1-2. (a) Ko te taimi fea e masaua sāle ei ne tatou se tino pele telā ko oti ne mate atu? (e) Se a te mea ne kamata ne Iesu i te po mai mua o mate?

 FAITALIA me ko leva ne ‵galo atu a ‵tou tino pele i te mate, koi masaua eiloa ne tatou a latou. E masani o masaua ne tatou a mea ‵gali e uiga ki a latou i te aso ne ‵mate ei latou.

² I tausaga takitasi, e aofia tatou i te fia miliona o tino i te lalolagi kātoa kolā e maopoopo o fakamanatu a te mate o se tino telā e pele ki a tatou—ko Iesu Keliso. (1 Pe. 1:8) E maopoopo fakatasi tatou ke mafau‵fau ki te tino telā ne tuku atu tena ola e pelā me se togiola ke faka‵sao tatou mai te agasala mo te mate. (Mata. 20:28) A te ‵tonuga loa, ne manako a Iesu ke masaua ne ana soko a tena mate. I te po mai mua o mate, ne kamata ne ia se ‵kaiga fakapito kae fakatonu atu: “Ke fai faeloa te mea tenei mo fai se fakamasauaga ki a au.” *—Luka 22:19.

3. Ne a mea ka sau‵tala tatou ki ei i te mataupu tenei?

³ A nai tino fua mai i tino kolā e ‵kau ki te Fakamanatuga o te mate o Keliso e maua ne latou te fakamoemoega ke ola i te lagi. Kae e ‵kau atu foki a te fia miliona o tino kolā e fakamoe‵moe ke ola i te lalolagi. I te mataupu tenei, ka mafau‵fau tatou ki pogai e olioli ei a te avā potukau konei ke ‵kau atu ki te Fakamanatuga i tausaga takitasi. Ka suke‵suke foki tatou ki mea aoga ka maua mai te ‵kau atu ki ei. Ke kamata tatou mai te mafau‵fau ki nisi pogai e ‵kau atu ei a te kau fakaekegina.

4. Kaia e ‵kai kae inu i ei a te kau fakaekegina ki te falaoa mo te uaina i te Fakamanatuga?

⁴ I tausaga takitasi, e olioli a te kau fakaekegina ki te Fakamanatuga e pelā me ne tino e ‵kai kae inu ki te falaoa mo te uaina. Kaia e ‵tau ei o ‵kai kae inu latou ki te falaoa mo te uaina? Ke maua te tali, mafaufau ki mea ne ‵tupu i te ‵toe po o Iesu i tena olaga i te lalolagi. Mai tua o te ‵kaiga o te Paseka, ne kamata ne Iesu a te mea telā ne lauiloa fakamuli e pelā me ko te ‵Kaiga a te Aliki i te Afiafi. Ne fakasoa atu ne ia te falaoa mo te uaina ki ana apositolo fakamaoni e toko 11, kae fai atu ki a latou ke ‵kai kae inu ki ei. Ne faipati a Iesu ki a latou e uiga ki feagaiga e lua—te feagaiga fou mo te feagaiga o te Malo. * (Luka 22:19, 20, 28-30) Ne ‵tala mai ne feagaiga konei a te auala mō te kau apositolo mo se aofaki foliki o nisi tino ke fai pelā me ne tupu mo faitaulaga i te lagi. (Faka. 5:10; 14:1) Ko te ‵toega fakaekegina fua, * kolā e aofia i feagaiga e lua konei, e mafai o ‵kai kae inu ki te falaoa mo te uaina i te Fakamanatuga.

