Kai faitau faka‵lei koe ki lōmiga o Te Faleleoleo Maluga i te tausaga nei? Onoono aka me e mafai o tali mai ne koe a fesili konei:

Se a te uiga ke “‵fuli otou mafaufau”? (Loma 12:2)

E aofia i ei a mea e uke atu i lō te faiga fua o galuega ‵lei i ‵tou olaga kātoa. E aofia i ei te iloilo aka a ‵tou loto kae fai so se ‵fuliga e manakogina, ko te mea ke fakafetaui aka a ‵tou olaga ki tulaga o te Atua.—w23.01, itu. 8-9.

E fakaasi atu pefea me paleni ‵lei tatou māfai e kilo‵kilo atu ki mea ‵tupu i te lalolagi?

E fia lavea ne tatou te auala e fakataunu ei a valoaga i te Tusi Tapu e auala i mea ‵tupu i ‵tou aso nei. I lō te tuku taumate ne tatou a mea ‵tupu kolā e mafai o fakamāfua aka i ei te ‵nofo mavae‵vae, se mea gali ke fakavae ‵tou sau‵talaga ki mea kolā ne ‵lomi ne te fakapotopotoga a Ieova. (1 Koli. 1:10)—w23.02, itu. 16.

E ‵kese pefea te papatisoga o Iesu mai te papatisoga o ana soko?

Ona ko te mea ne fanau mai a ia ki se fenua telā ko oti ne tukugina atu ki te Atua, ne seki manakogina ke fai ne Iesu tena tukuatuga ki a Ieova e pelā mo tatou. A Iesu se tino ‵lei katoatoa, telā e seai sena agasala. Ne seki manakogina ke salamō a ia ki ana agasala.—w23.03, itu. 5.

E mafai pefea o fesoasoani tatou ki nisi tino ke fai olotou tali i fakatasiga?

Ke fakatoe‵toe a ‵tou tali, ko te mea ke maua ne nisi tino te avanoaga ke fai olotou tali. Ke ‵kalo keatea mai te fai o manatu e uke. Mai te fai penā, ka isi ne manatu e mafai o aofia ne nisi tino i olotou tali.—w23.04, itu. 23.

Se a te mea e fakauiga ki ei a “te Ala Tapu” telā ne fakaasi mai i te Isaia 35:8?

A te auala lasi fakatusa tenei ne fakasino muamua atu ki te auala ne olo i ei a tino Iutaia mai Papelonia ki te lotou fenua. Kae pefea la i aso fakamuli konei? I te fia senitenali mai mua o te 1919, ne fai a galuega ki te fakatokaga o te auala—te ‵fuliga mo te ‵lomiga o Tusi Tapu, mo nisi mea aka. Koi faima‵laga atu eiloa a tino o te Atua i “te Ala Tapu” ke oko ki te palataiso faka-te-agaga, telā ka maua i ei a fakamanuiaga o te Malo.—w23.05, itu. 15-19.

Ko oi a fāfine fakatusa kolā ne fakasino atu ki ei a manatu fesoasoani i te Faataoto mataupu e 9?

E faipati te Faataoto e uiga ki se “fafine valea” telā ka iku atu tena ‵kamiga ki “te Tanuga” kae ne fakatusa te “poto tonu” ki se fafine, telā ka iku atu tena ‵kamiga ki te “auala o te malamalama” mo te ola. (Faata. 9:​1, 6, 13, 18)—w23.06, itu. 22-24.

Ne lavea faka‵lei atu pefea a te loto maulalo o te Atua mo tena loto malamalama i ana faifaiga ki a Lota?

Ne fakatonu atu a Ieova ki a Lota ke tele kea‵tea mai Sotoma ki luga i koga maugā. I te taimi ne fakamolemole atu a Lota ke faka‵lafi fua a ia i Soala, ne talia ne te Atua tena fakamolemole.—w23.07, itu. 21.

Ne a mea e mafai o fai ne se fafine māfai e onoono sāle tena avaga i ata ma‵sei?

E ‵tau o masaua ne tou fafine me e se ‵tau o ‵losi atu te mea tenei ki a ia. Ke na saga tonu fua tou fafine ki tena fesokotakiga mo te Atua kae mafaufau ‵loto ki tala i te Tusi Tapu o fāfine loto mafatia kolā ne maua ne latou se fakamafanafanaga mai i te Atua. E mafai o fesoasoani tou fafine ki tena avaga ke kalo kea‵tea mai nisi tulaga fakama‵taku. —w23.08, itu. 14-17.

Kafai ko fakafesili ne nisi tino a ‵tou talitonuga, ka fesoasoani mai pefea a te ‵loto o te malamalama ke agamalu tatou?

E mafai o ‵kilo atu tatou ki te fakafesiliga tenā e pelā me se auala ke iloa a mea i te mafaufau io me ko mea e manavase ki ei te tino tenā. Mai te fai penā, ka mafai o toka ‵lei tatou ke tali atu i se auala agamalu.—w23.09, itu. 17.

Ne a mea e mafai o tauloto ne tatou mai i a Malia e uiga ki te auala ke maua ei te malosi?

I te iloaga ne ia me ka fai tou fafine mo fai te mātua o te Mesia, ne maua ne Malia te malosi mai i nisi tino. Ne fai atu ne Kapilielu mo Elisapeta ki a Malia a pati fakamalosi mai te Tusi Tapu. E mafai foki o maua ne tatou te malosi mai ‵tou taina tapuaki.—w23.10, itu. 15.

E tali mai pefea ne Ieova a ‵tou ‵talo?

Ne tauto mai a ia me ka fakalogologo a ia ki ‵tou ‵talo kae mafaufau ki te auala e soko i ei ki tena fuafuaga. (Iele. 29:12) E mafai foki o tali a ia ki fakatagi tai ‵pau penā i auala kese‵kese, kae ka fesoasoani mai faeloa a ia ki a tatou.—w23.11, itu. 21-22.

Loma 5:2 e faipati e uiga ki te “fakamoemoega,” kae kaia ne toe sae aka i ei i te fuaiupu e 4?

I te taimi e lagona ei ne se tino a te tala ‵lei, e mafai o maua ne ia te fakamoemoega ke ola mo te fiafia i te lalolagi palataiso. Kae kafai ko fepaki a ia mo tulaga faiga‵ta, kufaki i ei, kae lavea ne ia te taliaga a te Atua, ka fai i ei ke gasolo aka o malosi atu te fakamoemoega tenā kae kilo atu ki ei pelā me se fakamoemoega totino o ia.—w23.12, itu. 12-13.