I se aso e tasi, ne onoono se tuagane i Niusila i te vitio ko te “Have . . . Concern for One Another” i te jw.org, telā e fakamatala mai i ei a lagonaga atafai o Ieova mo te auala e fakaasi atu ne ia. (Isa. 63:​7-9) Ne fakaiku aka ne ia ke fakagalue ana mea ne tauloto mai te ‵sala ki avanoaga ke fesoasoani atu ki se tino. Fakamuli ifo, i tena fanoga ki te sitoa i te aso eiloa tenā, ne fetaui a ia mo se fafine e seai sena fale kae ne ofo atu ke ‵togi ne ia se mea‵kai a te fafine tenā. Ne talia ne te fafine te mea tenā. I te fokiatuga te tuagane mo mea‵kai, ne talai malie atu a ia mai te fakaaogaga o te tamā pepa E Mata, ka Gata Atu a Logo‵maega Katoa?

Ne kamata o tagi te fafine kae fai atu me ne puti aka a ia e pelā me se Molimau kae ko leva ne tiaki ne ia a te munatonu. Fakamuli fua nei, ne ‵talo faeloa tou fafine ki a Ieova mō se fesoasoani ke toe foki atu ki a ia. Ne tuku atu ne te tuagane ki tou fafine se Tusi Tapu kae fai a fakatokaga ke fai sena akoga. a

Ke na fakaakoako eiloa tatou ki te alofa atafai o Ieova ki ana tino, e aofia ei ‵tou kāiga mo taina mo tuagane i te fakapotopotoga. Kae e mafai o fakaasi atu ne tatou te alofa atafai mai te ‵sala ki avanoaga ke talai atu ki nisi tino.