1. Ne a mea ne fai ne Ieova mō tatou taki tokotasi?

NE ‵TAKI mai ne Ieova a tatou taki tokotasi ki a ia. (Ioa. 6:44) Mafaufau ki te uiga o te mea tenā. I te taimi e iloilo faka‵lei ne Ieova a te fia miliona o tino katoa i te lalolagi nei, e lavea ne ia se mea tāua i a latou—se loto ‵lei telā e mafai o gasolo aka o alofa ki a Ia. (1 Nofo. 28:9) E iloa ne Ieova a koe, e malamalama i a koe, kae alofa ki a koe. Ko oko loa te fakamalosi loto te mea tenā!

2. Ne fakatusa pefea ne Iesu a te tāua ki a Ieova a Ana mamoe taki tokotasi?

² E atafai malosi a Ieova ki a koe, kae atafai foki a ia ki ou taina mo ou tuagane katoa. Ke fai se fakatusaga ki te mea tenei, ne fakatusa ne Iesu a Ieova ki se tausi mamoe. Kafai se mamoe e 1 mai mamoe e 100 ko takasēsē kea‵tea mai te lafu, ne a mea ka fai ne te tausi mamoe? Ka “tiaki ne ia a mamoe e 99 i luga i mauga kae fano o ‵sala te mamoe e tasi telā ko takasēsē kea‵tea.” Kafai ko maua ne te tausi mamoe a te mamoe, e se kaitaua ki ei ona ko te mea ne fano fakaa‵tea. Ka fiafia a ia. Se a te manatu tāua? A mamoe katoa e tāua ki a Ieova. Ne fai mai a Iesu: “E penā foki a toku Tamana i te lagi, e se manako ke mate se tokotasi o tino fatauva konei.”—Mata. 18:12-14.

3. Ne a mea ka sau‵tala tatou ki ei i te mataupu tenei?

³ E se ma‵nako tatou o fai pelā me ne tino fakavāivāi ki ‵tou taina mo tuagane. E mafai pefea o ‵kalo kea‵tea tatou mai te fakavāivāi atu ki nisi tino? Kae ne a ‵tou mea e mafai o fai māfai e fakalogo‵mae mai se tino ki a tatou? Ka tali ne tatou a fesili konā i te mataupu tenei. Kae koi tuai o onoono ki ei, e ‵tau muamua o tauloto tatou ki mea e uke atu e uiga ki “tino fatauva konei” e fakasino ki ei i te Mataio mataupu 18.

4. Ko oi a “tino fatauva konei”?

⁴ A “tino fatauva konei” ko soko o Iesu kolā e kese‵kese te ma‵tua o latou. Faitalia te tulaga o olotou tausaga, e fai latou pelā me ne “tamaliki fo‵liki” ona ko te lotou loto fia‵fia ke akoako latou ne Iesu. (Mata. 18:3) E tiga loa e ‵kese olotou telega, tuu, kilokiloga mo olotou uiga, ne fakaasi atu ne latou katoa te fakatuanaki ki a Keliso. Tela la, ne alofa malosi foki a ia ki a latou.—Mata. 18:6; Ioa. 1:12.

5. Ne a lagonaga o Ieova māfai e fakavāivāi io me fakalogo‵mae ne se tino a Ana tino?

⁵ A “tino fatauva konei” e tāua katoa ki a Ieova. Ke maina tatou i ana lagonaga, mafaufau ki ‵tou lagonaga e uiga ki tamaliki. E tāua ki a tatou. E ma‵nako tatou o puipui latou i a latou e vāi‵vai, e se lasi te lotou iloa mo te poto e pelā mo tino ma‵tua. E pelā loa mo tatou e se ma‵nako ke logo‵mae se tino, e fanoa‵noa malosi tatou—io me kaitāua ‵ki—māfai e fakalogo‵mae ne se tino se tamaliki. E penā foki a Ieova, e manako ke puipui ne ia tatou. A ia e fanoanoa—kae kaitaua foki—māfai e fakalogo‵mae io me fai ne se tino ke siga se tokotasi o Ana tino!—Isa. 63:9; Male. 9:42.

6. E ‵tusa mo te 1 Kolinito 1:26-29, e ‵kilo atu pefea te lalolagi ki soko o Iesu?

⁶ Ne a nisi pogai e fakatusa i ei a soko o Iesu ki “tino fatauva”? Ko oi a tino e fakatāua ne te lalolagi? Ko tino mau‵mea, tino takutakua, mo tino ma‵losi. E ‵kese mo soko o Iesu kolā ne ‵kilo atu latou ki ei e pelā me se tāua kae ne “tino fatauva.” (Faitau te 1 Kolinito 1:26-29.) Kae ‵kese te kiloga a Ieova ki a latou.

