigofie e fai atu mo te loto kātoa e mafai eiloa o fakamalosi atu ki tou taina talitonu ke tumau i te fakamaoni mō te suā aso io me fai ei ke maua ne ia se kilokiloga ‵lei ki tena fakalavelave.—Faata. 12:25; Efe. 4:29.

11. E fakaaoga pefea ne Ieova a tena poto?

¹¹ E tuku mai ne Ieova te poto. Ne tusi mai te soko ko Iakopo: “Kafai se tino i a koutou e se lava te poto i a ia, ke fakamolemole atu faeloa a ia ki te Atua, me e tuku atu ne ia mo te kaimalie ki tino katoa e aunoa mo te mafaufau ki olotou mea ‵se ne fai.” (Iako. 1:5) E fakaasi mai i pati konei me e se ‵funa ne Ieova a tena poto mai i a tatou. E fakaasi atu ne ia mo te kaimalie ki tino. Ne fai mai foki a Iakopo me  kafai e tuku mai ne Ieova a te poto, e tuku mai eiloa ne ia e ‘aunoa mo te mafaufau ki ‵tou mea ‵se.’ E se manako a ia ke se ‵lei ‵tou lagonaga māfai e fakamolemole atu mō tena takitakiga. A te ‵tonuga loa, e fakamalosi ne ia tatou ke akai atu ki a ia mō se takitakiga.—Faata. 2:​1-6.

12. Ne a avanoaga e maua ne tatou ke fakaasi atu ‵tou poto ki nisi tino?

¹² Kae e a tatou? E mata, e mafai o fakaakoako tatou ki a Ieova mai te fakaasi atu ki nisi tino a ‵tou poto? (Sala. 32:8) E maua ne tino o Ieova a avanoaga e uke ke fakaasi atu ki nisi tino a olotou mea ne tauloto. E pelā me se fakaakoakoga, e masani o fakaakoako ne tatou a tino ‵fou i te galuega talai. E fesoasoani atu a toeaina mo te kufaki ki tavini fesoasoani mo taina papatiso ke tauloto ke iloa o fai olotou tōfiga i te fakapotopotoga. Kae e fesoasoani atu a tino kolā e apo i galuega fakatū‵tu o akoako a latou kolā e se apo malosi ke iloa o fai a galuega penā i te taviniga a Ieova.

13. Kafai e akoako a nisi tino, e mafai pefea o fakaakoako tatou ki te auala e fakaasi atu ne Ieova tena poto ki tino?

¹³ A latou kolā e fai ne latou a akoakoga e fakaakoako ki te auala e akoako ne Ieova a nisi tino. Ke masaua me e tuku mai ne Ieova a tena poto mo te kaimalie. I se auala tai ‵pau, e fia‵fia tatou o fakaasi atu a ‵tou mea e iloa ki a latou kolā koi tauloto. E se ma‵nako tatou o taofi aka a ‵tou iloaga ona ko te manava‵se i te mea ma sui fakamuli tatou ne latou kolā ne akoako ne tatou. Io me maua ne tatou a te kilokiloga tenei: ‘Seai se tino ne akoako ne ia au! Fai loa ke akoako ne ia a ia eiloa.’ E se ‵tau o maua ne tino o Ieova a te vaegā kilokiloga tenā. I lō te fai penā, e fia‵fia eiloa tatou o fakaasi atu a te ‵tou iloaga kae ‘tuku atu foki tatou’ ki a latou kolā e akoako ne tatou. (1 Tesa. 2:8) E fakamoe‵moe tatou me i a latou “ka fetaui ‵lei o akoako a nisi tino.” (2 Timo. 2:​1, 2) Kafai e fakaasi atu ne tatou mo te kaimalie a ‵tou mea ko iloa, ka gasolo aka eiloa o ‵poto kae fia‵fia malosi tatou pelā foki mo nisi tino.

MĀFAI E FOLIGA MAI ME E SE LOTO FAKAFETAI A TINO

14. E ‵saga mai pefea a te tokoukega māfai e fakaasi atu te kaimalie ki a latou?

¹⁴ Kafai tatou e kaima‵lie, maise loa ki ‵tou taina mo tuagane, ka fakaasi mai eiloa ne latou a te loto fakafetai. Kāti ka fakaasi mai ne latou a te loto fakafetai e auala i se card io me i se isi auala aka. (Kolose 3:15) Kafai e fakafetai mai latou, ka fia‵fia malosi tatou o fai se mea ki a latou.

