E MAUTINOA me fakatāua ne koe a meaalofa kese‵kese a Ieova, e aofia i ei tou saolotoga ke fakaiku aka te auala ke fakaaoga ne koe a meaalofa konei. Se mea gali me taku ne te Tusi Tapu a uaina e pelā me se meaalofa mai te Atua, kae fai mai foki: “A meakai ne fai ke kata‵kata ei a tino, kae ko te uaina e fai i ei ke gali te olaga.” (Fai. 10:19; Sala. 104:15) Kāti ko oti ne lavea ne koe me ne fai a meainu ma‵losi mo fai se fakalavelave ki nisi tino. E se gata i ei, e tofu a tuu mo aganuu kese‵kese mo olotou kilokiloga mo tulaga ki meainu ma‵losi. Se a la te auala poto mō Kelisiano?

Faitalia te koga e ‵nofo tatou i ei io me ko tuu mo aganuu ne ‵tupu aka i ei tatou, kafai e talia ne tatou ke takitaki ‵tou mafaufauga mo fakaikuga ne te kilokiloga a te Atua, ka aoga eiloa te mea tenā kae ka iku atu ki te mauaga ne tatou se olaga fiafia.

E pelā mo te mea kāti ko lavea ne koe, e inu faeloa kae inu malosi a tino e tokouke i te lalolagi. E fakaaoga ne nisi tino a meainu ma‵losi me e fai i ei ke maua ne latou a lagonaga tokagamalie. Nisi e inu ke mafai ne latou o fa‵ki i olotou fakalavelave. Kae i nisi koga, a te inu malosi se fakaasiga me i te tino tenā ko matua kae malosi foki.

Kae e maua ne Kelisiano a fakatakitakiga ‵poto mai te lotou Mafuaga alofa. E pelā me se mea e tasi, ko oti ne fakaasi mai ne ia a ikuga sē ‵lei o te inu malosi. Kāti ko oti ne fai‵tau tatou ki te Faataoto 23:​29-35 telā e fakamatala likiliki mai ei a mea e uiga ki se tino māfai ko konā mo mea ka iku mai i ei. a E masaua ne Daniel, se toeaina Kelisiano i Eulopa, a tena olaga mai mua o fai a ia mo fai se Kelisiano tonu, “A te inu malosi ne iku atu ki te faiga o fakaikuga sē ‵lei mo mea fakalogo‵mae ki te loto kolā ko faigata ke fakapuli atu.”

E mafai pefea o fakaaoga ne Kelisiano a te lotou saolotoga kae ‵kalo keatea mai fakalavelave kolā e māfua mai i te fakaaoga ‵se o meainu ma‵losi? A te kī ki ei ko te talia ne tatou te kilokiloga mo mafaufauga o te Atua ke takitaki ei ‵tou faifaiga.

Ke onoono tatou me ne a pati a te Tusi Tapu e uiga ki meainu ma‵losi mo pogai e inu sāle i ei a tino ki meainu ma‵losi.

E se taku fakamasei ne te Muna a te Atua a te fakaaogaga o meainu ma‵losi. E fai ‵tonu mai te Tusi Tapu me se mea fakafiafia a te inu ki uaina. E fai‵tau tatou penei: “Kai au meakai mo te fiafia kae inu au uaina mo te loto fiafia.” (Fai. 9:7) A Iesu ne inu uaina i nisi taimi, kae penā foki a nisi tavini fakamaoni a Ieova.—Mata. 26:​27-29; Luka 7:34; 1 Timo. 5:23.

Kae e manino ‵lei a pati i te Muna a te Atua e uiga ki te inu malie ki meainu ma‵losi mo te inu ke konā. E fai faka‵lei mai i ei penei: “Ke se ko‵nā foki koutou i te uaina.” (Efe. 5:18) Kae e fakaasi mai foki i ei me i “tino ko‵nā . . . ka se maua ne latou a te Malo o te Atua.” (1 Koli. 6:10) Ao, a Ieova e takalialia malosi ki te inu malosi mo te konā. I lō te tautali atu fua i tuu mo aganuu masani a te fenua, e loto fakafetai eiloa tatou ki te kilokiloga a te Atua.

E mafau‵fau nisi tino me mafai o inu malosi latou ki meainu ma‵losi kae sē konā. Kae ko te mea tenā e fakamataku ‵ki. E manino ‵lei a pati i te Tusi Tapu me i te “pologa ki uaina e uke” e mafai o takitaki ei se tagata (io me se fafine) ke fai amioga fakatauavaga i te feitu faka-te-foitino mo te feitu faka-te-agaga. (Tito 2:3; Faata. 20:1) Ne polopoloki mai foki a Iesu me i te “inu malosi” e mafai o fai ei ke se ulu te tino ki loto i te lalolagi fou a te Atua. (Luka 21:​34-36) Ne a la mea e mafai o fesoasoani ki Kelisiano ke ‵kalo keatea mai auala kolā e faigofie o takitaki ei se tino ki te inu malosi?

