1. Kaia ko ‵numi i ei a tino e tokouke?

KĀTI e lau i se sefulu afe o lotu kolā e fai mai i a latou ne Kelisiano kae mafau‵fau me e tapuaki ‵tonu atu latou ki te Atua. E se tioa loa o ‵numi a tino e tokouke! E fesili mai latou, “E mata, e tasi loa te lotu tonu io me e fakafiafia atu a lotu katoa ki te Atua?” E mata, e tali‵tonu katoatoa tatou i ‵tou mafaufau me i mea e akoako atu ne tatou ko te munatonu, kae e fai eiloa ne Molimau a Ieova i aso nei a te tapuakiga tonu telā e talia ne Ieova? E mata, e mafai eiloa o maua te loto talitonu tenā? Ke mafau‵fau tatou ki fakamaoniga.

2. E ‵tusa mo te 1 Tesalonia 1:5, kaia ne talitonu ei a te apositolo ko Paulo ki te munatonu?

² Ne talitonu katoatoa a te apositolo ko Paulo ki te munatonu. (Faitau te 1 Tesalonia 1:5.) Ne seki fakavae a te loto talitonu tenā ki lagonaga. A Paulo se tino telā ne sukesuke malosi ki te Muna a te Atua. Ne talitonu a ia me i “Tusitusiga Tapu katoa ne māfua mai i te Atua.” (2 Timo. 3:16) Ne a mea ne maua ne ia i ana sukesukega? Ne maua ne Paulo i te Tusi Tapu, a fakamaoniga mautinoa me i a Iesu ko te Mesia telā ne folafola mai—ko fakamaoniga kolā ne fakaseaoga ne takitaki lotu Iutaia. E fai mai a tino ‵lotu ‵loi konā me e sui ne latou te Atua kae fakafiti ne latou a ia e auala i olotou faifaiga. (Tito 1:16) E ‵kese mo latou, ne seki filifili ne Paulo a vaega o te Tusi Tapu e manako a ia o talitonu ki ei. Ne toka a ia o fakagalue kae akoako atu e uiga ki “fuafuaga a te Atua.”—Galu. 20:27.

3. E mata, e ‵tau o iloa ne tatou a tali ki fesili katoa ko te mea ke mafai o tali‵tonu katoatoa tatou? (Onoono foki ki te “ Galuega mo Mafaufauga o Ieova—‘Ko tō Uke Katoa a Mea Konā ke Lau Aka.’”)

³ E mafau‵fau a nisi tino me e mafai ne te lotu tonu o tali aka  a fesili katoa, ke oko foki ki fesili kolā e se maua tonu a tali ki ei i te Tusi Tapu. E mata, se mea ‵tau ke mafaufau penā? Mafaufau ki te tala o Paulo. Ne fakamalosi atu a ia ki taina tali‵tonu ke “tofotofo aka a mea katoa,” kae ne fai ‵tonu atu foki a ia me e uke a mea ne seki malamalama a ia i ei. (1 Tesa. 5:21) “E se katoatoa te ‵tou iloa,” ne tusi mai a ia, kae ne toe fakaopoopo mai, “koi ‵nefu te ‵tou ‵kilo e pelā me e ‵kilo atu tatou ki se kilo telā e se maina ‵lei.” (1 Koli. 13:9, 12) Ne seki malamalama a Paulo i mea katoa; kae penā foki tatou. Kae ne maina a Paulo i muna‵tonu faigofie e uiga ki fuafuaga a Ieova. Ne lava ‵lei ana mea ko iloa ke fakatalitonu atu me ko maua ne ia te munatonu!

4. E fakamalosi aka pefea ne tatou te ‵tou loto tali‵tonu me ko maua ne tatou te munatonu kae ne a mea ka mafau‵fau tatou ki ei e uiga ki Kelisiano ‵tonu?