15. Se a te mea e ‵tau o masaua ne tatou māfai e se fakaasi mai ne nisi tino a te loto fakafetai?

¹⁵ Kae kāti e se fakaasi mai faeloa ne nisi tino a te loto fakafetai. I nisi taimi kāti e se fia ‵saga mai latou ki mea katoa ne fai ne tatou ke fesoasoani atu ki a latou, io me ko ‵tou taimi, malosi mo kope ne fakamāumāu ki a latou. Kafai ko tupu te mea tenā, e mafai pefea o ‵kalo kea‵tea tatou mai te kaitaua io me se fiafia? Masaua a pati i te ‵tou tusi siki fakavae, Galuega 20:35. A te ‵tou fia‵fia o tuku atu a mea, e se faka‵na ki te ‵saga mai o tino. Koi mafai eiloa o fia‵fia tatou o tuku atu ‵tou mea faitalia foki loa e se fakaasi mai ne tino te loto fakafetai. Pefea la? Mafau‵fau ki nai auala.

16. Se a te mea e ‵tau o ‵saga tonu tatou ki ei māfai e tuku atu ‵tou mea?

¹⁶ Saga tonu atu o fakaakoako ki a Ieova. E tuku atu ne ia a mea ‵lei ki tino faitalia me loto fakafetai latou ki ei io me ikai. (Mata. 5:​43-48) E tauto mai a Ieova me kafai foki e tuku atu ‵tou mea “e aunoa mo te fakamoemoe ke toe maua mai ne mea,” a te ‵tou “taui ka lasi ‵ki.” (Luka 6:35) Tela la, sa fanoanoa māfai e se fakaasi mai faeloa ne tino te loto fakafetai. Masaua me ka taui ne Ieova tatou ona ko ‵tou mea ‵lei e fai ke fesoasoani atu ki nisi tino kae  ona foki ko tatou ne ‘tino e loto fia‵fia o tuku atu.’—Faata. 19:17; 2 Koli. 9:7.

17. Se a te ‵toe pogai tāua e ma‵nako ei tatou o tuku atu ‵tou mea ki nisi tino? (Luka 14:​12-14)

¹⁷ A te suā mea e mafai ne tatou o fai ke fakaakoako ki a Ieova māfai e tuku atu a mea, ko te fakagalue o pati a Iesu i te Luka 14:​12-14. (Faitau.) E se masei ke fakaasi atu te uiga talimalo io me ko te uiga kaimalie i nisi auala aka ki a latou kolā e mafai o fai mai foki ne latou se mea tai pau pena ki a tatou. Kae e a māfai ko masani tatou o tuku atu ‵tou mea ki nisi tino me e fakamoe‵moe tatou me ka toe taui mai ne latou? Kafai e penā loa, taumafai o ‵tofo aka te mea ne fai mai ne Iesu. E mafai o uiga talimalo tatou ki se tino telā e iloa ne tatou me e se mafai o toe taui mai ne ia. Kae ka fia‵fia eiloa tatou me e fakaakoako tatou ki a Ieova. Ka fesoasoani mai foki a te kilokiloga tenā ke tumau te ‵tou fia‵fia māfai e se fakaasi mai ne nisi tino te loto fakafetai.

18. Se a te mea e se ‵tau o fai ne tatou kae kaia?

¹⁸ Ke mo a ma fakafesili a te pogai e se loto fakafetai ei a tino. (1 Koli. 13:7) Kafai e se loto fakafetai a nisi tino, e mafai o ‵sili ifo tatou, penei: ‘E mata, e seai loa se loto fakafetai i a latou, io me puli fua o fakaasi mai ne latou?’ Kāti e isi aka ne pogai ne seki fakaasi mai ne latou te loto fakafetai e pelā mo te mea ne ma‵nako tatou ki ei. Nisi tino kāti e lasi ‵ki te lotou fakafetai kae faigata ke fakaasi mai. Kāti e ‵mā latou māfai e fesoasoani atu tatou, maise loa māfai latou ne tino ne masani o fesoasoani ki nisi tino i taimi mua. Faitalia te kilokiloga tenā, ka fakamalosi aka tatou ne te alofa faka-Kelisiano ke se mafau‵fau i se auala sē ‵lei ki ‵tou taina kae ke tumau i te fia‵fia mai te tuku atu o ‵tou mea.—Efe. 4:2.

