I TAUSAGA takitasi e tokouke a mamoe pele e toe ‵foki mai ki te fakapotopotoga Kelisiano. Mafaufau la ki te “lasi o te fiafia e maua i te lagi” māfai ko ‵foki mai a tino taki tokotasi! (Luka 15:7, 10) Kafai koe ko toe foki mai, e mafai o mautinoa i a koe me i a Iesu, te kau agelu, mo Ieova, ko fia‵fia malosi ke ‵kilo atu me ko toe puke ‵mau koe ki te munatonu. Kae i te taimi e toe ati aka ei tou va fakataugasoa mo Ieova, e mafai o fepaki koe mo tulaga faiga‵ta. Ne a nisi mea konā, kae ne a mea e mafai o fesoasoani atu ki a koe?

E maua ne tino e tokouke a lagonaga sē ‵lei māfai ko toe ‵foki mai ki te fakapotopotoga. Kāti e malamalama koe i lagonaga o te Tupu ko Tavita. Ke oko foki loa ki te taimi ko oti ne fakamagalo ana agasala, ne fai mai a ia: “Aku mea ‵se ko fai ei au ke manavase malosi.” (Sala. 40:12; 65:3) Kafai e toe foki mai se tino ki a Ieova, e mafai o nofo a ia mo lagonaga sē ‵lei kae ma mō se fia tausaga. A Isabelle, ne fakatea i tausaga e silia atu i te 20. * Ne fai mai a ia, “Ne faigata ke talia ne au te manatu me ne mafai ne Ieova o fakamagalo au.” Kafai e loto vāivāi koe, e mafai foki o toe vāivāi koe i te feitu faka-te-agaga. (Faata. 24:10) Taumafai ke mo a ma tupu te mea tenā ki a koe.

E manava‵se a nisi tino i mea kolā e aofia i te ‵toe atiakaga o te lotou va fakataugasoa mo Ieova. I te otiga ne foki mai, ne fai mai a Antoine: “Ne mafaufau au me ko puli i a au toku olaga mua e pelā me se Kelisiano.” Ona ko vaegā lagonaga penā, e fakatalave a nisi tino ke aofia malosi i galuega faka-te-agaga.

Ke fai se fakatusaga, kāti e manavase malosi se tino telā ne maofa tena fale i se matagi malosi, māfai e mafaufau ki te taimi mo taumafaiga e manakogina ke toe faite aka tena fale. I se auala tai ‵pau, kafai ko oti ne fakamasei tou va fakataugasoa mo Ieova i se agasala matagā, e mafai o mafaufau koe  me i te ‵toe atiakaga o tou feitu faka-te-agaga, e manakogina i ei a taumafaiga e uke. Kae e isi eiloa se fesoasoani e mafai o maua ne koe.

E ‵kami ne Ieova a tatou: “Nei la, o‵mai ke faka‵tonu aka ne tatou a mea ke ‵tonu i te va o tatou.” (Isa. 1:18) Ko oti eiloa ne galue malosi koe “ke faka‵tonu aka ne [koe] a mea.” E alofa a Ieova ki a koe ona ko au taumafaiga konā. Mafaufau la: Ko oti ne tuku ne koe ki a Ieova se mea ke mafai o tuku atu ne ia se tali ki ‵losiga a Satani!—Faata. 27:11.

Mai te faiga o te mea tenei, ko oti eiloa ne fakapilipili atu koe ki a Ieova, kae ne tauto mai a ia me ka fakapilipili atu foki a ia. (Iako. 4:8) Kae e uke a mea e ‵tau o fai i lō te iloa atu fua ne nisi tino me ko toe fai koe mo vaega o te fakapotopotoga. E ‵tau o tumau koe i te fakamalosi aka o tou alofa ki tou Tamana mo tou Taugasoa, ko Ieova. E fai pefea ne koe te mea tenei?

Taumafai o fakatoka a fakamoemoega kolā e mafai o fai. Masaua la me i te fakavae o tou feitu faka-te-agaga—ko mea e iloa ne koe e uiga ki a Ieova mo ana fuafuaga mō aso mai mua—kāti koi masaua eiloa ne koe. Kae nei, ko ‵tau o toe kamata se polokalame tumau o mea faka-te-agaga, kae e aofia i ei a te talai atu o te tala ‵lei mo te ‵kau fakatasi faeloa mo taina mo tuagane. Mafaufau ki fakamoemoega konei.