⁴ A te auala e tasi ke fakamalosi aka te ‵tou loto tali‵tonu me ko maua ne tatou te munatonu, ko te fakatusatusa o te tapuakiga tonu telā ne fakatu aka ne Iesu mo mea e fai ne Molimau a Ieova i aso nei. I te mataupu tenei, ka onoono tatou me i Kelisiano ‵tonu e (1) ‵teke ki te ifo ki tupua, (2) āva ki te igoa o Ieova, (3) fia‵fia malosi ki te munatonu, kae ko te (4) fakatau a‵lofa.

5. Ne a mea e tauloto ne tatou mai i a Iesu e uiga ki te auala tonu ke tapuaki atu ki te Atua, kae e fakagalue pefea ne tatou a mea ne akoako mai ne ia?

⁵ Ona ko te lasi o tena alofa ki te Atua, ne tapuaki atu a Iesu ki a Ieova tokotasi, i tena nofoga i te lagi mo te lalolagi. (Luka 4:8) Ne akoako ne ia ana soko ke fai foki penā. Ne seki fakaaoga eiloa ne Iesu io me ko ana soko fakamaoni a mea fakatusa i olotou tapuakiga. Ona ko te Atua se agaga, e seai eiloa se mea ne faite ne se tagata e mafai o tai fakapilipili atu ki te ‵malu o Ieova! (Isa. 46:5) Kae e a, a fakatusa o  tino kolā e ‵kilo atu ki ei e pelā me ne tino tapu mo te ‵talo atu ki a latou? Ne fai mai a Ieova i te lua o Tulafono e Sefulu: “E se ‵tau mo koe o faite se tupua io me se mea e foliga pelā mo mea i te lagi i luga io me i lalo i te lalolagi . . . E se ‵tau mo koe o ifo ki mea konā.” (Eso. 20:4, 5) E manino ‵lei a pati konā ki a latou kolā e ma‵nako o fakafiafia te Atua.

6. Se a te vaegā tapuakiga e tau‵tali ki ei a Molimau a Ieova i aso nei?

⁶ Ne fai mai a tino sukesuke ki tala fakasolopito me ne tapuaki atu fua a Kelisiano mua ki te Atua. E pelā mo te tusi ko te History of the Christian Church ne fai mai me i Kelisiano mua “ne takalia‵lia” ki te manatu ke fakaaoga a mea fakatusa i koga tapuaki. I aso nei, e tau‵tali a Molimau a Ieova ki mea konā ne fai ne Kelisiano i te senitenali muamua. E se ‵talo tatou ki fakatusa o “tino tapu” io me ko agelu; e se ‵talo foki tatou ki a Iesu. Kae e se ifo atu foki tatou o tapuaki ki fakailoga o te ‵tou Fenua. Faitalia me se a te mea e mafai o tupu, ko oti ne fakaiku aka ne tatou ke faka‵logo ki pati a Iesu: “E ‵tau mo koe o tapuaki ki a Ieova tou Atua.”—Mata. 4:10.

7. Ne a mea kolā e tu ‵kese ei a Molimau a Ieova mai nisi lotu?

⁷ I aso nei, e tau‵tali a tino e tokouke ki takitaki lotu lauiloa. Ona ko te lasi o te lotou fia‵fia ki tāgata konei, ko pelā loa me ko ifo atu latou ki ei. E ‵kau atu a tino e tokouke ki olotou lotu, ‵togi olotou tusi, kae tuku atu ne latou a tupe e uke ki fakapotopotoga e ‵kau ki ei a takitaki lotu konei. E tali‵tonu a nisi tino ki pati katoa e fai mai ne latou. Kāti ko ‵pau eiloa te fia‵fia o tino ‵lotu konei ki olotou faifeau mo te lotou fia‵fia moi fai ko Iesu telā ko fakasae atu ki a latou! E ‵kese mai i a latou, a tino tapuaki ki a Ieova e seai ne olotou faifeau. E tiga loa e āva tatou ki a latou kolā e fai te takitakiga, kae e talia ne tatou te akoakoga manino a Iesu: “Koutou katoa ne taina.” (Mata. 23:8-10) E se tapuaki tatou ki tino, faitalia me ko latou ne takitaki lotu io me ne takitaki fakapolitiki. Kae e se ‵lago atu foki tatou ki olotou fakamoemoega. I lō te fai penā, e tumau tatou i te sē ‵kau ki se feitu kae ‵vae keatea mai te lalolagi. I feitu konei, e tu ‵kese ei tatou mai potukau e uke kolā e fai mai i a latou ne Kelisiano.—Ioa. 18:36.

