1. E ‵saga atu pefea te tokoukega ki manakoga o te galuega talai?

 E UKE ‵ki a galuega e ‵tau o fai ne tatou ona ko te pili mai o te gataga o te olaga tenei. (Mata. 24:14; Luka 10:2; 1 Pe. 5:2) E ma‵nako katoa tatou o tavini katoatoa atu ki a Ieova. E tokouke a tino ko fakalauefa atu te lotou galuega talai. Nisi e fakamoe‵moe ke tavini e pelā me ne paenia. E fakamoe‵moe a nisi tino ke tavini atu i te Peteli io me aofia i te matagaluega fakatu‵tu. Kae e lau i se fia o taina e kausaki atu ke fai pelā me ne tavini fesoasoani io me se toeaina. (1 Timo. 3:1, 8) Ko oko eiloa i te fiafia o Ieova ke lavea ne ia te uiga loto fiafia o ana tino ke tavini atu ki a ia!—Sala. 110:3; Isa. 6:8.

2. E pefea ‵tou lagonaga māfai e seki taunu ‵tou fakamoemoega faka-te-agaga?

² E mafai eiloa o loto vāi‵vai tatou māfai e seki taunu a nisi fakamoemoega faka-te-agaga mō se taimi leva. Io me e mafai o loto vāi‵vai tatou me ko se mafai o maua ne tatou a nisi tauliaga ona ko te tulaga matua io me ko nisi pogai aka. (Faata. 13:12) Tenā te mea ne tupu ki a Melissa. * E fiafia a ia ke tavini atu i te Peteli io me kau ki te Akoga mō Tino Talai o te Malo, kae ne fai mai a ia: “Au ko se fetaui ‵lei mo tauliaga konā, i au ko tō matua. I nisi taimi ne loto vāivāi au.”

3. Ne a mea e manakogina ke kausaki atu ki ei se tino ke fetaui ‵lei mō nisi tauliaga?

³ A nisi talavou kolā e ma‵losi ‵lei kāti e manakogina ke ma‵tua ‵lei kae ke fakaasi atu ne latou a nisi uiga kolā e mafai ei o fetaui ‵lei latou ki nisi tauliaga. I te suā feitu, kāti a nisi tino e ‵poto, e fai fai fakavave oilotou fakaikuga kae loto finafinau; i te suā feitu, kāti e ‵tau o tauloto ke iloa o kufaki, ke fai faka‵lei  olotou galuega, kae ke āva foki ki nisi tino. Kafai e saga tonu koe o ati aka a uiga tāua konā, ka mafai o tuku atu ki a koe se tauliaga i te taviniga e tiga eiloa seki fakamoemoe koe ki ei. Mafaufau ki te tala o Nick. I te taimi ko 20 ei ana tausaga, ne fanoanoa malosi a ia me ne seki filifili a ia ke fai mo tavini fesoasoani. Ana muna, “Ne mafaufau au me isi se mea e tupu ki a au.” Kae ne seki ‵fiu vave a Nick. Ne fakaaoga faka‵lei ne ia a tauliaga kolā ne ma‵tala atu ki a ia. I aso nei, ko tavini atu a ia e pelā me se sui o te Komiti o se Ofisa Lagolago.

4. Ne a mea ka sau‵tala ki ei i te mataupu tenei?

⁴ E mata, e loto vāivāi koe ona ko te mea e seki maua sou fakamoemoega faka-te-agaga? Kafai e penā loa, fakaasi atu a mea e manavase koe ki ei ki a Ieova. (Sala. 37:5-7) E se gata i ei, ‵sala atu ki taina ma‵tua ‵lei mō ne manatu fesoasoani ki te auala e mafai o momea aka te ‵lei o tau taviniga ki te Atua, kae taumafai malosi o fakagalue a olotou manatu. Kafai e fakagalue ne koe, e mafai eiloa o maua ne koe se tauliaga. Kae e pelā mo Melissa, telā ne taku atu muamua, kāti ko se mafai nei ne koe o kausaki atu ki te tauliaga tenā i te taimi nei. E mafai la pefea o fakatumau ne koe a tou fiafia? Ke tali aka te fesili tenā, ka faipati a te mataupu tenei ki te (1) koga e maua i ei te fiafia, (2) te auala ke momea aka tou fiafia, mo te (3) ko fakamoemoega kolā e mafai o fakatoka ne koe ke maua i ei te fiafia.