5. Ne a mea e iloa ne te kau fakaekegina e uiga ki te fakamoemoega ne tuku atu ki a latou?

⁵ Tenei te suā pogai e olioli ei a te kau fakaekegina ke ‵kau atu ki te Fakamanatuga: E maua ne latou i te fakatasiga tenei a te avanoaga ke mafau‵fau ‵loto ki te lotou fakamoemoega. Ne tuku atu ne Ieova ki a latou se fakamoemoega fakaofoofogia—ke maua ne latou a te ola telā e se mafai o toe tamate i te lagi, ke tavini fakatasi mo Iesu Keliso telā ko oti ne fakamaluga aka mo te ‵toega o te toko 144,000 kae sili atu i ei, ko te ‵tu atu o latou i mua eiloa o Ieova te Atua! (1 Koli. 15:51-53; 1 Ioa. 3:2) E iloa ne te kau fakaekegina me ko oti ne ‵kami latou ke maua a tauliaga penā i te lagi. Kae ke talia latou ki te lagi, e ‵tau mo latou o tumau i te fakamaoni ke oko ki te lotou ‵mate. (2 Timo. 4:7, 8) E maua ne te kau fakaekegina a te fiafia lasi māfai ko mafau‵fau ki te lotou fakamoemoega i te lagi. (Tito 2:13) Kae pefea la a “nisi mamoe”? (Ioa. 10:16) Ne a nisi pogai e ‵kau atu ei latou ki te Fakamanatuga?

6. Kaia e ‵kau atu ei a nisi mamoe ki te Fakamanatuga i tausaga katoa?

⁶ E ‵kau atu a nisi mamoe ki te Fakamanatuga, e pelā me ne tino maimoa kae e se ‵kai kae inu ki te falaoa mo te uaina. I te 1938, ne ‵kami fakapito i ei a tino kolā e fakamoe‵moe ke ola i te lalolagi mō te taimi muamua ke ‵kau ki te Fakamanatuga. Ne fai mai The Watchtower i a Mati 1, 1938: “Se mea tonu kae fetaui ‵lei eiloa ke aofia a [nisi mamoe] i te fakatasiga tenei kae onoono atu ki mea e fai i ei. . . . E ‵tau foki o fai te aso tenā mo fai se taimi fakafiafia ki a latou.” E pelā loa mo te fia‵fia o tino ‵kami ke ‵kau atu kae maimoa ki se fakaipoipoga, e fia‵fia foki a nisi mamoe ke ‵kau atu ki te Fakamanatuga e pelā me ne tino maimoa.

7. Kaia e olioli ei a nisi mamoe ki te lāuga o te Fakamanatuga?

⁷ E mafaufau ‵loto foki a nisi mamoe ki te lotou fakamoemoega. E olioli latou ki te lāuga o te Fakamanatuga, me e fakaasi mai i ei a mea ka fai ne Keliso mo ana tupu lagolago e toko 144,000 mō tino fakamaoni i te Pulega i te Afe Tausaga. Mai lalo i te takitakiga a te lotou Tupu ko Iesu Keliso, a pule faka-te-lagi konā ka fesoasoani atu ki te ‵fuliga o te  lalolagi ki se palataiso kae ke maua ne tino faka‵logo a te tulaga ‵lei katoatoa. Ko oko eiloa i te fakafiafia ki te fia miliona o tino maimoa ki te Fakamanatuga ke fakaataata i olotou mafaufau a te fakataunuga o valoaga i aso mai mua e pelā mo mea e maua i te Isaia 35:5, 6; 65:21-23; mo te Fakaasiga 21:3, 4. Kafai e fakaataata ne latou a latou eiloa mo olotou tino pele i te lalolagi fou, ka fakamalosi aka ei te lotou fakamoemoega mō aso mai mua, mo te lotou fakaikuga ke mo a eiloa ma taofi aka te lotou tavini atu ki a Ieova.—Mata. 24:13; Kala. 6:9.

8. Se a te pogai e ‵kau atu ei a nisi mamoe ki te Fakamanatuga?

⁸ Mafaufau ki te suā pogai e ‵kau atu ei a nisi mamoe ki te Fakamanatuga. E ma‵nako latou ke fakaasi atu te lotou a‵lofa mo te lotou ‵lago atu ki te kau fakaekegina. Ne ‵valo mai i te Muna a te Atua me ka isi se fesokotakiga ‵pili i te va o te kau fakaekegina mo latou kolā e fakamoe‵moe ke ola i te lalolagi. E pefea la? Ke mafau‵fau tatou ki nisi fakaakoakoga.