7. Se a te mea e manako a Ieova ke fai ne tatou ki ‵tou taina mo tuagane?

⁷ E alofa a Ieova ki ana tavini katoa, faitalia me ko leva ne tavini latou ki a ia io me koi ‵fou ki te munatonu. A ‵tou taina mo tuagane e tāua katoa ki a Ieova, tela la, e ‵tau foki o tāua a latou ki a tatou. E ‵tau o “a‵lofa ki te kautaina kātoa,” kae se ki ne nāi tino fua. (1 Pe. 2:17) E ‵tau o loto fia‵fia tatou o fai so se mea ke puipui kae tausi atu ki a latou. Kafai e iloa ne tatou me ne fakalogo‵mae io me ne fai ne tatou ke ita se tino, e se ‵tau mo tatou o tuku tiaki atu fua penā, kae fakaiku aka me ko to kaitaua vave kae kāti ka mafai o ‵lei fakamuli te lotou ita. Kaia e mafai o se fia‵fia a nisi tino ki a tatou? Kāti ko telega o latou, e mafau‵fau a nisi taina mo tuagane i a latou ne tino fatauva. A nisi tino koi ‵fou ki te munatonu; seki iloa ne latou o fakafesagai atu ki vāivāiga o nisi tino. Faitalia me se a te pogai, e ‵tau faeloa mo tatou o fai te ‵toe mea e mafai ke maua se va ‵lei mo latou. E se gata i ei, a te tino foki telā e masani o se ti fiafia ki mea e fai ne nisi tino, e ‵tau o masaua ne ia i te uiga tenei se uiga sē ‵lei telā e ‵tau o galue a ia ki ei. E manakogina ke fai ne ia te mea tenā, ko te mea ke maua ne ia te filemu o te mafaufau mo se va ‵lei mo nisi tino.

8. Se a te uiga masani ne pokotia i ei a soko o Iesu?

⁸ Se a te mea ne fai ei ke faipati a Iesu e uiga ki “tino fatauva konei”? Ne fai atu ne ana soko se fesili: “Ko oi te tino e sili i te Malo o te lagi?” (Mata. 18:1) E tokouke a tino Iutaia e ‵kilo atu ki tulaga mo tofi e pelā me ne mea tāua ‵ki. Ne fai mai se tagata poto e tokotasi: “E ma‵nako a tino ke ola kae ‵mate mo te fakaaloalo, se igoa ‵lei, takutakua, fia‵fia, kae āva ki ei a tino.”

9. Ne a mea e ‵tau o fai ne soko o Iesu?

⁹ Ne iloa ne Iesu i ana soko e ‵tau o ga‵lue malosi ke tapale kea‵tea mai i olotou loto a te uiga fakatau‵fai telā ne malosi ‵ki i tino Iutaia. Ne fai atu a ia ki a latou: “Ke fai te tino telā e sili i a koutou e pelā mo te ‵toe tamaliki foliki, kae ko te tino telā e takitaki ne ia koutou ke fai pelā me se tavini.” (Luka 22:26) E fai tatou pelā me  ne “tamaliki foliki” māfai e ‵nofo tatou “mo te manatu me tāua atu a nisi tino” i a tatou. (Fili. 2:3) Kafai e ati aka faeloa ne tatou te kilokiloga tenā, ka sē fakavāivāi foki ne tatou a nisi tino.

10. Se a te polopolokiga a Paulo e ‵tau o fakagalue ne tatou?

¹⁰ E uke a auala e tāua ei a ‵tou taina mo tuagane ki a tatou. E faigofie ke lavea ne tatou a te mea tenei māfai e ‵saga faeloa tatou ki uiga ‵lei o latou. E ‵tau o fakagalue ne tatou te polopolokiga ne tuku ne Paulo ki te kau Kolinito: “Ko oi ne fai ne ia koe ke ‵kese mai te suā tino? E tonu, se a tau mea ne maua telā e seki tuku atu ki a koe? Kafai la e tonu me ne tuku atu fua ki a koe, kaia la e fakamatamata ei koe, e pelā eiloa me ne seki tuku atu te mea tenā ki a koe?” (1 Koli. 4:7) E ‵tau o fakaeteete tatou ke mo a ma to fakatāua ne tatou a tatou eiloa io me mafau‵fau me sili atu a tatou i nisi tino. Kafai se taina e ‵gali ana lāuga io me se tuagane e apo i te faiga ke kamata se akoga faka-te-Tusi Tapu, e ‵tau mo ia o tuku atu a vikiga mo tavaega ki a Ieova ona ko te atamai tenā.

