1. E fakaaoga pefea ne tatou a taimi mo Ieova?

 E FIA‵FIA tatou o fakaaoga a taimi mo tino kolā e a‵lofa tatou ki ei. E gali atu ki se tauavaga fiafia ke fakamāumāu se taimi i te fakaafiafi i a lāua eiloa. E fia‵fia a talavou ke ‵kau fakatasi mo olotou taugasoa ‵pili. Kae e fakatāua ne tatou katoa a taimi ke ‵kau fakatasi mo taina tali‵tonu. Kae e sili atu i ei, e fia‵fia malosi tatou ke fakaaoga a taimi mo te ‵tou Atua. E mafai o fai tatou penā mai te ‵talo atu ki a ia, faitau ki tena Muna, kae mafaufau ‵loto ki tena fuafuaga mo ana uiga ‵gali. A taimi e fakaaoga ne tatou mo Ieova e tāua ‵ki eiloa!—Sala. 139:17.

2. Se a te tulaga faigata e fepaki mo tatou?

² E tiga eiloa e fia‵fia tatou ke fakaaoga a taimi mo Ieova, e fe‵paki tatou mo se tulaga faigata. E fakalave‵lave faeloa tatou, ko faigata ei o fakatoka se taimi mō mea faka-te-agaga. A ‵tou galuega ‵togi, tiute i te kāiga, mo nisi mea tāua, e manakogina i ei a taimi e uke, telā ko mafai ei o mafau‵fau aka tatou me ko seai se taimi ke ‵talo, fai a sukesukega, io me ke mafaufau ‵loto.

3. Se a te suā mea e mafai o fakamāumāu taimi?

³ E isi foki se mea telā e mafai o fakamāumāu taimi. Kafai e se fakaeteete tatou, e mafai o fakalave‵lave tatou i te faiga o mea kolā e se ma‵sei, ke ave keatea ei a taimi kolā e mafai o fakaaoga ke fakapili‵pili atu ki a Ieova. E pelā eiloa mo fakafiafiaga. E maua ne tatou katoa a mea aoga māfai e ‵kau atu ki fakafiafiaga. Kae ke oko foki loa ki fakafiafiaga ‵lei, e mafai o fakamāumāu ki ei a taimi e uke, ko se lava ei a taimi mō mea faka-te-agaga. E ‵tau o masaua ne tatou me i fakafiafiaga e se ko te ‵toe mea tāua.—Faata. 25:27; 1 Timo. 4:8.

4. Ne a mea ka mafau‵fau nei tatou ki ei?

 ⁴ I te mataupu tenei, ka mafau‵fau tatou ki pogai e ‵tau ei o fakaiku aka ne tatou a mea kolā e ‵tau o fakamuamua. Ka sau‵tala foki tatou ki auala ke fakaaoga faka‵lei a taimi mo Ieova mo mea aoga e mafai o maua mai i ei.

5. E fesoasoani atu pefea ki se talavou a te mafaufau ki pati fakatonutonu i te Efeso 5:15-17 ke filifili ne ia te ‵toe olaga ‵lei?

⁵ Ke filifili te ‵toe olaga ‵lei. E masani o manava‵se a talavou e uiga ki te ‵toe auala ‵lei ke fakaaoga ki ei olotou taimi. E mafai o fakamalosi atu a faiakoga mo kāiga sē tali‵tonu ke kausaki latou ki akoakoga ma‵luga, ke maua se galuega ‵togi ‵lei i te lalolagi. Kae ko vaegā akoakoga penei, e manakogina i ei a taimi e uke. I te suā feitu, e mafai o fakamalosi atu a mātua mo taugasoa i te fakapotopotoga ki talavou, ke fakaaoga olotou olaga i te taviniga ki a Ieova. Ne a mea e mafai o fesoasoani atu ki se talavou telā e alofa ki a Ieova, ke fai ne ia te ‵toe fakaikuga ‵lei? Ka maua ne ia a mea aoga mai te faitau ki te Efeso 5:15-17 kae mafaufau ‵loto ki ei. (Faitau.) Kafai ko oti ne faitau ki fuaiupu konei, e mafai o mafaufau ifo se talavou: ‘Se a te “loto o Ieova”? Se a te fakaikuga ka fakafiafia atu ki a ia? Se a te auala ka fesoasoani mai ke fakaaoga oku taimi ki toe mea aoga?’ Ke masaua me “i aso konei ko aso ma‵sei,” kae ko te olaga tenei e pule atu ki ei a Satani, ko pili fua o palele atu. Se mea poto eiloa ke fakaaoga ne tatou a ‵tou olaga i se auala telā e fai ei ke fiafia mai a Ieova ki a tatou.