8. E iloa pefea ne tatou me e manako a Ieova ke faka‵malu tena igoa kae ke fakailoa atu foki ki nisi tino?

⁸ I se taimi e tasi, ne ‵talo atu a Iesu: “Toku Tamana, faka‵malu tou igoa.” Ne tali mai eiloa a Ieova ki te ‵talo tenā i se leo maluga mai te lagi kae tauto atu me ka faka‵malu eiloa ne ia tena igoa. (Ioa. 12:28) I te faiga o tena galuega talai, ne faka‵malu eiloa ne Iesu a te igoa o tena Tamana. (Ioa. 17:26) Tela la, se mea ‵lei ke fakamoe‵moe me e maua ne Kelisiano ‵tonu a te tauliaga ke fakaaoga te igoa o te Atua kae fakailoa atu ki nisi tino.

9. Ne fakamaoni atu pefea ne Kelisiano i te senitenali muamua me ne āva latou ki te igoa o te Atua?

⁹ I te senitenali muamua T.A., mai tua malie eiloa o te fakatuga o te fakapotopotoga Kelisiano, “ne saga atu ei a [Ieova] ki fenua fakaa‵tea ke aumai mai i a latou ne tino mō tena igoa.” (Galu. 15:14) Ne fia‵fia a Kelisiano i te senitenali muamua ke fakaaoga te igoa o te Atua kae fakailoa atu ki nisi tino. Ne fakaaoga faeloa ne latou te igoa o te Atua i te lotou galuega talai mo olotou tusitusiga. * Ne fakamaoni atu ne latou me i a latou ko tino mō te igoa o te Atua.—Galu. 2:14, 21.

10. Ne a fakamaoniga e iloa atu ei me i Molimau a Ieova ko tino mō te igoa o Ieova?

 ¹⁰ E mata, a Molimau a Ieova ko tino mō te igoa o Ieova? Mafaufau ki fakamaoniga. I aso nei, ne fakaoti ne takitaki lotu e tokouke olotou mafi ke ‵funa aka a te manatu me i te Atua e isi sena igoa totino. Ko oti ne tapale ne latou mai i ‵fuliga o olotou Tusi Tapu, kae i nisi taimi, ne fakatapu ne latou te fakaaogaga o te igoa tenā i olotou lotu. * E mata, e mafai o fakafiti ne se tino a te manatu me ko Molimau a Ieova fua e fakaasi atu ne latou te āva mo te fakaaloalo ‵tau ki te igoa o Ieova? Ko tatou fua e fakasalalau malosi atu a te igoa totino o te Atua i lō nisi lotu! I te feitu tenei, e fai ne tatou te ‵toe mea e mafai ke ola e ‵tusa mo te ‵tou igoa, Molimau a Ieova! (Isa. 43:10-12) Ko oti ne ‵lomi ne tatou a ‵kopi e sili atu i te 240 miliona o Te Tusi Tapu i te ‵Fuliga o te Lalolagi Fou, telā e fakaaoga i ei a te igoa o Ieova i koga kolā ne tapale keatea ne nisi tino ‵fulitusi o te Tusi Tapu. Kae e fakatoka ne tatou a tusi faka-te-Tusi Tapu kolā e fakaaoga i ei a te igoa o Ieova i ‵gana e 1,000 tupu!

