1. E pefea ou lagonaga ona ko te alofa o te Atua?

“TE ATUA ko te alofa,” ko pati a te apositolo ko Ioane. (1 Ioa. 4:8) E fakamasaua mai ne te fuaiupu tenā se munatonu tāua: A te Atua, telā ko te Mafuaga o te ola, ko ia foki te Mafuaga o te Alofa. E alofa a Ieova ki a tatou! E fai ne tena alofa ke tokagamalie, ke fia‵fia kae ke lotoma‵lie tatou.

2. E ‵tusa mo te Mataio 22:37-40, ne a fakatonuga sili e lua, kae kaia e mafai ei o faigata ke faka‵logo ki te lua o fakatonuga?

² A te fakaasiatuga o te alofa se mea e ‵tau o fai ne Kelisiano. A te mea tenā se fakatonuga. (Faitau te Mataio 22:37-40.) Kafai ko iloa faka‵lei ne tatou a Ieova, ka faigofie ki a tatou ke faka‵logo ki te fakatonuga muamua, me e ‵lei katoatoa a Ieova; e atafai kae fai faka‵lei ne ia tatou. Kae kāti e tai faigata ki a tatou ke faka‵logo ki te lua o fakatonuga. Kaia? Me i ‵tou taina mo tuagane—kolā ko tuakoi ‵pili eiloa o tatou—e se ‵lei katoatoa. E mafai o fai ne latou i nisi taimi a pati mo faifaiga sē a‵lofa. E iloa ne Ieova me ka fe‵paki tatou mo te tulaga faigata tenei, tenā ne fakaosofia ei ne ia a nisi tino ne tusi ne latou te Tusi Tapu ke tusi mai ne latou a pati fakatonutonu e uiga ki pogai mo auala e ‵tau o fakaasi atu te alofa ki nisi tino. E tokotasi mai i a latou ko Ioane.—1 Ioa. 3:11, 12.

3. Se a te mea ne faka‵mafa mai ne Ioane?

³ Ne faka‵mafa mai ne Ioane i ana tusitusiga me e ‵tau mo Kelisiano o fakaasi atu te alofa. I ana tala e uiga ki te olaga o Iesu, e uke atu a taimi ne fakaaoga ne Ioane a pati penei “alofa” mo te “ne alofa” i lō nisi tusi Evagelia e tolu māfai ko tuku fakatasi. Kāti ko selau a tausaga o Ioane i te taimi ne tusi  ne ia tena tusi Evagelia mo ana nisi tusi e tolu. E fakaasi mai i tusitusiga fakaosofia konā me ko te alofa e ‵tau o fakamalosi ne ia a mea katoa e fai ne se Kelisiano. (1 Ioa. 4:10, 11) Kae e manakogina se taimi leva ke tauloto ne ia a mea tāua mai te akoakoga tenā.

4. E mata, ne fakaasi atu faeloa ne Ioane a te alofa ki nisi tino?

⁴ I te taimi koi tamataene ei a Ioane, ne seki fakaasi atu faeloa ne ia te alofa. E pelā mo te taimi e tasi, ne faima‵laga a Iesu mo ana soko ki Ielusalema kae ui atu i Samalia. Ne ita se fakai Samalia e tasi ma talimalo latou. Se a te mea ne fai ne Ioane? Ne fakamolemole atu a ia ke kalaga a ia ke tō mai te afi mai te lagi ke fakaseai a tino katoa i te fakai! (Luka 9:52-56) I te suā taimi, ne seki fakaasi atu ne Ioane te alofa ki ana taina apositolo. Ne fakakolekole ne lāua mo tena taina ko Iakopo a te lā mātua ke fakamolemole ki a Iesu ke tuku atu ne tulaga ma‵luga o lāua i ana feitu, i te Malo. I te iloaga ne nisi apositolo a te mea ne fai ne Iakopo mo Ioane, ne kaitāua malosi latou! (Mata. 20:20, 21, 24) Kae tiga i ei, ne alofa eiloa a Iesu ki a Ioane faitalia ana vāivāiga konā.—Ioa. 21:7.

