Ikai, e seai se mea penā ne fakaasi mai i te Tusi Tapu io me i tala fakasolopito.

A te auala ne ‵fuli aka i ei a te fuaiupu tenei i Tusi Tapu e uke, ne fai i ei ke mafau‵fau a nisi tino me i te papatisoga ki te vai mō tino ‵mate se faifaiga ne fai i aso o Paulo. E pelā me se fakaakoakoga, “Kafai e tonu, e pela mo te fai mai o nisi me i tino mate e sē fakatuakegina ki te ola, kaia e papatisogina i ei a tino konā mō te mate?”—Tusi Tapu Tauloto.

Kae ke onoono tatou ki manatu mai tino ‵poto i te Tusi Tapu e tokolua. Ne fai mai a Dr. Gregory Lockwood me i te manatu ki te papatisoga telā ne fai “mō tino kolā ko oti ne ‵mate” se “vaegā papatisoga telā e seai sena fakamaoniga i tala fakasolopito io me ko mea i te Tusi Tapu me se mea tonu.” E penā foki te polofesa ko Gordon D. Fee ne tusi mai a ia: “E seai se tala i te Tusi Tapu io me i tala fakasolopito e uiga ki se vaegā papatisoga penei. E seai loa se vaegā fakamatalaga penā i te [F]eagaiga [F]ou; e seai foki ne faifaiga penā ne fai ne Kelisiano mua io me ko nisi lotu kolā ne faka‵tu aka fakamuli.”

E fai mai te Tusi Tapu me ‵tau mo soko o Iesu o olo “o fai a tino . . . mo fai a soko, kae papatiso atu latou . . . , akoako atu latou ke faka‵logo ki mea katoa ne fakatonu atu” ne ia. (Mata. 28:19, 20) A koi tuai se tino o fai mo fai se soko papatiso, e ‵tau mo ia o tauloto e uiga ki a Ieova mo Tena Tama, talitonu ki a lāua, kae faka‵logo ki a lāua. A te tino telā ko oti ne mate kae ko nofo i te tanuga e se mafai ne ia o fai a mea konā; io me fai ne se Kelisiano telā e ola nei a mea konā mō ia.—Fai. 9:5, 10; Ioa. 4:1; 1 Koli. 1:14-16.

Se a la te mea ne fakauiga a Paulo ki ei?

Ne fai mai a nisi tino Kolinito me i tino ‵mate ka sē faka‵tu aka. (1 Koli. 15:12) Ne ‵teke ne Paulo a te kilokiloga tenā. Ne fai mai a ia me ne ‘fepaki a ia mo te mate i aso takitasi.’ E tonu, ne ola a ia i te taimi tenā. Kae faitalia a tulaga fakama‵taku ne fepaki mo ia, ne talitonu a ia me kafai e mate a ia ka toe fakatu aka a ia ki te ola i te lagi, e pelā eiloa mo Iesu.—1 Koli. 15:30-32, 42-44.

E ‵tau o malamalama a tino Kolinito me i te fai pelā me se Kelisiano fakaekegina e fakauiga i ei me ‵tau mo latou o fakafesagai ki tofotofoga i aso takitasi kae oti ko ‵mate i ei mai mua o faka‵tu latou. A te “papatiso ke ‵kau fakatasi mo Keliso Iesu” e aofia i ei a te “papatiso foki ki tena mate.” (Loma 6:3) A te lotou papatisoga i se auala fakatusa e fakauiga i ei me ka fe‵paki latou mo tofotofoga, ko ‵mate i ei ko te mea ke mafai o toe faka‵tu aka ki te lagi.

I se lua tupu tausaga mai tua o te papatisoga o Iesu ki te vai, ne fai atu a ia ki ana apositolo e tokolua: “Ka papatiso foki koulua ki te papatisoga telā ne papatiso au ki ei.” (Male. 10:38, 39) Ne seki fakauiga a Iesu i konei ki te papatisoga ki te vai. Ne fakauiga a ia me i tena fakamaoni ki te Atua ka iku atu ki tena mate. Ne tusi mai a Paulo me i tino fakaekegina ka “puapuaga fakatasi ko te mea ke faka‵malugina foki fakatasi latou.” (Loma 8:16, 17; 2 Koli. 4:17) Tela la, e ‵tau foki mo latou o ‵mate ko te mea ke faka‵tu aka latou ki te lagi

E ‵tusa mo te mea tenā, e ‵tau eiloa o ‵fuli penei a pati a Paulo: “Kafai e se fai penā, se a la te mea ka fai ne latou kolā e papatiso ke fai latou e pelā me ne tino ‵mate? Kafai e se mafai o toe faka‵tu mai a tino ‵mate, kaia la e papatiso ei latou ke fai latou penā?”