Ikai, e se tenā loa te mea e fakauiga ki ei te fuaiupu tenei. Kae e fakauiga loa ki se tino telā e fepaki faeloa mo fakalavelave, io me ko tulaga faiga‵ta kae toe tu aka ki luga ko te mea ke mafai o toe malosi a ia.

Ke onoono tatou ki fuaiupu i tafa o te fuaiupu tenei: “Ke mo a ma amio koe e pelā me se tino masei kae alamati ki te tino amiotonu i tafa o tena fale; ke mo a ma fakamasei ne koe tena koga malōlō. Me i te tino amiotonu e mafai o siga fakafitu taimi kae ka toe tu aka, kae ko tino amio ma‵sei ka ‵siga ona ko te malaia. Kafai e siga tou fili, ke mo a ma fiafia koe, kae kafai e pakū a ia, ke mo a ma fiafia tou loto.”—Faata. 24:15-17.

E mafau‵fau a nisi tino me i te fuaiupu e 16 e fakauiga ki se tino telā ne agasala, ne salamō kae ko maua ne ia se fesokotakiga ‵lei mo te Atua. Ne tusi mai a faifeau Egelani e tokolua, me i “faifeau i aso mua mo aso nei, ne fakaaoga malosi ne latou te fuaiupu tenei” i te auala tenei. Ne toe fai mai a faifeau me i te kilokiloga tenā e fakauiga i ei me “e mafai o tō atu se tagata ‵lei ki te faiga o . . . agasala matagā, kae e se mafai o galo i a ia a tena alofa ki te Atua, kae e mafai o toe tu aka a ia māfai e salamō i taimi katoa.” A te kilokiloga tenā e gali ki se tino telā e ita ma ‵teke atu ki te agasala. E mafai o mafaufau a ia me faitalia me agasala fakafia a ia, ka fakamagalo faeloa a ia ne te Atua.

E se tenā loa te mea e fakauiga ki ei te fuaiupu e 16.

A te pati Epelu telā ne ‵fuli ki te “siga” i te fuaiupu e 16 mo te 17 e mafai o fakaaoga i auala e uke. E mafai o fakauiga ki te siga loa, se pulumakau e siga i te auala, io me se taoa e siga. (Teu. 22:4, ; Isa. 30:25) E mafai foki o fakaaoga te pati tenā i se auala fakatusa, e pelā mo mea konei: “E takitaki ne Ieova a kalafaga o se tagata māfai e fiafia a Ia ki ana auala. E tiga loa e mafai o siga tou tagata, ka se ‵pei ‵tuki a ia ki lalo, me i a Ieova e puke atu ki tena lima.”—Sala. 37:23, 24; Faata. 11:5.

Kae ke mafaufau ki se manatu ne fakaasi mai ne te polofesa ko Edward H. Plumptre: “A te pati Epelu ko te [“siga”] e se ti fakaaogā eiloa ki se tino telā e agasala.” Kae ne fakamatala mai ne te suā tino a te fuaiupu e 16 penei: “E seai se aoga māfai e fai fakamasei a tino o te Atua, me ka ‵sao latou kae ko tino amio ma‵sei ka se sao!”

Tela la, e fakaasi mai i mea konei me i te Faataoto 24:16 e se fakasino atu ki te agasala, kae fakasino ki fakalavelave faiga‵ta e fepaki mo se tino faitalia me fia taimi e fepaki mo ia. I te olaga masei tenei, e mafai o pokotia se tino amiotonu ne masaki io me ko nisi fakalavelave aka. E mafai o talitonu a ia me ka ‵lago atu faeloa te Atua kae ka fesoasoani mai a ia ke mafai ne ia o kufaki kae ke manuia. Ke mafaufau ki te uke o mea ‵lei ko oti ne lavea ne koe ne ‵tupu ki tavini a te Atua. Kaia? E tali‵tonu tatou me i a “Ieova e ‵lago atu ki a latou katoa kolā ko ‵siga kae faka‵tu ‵tonu aka a latou katoa kolā e pu‵nou ki lalo.”—Sala. 41:1-3; 145:14-19.

“A te tino amiotonu” e se fiafia ona ko fakalavelave e fe‵paki mo nisi tino. Kae e maua ne ia se fakamafanafanaga i te iloaga telā ko iloa ne ia me “e ‵lei atu a mea ka ‵tupu ki a latou kolā e ma‵taku ki te Atua tonu me ma‵taku latou ki a ia.”—Fai. 8:11-13; Iopu 31:3-6; Sala. 27:5, 6.