Se mea fakamataku eiloa māfai e talia ne tatou a te kilokiloga a tino o te fenua ne tupu aka ei a tatou e uiga ki te inu ki meainu ma‵losi. E fai eiloa ne Kelisiano mo te poto a fakaikuga kolā e fakafiafia ki a Ieova e uiga ki mea‵kai mo meainu. E fakamasaua mai te Tusi Tapu ki a tatou: “Faitalia me ‵kai koutou io me inu io me e fai so se mea aka, ke fai a mea katoa mō te vikiga o te Atua.” (1 Koli. 10:31) Konei a nai fesili mo fakatakitakiga i te Tusi Tapu ke mafau‵fau ki ei:

E mata, e inu au ki meainu ma‵losi ko te mea ke fia‵fia mai a tino ki a au? Esoto 23:2 e fai mai: “E se ‵tau mo koe o tautali i te tokoukega o tino.” Ne fai atu a Ieova i konei ki tino Isalaelu ke fakaeteete i te tau‵tali atu ki tino kolā e fai ne latou a mea e se fiafia a ia ki ei. E aoga foki a pati fakatonutonu konā ki Kelisiano i aso nei. Kafai e talia ne tatou a ‵tou taugasoa ke pule mai ki ‵tou mafaufauga mo fakaikuga e uiga ki meainu ma‵losi, e mafai o fai ei ke ‵mao tatou mo Ieova mo ana tulaga.—Loma 12:2.

E mata, e inu au ki meainu ma‵losi ke mafau‵fau a tino i a au e malosi? A te inu malosi mo te inu faeloa ki meainu ma‵losi se mea masani telā e talia i nisi tuu mo aganuu. (1 Pe. 4:3) Kae onoono la ki pati fakamalosi i te 1 Kolinito 16:13: “Ke ala faeloa koutou, ke tu ‵mautakitaki i te fakatuanaki, ke fai e pelā me ne tāgata, ke loto ma‵losi koutou.” E mata, e mafai eiloa o fai ne meainu ma‵losi ke malosi se tino? Ikai, e ‵kese ‵ki a mea ka iku mai i ei. A meainu ma‵losi e mafai o fai ne ia se tino ke se mafaufau faka‵lei kae ke ‵kese ana faifaiga e fai. Tela la, i lō te fai pelā me se fakailoga o te malosi, a te inu malosi ki meainu ma‵losi se fakaasiga o te vāivāi. E fakamatala mai i te Isaia 28:7 me i te tino telā e faka‵segina ne meainu ma‵losi e fai pelā me e takasēsē kae siga.

A te malosi tonu e maua mai i a Ieova kae e aofia i ei te ala faeloa kae tu ‵mautakitaki i te fakatuanaki. (Sala. 18:32) E mafai o fai ne se Kelisiano loto fakamaoni a te mea tenei mai te tumau i te matapulapula kae fai faka‵lei ana fakaikuga ke puipui a ia i te feitu faka-te-agaga. Ne lavea atu a te malosi tenā i a Iesu i tena nofoga i te lalolagi nei, kae ne āva a tino e tokouke ki a ia kae ‵kilo atu ki ei e pelā me se tagata loto malosi.

E mata, e fakaaoga ne au a meainu ma‵losi ke kalo kea‵tea au mai oku fakalavelave? Ne  fakaosofia se faisalamo ke tusi mai penei: “Kafai ko uke a mea e manavase au ki ei, e fakamafanafana kae fakafiafia ne koe [Ieova] au.” (Sala. 94:19) Kafai e manavase koe ona ko te uke o ou fakalavelave, kilo ki a Ieova mō se fesoasoani, kae e se ki meainu ma‵losi. A te auala aoga e tasi ke fai penā ko te fakamasani o ‵talo ki a Ieova i taimi katoa. Ko oti foki ne iloa aka ne nisi tino a te aoga māfai e ‵sala atu ki manatu fesoasoani mai taugasoa ma‵tua ‵lei i te fakapotopotoga. Te ‵tonuga loa, a te inu ki meainu ma‵losi ke kalo kea‵tea mai mea faiga‵ta, e mafai o fakavāivāi atu ki tulaga o te tino i mea tau amioga mo ana fakaikuga ke fai te mea tonu. (Ho. 4:11) Ne fai mai a Daniel telā ne taku muamua mai: “Ne manavase malosi sāle au kae maua a lagonaga sē aoga. Ne inu malosi au ke sē manavase au ki oku fakalavelave, kae ne fai fua i ei ke gasolo o uke atu oku fakalavelave kae ne seki toe fia fai taugasoa mai nisi tino ki a au kae sē āva mai foki.” Se a te mea ne fesoasoani atu ki a Daniel? “Ne iloa ne au me ne manakogina ne au te fesoasoani o Ieova, kae e se ko meainu ma‵losi. Fakamuli ifo, ne mafai o fakafesagai atu au ki oku fakalavelave kae manumalo i ei,” ko ana pati. Te ‵tonuga loa, e toka faeloa a Ieova o fesoasoani mai, faitalia foki loa me foliga sē aoga ‵tou tulaga.—Fili. 4:​6, 7; 1 Pe. 5:7.

