Ne tusi mai a Paulo: “E auala i te tulafono ne mate au mō te tulafono, ko te mea ke mafai au o ola mō te Atua.”—Kala. 2:19.

Ne fetaui ‵lei a te mea ne tusi ne Paulo mo te manatu tāua ne manako a ia o fai atu ki te fakapotopotoga i te fenua o Loma ko Kalatia. E isi ne Kelisiano i konā ko fia‵fia ki akoakoga a faiakoga ‵loi. Ne akoako atu ne tāgata konā i te fakaolataga e maua māfai e tau‵tali ki te Tulafono faka-Mose, maise loa ko te pilitome. Kae ne iloa ne Paulo me ko se manakogina ne te Atua ko Kelisiano ke ‵tau loa o pilitome. Ne fakamaoni faka‵lei atu ne ia i akoakoga konā e ‵se kae ne fakamalosi ne ia te fakatuanaki o taina ki te taulaga togiola a Iesu Keliso.—Kala. 2:4; 5:2.

E fakaasi fakaasi faka‵lei mai i te Tusi Tapu i te tino kafai e mate, e seai sena mea e iloa io me pokotia i mea a tino e fai. (Fai. 9:5) I te faimaiga a Paulo: “Ne mate au mō te tulafono,” ne fakauiga a ia ki te Tulafono faka-Mose ko seai sena malosi ki a ia. Ne talitonu a Paulo i tena fakatuanaki ki te taulaga togiola, ne fai ei ke ‘ola a ia mō te Atua.’

A te fuliga tenā i te tulaga o Paulo ne fai “e auala i te tulafono.” E pefea la? Ne fatoa oti ne fakamatala mai ne ia “me e taku amiotonugina se tino, e se auala i galuega o te tulafono, kae auala fua i galuega o te tulafono.” (Kala. 2:16) Kae ne fakataunu ne te Tulafono se mea tāua ‵ki. Ne fakamatala atu ne Paulo ki tino Kalatia: “Ne fakaopoopo atu fua ke fakaasi mai i ei a agasala, ke oko ki te taimi e oko mai ei te tama.” (Kala. 3:19) Ne fakaasi mai ne te Tulafono i tino agasala kolā e se ‵lei katoatoa, e se mafai o tausi katoatoa ki te Tulafono kae manakogina ne latou se taulaga ‵lei katoatoa. Tela la, ne takitaki ne te Tualafono a tino ki te “fanau,” telā ko te Keliso. E mafai o taku amiotonugina se tino ne te Atua māfai e fakaasi atu te fakatuanaki ki a Iesu Keliso. (Kala. 3:24) Ne iloa ne Paulo me auala i te Tulafono ne mafai ei o talia kae fakatuanaki a ia ki a Iesu. Telā la, ne fai ei a Paulo e pelā me “ne mate mō te tulafono” kae toe “ola mō te tulafono.” Ko se toe ai se malosi o te Tulafono ki a ia, kae na ko te malosi fua o te Atua.

Ne fakaasi atu foki ne Paulo se manatu tai ‵pau penā i tena tusi ki te kau Loma. “Oku taina, a koutou ko oti foki ne fai ke ‵mate ki te Tulafono e auala i te foitino o te Keliso . . . Nei la ko oti ne fakasaoloto tatou mai te Tulafono, me ko oti ne mate tatou ki mea kolā ne ‵sai ne ia tatou.” (Loma 7:4, 6) I te tusi faitau tenā mo te Kalatia 2:19, ne seki faipati a Paulo ki te mate e pelā me se tino agasala mai lalo i te Tulafono. Kae ne faipati eiloa a ia ki te saolotoga. Ko se toe ai se malosi o te Tulafono ki a ia penā foki mo tino kolā e ‵pau mo ia. Mai te fakatuanaki ki te taulaga togiola a Keliso, ne fakasoloto ei latou.