6. Se a te filifiliga ne fai ne Malia, kae kaia ne fai ei pelā me se filifiliga poto?

⁶ Fakaiku aka a mea kolā e ‵tau o fakamuamua. I nisi taimi, a te fakaaogaga o ‵tou taimi ki toe mea aoga, e aofia i ei te filifiliga o se mea mai i mea e lua kolā e se ma‵sei. A te tala lauiloa e uiga ki te asiatuga a Iesu ki te fale o Malia mo Maleta, e fakamatala mai i ei a te manatu tenei. Ona ko tena fiafia ke talimalo faka‵lei ne ia a Iesu, ne fakatoka faka‵lei ne Maleta a mea‵kai ‵gali. I te taimi tenā, ne fakaaoga faka‵lei ne tena taina ko Malia, a te avanoaga ke sagasaga i tafa o tena Aliki, kae fakalogologo atu ki ana akoakoga. E tiga eiloa ne fai ne Maleta a mea konā mo te loto fiafia, kae ne filifili ne Malia a “te ‵toe vaega ‵lei.” (Luka 10:38-42, fml.) Fakamuli ifo, kāti ne puli i a Malia a meakai ne fakatoka i te taimi tenā, kae mautinoa i a tatou me ne seki mafai o puli i a ia ana mea ne tauloto mai i a Iesu. E pelā eiloa mo te fakatāua ne Malia te taimi tenā mo Iesu, e ‵tau foki o fakatāua ne tatou a ‵tou taimi mo Ieova. E fakaaoga pefea ne tatou a ‵tou taimi ki toe mea aoga?

7. Kaia e tāua malosi ke fakaaoga ‵tou taimi ke ‵talo, fai a sukesukega kae mafaufau ‵loto?

⁷ Ke malamalama faka‵lei koe me i ‵talo, te faiga o sukesukega, mo te mafaufau ‵loto ne vaega o te ‵tou tapuakiga. Kafai tatou e ‵talo, ko fesokotaki atu tatou ki te ‵tou Tamana faka-te-lagi telā e alofa malosi ki a tatou. (Sala. 5:7) Kafai e suke‵suke tatou ki te Tusi Tapu, ko faka‵goto ki ‵tou loto a “te iloaga o te Atua,” telā ko te pogai o poto katoa. (Faata. 2:1-5) Kafai e mafau‵fau ‵loto tatou, ko mafau‵fau tatou ki uiga ‵gali o Ieova, pelā foki mo tena fuafuaga fakaofoofogia mō mea katoa ne faite mo te auala e aofia tatou i ei. E mata, e isi se auala ‵lei atu ke fakaaoga faka‵lei ki ei ‵tou taimi i lō te mea tenei? Kae e mafai pefea o maua ne tatou a mea e uke mai mu taimi e maua ne tatou?

8. Se a te akoakoga e tauloto ne tatou mai i te auala ne fakaaoga ne Iesu ana taimi i te koga lavaki?

 ⁸ Kafai e mafai, fano ki se koga sē logoa. Mafaufau ki te tala o Iesu. A koi tuai o kamata tena galuega talai i te lalolagi, ne nofo atu a Iesu i aso e 40 i te koga lavaki. (Luka 4:1, 2) I te koga sē logoa tenā, ne mafai ne Iesu o ‵talo ki a Ieova kae mafaufau ‵loto ki te faiga ne ia a te loto o tena Tamana. Mai te fai penā, e mautinoa me ne fakatoka ei a Iesu mō tofotofoga kolā ka fepaki mo ia. E aoga pefea ki a koe a te tala o Iesu? Kafai e tokouke te otou kāiga, kāti ka faigata ke ‵sala atu koe ki se koga sē logoa i te otou fale. I te feitu tenā, e mafai o fano koe ki se isi koga sē logoa. Tenā te mea ne fai ne Julie māfai ko manako ke fakaaoga ana taimi mō Ieova. E ‵nofo lāua mo tena avaga i se tamā potu, i Falani kae faigata ke maua se taimi ke nofo tokotasi e aunoa mo ne mea e fakalavelave atu. “Tela la, e fano au i aso katoa ki te malae tafaofao,” ko pati a Julie. “I konā, e mafai ne au o nofo tokotasi, mafaufau faka‵lei kae faipati atu eiloa ki a Ieova.”