19-20. Kaia e aoga ei a te kufaki māfai e tuku atu ‵tou mea ki nisi tino? (Onoono foki ki te ata.)

¹⁹ Ke kufaki. E uiga ki te kaimalie, ne tusi mai te Tupu poto ko Solomona: “‵Pei atu au falaoa ki luga i te vai, me mai tua ifo o aso e uke ka toe maua ne koe.” (Fai. 11:1) E pelā mo te mea e fakaasi mai i pati konei, kāti ka fakaasi mai ne nisi tino a te loto fakafetai mai tua o se vaitaimi —“mai tua ifo o aso e uke.” Mafaufau ki se tala telā e fakaasi mai i ei a te ‵tonu o te mea tenei.

²⁰ I tausaga e uke ko ‵teka, ne lafo atu ne se avaga a te ovasia o te seketi se tusi fakafetai ki se tuagane telā ne fatoa papatiso, kae fakamalosi atu ke tumau a ia i te fakamaoni. I se valu tausaga mai tua ifo, ne tali atu te tuagane tenā e auala i se tusi, mai te fai atu: “Ne mafaufau au ke tusi o fakailoa atu a te lasi o tou fesoasoani ki a au i tausaga konei ko ‵teka e aunoa mo te iloa ne koe.” Ne toe fai mai a ia: “[A tau tusi] ko oko eiloa i te fakamafanafana mai, kae ne ‵goto tonu ki toku loto a te tusi faitau tenā, kae ne seki mafai o puli i a au.” a I te otiga ne fakamatala ne ia a nisi mea faiga‵ta ne fepaki mo ia, ne fai atu te tuagane: “I nisi taimi ko manako fua au o fakagata taku taviniga ki a Ieova. Kae ne masaua faeloa ne au te tusi faitau i tau tusi kae ne fakamalosi mai faeloa ke tumau au i te fakamaoni kae ke se ‵fiu vave.” Ne toe fai mai a ia: “I loto i te valu tausaga tenā, ne lasi ‵ki eiloa te aoga o tau tusi mo te tusi faitau telā ne fakaasi mai ne koe.” Mafaufau aka la ki te fiafia o te avaga a te ovasia o te seketi i te mauaga ne ia te tusi tenā “mai tua ifo o aso e uke”! E mafai o maua ne tatou se fakaasiga penā o te loto fakafetai kāti mai tua o se vaitaimi ne fai ne tatou se mea ‵lei ki se tino.

21. Kaia e fakaiku aka ei ne koe ke tumau i te fakaakoako ki te kaimalie o Ieova?

²¹ E pelā mo te mea ne fakasae mai, ne faite ne Ieova tatou mo se atamai fakapito. E tiga eiloa e fia‵fia tatou māfai e maua ‵tou mea, e sili fakafia atu te fiafia māfai e tuku atu ‵tou mea ki nisi tino. E maua ne tatou a lagonaga ‵lei māfai e fesoasoani atu ki ‵tou taina tali‵tonu. Kae e fia‵fia tatou māfai e fakaasi mai ne latou te loto fakafetai. Kae faitalia me fakaasi mai ne te tino a te loto fakafetai io me ikai, e fia‵fia eiloa tatou me ne fai ne tatou a te mea tonu. Ke mo a ma puli me i so se mea e tuku atu ne koe, “e mafai fua ne Ieova o tuku atu ki a koe a mea e uke atu.” (2 Nofo. 25:9) Ka uke ou fakamanuiaga mai a Ieova! Kae e seai se taui e sili atu i te taui e tuku mai ne Ieova. Tela la, ke na tumau eiloa tatou i te fakaakoako atu ki te ‵tou Tamana kaimalie i te lagi.