5. Ke maua te fiafia, ne a mea e ‵tau o ‵saga tonu tatou ki ei? (Failauga 6:9)

⁵ E pelā mo te mea ne fakamau i te Failauga 6:9, e mafai o maua ne tatou a te fiafia māfai e ‵sala atu tatou ki ei i te koga tonu. (Faitau.) A te tino telā e fiafia “ki mea e lavea ki mata” e lotomalie ki mea ko maua ne ia, e pelā mo ana fakanofonofoga i te taimi tenei. E ‵kese mai ei, a te tino telā e kausaki ki manakoga o tena loto e tumau faeloa i te manako ki se mea telā e se mafai o maua ne ia. Tela la, se a te akoakoga mō tatou? Ke maua te fiafia, e ‵tau o ‵saga tonu tatou ki mea ko maua ne tatou mo mea kolā e mafai o kausaki tatou ke maua.

6. Se a te tala fakatusa ka sau‵tala tatou ki ei, kae ne a mea ka tauloto ne tatou?

⁶ E mata, e mafai o lotomalie koe ki mea ko maua ne koe? E tokouke a tino e mafau‵fau me e se mafai, me e ma‵nako faeloa tatou o tauloto ki mea ‵fou. Kae ko te ‵tonuga loa, e mafai. E mafai o maua ne tatou a te fiafia tonu mai mea kolā e maua ne tatou. E mafai pefea o fai ne tatou te mea tenā? Ke iloa aka te tali, ke sau‵tala nei tatou ki te tala fakatusa a Iesu ki taleni, telā e maua i te Mataio 25:14-30. Ka tauloto eiloa tatou ki te auala ke maua te fiafia mo te auala ke momea aka ‵tou fia‵fia i fakamanuiaga kolā ko maua nei ne tatou.

7. Fakamatala fakatoetoe mai te tala fakatusa a Iesu e uiga ki taleni.

⁷ A te tala fakatusa ko te tala o se tagata telā ka fai o fano ki se isi fenua. A koi tuai o fano, ne kalaga atu a ia ki ana tavini kae tuku atu ki tino taki tokotasi a taleni ke fakagalue ne latou. * Ona ko te mea ne iloa ne te tagata a mea e mafai o fai ne latou, tela la ne tuku atu ne ia ki te tavini e tokotasi e lima taleni, ki te suā tino e lua, kae ko te suā tino e tasi. Ne fakagalue ne tavini e tokolua a tupe konā mo te poto. Kae ko te tavini i te tolu ne seki fakagalue ne ia a tupe kolā ne tuku atu ki a ia, kae ne fakatea a ia mai tena galuega.

8. Ne mafai pefea o fiafia a te tavini muamua i te tala fakatusa?

⁸ E mautinoa eiloa me ne fiafia ‵ki te tavini muamua me ne tuku atu ne tena matai a taleni  e lima ki a ia. A te mea tenā se aofaki lasi ‵ki, kae ne fakaasi mai ei te talitonu katoatoa o tena matai ki a ia! Kae a te lua o tavini? Ne mafai o loto vāivāi a ia me ne seki maua ne ia a taleni e uke e pelā mo te tavini muamua. Kae ne saga atu pefea a ia ki ei?

9. Se a te mea e seki fai mai ne Iesu e uiga ki te tavini i te lua? (Mataio 25:22, 23)

⁹ Faitau te Mataio 25:22, 23. Ne seki fai mai a Iesu i te tavini i te lua ne fanoanoa kae loto masei me e lua fua ana taleni ne maua. Kae ne seki fai mai a Iesu me i te tavini i te lua ne fameo kae fai aka: ‘Konei fua aku mea e maua? Au nei e galue malosi pelā loa mo te tavini telā ne maua ne ia a taleni e lima! Kafai e se fiafia mai toku matai, kāti e ‵lei atu ke tanu fua ne au a taleni konei e lua kae galue loa mō au.’

10. Ne a mea ne fai ne te lua o tavini ki ana taleni?

¹⁰ E pelā mo te tavini muamua, ne fakatāua malosi ne te tavini i te lua a te tiute ne tuku atu ki a ia kae ne galue malosi ke tavini atu ki tena matai. Tela la, ne tapolo ne tena matai ana taleni. Ne fakamanuia ne te matai a ia ona ko tena galue malosi mo tena atamai. Ne fiafia kae tavae ne te matai a te tavini tenei kae toe tuku atu foki ki a ia a tiute tai uke atu!

11. E mafai pefea o momea aka te lasi o te ‵tou fia‵fia?

¹¹ I se auala tai ‵pau, e mafai o momea aka ‵tou fia‵fia mai te talia so se mea e tuku mai ke fai ne tatou i te taviniga a Ieova. Ke “saga malosi” ki te galuega talai, kae aofia katoatoa i galuega ki te fakapotopotoga. (Galu. 18:5; Epe. 10:24, 25) Ke fakatoka faka‵lei mō fakatasiga ko te mea ke fai au tali fakamalosi loto i te mataupu telā e suke‵suke ki ei. Ke fakatāua  so se tofiga e maua ne koe i te fakatasiga i loto i te vaiaso. Kafai ne fakamolemole atu ki a koe ke fai se galuega i te fakapotopotoga, ke fakamaoni kae fakatuagagina. Sa mafaufau me e se aoga te galuega telā e tuku atu ke fai ne koe, tela la e se ‵tau o fakamāumāu ou taimi ki ei. Taumafai ke momea aka tou atamai. (Faata. 22:29) Ko tou galue malosi mō Ieova, ko te vave gasolo foki o koe ki mua kae ka maua ne koe te fiafia sili. (Kala. 6:4) Ka faigofie foki ki a koe ke fia‵fia fakatasi mo nisi tino māfai ko maua ne latou se tauliaga telā ne manako koe ki ei.—Loma 12:15; Kala. 5:26.