9. Faitalia tena fakalavelave, ne fakaasi atu pefea ne Iesu me ne fakatāua ne ia tena fesokotakiga mo Ieova?

⁹ Ne fakalavelave malosi a Iesu i tena olaga. I te faiga o tena galuega talai i te lalolagi, ne tau‵tali atu se vaitino i koga katoa ne fano a ia i ei. Kae ne ‵tau o fakaaoga ana taimi mō latou. I te taimi e tasi, “ne mumu atu a tino katoa o te fakai ki te mataloa o te fale” ke lavea ne latou a ia. Kae faitalia a mea katoa konā, ne fakatoka ne Iesu se taimi ke fakamalosi aka tena fesokotakiga mo Ieova. A koi tuai o sae aka te la, “ne fanatu a ia ki se koga sē logoa” ke nofo i a ia eiloa kae fakaaoga te taimi tenā mo tena Tamana.—Male. 1:32-35.

10-11. E ‵tusa mo te Mataio 26:40, 41, ne a pati fakatonutonu ne fai atu ne Iesu ki ana soko i te fatoaga o Ketesemane, kae ne a mea ne ‵tupu?

¹⁰ I tena toe po i te lalolagi nei, i te taimi ko palele atu tena galuega talai, ne toe fanatu a Iesu ki se koga sē logoa, ke mafai ne ia o mafaufau ‵loto kae ‵talo. Ne maua ne ia te koga tenā i te fatoaga o Ketesemane. (Mata. 26:36) I te taimi tenā, ne fai atu ne Iesu ki ana soko a pati fakatonutonu e uiga ki ‵talo.

¹¹ Mafaufau ki te mea ne tupu. I te lotou okoatuga ki te fatoaga o Ketesemane, ko leva ‵ki te po, kāti ko seke mo te valuapo. Ne fakamolemole atu a Iesu ki ana soko “ke matapula‵pula” kae ne fano a ia o ‵talo. (Mata. 26:37-39) Kae i te taimi koi ‵talo ei a ia, ne ‵to a ‵moe o ana soko. I te taimi ne maua atu ei ne ia e ‵moe, ne toe fakamalosi atu a Iesu “ke tumau i te matapula‵pula kae ‵talo faeloa.” (Faitau te Mataio 26:40, 41.) Ne iloa ne ia me ne mafatia malosi latou kae ko fi‵ta. Ne faipati atu a Iesu mo te atafai me “ko vāivāi te  foitino.” Kae ne fano fakalua a Iesu o ‵talo, kae i tena fokimaiga, ne toe maua ne ia ana soko e ‵to olotou ‵moe kae se ‵talo.—Mata. 26:42-45.

12. Ne a mea e mafai o fai ne tatou māfai ko to mafatia io me to fi‵ta ma ‵talo?

¹² Filifili te taimi tonu. I nisi taimi, kāti ko to mafatia io me ko to fi‵ta tatou ke ‵talo. Kafai ne tupu te mea tenā ki a koe, ke masaua me ne tupu foki ki nisi tino. Ne a au mea e mafai o fai? Ne iloa aka ne tino kolā e masani o ‵talo ki a Ieova i te fakaotiga o te aso me e ‵lei atu ke ‵talo kae koi tai afiafi. Ko te taimi telā e seki fi‵ta malosi ei latou. Kae ne iloa aka ne nisi tino me i te auala e tu, e sagasaga, io me e totuli ei koe, e aoga foki ki te faiga o ‵talo. Kae e a māfai ko to lasi te manavase io me ko to loto vaivāi ke ‵talo? Fai atu ki a Ieova ou lagonaga. E mautinoa eiloa me ka malamalama a te ‵tou Tamana alofa fakamagalo.—Sala. 139:4.