11. Ne fakaasi atu pefea ne Kelisiano mua a te lotou fia‵fia malosi ki te munatonu?

¹¹ Ne fiafia malosi a Iesu ki te munatonu, ko te munatonu e uiga ki te Atua mo Ana fuafuaga. Ne ola a Iesu e ‵tusa mo te munatonu kae ne fakailoa atu foki ne ia te munatonu tenā ki nisi tino. (Ioa. 18:37) Ne fia‵fia malosi foki a  soko ‵tonu o Iesu ki te munatonu. (Ioa. 4:23, 24) A te ‵tonuga loa, ne fakasino atu a te apositolo ko Petelu ki te Lotu Kelisiano e pelā me ko “te auala o te munatonu.” (2 Pe. 2:2) Ona ko te lotou fia‵fia malosi ki te munatonu, ne ‵teke ne Kelisiano mua a manatu fakalotu, tuu mo agannu, mo kilokiloga totino kolā e se fetaui mo te munatonu. (Kolose 2:8) E penā foki i aso nei, e taumafai a Kelisiano ‵tonu ke “tumau i te sasale i te munatonu” mai te fakavae olotou talitonuga mo te auala e ola ei latou ki te Muna a Ieova.—3 Ioa. 3, 4.

12. Ne a mea e fai ne tino kolā e fai ne latou te takitakiga māfai ko iloa ne latou me e ‵tau o faka‵tonu aka se mainaga, kae kaia e fai ei ne latou te mea tenā?

¹² E se fai atu a tino o te Atua i aso nei me ko iloa ‵lei katoatoa ne latou a te munatonu. Ko oti ne fai ne latou i nisi taimi a mea ‵se e uiga ki akoakoga mo te fakatokaga o te fakapotopotoga. E se ‵tau o ‵poi tatou i ei. E manino ‵lei te fakaasiga i te Tusi Tapu me i te iloaga tonu e gasolo malielie aka. (Kolose 1:9, 10) E fakaasi malielie mai ne Ieova a te munatonu, kae e ‵tau mo tatou o loto fia‵fia mo te kufaki ke oko ki te taimi ko maina ‵lei mai i ei a te munatonu. (Faata. 4:18) Kafai ko iloa ne tino kolā e fai ne latou te takitakiga, me e ‵tau o faka‵tonu aka a te mainaga o tatou ki se mea, e se fakatalave latou o fai a fakama‵fuliga ki ei. E tiga eiloa e fai ne lotu e uke i Fenua Kelisiano a fakama‵fuliga e uke ko te mea ke fakafiafia atu fua ki olotou fakapotopotoga io me ke fakapilipili atu ki te lalolagi, a fakama‵fuliga i te fakapotopotoga a Ieova, e fai ko te mea ke fakapili‵pili malosi atu tatou ki te Atua mo te tapuakiga tonu telā ne fakatu ne Iesu. (Iako. 4:4) E faka‵na a fakama‵fuliga e fai ne tatou, ki te gasolo aka o te malamalama ‵lei i te Tusi Tapu, kae e se ki manatu ‵fou io me ko faifaiga lauiloa. E fia‵fia malosi tatou ki te munatonu!—1 Tesa. 2:3, 4.

13. Se a te ‵toe uiga tāua e fakaasi atu ne Kelisiano ‵tonu kae e lavea faka‵lei atu pefea te uiga tenā i Molimau a Ieova i aso nei?

¹³ Mai i uiga katoa ne lauiloa ei a te fakapotopotoga Kelisiano i te senitenali muamua, a te ‵toe uiga tāua ko te alofa. Ne fai mai a Iesu: “Ona ko te mea tenei ka iloa ei ne tino katoa i a koutou ko oku soko—māfai e fakatau a‵lofa koutou.” (Ioa. 13:34, 35) I aso nei, e lagona ne Molimau a Ieova a te alofa tonu i te lalolagi kātoa. E ‵kese mo nisi fakapotopotoga, e fai eiloa ‵tou kautaina e pelā me se kāiga faitalia ‵tou fenua, ‵tou matakāiga, mo ‵tou tulaga i te olaga. E lavea ne tatou a fakamaoniga o te alofa tonu i ‵tou fakatasiga, tamā fono, mo fono ‵lasi. E fakamalosi aka ne te fakamaoniga tenā a te ‵tou loto tali‵tonu me e talia ne Ieova ‵tou tapuakiga.