9. Se a te mea e fakaasi mai i te valoaga i te Sakalia 8:23 e uiga ki lagonaga o nisi mamoe ki te kau fakaekegina?

⁹ Faitau te Sakalia 8:23. E fakaata mai i se auala gali i te valoaga tenei a lagonaga o nisi mamoe e uiga ki olotou taina mo tuagane fakaekegina. A tugapati “te tino Iutaia” mo “koutou” e fakasino ki se potukau e tasi—ko te ‵toega fakaekegina. (Loma 2:28, 29) A te “tokosefulu tāgata mai i ‵gana katoa o atufenua” e fakaata mai i ei a nisi mamoe. “Ka puke ‵mautakitaki”—‵piki ‵mau latou—ki te kau fakaekegina kae ‵kau atu ki a latou i te tapuakiga ‵ma. Tela la, i te po o te Fakamanatuga, e fakaasi atu ne nisi mamoe a te lotou va ‵pili mo te lotou fesokotakiga ‵pili mo te kau fakaekegina mai te ‵kau fakatasi mo latou.

10. Ne a mea ne fai ne Ieova i te fakataunuga o te valoaga i te Esekielu 37:15-19, 24, 25?

¹⁰ Faitau te Esekielu 37:15-19, 24, 25. I te fakataunuga o te valoaga tenei, ne tuku fakatasi ne Ieova a te kau fakaekegina mo nisi mamoe ke aofia i se fesokotakiga ‵mautakitaki. E taku mai i te valoaga a lakau e lua. A latou kolā e fakamoe‵moe ki te lagi, e fai pelā mo te lakau “mō Iuta” (ko matakāiga ne filifili mai i ei a tupu o Isalaelu), kae ko latou kolā e fakamoe‵moe ki te lalolagi e fai pelā mo te lakau “a Efalaima.” * Ko tuku fakatasi ei ne Ieova a potukau e lua konei ke fai mo fai “se lakau e tasi.” E fakauiga te mea tenei ki te lotou tavini fakatasi atu mai lalo i te lotou Tupu, ko Keliso Iesu. I tausaga takitasi e ‵kau atu a te kau fakaekegina mo nisi mamoe ki te Fakamanatuga e pelā me se “lafu mamoe e tasi” mai lalo i te “tausi mamoe e tokotasi,” kae e se pelā me ne potukau e lua—Ioa. 10:16.

11. Se a te ‵toe auala tāua e ‵lago atu ei ki taina o Keliso a “nisi mamoe” kolā e taku mai i te Mataio 25:31-36, 40?

¹¹ Faitau te Mataio 25:31-36, 40. “A mamoe” i te tala fakatusa tenei e fakaata mai i ei a tino amio‵tonu i te taimi o te gataga kolā e fakamoe‵moe ke ola i te lalolagi—ko nisi mamoe. E ‵lago atu latou mo te fakamaoni i te ‵toe auala tāua ki te ‵toega o taina fakaekegina o Keliso, mai te fesoasoani atu ki a latou ke fakataunu se tiute lasi ‵ki—te galuega ko te talai atu mo te faiga o soko.—Mata. 24:14; 28:19, 20.

12-13. Ne a nisi auala e ‵lago atu ei a nisi mamoe ki taina o Keliso?