13. Ka fakalavelave mai pefea a tivaisi ki ‵tou taimi mo Ieova?

¹³ ‵Kalo keatea mai mea e mafai o fakalavelave atu i taimi e fai au sukesukega. A ‵talo e se ko te auala e tasi fua ke fakamalosi i ei ‵tou va fakataugasoa mo Ieova. A te sukesuke ki te Muna a te Atua mo te kau atu ki fakatasiga a te fakapotopotoga, e mafai foki o fesoasoani mai ke fakapilipili atu koe ki te Atua. E mata, e isi ne mea e mafai o fai ne koe ke fakaaoga faka‵lei a taimi e fai ei sukesukega mo taimi e kau atu ki fakatasiga a te fakapotopotoga? Fesili ifo, ‘Ne a mea e mafai o fakalavelave mai i taimi o fakatasiga io me ko taimi o aku sukesukega?’ E mata, ko telefoni, meli, io me ko fekau aveave i selefoni io me ko nisi tivaisi? E maua ne te fia piliona o tino i aso nei a mea faigaluega aoga penā. E fai mai a tino fai sukesukega me kafai e taumafai malosi tatou o ‵saga tonu ki se mea, kae e isi se selefoni i ‵tou tafa ka fakalavelave mai eiloa ki a tatou. “Ka se saga tonu atu koe ki tau mea e fai,” ne fai mai se polofesa. “A tou mafaufau e tuku i se koga fakaa‵tea.” A koi tuai o kamata a tamā fono mo fono ‵lasi, e mafai o faka‵pula mai ke tamate ‵tou tivaisi ko te mea ke mo a ma fakalavelave atu ki nisi tino. E mata, e mafai foki o fai tatou penā māfai ko ‵nofo tokotasi ke mo a ma fakalavelave mai ki a tatou a ‵tou tivaisi mo ‵tou taimi mo Ieova?

14. E ‵tusa mo te Filipi 4:6, 7, ka fesoasoani mai pefea a Ieova ke ‵saga tonu atu tatou?

 ¹⁴ Fakamolemole ki a Ieova ke fesoasoani mai ke saga tonu atu koe. Kafai ko iloa ne koe me e se mafai o saga tonu atu koe, i te taimi e fai ei au sukesukega io me se fakatasiga a te fakapotopotoga, akai ki a Ieova ke fesoasoani atu. Kafai e manavase koe, ka faigata ke saga tonu atu koe ki mea faka-te-agaga, kae e tāua eiloa ke fai penā. ‵Talo ke maua te filemu telā ka puipui ei tou loto kae penā foki te malosi o tou “mafaufau.”—Faitau te Filipi 4:6, 7.

15. Se a te mea aoga e tasi e maua māfai e fakamāumāu ou taimi mo Ieova?

¹⁵ Kafai e fakaaoga ne koe a taimi ke faipati atu, fakalogologo, kae mafaufau e uiga ki a Ieova, ka maua ne koe a mea aoga e uke. E pefea la? A te mea muamua, ka fai ne koe a fakaikuga ‵lei. E fakamautinoa mai i te Tusi Tapu me i “te tino e sa‵sale fakatasi mo tino ‵poto ka poto.” (Faata. 13:20) Tela la, kafai e fakamāumāu ne koe a taimi mo Ieova, te ‵toe Tino poto, ka poto foki koe. Ka malamalama faka‵lei koe i te auala ke fakafiafia atu ki a ia, kae ‵kalo keatea mai te faiga o filifiliga kolā ka fakalogo‵mae atu ki a ia.

16. E fesoasoani mai pefea a te fakamāumāu taimi mo Ieova ke momea aka te ‵lei o te ‵tou akoako atu?

¹⁶ A te lua, ka momea aka tou ‵lei e pelā me se faiakoga. Kafai e suke‵suke tatou ki te Tusi Tapu mo se tino, a te fakamoemoega e tasi o tatou, ko te fesoasoani atu ki te tino akoga ke fakapilipili ki a Ieova. Ko te uke o taimi e fesokotaki tatou ki te ‵tou Tamana faka-te-lagi, ka gasolo aka foki o lasi te ‵tou a‵lofa ki a ia kae toka o akoako atu a ‵tou tino akoga ke alofa foki ki a ia. Tenā loa te mea ne fai ne Iesu. Ne fakamatala mai ne ia a mea e uiga ki tena Tamana i se auala alofa mo tugapati a‵lofa kolā ne fai ei ke a‵lofa foki ana soko fakamaoni ki a Ieova.—Ioa. 17:25, 26.