12. Ne a mea ne fai ne Molimau e tokolua ke momea aka ei te lā fia‵fia?

¹² Masaua a Melissa, te tuagane telā ne fakaasi mai tena manakoga ke tavini i te Peteli io me kau ki te Akoga mō Tino Talai o te Malo. E tiga eiloa e se mafai o fakataunu ana manakoga, ne fai mai a ia: “Ne fai ne au te ‵toe mea e mafai ke paenia kae taumafai o aofia i auala kese‵kese o te galuega talai. Ne maua ne au te fiafia sili mai ei.” Kae ne mafai pefea ne Nick o kufaki i te fanoanoa i te taimi ne seki filifili a ia ke fai mo tavini fesoasoani? “Ne saga tonu atu ki tauliaga kolā ne maua ne au—ko te kau ki te galuega talai kae fai aku tali fakamalosi loto i fakatasiga. Ne avatu foki taku tusi ke tavini i te Peteli kae ne talia i te tausaga mai tua.”

13. Se a te ikuga ka maua ne koe mai te galue malosi i te galuega ne tuku atu ki a koe? (Failauga 2:24)

¹³ Kafai e galue malosi koe i se galuega telā ne ‵tofi koe ki ei, e mata, ka maua ne koe a nisi tauliaga tai uke atu i aso mai mua? E mafai eiloa o tupu te mea tenā, e pelā mo te mea ne oko ki a Nick. Kae kafai e se penā, e pelā mo Melissa, ka tumau eiloa tou fiafia, kae ka fiafia kae lotomalie eiloa koe ki au mea e fai mō Ieova. (Faitau te Failauga 2:24.) E se gata i ei, e mautinoa eiloa me ka maua ne koe a te fiafia sili me e iloa ne koe me e fakafiafia ne koe a te ‵tou Matai ko Iesu Keliso.

14. Se a te mea e ‵tau o masaua ne tatou e uiga ki ‵tou fakamoemoega faka-te-agaga?

¹⁴ E mata, kafai ko isi ne tauliaga ko maua ne tatou i te taimi nei, ko tena uiga ko se ‵tau o kausaki atu tatou ki nisi vaega o te taviniga ki a Ieova? Ikai! E mafai kae e ‵tau o fakatoka ne tatou a fakamoemoega faka-te-agaga kolā e fesoasoani mai ke fai tatou mo tino talai mo faiakoga apo. E mafai o manuia tatou māfai e ‵saga tonu atu mo te ‵poto o tavini atu ki nisi tino i lō tatou eiloa.—Faata. 11:2; Galu. 20:35.

15. Ne a nisi fakamoemoega e mafai o fesoasoani atu ke momea aka tou fiafia?

¹⁵ Ne a fakamoemoega e mafai o fakatoka ne koe mō koe? Fakamolemole atu ki a Ieova ke fesoasoani atu ke iloa ne koe a fakamoemoega kolā ka kausaki koe ki ei. (Faata. 16:3; Iako. 1:5) E mata, e mafai o kausaki atu koe ki se tasi o fakamoemoega telā ne fakasae mai i te  palakalafa muamua o te mataupu tenei—ke paenia lagolago io me paenia tumau, tavini atu i te Peteli, io me aofia i galuega fakatu‵tu? Io me kāti e manako koe o tauloto ki se ‵gana fou ko te mea ke fakasalalau atu ne koe te tala ‵lei io me talai ki tino e fai‵pati ki ‵se gana fakaa‵tea. E mafai o iloa ne koe a nisi fakamoemoega mai te faitau ki te mataupu e 10 o te tusi ko te Fakatoka ke Fai te Loto o Ieova kae sau‵tala mo toeaina i tau fakapotopotoga. * I te taimi e galue ei koe ki fakamoemoega konā, ka mafai o lavea ne koe a tou gasolo ki mua kae ka momea aka ei tou fiafia.

16. Kafai ko sē mafai o kausaki atu ki se fakamoemoega ne manako koe ki ei, se a te mea e mafai ne koe o fai?

 ¹⁶ Kae e a māfai ko sē mafai nei ne koe o kausaki atu ki se tasi o fakamoemoega kolā ne sau‵tala ki ei i te mataupu tenei? Taumafai ke fakatoka se suā fakamoemoega, telā e mafai o fai ne koe. Ke sau‵tala ki nisi fakamoemoega kolā e mafai o kausaki ki ei.