5. Ne a mea ka iloilo ne tatou i te mataupu tenei?

⁵ I te mataupu tenei, ka iloilo ne tatou te fakaakoakoga a Ioane mo nisi mea ne tusi mai ne ia e uiga ki te alofa. Kae ka tauloto tatou ki te auala e mafai ei ne tatou o fakaasi atu te alofa ki ‵tou taina mo tuagane. Ka tauloto foki tatou ki se auala tāua e mafai o fakamaoni atu ei ne se ulu o te kāiga a tena alofa ki tena kāiga.

6. Ne fakaasi mai pefea ne Ieova tena alofa mō tatou?

⁶ E masani o mafau‵fau tatou me i te alofa ko te fakaasiatuga fua o lagonaga alofa mo pati a‵lofa. Kae ko te alofa tonu, e ‵tau o olo tasi mo faifaiga. (Fakatusa ki te Iakopo 2:17, 26.) E pelā me se fakaakoakoga, e alofa a Ieova ki a tatou. (1 Ioa. 4:19) E fakaasi mai ne ia tena alofa e auala i pati ‵gali ne fakamau i te Tusi Tapu. (Sala. 25:10; Loma 8:38, 39) Kae e tali‵tonu tatou me e alofa mai te Atua ki a tatou e se auala fua i ana pati kae penā foki loa mo ana faifaiga. Ne tusi mai a Ioane: “Ne fakaasi mai te alofa o te Atua ki a tatou e auala i te mea tenei, ne uga mai ne te Atua a tena Tama fagasele e tokotasi ki te lalolagi ko te mea ke mafai o maua ne tatou te ola e auala i a ia.” (1 Ioa. 4:9) Ne talia ne Ieova ke logo‵mae a tena Tama pele kae ke mate mō tatou. (Ioa. 3:16) E mata, e fakalotolotolua tatou ki te alofa o Ieova ki a tatou?

7. Ne a mea ne fai ne Iesu ke fakamaoni mai ei tena alofa mō tatou?

 ⁷ Ne fakamautinoa atu ne Iesu ki ana soko me e alofa a ia ki a latou. (Ioa. 13:1; 15:15) Ne fakamaoni ne ia te lasi o tena alofa mō latou pelā foki mo tatou e auala i ana pati kae penā foki mo ana faifaiga. Muna a Iesu “E seai se tino e sili atu tena alofa i lō te mea tenei, ko te tuku atu ne se tino a tena ola mō ana taugasoa.” (Ioa. 15:13) Kafai e mafau‵fau tatou ki mea ne fai ne Ieova mo Iesu mō tatou, se a te mea e fakamalosi mai i ei ki a tatou?

8. Se a te mea e fai mai i te 1 Ioane 3:18 ke fai ne tatou?

⁸ E fakamaoni atu ne tatou a te ‵tou a‵lofa ki a Ieova mo Iesu mai te faka‵logo ki a lāua. (Ioa. 14:15; 1 Ioa. 5:3) Kae ne fakatonu faka‵lei mai a Iesu ki a tatou ke fakatau a‵lofa te suā tino ki te suā tino. (Ioa. 13:34, 35) E se ‵tau mo tatou o fakaasi atu fua a te ‵tou a‵lofa ki ‵tou taina mo tuagane i ‵tou pati kae penā foki i ‵tou mea e fai. (Faitau te 1 Ioane 3:18.) Ne a mea e mafai o fai ne tatou ke fakamaoni atu ei me a‵lofa tatou ki a latou?

9. Se a te mea ne fai ne Ioane ona ko te alofa?

⁹ Ne mafai fua ne Ioane o ‵nofo mo tena tamana o galue i te pisinisi a te kāiga ke maua ne tupe. I lō te fai penā, ne fakaaoga ne ia te ‵toega o tena olaga ke fesoasoani ki tino ke tauloto ki te munatonu e uiga ki a Ieova mo Iesu. A te olaga ne filifili ne Ioane e se faigofie. Ne logo‵mae a ia i fakasauaga, kae i te fakaotiotiga o te senitenali muamua, i te taimi ko toeaina ei a ia, ne ave fakapagota a ia. (Galu. 3:1; 4:1-3; 5:18; Faka. 1:9) Ke oko foki loa ki te taimi ne ‵loka ei a ia ona ko tena talaiga e uiga ki a Iesu, ne mafaufau eiloa a Ioane ki nisi tino. E pelā mo tena nofoga i te motu ko Patamo, ne tusi ki lalo ne ia te fakaasiga ne maua ne ia kae ave ki fakapotopotoga ko te mea ke iloa ne latou “a mea kolā ko pili o ‵tupu.” (Faka. 1:1) Kae kāti i te taimi ne ‵tala mai a ia mai Patamo, tusi ei ne Ioane a tena tusi Evagelia e uiga ki te olaga o Iesu mo tena galuega talai. Ne tusi foki ne ia a nisi tusi e tolu ko te mea ke fakamalosi atu a taina mo tuagane. E mafai pefea o fakaakoako koe ki te vaegā olaga ne ola ei a Ioane?