14. E ‵tusa mo te Kolose 3:12-14, se a te auala tāua e mafai o fakaasi atu te fakatau a‵lofa o tatou?

¹⁴ E fakamalosi mai te Tusi Tapu “ke fakatau a‵lofa” tatou. (1 Pe. 4:8) A te auala e tasi e fakaasi atu ne tatou a te alofa, ko te fakatau fakamagalo mo te fakatau fa‵ki a mea ‵se a nisi tino. E ‵sala foki tatou ki avanoaga ke fakaasi atu te kaimalie mo te talimālō ki tino katoa i te fakapotopotoga, ke oko foki ki tino kolā kāti ne fai ne latou se mea ke ita tatou. (Faitau te Kolose 3:12-14.) A te vaegā alofa penā ko te ‵toe fakailoga tāua o Kelisiano ‵tonu.

15. I auala fea e tau‵tali tatou ki mea ne fai i te tapuakiga tonu telā ne fai ne te kau Kelisiano i te senitenali muamua?

¹⁵ E tau‵tali tatou ki nisi vaega o te tapuakiga tonu telā ne fai ne te fakapotopotoga Kelisiano i te senitenali muamua. E pelā mo te fakatokaga o ‵tou fakapotopotoga—e aofia i ei a ovasia faima‵laga, toeaina, mo tavini fesoasoani—e fakaata mai i ei a te fakatokaga ne fai ne te kau apositolo i te senitenali muamua. (Fili. 1:1;  Tito 1:5) A te ‵tou kilokiloga ki faifaiga fakatauavaga mo te fakaipoipoga, te ‵tou āva ki te ‵malu o te toto, mo te ‵tou manakoga ke puipui te fakapotopotoga mai tino fai agasala sē sala‵mō, e fakavae ki mea katoa ne fai i te tapuakiga tonu i te senitenali muamua.—Galu. 15:28, 29; 1 Koli. 5:11-13; 6:9, 10; Epe. 13:4.

16. Se a te mea e tauloto ne tatou mai i pati i te Efeso 4:4-6?

¹⁶ Ne fai mai a Iesu me e tokouke a tino e fai mai me i a latou ko ana soko, kae e se ko tino katoa ne soko ‵tonu. (Mata. 7:21-23) Ko leva foki ne ‵valo mai i te Tusi Tapu me i aso fakaoti, e tokouke a tino “e foliga mai me e fakamaoni latou ki te Atua.” (2 Timo. 3:1, 5) Kae e fakaasi faka‵lei mai i te Tusi Tapu me e “tasi te fakatuanaki” telā e talia ne te Atua.—Faitau te Efeso 4:4-6.

17. Ko oi a tino i aso nei e tau‵tali atu i a Iesu kae fakaasi atu te fakatuanaki tonu e tasi?

¹⁷ Ko oi e fakaasi atu ne latou a te fakatuanaki tonu e tasi i aso nei? Ko oti ne iloilo aka ne tatou a fakamaoniga. Ne mafau‵fau tatou ki te tapuakiga tonu telā ne akoako ne Iesu kae ne tau‵tali atu ki ei a Kelisiano i te senitenali muamua. E tasi fua te tali—ko Molimau a Ieova. Ko oko eiloa i te ‵tou taulia ke aofia i tino o Ieova kae ke iloa ne tatou te munatonu e uiga ki a Ieova mo ana fuafuaga! Ke na puke ‵mau faeloa tatou ki te munatonu mo te loto talitonu katoatoa.