Kafai koe e inu sāle ki meainu ma‵losi, kaia e se iloilo ei ne koe a tau inu mai te fakaaogaga o fesili konei: ‘E mata, e isi se tino i te kāiga io me se taugasoa pele ne fakaasi mai tena manavase e uiga ki taku inu?’ Kafai e isi, ko fakaasi atu i te mea tenei me ko kamata o ati aka ne koe se faifaiga masani io me se fakalavelave telā e se lavea ne koe. ‘E mata, ko uke atu aku mea e inu i lō te aofaki masani e inu sāle ne au?’ Tenā te tulaga e mafai o oko ki ei se tino telā e se masani o inu malosi ki meainu ma‵losi. ‘E mata, e faigata ki a au māfai ko se inu ki meainu ma‵losi i loto i nai aso io me tai leva atu?’ Kafai e penā loa, tena uiga ko kamata o fakavalevale koe ki te inu ki meainu ma‵losi. Kāti ka manakogina ne koe te fesoasoani o tino ‵poto ke manumalo koe i te fakalavelave tenā.

Ona ko fakalavelave mo mea fakama‵taku e mafai o iku mai i te inu malosi, ko oti ne filifili aka ne nisi Kelisiano ke se inu eiloa latou ki meainu ma‵losi. Nisi tino e se inu eiloa ki ei me e se tami gali  ki a latou. Kafai tenā te fakaikuga ne fai ne sou taugasoa, ke fakaasi atu te alofa ki a ia mai te āva ki tena fakaikuga e aunoa mo te fakamasei ne koe a ia.

Io me kāti ko oti ne lavea ne koe me se mea poto ke inu mo te faka‵tau. E mafai o fakatapula ne se Kelisiano te uke o ana mea e inu. Io me kāti e fai ne ia se tulafono ki taimi e inu ei a ia, kāti fakatasi fua i te vaiaso io me inu faka‵tau fua i taimi e kai ei. Ko oti ne fakaiku aka ne nisi tino a vaegā meainu ma‵losi ka inu latou ki ei, kāti pelā mo uaina mo pia, kae e se ko meainu tai ma‵losi atu, ke oko ki meainu ma‵losi kolā e palu mo nisi mea. Kafai ko oti ne fakatoka ne se tino ana tapulā e uiga ki te inu ki meainu ma‵losi, ka faigofie ke tautali a ia i ei. Kae e seai se pogai ke mā i ei se Kelisiano matua faka-te-agaga māfai ko oti ne fai tena fakaikuga kae tautali katoatoa ki ei.

A te mafaufau ki nisi tino se suā mea telā e ‵tau o masaua ne tatou. Loma 14:21 e fai mai: “E ‵lei atu ke se kai ki ‵kano o manu io me inu ki uaina io me e fai so se mea telā e fakavāivāi ei tou taina.” E fakagalue pefea ne koe a pati fakatonutonu konei? Fakaasi te alofa fakataina. Kafai e mafaufau koe me e mafai o fakavāivāi ne koe se tino mai te inu ki meainu ma‵losi, e mata, ka se fakamalosi aka koe ne te alofa ke mo a ma inu ki meainu ma‵losi i te taimi tenā? Mai te fai penā ko fakaasi atu ne koe a tou saga tonu atu mo te āva ki lagonaga o nisi tino, kae ‵sala ki mea e ‵lei ei latou, i lō te ‵sala ki mea e fiafia koe ki ei.—1 Koli. 10:24.

E se gata i ei, kāti e isi ne tulafono a te malo kolā e mafai o takitaki ki ei se fakaikuga a se Kelisiano. E mafai o aofia i tulafono konā te aofaki o tausaga ko saoloto ei se tino ke inu ki meainu ma‵losi io me fakatapu te inu kae fakateletele io me fakaaoga a masini faigaluega ‵lasi.—Loma 13:​1-5.

Ne faka‵malu ne Ieova tatou mai te tukumaiga o te saolotoga ke fakaaoga a meaalofa e uke ne tuku mai ne ia ki a tatou. E aofia i ei te meaalofa ke filifili a meakai ka ‵kai tatou mo meainu ka inu tatou ki ei. Ke na fakaasi atu ne tatou i ‵tou filifiliga me fakatāua ne tatou a te saolotoga tenei mai te fakafiafia atu ki te ‵tou Tamana i te lagi.