Ko oti eiloa ne talai atu te tala ‵lei o te Malo o te Atua ki te lalolagi nofoaki kātoa, e pelā mo te mea ne ‵valo mai ne Iesu. (Mataio 24:14) E fakamatala mai i te tusi o te Tusi Tapu ko Tanielu me i te Malo tenei se pulega mai te Atua. E aofia i te mataupu e 2 o te tusi tenā se valoaga telā e fakamatala mai i ei a pulega a tāgata, io me ko malo, kamata mai i a Papelonia ke oko mai loa ki ‵tou aso nei. Ne ‵valo mai eiloa a te mea ka tupu i aso mai mua i te fuaiupu e 44, telā e fai penei:

“Ka fakatu aka ei ne te Atua o te lagi se malo telā ka se mafai o fakaseai. Kae ko te malo tenei ka se tuku atu ki se isi atufenua. Ka tuki pala kae fakaseai ne ia a malo katoa konei, kae ka tumau eiloa a te malo tenā ki te se-gata-mai.”

E ‵valo mai i te valoaga tenei mo nisi valoaga i te Tusi Tapu me ka sui ne te Malo o te Atua a malo katoa o tāgata o te lalolagi nei kae aumai ne ia te saogalemu mo te tokagamalie ki tino i te lalolagi. Ka pefea te olaga mai lalo i te pulega o te Malo? Konei a nisi folafolaga ‵gali kolā ka fakataunu tonu eiloa.

• KA SE TOE AI NE TAUA

  Salamo 46:9: “E aumai ne te [Atua] te gataga ki taua i te lalolagi kātoa. E fatifati ne ia a kausana kae ofa likiliki ne ia a tao; e ‵sunu ne ia a ka a te kautau ki te afi.”

  Mafaufau la ki te tulaga o te lalolagi moi ne fai ne fakaaoga a tupe mo poto kolā ne fakamāumāū ke faite ki ei a meatau ki mea kolā e aoga ki tino i lō te tamate fua o latou! Ka fakataunu tonu mai eiloa a te folafolaga tenā mai lalo o te Malo o te Atua.

• KA SE TOE AI NE MASAKI

  Isaia 33:24: “Ka seai se tino e fai aka: ‘Au ko masaki.’”

  Mafaufau la ki se lalolagi telā ka se toe ai se tino e logo‵mae mai te fatu vāivāi, kenisa, malalia io me ko nisi masaki aka. Ka se toe manakogina foki eiloa a fakaimasaki mo vailakau. Ka maua te ola ‵lei katoatoa—te mea ka tupu ki tino kolā ka ‵nofo i te lalolagi i aso mai mua.

• KA SE TOE AI SE OGEGA MEA‵KAI

  Salamo 72:16: “Ka malaku eiloa a saito i te laukele; ka ‵fonu a taulu o mauga.”

  Ka ‵fua mai eiloa ne te lalolagi a mea‵kai e lava kae ‵toe mō tino katoa, kae ka maua ne tino katoa a mea konā. Ka se toe ai se tino e fia kai io me masaki i te sē lava o mea‵kai.

• KA SE TOE AI SE LOGO‵MAE, FANOANOA, MO TE MATE

  Fakaasiga 21:4: “Ka ‵solo kea‵tea ne [te Atua] a loimata katoa mai i olotou mata, kae ka se toe ai se mate, ka se toe ai foki se fanoanoa, se tagi io me se ‵mae. Ko palele atu a mea mua.”

   Ko tena uiga ka maua te ola ‵lei katoatoa i te lalolagi palataiso! Tenā eiloa te mea ne folafola mai ne te ‵tou Mafuaga alofa, ko Ieova te Atua.

E mata, e ‵tagi gali mai ki a tatou katoa te ‵tonu o te mea tenei? E tiga eiloa ko oti ne talia ne te tokoukega a te olaga telā ne folafola kae fakamatala mai i te Tusi Tapu, e isi ne pogai e faigata ei ki te tokoukega o nisi tino ke malamalama i te manatu ke ola ki te se-gata-mai. E sē se mea fakapoi a te mea tenā, me seki ai eiloa se tino ne ola i se olaga penā kae fakamatala mai ne ia ki a tatou.

Ko leva eiloa ne ‵nofo pologa a tino ki te agasala mo te mate kae ne pologa eiloa ki te logo‵mae, puapuaga mo te manavase mō se taimi leva, telā a te tokoukega o tino ko talia ne latou a te olaga tenei e pelā me se olaga masani ki a latou. Kae e ‵kese ‵mao eiloa a te mea tenā mai te fuafuaga a te ‵tou Mafuaga, ko Ieova te Atua mō tino katoa.

Ke fesoasoani mai ke loto fakafetai ki te ‵tonu o mea katoa kolā ne folafola mai ne ia, ne fai ‵tonu mai te Atua penei: “Ka se foki mai ki a au e aunoa mo ne ikuga, kae ka fakataunu eiloa ne ia so se mea e fiafia au ki ei, kae ka manuia eiloa i so se mea e fai ne au ki ei ke fai ne ia.”—Isaia 55:11.

E fakamatala mai eiloa a Ieova i te Tusi Tapu e pelā me ko te Atua telā “e se mafai o loi.” (Tito 1:2) Ona ko te mea ne folafola mai ne ia a mea ‵gali katoa konei ka ‵tupu i aso mai mua, se mea poto ke mafau‵fau ifo tatou penei: E mata, e mafai eiloa o ola a tino ki te se-gata-mai i te lalolagi Palataiso telā ne folafola mai? Ne a mea e ‵tau o fai ne tatou ke maua a mea aoga mai te folafolaga a te Atua? I nisi itulau o te mekesini tenei, ka maua eiloa ne koe i ei a nisi fakamatalaga fesoasoani ke tali aka i ei a fesili konei.