¹² I tausaga takitasi, i vaiaso mai mua o te Fakamanatuga, e ‵lago atu a nisi mamoe ki taina o Keliso, mai te ‵kau katoatoa atu ki te galuega talai i te lalolagi kātoa ke ‵kami mai a  tino fia‵fia ki te Fakamanatuga. (Onoono ki te pokisi “ E Mata, ko Oti ne Fai Au Fakatokaga mō Masina o te Fakamanatuga?”) E fesoasoani atu foki latou o fai a fakatokaga e manakogina ko te mea ke mafai o fai te Fakamanatuga i fakapotopotoga i te lalolagi kātoa, faitalia me e seai ne tino i te ukega o fakapotopotoga e ‵kai kae inu i te falaoa mo te uaina. E fia‵fia malosi a nisi mamoe o ‵lago atu ki taina o Keliso i auala penei. E iloa ne mamoe konei me e kilo atu a Iesu ki mea e fai ne latou ki taina fakaekegina e pelā me e fai atu eiloa ki a ia.—Mata. 25:37-40.

¹³ Ne a nisi pogai e ‵kau atu ei a tatou katoa ki te Fakamanatuga faitalia ‵tou fakamoemoega?

14. Ne fakaasi mai pefea ne Ieova mo Iesu a te lasi o te a‵lofa o lāua ki a tatou?

¹⁴ E loto fakafetai tatou ki te alofa ne fakaasi mai ne Ieova mo Iesu ki a tatou. Ne fakaasi mai ne Ieova tena alofa mō tatou i auala e uke, kae e tasi eiloa te auala e sili atu i auala katoa konei. A te ‵toe auala sili ne fakaasi mai ne te ‵tou Atua tena alofa kaimalie ki a tatou, ko te ugamaiga o tena Tama pele ke logo‵mae kae ke mate mō tatou. (Ioa. 3:16) E iloa foki ne tatou a te lasi o te alofa ne fakaasi mai ne Iesu e auala i tena loto fiafia o tuku mai tena ola mō tatou. (Ioa. 15:13) E seai se mea e mafai o ‵togi ne tatou ki ei a te alofa ne fakaasi mai ne Ieova mo Iesu mō tatou. Kae e mafai o fakaasi atu ne tatou a te ‵tou loto fakafetai e auala i ‵tou olaga i aso takitasi. (Kolose 3:15) Tela la, e ‵kau atu tatou ki te Fakamanatuga ke mafau‵fau ki te a‵lofa o lāua mō tatou kae ke fakaasi atu foki te ‵tou a‵lofa ki a lāua.

15. Kaia e fakatāua malosi ei ne te kau fakaekegina mo nisi mamoe a te meaalofa ko te togiola?

¹⁵ E fakatāua malosi ne tatou te meaalofa ko te togiola. (Mata. 20:28) E tāua ‵ki a te togiola ki te kau fakaekegina me ko te auala e fakataunu ei te lotou fakamoemoega gali. Ona ko te lotou fakatuanaki ki te taulaga a Keliso, ne taku ne Ieova a latou me e amio‵tonu kae ko oti ne puke ne ia latou mo fai ana tama‵liki. (Loma 5:1; 8:15-17, 23) E loto fakafetai foki a nisi mamoe ki te togiola. Ona ko te lotou fakatuanaki ki te toto maligi o Keliso, ko maua ne latou se tulaga ‵ma i mua o te Atua, ko mafai o avatu ne latou ki a ia te taviniga tapu, kae maua te fakamoemoega ke “‵sao i te fakalavelave lasi.” (Faka. 7:13-15) A te auala e tasi e fakaasi atu ei ne te kau fakaekegina mo nisi mamoe a te lotou loto fakafetai ki te togiola ko te ‵kau atu ki te Fakamanatuga i tausaga takitasi.

16. Se a te suā pogai e ‵kau atu ei tatou ki te Fakamanatuga?

¹⁶ A te suā pogai e ‵kau atu tatou ki te Fakamanatuga me e ma‵nako tatou o faka‵logo ki a Iesu. Faitalia me se a ‵tou fakamoemoega mō aso mai mua, e ma‵nako eiloa tatou katoa o faka‵logo ki te fakatonuga ne tuku mai ne Iesu i te po ne kamata ei ne ia te Fakamanatuga: “Ke fai faeloa te mea tenei mo fai se fakamasauaga ki a au.”—1 Koli. 11:23, 24.