11. Se a te manatu tāua ne fakaasi mai i te tala fakatusa a Iesu ki te tupu mo tena pologa?

¹¹ Mai tua mālie o te faiatuga a Iesu ki ana soko ke se fakavāivāi atu ki nisi tino, ne fai atu ne ia se tala fakatusa e uiga ki se tupu mo tena pologa. Ne fakamagalo ne te tupu a te kaitalafu lasi a tena pologa telā ko se mafai ne ia o ‵togi. Fakamuli ifo, ne seki fakamagalo ne te pologa tenā a te kaitalafu foliki a tena taina pologa. I te fakaotiga, ne ‵pei ne te tupu a te pologa sē alofa tenā ki te falepuipui. Se a te akoakoga? Ne fai atu a Iesu: “E penā foki eiloa a mea ka fai ne toku Tamana i te lagi ki a koutou māfai e se fakamagalo ne koutou taki tokotasi otou taina mo otou loto kātoa.”—Mata. 18:21-35.

12. E fakalogo‵mae pefea ne tatou a nisi tino māfai e se talia ne tatou o fakamagalo atu?

¹² A faifaiga a te pologa tenā ne seki fakalogo‵mae atu fua ki a ia kae penā foki ki nisi tino. Te mea muamua, ne fakalogo‵mae ne ia tena taina pologa mai te fai atu ke “‵pei te pologa tenā ki te falepuipui ke oko eiloa ki te taimi ko mafai ei ne ia o ‵tina mai tena kaitalafu.” Te lua, ne fakalogo‵mae foki ne ia a nisi pologa kolā ne kilo‵kilo atu ki tena mea ne fai. “I te laveaga ne nisi pologa a mea katoa ne fai ne ia, ne fanoa‵noa malosi latou.” I se auala tai ‵pau, e mafai foki o pokotia a nisi tino i ‵tou faifaiga e fai. Kafai se tino ne fai ne ia se mea ‵se ki a tatou kae e se talia ne tatou o fakamagalo, se a te mea ka tupu? Te mea muamua ka logo‵mae a ia me se talia ne tatou tena fakatoesega, se fia ‵saga atu tatou ki a ia, kae se a‵lofa foki tatou ki a ia. Te lua, ka fai foki ne tatou ke se ‵lei a lagonaga o nisi tino i te fakapotopotoga māfai e lavea ne latou i a tatou e se ‵lei te ‵tou va mo te tino tenā.

13. Se a te mea ne tauloto ne koe mai te tala o te paenia e tokotasi?

¹³ Kafai e fakamagalo ne tatou a ‵tou taina mo tuagane, ka aoga eiloa te mea tenā ki a tatou mo nisi tino. Tenā te mea ne iloa ne se paenia e igoa ki a Crystal. Ne fakalogo‵mae a ia ne se tuagane i te fakapotopotoga. Ne fai mai a Crystal: “Ana pati sē a‵lofa e pelā loa me se naifi e ‵suki mai. I te galuega talai, ne seki manako au ke ga‵lue fakatasi mo ia. Ne kamata ei o galo atu toku loto finafinau ki te galuega talai.” Ne mafaufau a Crystal me tonu loa te pogai e ita i ei a ia. Kae ne seki talia ne tou fafine ke nofo faeloa a ia mo te loto ita io me mafaufau fua ki tena ‵lei. Ne loto maulalo tou fafine o fakagalue a fakatakitakiga i te Tusi Tapu kolā ne maua i te mataupu “Ke Loto Fakamagalo Koe” i Te Faleleoleo Maluga i a Oketopa 1, 1999. Ne fakamagalo ne ia tena taina. Ne fai mai a  Crystal: “Ko iloa ne au me ‵tau faeloa o taumafai tatou o ‵pei faeloa ki uiga ‵fou i a Ieova e toka faeloa o fakamagalo ne ia tatou i aso katoa. E pelā eiloa me se amoga ‵mafa ko tuku ifo ne au mai i oku tuauma. Nei la, ko toe maua ne au te fiafia.”

14. E ‵tusa mo te Mataio 18:21, 22, se a te fakalavelave kāti ne nofo mo te apositolo ko Petelu kae se a te tali a Iesu ki a ia?