17. E ‵tusa mo te 1 Timoteo 4:13, 15, ne a mea e mafai ne se taina o fai ke fai pelā me se faiakoga apo?

¹⁷ Faitau te 1 Timoteo 4:13, 15. Kafai koe se taina papatiso, kāti ka taumafai koe o momea aka te ‵lei o tau faipati mo te akoako atu. Kaia? Me kafai e “‵goto ifo ki loto i tou loto” au mea ne faitau, tau faipati mo tau akoako atu, ka aoga eiloa ki au tino fakalogo‵logo. Taumafai o fakatoka se fakamoemoega ke sukesuke kae fakagalue a manatu fesoasoani kolā e fakamatala mai i te polosiua ko te Ke Atamai i te Faitau mo te Akoako Atu. Sukesuke ki se manatu e tasi, fakaakoako faka‵lei i te fale, kae taumafai ke fakaasi atu te manatu tenā i tou tofiga. ‵Sala atu ki manatu fesoasoani mai tino fakatonutonu io me ko toeaina kolā “e ga‵lue ma‵losi i te fai‵pati mo te faiga o akoakoga.” * (1 Timo. 5:17) Sa saga fua o fakagalue a te akoakoga mai te polosiua kae fesoasoani atu foki ki au tino fakalogo‵logo ke fakamalosi aka olotou fakatuanaki io me fai ke fakagalue aka a olotou mea e tauloto. Mai te faiga penā, ka momea aka eiloa tou fia‵fia penā foki latou.

18. Se a te mea e mafai o fesoasoani mai ke kausaki atu tatou ki fakamoemoega i te galuega talai?

¹⁸ E maua ne tatou katoa a te tiute ke talai kae fai a soko. (Mata. 28:19, 20; Loma 10:14) E mata, e manako koe ke momea aka tou apo  i te faiga o te galuega tenei? Fakatoka ne fakamoemoega mautinoa i te taimi e sukesuke kae fakagalue ne koe au mea ne tauloto mai te polosiua ko te Akoako Atu. E mafai o maua ne koe a nisi manatu fesoasoani aoga mai te Tusi mō Fakatasiga ko te ‵Tou Olaga Kelisiano mo te Galuega Talai mo vitio o manatu fesoasoani mō sau‵talaga i fakatasiga i loto i te vaiaso. Tofotofo so se manatu telā e aoga ki a koe. Mai te tautali i manatu fesoasoani konei, e mautinoa eiloa me ka maua ne koe a te fiafia sili i te fai e pelā me se tino talai apo.—2 Timo. 4:5.

19. E mafai pefea o ati aka ne koe a uiga faka-Kelisiano?

¹⁹ Kafai e mafaufau koe o fakatoka ou fakamoemoega, sa puli a te ‵toe mea tāua—ko te atiakaga o uiga faka-Kelisiano. (Kala. 5:22, 23; Kolose 3:12; 2 Pe. 1:5-8) Ne a au mea e mafai o fai ke kausaki atu ki ei? Mafaufau la me e manako koe o ati aka tou fakatuanaki ke malosi. Kāti e faitau koe ki mataupu i ‵tou tusi kolā e maua i ei a manatu fesoasoani aoga ke fakamalosi aka tou fakatuanaki. E mautinoa eiloa me ka maua ne koe a mea aoga mai te onoono ki vaega o te Leo Fakasalalau o te JW^® kolā e fakamatala mai ei a te auala ne fakaasi mai ne taina mo tuagane a te fakatuanaki i te taimi e fakafesagai latou ki fakalavelave kese‵kese. Ko mafau‵fau ei ki auala e mafai o fakaakoako koe ki te lotou fakatuanaki i tou olaga.

20. Ne a mea e mafai ne tatou o fai ke maua te fiafia sili kae fakafeoloolo aka te fanoanoa?

²⁰ E seai se fakalotolotolua me e ma‵nako tatou katoa o fai a mea e uke mō Ieova i lō mea e mafai ne tatou o fai i te taimi nei. I te lalolagi fou a te Atua, ka mafai o tavini katoatoa atu tatou ki a ia. I te taimi nei, mai te fakaaoga faka‵lei so se avanoaga e maua ne tatou, e mafai o momea aka ‵tou fia‵fia kae fakafeoloolo aka a lagonaga fanoanoa. Kae sili atu la i te tāua, ka avatu eiloa ne tatou a tavaega mo vikiga ki a Ieova, te ‵tou “Atua fiafia.” (1 Timo. 1:11) Tela la, ke fia‵fia i tauliaga ko maua nei ne tatou!