17. Kaia e aoga ei a ‵talo mo sukesukega ki te fakamalosi aka o te ‵tou fakatuanaki?

¹⁷ A te tolu, ka gasolo o malosi atu tou fakatuanaki. Mafaufau ki te mea e mafai o tupu māfai e fakamolemole atu koe ki te Atua ke takitaki, fakamafanafana, io me fesoasoani mai ki a koe. I taimi katoa e tali mai ne Ieova a ‵talo konā, e gasolo aka faeloa o malosi tou fakatuanaki ki a ia. (1 Ioa. 5:15) Se a foki te suā mea e fesoasoani mai ke fakamalosi aka ei ‵tou fakatuanaki? Sukesukega totino. Masaua la, me “e maua te fakatuanaki mai i mea kolā e lagona.” (Loma 10:17) Kae ke ati aka se fakatuanakai malosi, e uke atu a mea e manakogina i lō te tauloto fua ki mea e uke. Ne a nisi mea e ‵tau o fai ne tatou?

18. Fakamatala mai a te pogai e ‵tau ei mo tatou o mafaufau ‵loto.

 ¹⁸ E ‵tau o mafaufau ‵loto tatou ki ‵tou mea ne tauloto. Mafaufau ki te mea ne tupu ki te tino ne tusi ne ia te Salamo e 77. Ne loto mafatia a ia me ne mafaufau me ko se talia ne Ieova a ia mo te kau Isalaelu. Ne fai ne mafaufauga manava‵se konā ke se mafai o moe a ia i po. (Fuaiupu 2-8) Ne a ana mea ne fai? Ne fai atu a ia ki a Ieova: “Kae ka mafaufau ‵loto au ki au faifaiga katoa kae mafaufau ‵loto ki au mea ne fai.” (Fuaiupu 12) E tonu, ne iloa ‵lei ne te faisalamo a mea ne fai ne Ieova ki ana tino i aso mua, kae ne mafaufau a te tagata manavase tenā penei: “E a, ko puli i te Atua o fakaasi mai me ko talia ne ia tatou, io me ko fai ne tena kaitaua ke seai sena alofa fakamagalo?” (Fuaiupu 9) Ne mafaufau ‵loto a te faisalamo ki faifaiga a Ieova, te alofa fakamagalo mo te alofa atafai ne fakaasi atu ne Ieova i aso mua. (Fuaiupu 11) Ne a mea ne iku mai i ei? Ne talitonu te faisalamo me e se mafai o tuku tiaki ne Ieova Ana tino. (Fuaiupu 15) I se auala tai ‵pau, ka gasolo aka foki o malosi tou fakatuanaki i te taimi e mafaufau ‵loto ei koe ki mea ko oti ne fai ne Ieova mō ana tino, mo mea ko oti ne fai ne ia mō koe.

19. Ne a nisi mea aoga ka maua ne tatou mai te fakamāumāu o taimi mo Ieova?

¹⁹ A te fa, telā ko te ‵toe mea tāua, ka malosi atu tou alofa ki a Ieova. A te alofa telā e sili atu i nisi uiga aka, ka fakamalosi ne ia koe ke fakalogo ki a Ieova, ke talia a mea faiga‵ta ko te mea ke fakafiafia atu ki a ia, kae ke kufaki i tofotofoga. (Mata. 22:37-39; 1 Koli. 13:4, 7; 1 Ioa. 5:3) E seai se isi mea e sili atu tena tāua i lō te mauaga o se va fakataugasoa pili kae alofa mo Ieova!—Sala. 63:1-8.

20. E fakamautinoa pefea ne koe me e isi sou taimi mo Ieova?

²⁰ Ke masaua me i ‵talo, te faiga o sukesukega, mo te mafaufau ‵loto ne vaega o te ‵tou tapuakiga. E pelā mo Iesu, onoono ki koga sē logoa ke fakamāumāu a taimi mō Ieova. ‵Kalo keatea mai i mea kolā e mafai o fakalavelave mai. Fakamolemole atu ki a Ieova ke fesoasoani mai ke saga tonu atu koe māfai ko aofia koe i polokalame faka-te-agaga. Kafai e fakaaoga ne koe ou taimi ki toe mea aoga i te taimi nei, ka taui koe ne Ieova ki te ola se-gata-mai i te lalolagi fou a te Atua.—Male. 4:24.