¹⁴ E iloa ne tatou me ‵tau mo tatou o fakamagalo atu, kae tenā loa te mea e ‵tau o fai. Kae mafai loa o faigata ki a tatou. Kāti konā foki a lagonaga o te apositolo ko Petelu i nisi taimi. (Faitau te Mataio 18:21, 22.) Ne a mea e mafai o fesoasoani mai? Te mea muamua, mafaufau ki te lasi o te alofa o Ieova ne fakamagalo ne ia koe. (Mata. 18:32, 33) E seai se pogai e ‵tau ei o fakamagalo ‵tou agasala, kae ui ei, ne tuku mai eiloa ne ia e aunoa mo se ‵togi. (Sala. 103:8-10) E se gata i ei, “e ‵tau foki o fakatau a‵lofa tatou te suā tino ki te suā tino.” Tela la, te fakamagalo atu e seai se filifiliga e ‵tau o fai ki ei. E ‵nofo kaitalafu tatou ki ‵tou taina mo tuagane māfai e se fakamagalo ne tatou a latou. (1 Ioa. 4:11) Te lua, mafaufau ‵loto ki mea ka iku mai māfai e fakamagalo ne tatou a nisi tino. Ka fesoasoani tatou ki te tino telā ne ‵se mai ki a tatou, fakatumau ne tatou te ‵kaufakatasi o te fakapotopotoga, puipui ‵tou fesokotakiga mo Ieova, kae tapale kea‵tea te amoga ‵mafa i luga i a tatou. (2 Koli. 2:7; Kolose 3:14) Kae ko te ‵toe mea, ‵talo ki te Tino telā ne fai mai ke fakamagalo ne tatou a nisi tino. Sa talia ne koe Satani ke fakamakosu ne ia te va filemu o koe mo ou taina tali‵tonu. (Efe. 4:26, 27) E ma‵nako eiloa tatou ki te fesoasoani o Ieova māfai e se ma‵nako tatou ke ‵to ki loto i te malei a Satani.

15. E pelā mo te Kolose 3:13, ne a ‵tou mea e mafai o fai māfai e sē fia‵fia tatou ki se mea ne fai ne se taina io me se tuagane?

¹⁵ Kae e a māfai e isi se taina talitonu e fai  sāle ne ia ke kaitaua koe? Ne a au mea e ‵tau o fai? Taumafai malosi ke maua se va filemu. Fakaasi atu ki a Ieova a mea i tou loto e auala i te ‵talo. Akai atu ki a ia ke fesoasoani ki te tino telā e fakakaitaua ne ia koe kae ke fesoasoani atu ke mafai o lavea ne koe a uiga ‵lei i te tino tenā—ko ana uiga ‵gali kolā e alofa ei a Ieova ki a ia. (Luka 6:28) Kafai e se mafai ne koe o fakapuli a mea ne fai ne tou taina ki a koe, mafaufau ki te auala ke faipati atu ki a ia. Se mea ‵lei ke mafaufau me seki fakauiga ne te taina tenā ke fakalogo‵mae a koe. (Mata. 5:23, 24; 1 Koli. 13:7) Kafai e faipati koe ki a ia, ke mafaufau faeloa i te tino tenā e se ita ki a koe. Kae e a māfai e se manako a ia ke faka‵lei koulua? Ke “fa‵ki faeloa” i a ia. Ke mo a loa e ‵fiu a koe i a ia. (Faitau te Kolose 3:13.) Kae ko te ‵toe mea tāua, ke mo a eiloa e nofo koe mo tou loto ita, me ka mafai ei o fakamasei tou fesokotakiga mo Ieova. Ke mo a eiloa e talia ne koe se mea ke fakavāivāi atu ki a koe. Kafai e fai koe penā, ko fakamaoni atu ei ne koe me seai loa se mea e sili atu i tou alofa ki a Ieova.—Sala. 119:165.

16. Se a te tiute e ‵tau mo tatou taki tokotasi o fai?

¹⁶ E tāua ki a tatou a te ‵tou tauliaga ke tavini fakatasi atu ki a Ieova e pelā me se “lafu mamoe e tasi” mai lalo i te “tausi mamoe e tokotasi”! (Ioa. 10:16) E fai mai te tusi ko te Organized to Do Jehovah’s Will, itulau 165, penei: “Kafai e aoga ki a tatou te ‵kaufakatasi tenā, e ‵tau o fai te ‵tou tiute ke fakatumau.” Tela la, e ‵tau o “akoako ne tatou a tatou eiloa ke ‵kilo atu ki ‵tou taina mo tuagane e pelā mo te auala e kilo atu ei a Ieova ki a latou.” I te kiloga a Ieova, a tatou katoa ne “tino fatauva” kolā e tāua. E mata, tenā te auala e kilo atu koe ki ou taina mo tuagane? E lavea kae fakatāua ne Ieova so se mea e fai ne koe ke fesoasoani kae tausi atu ki a latou.—Mata. 10:42.

17. Ne a mea e fakaiku aka ne tatou ke fai?

¹⁷ E a‵lofa tatou ki ‵tou taina tali‵tonu. Tela la, e ‵tau mo tatou o “fakaiku aka ke se tuku atu i mua o se taina se fatu fakasiga tino.” (Loma 14:13) E ‵kilo atu tatou ki ‵tou taina mo tuagane e pelā me tāua atu ki a tatou, kae ma‵nako tatou o fakamagalo latou mai ‵tou loto. Ke mo a eiloa e fai ne tatou ke ‵siga a nisi tino. I lō te fai penā, ke “kausaki atu ki mea kolā e maua ei a te filemu mo mea kolā e fakatau fakamalosi aka ei te suā tino ki te suā tino.”—Loma 14:19.