Faipati atu faeloa ki a Ieova. E malamalama tou Tamana me i te mauaga faeloa o se loto lagona sē ‵lei e mafai o fai ei ke faigata ki a koe ke ‵talo atu ki a ia. (Loma 8:26) E tiga eiloa te feitu tenā, “tumau faeloa i te ‵talo,” kae fai atu ki a Ieova me e manako malosi koe o fai taugasoa mo ia. (Loma 12:12) Ne fai mai a Andrej: “Ne masei ‵ki toku loto lagona kae ma foki au. Kae i te otiga o ‵talo takitasi, ne gasolo o ‵galo atu a lagonaga konā. Ne sili atu te filemu o toku mafaufau.” Kafai e se iloa ne koe a mea ke ‵talo ki ei, mafaufau ki ‵talo a te Tupu ko Tavita kolā e maua i te Salamo 51 mo te 65.

Sukesuke faeloa ki te Tusi Tapu. Ka fesoasoani atu ki a koe i te feitu faka-te-agaga kae e gasolo aka foki i ei o malosi tou alofa ki a Ieova. (Sala. 19:7-11) “Ne gasolo ifo au o vāivāi ona ko te seai o saku polokalame faka-te-agaga tumau, kae ne fakafanoanoa ei ne au a Ieova,” ko pati a Felipe. “Ne seki toe manako au o fai te mea ‵se tenā, telā ne fakaiku aka ne au ke fai faeloa a sukesukega totino mo fai toku puipuiga.” E mafai foki o fai koe penā. Kafai e manako koe ki se fesoasoani ke iloa aka a mataupu ‵lei ke fai ki ei au sukesukega totino, kaia e se fesili atu ei koe ki se taugasoa matua faka-te-agaga mō se fesoasoani?

Ke toe ati aka tou va fakataugasoa mo ou taina mo tuagane. E manava‵se a nisi tino kolā e toe ‵foki mai ki te fakapotopotoga, i te mea ma se ‵lei te kilokiloga a nisi tino ki a latou. Ne fai ‵tonu mai a Larissa: “Ne ma ‵ki eiloa au. Ne mafaufau au me ne fakalogo‵mae ne au a te fakapotopotoga. Ne nofo au mo lagonaga konei mō se taimi leva ‵ki.” Ke masaua me e loto fia‵fia a toeaina mo nisi tino ma‵tua faka-te-agaga o fesoasoani atu ki a koe ke toe ati aka tou feitu faka-te-agaga. (Onoono ki te pokisi “ Ne a Mea e Mafai ne Toeaina o Fai?”) E fia‵fia latou me ko foki mai koe kae e ma‵nako latou ke fiafia koe!—Faata. 17:17.

Ne a mea e mafai o fai ei ke pili malosi koe ki te fakapotopotoga? Kau katoatoa atu ki mea e fai ne taina mo tuagane—mai te kau atu faeloa ki fakatasiga mo te galuega talai. Ka aoga pefea te mea tenei? Ne fai mai a Felix: “Ne olioli te fakapotopotoga ke toe foki mai au. Ne maua ne au se lagonaga tāua. Ne fesoasoani malosi mai latou ke toe fai au mo vaega o se kāiga, ke maua ne au se lagona me ko oti ne fakamagalogina au kae tumau i te kausaki atu ki mua.”—Onoono ki te pokisi “ Ne a Au Mea e Mafai o Fai?”

Ka tumau eiloa a Satani o fai ne ia ke uke a “matagi ma‵losi” i ana taumafaiga ke fakavāivāi koe i te taimi e toe ati aka ei tou va fakataugasoa mo Ieova. (Luka 4:13) Ke toka koe o fakamalosi aka tou fale i te feitu faka-te-agaga.

Ne tauto mai a Ieova e uiga ki ana mamoe: “Ka ‵sala ne au a ia telā e galo, ko ia telā ne takasēsē kea‵tea ka fakafoki mai ne au, ka fusi ne au a pa‵kiaga o te tino pakia, ka fakamalosi ne au a ia telā ko vāivāi.” (Eseki. 34:16) Ko oti ne fesoasoani a Ieova ki tino e tokouke ke toe ati aka te lotou va fakataugasoa mo ia. Masaua la me e manako a ia o fesoasoani atu ke ati aka faeloa ne koe te malosi o tou fesokotakiga mo ia.