17. E fesoasoani mai pefea te Fakamanatuga ke fakapili‵pili malosi atu tatou ki a Ieova?

¹⁷ E fakapili‵pili malosi atu ei tatou ki a Ieova. (Iako. 4:8) E pelā mo mea ne tauloto tatou ki ei, a te Fakamanatuga se avanoaga ke mafaufau ‵loto tatou e uiga ki te fakamoemoega ne tuku mai ne Ieova, mo te lasi o te alofa ne fakaasi mai ne ia ki a tatou. (Iele. 29:11; 1 Ioa. 4:8-10) Kafai e mafaufau ‵loto ki te ‵tou fakamoemoega mautinoa mō aso mai mua mo te alofa o te Atua telā e se mafai  o gata mō tatou, ka faka‵poko aka ei ‵tou a‵lofa ki a Ieova kae fakamalosi foki ‵tou va fakataugasoa mo ia.—Loma 8:38, 39.

18. Se a te mea e fakamalosi mai ke fai ne tatou māfai e mafaufau ‵loto ki te fakaakoakoga a Iesu?

¹⁸ E fakamalosi ei tatou ke fakaakoako ki a Iesu. (1 Pe. 2:21) I aso mai mua o te Fakamanatuga, e ‵saga tonu atu tatou ki tala i te Tusi Tapu e uiga ki te ‵toe vaiaso o Iesu i te lalolagi, tena mate, mo tena toetuga. Kae i te afiafi po o te Fakamanatuga, e fakamasaua mai i te lāuga a te alofa o Iesu mō tatou. (Efe. 5:2; 1 Ioa. 3:16) Kafai e fai‵tau kae mafaufau ‵loto tatou ki te alofa sē fakapito o Iesu, e fakamalosi mai ki a tatou ke sa‵sale “faeloa e pelā mo ia.”—1 Ioa. 2:6.

19. E mafai pefea o tumau tatou i te alofa o te Atua?

¹⁹ Ka momea aka te ‵tou ma‵nako malosi ke tumau i te alofa o te Atua. (Iuta 20, 21) E tumau tatou i te alofa o te Atua mai te faiga o ‵toe mea e mafai ke faka‵logo ki a ia, faka‵maluga o tena igoa, kae fai ke fiafia tena loto. (Faata. 27:11; Mata. 6:9; 1 Ioa. 5:3) E fakamalosi aka ne te ‵tou ‵kau atu ki te Fakamanatuga, ke ola tatou i aso takitasi i te auala telā e fai atu ei tatou ki a Ieova, ‘Au e manako ke tumau i tou alofa ki te se-gata-mai!’

20. Ne a pogai ‵lei e maua ne tatou ke ‵kau ki te Fakamanatuga?

²⁰ Faitalia me e fakamoe‵moe tatou ke ola ki te se-gata-mai i te lagi io me ko te lalolagi, e maua ne tatou a pogai ‵lei ke ‵kau atu ki te Fakamanatuga. I tausaga katoa, kafai ko maopoopo fakatasi tatou i te po masina tenā, e mafau‵fau tatou ki te mate o se tino telā e a‵lofa tatou ki ei, ko Iesu Keliso. Kae e sili atu i ei, e masaua ne tatou a te ‵toe fakaasiga sili o te alofa—ko te alofa ne fakaasi mai ne Ieova i te tukumaiga o tena Tama e pelā me se togiola. I te tausaga nei, ka fai a te Fakamanatuga i te fakaafiafi o te Aso Lima, Apelila 15, 2022. E a‵lofa tatou ki a Ieova mo tena Tama, tela la, i te taimi e fakamanatu ei te mate o Iesu i te tausaga tenei, e seai se isi mea telā e sili atu tena tāua i lō te ‵tou ‵kau atu ki te Fakamanatuga.