10. E fakamaoni atu pefea ne koe tou alofa ki tino?

¹⁰ E mafai o fakamaoni ne koe tou alofa ki tino i te vaegā olaga e filifili ne koe. E manako te lalolagi a Satani ke fakaaoga ne koe ou taimi mo tou malosi mō koe eiloa, ke maua a tupe e uke kae ke takutakua koe. Kae ko tino talai o te Malo i te lalolagi kātoa e fakaaoga olotou taimi e uke ke talai atu te tala ‵lei kae fesoasoani ki tino ke fakapili‵pili ki a Ieova. Nisi tino e ga‵lue tumau i te talai mo te akoako atu.

11. E fakamaoni atu pefea ne tino talai fakamaoni e tokouke me a‵lofa latou ki a Ieova mo olotou taina mo tuagane?

¹¹ E tokouke a Kelisiano fakamaoni e ‵tau o ga‵lue tumau i galuega ‵togi ke tausi ki a latou mo olotou kāiga. Kae e ‵lago atu eiloa a tino talai fakamaoni konei ki te fakapotopotoga a te Atua i so se feitu. E pelā mo nisi tino e fesoasoani atu latou i taimi o fakalavelave ‵tupu fakafuasei, nisi tino e ga‵lue i galuega fakatu‵tu, kae maua ne tino katoa te tauliaga ke fai olotou meaalofa tupe ki te galuega e fai i te lalolagi kātoa. E fai ne latou a mea konei ona ko te lotou a‵lofa ki te Atua mo nisi tino. I vaiaso katoa, e fakaasi atu ne tatou a te ‵tou a‵lofa ki ‵tou taina mo tuagane mai te ‵kau ki fakatasiga a te fakapotopotoga kae fai tusaga i ei. E tiga loa e fi‵ta tatou, kae e ‵kau eiloa tatou ki fakatasiga konā. E fai eiloa ‵tou tali faitalia me pole‵pole tatou. Kae tiga loa e isi ne  ‵tou fakalavelave totino, e fakamalosi atu tatou ki nisi tino mai mua kae mai tua foki o te fakatasiga. (Epe. 10:24, 25) E loto fakafetai eiloa tatou ki te galuega e fai ne ‵tou taina mo tuagane pele!

12. Se a te suā auala ne fakamaoni atu ne Ioane me alofa a ia ki ana taina mo tuagane?

¹² Ne fakamaoni atu ne Ioane a tena alofa ki ana taina mo tuagane mai te fakamālō atu kae tuku atu foki a pati fakatonutonu ki a latou. Ne fakamālō atu a ia ki ana taina mo tuagane ona ko te lotou fakatuanaki mo olotou galuega ‵lei, kae ne tuku atu foki ne ia a pati fakatonutonu e uiga ki te agasala. (1 Ioa. 1:8–2:1, 13, 14) E penā foki tatou, e ‵tau o fakamālō atu tatou ki ‵tou taina mo tuagane mō mea ‵lei ne fai ne latou. Kae kafai ko kamata o ‵sae aka i se tino a uiga sē ‵lei, e fakaasi atu ne tatou a te alofa mai te faipati faka‵lei atu ki a ia a mea e ‵tau o iloa ne ia. E manakogina te loto malosi ke fai atu ne pati fakatonutonu ki se tino, kae e fai mai te Tusi Tapu me i te taugasoa tonu e fakamata, io me fakatonutonu ne ia te suā tino.—Faata. 27:17.

13. Se a te mea e ‵tau o ‵kalo kea‵tea tatou mai i ei?

¹³ I nisi taimi, e fakamaoni atu ne tatou a te ‵tou a‵lofa ki ‵tou taina mo tuagane mai mea kolā e se fai ne tatou. E pelā me se fakaakoakoga, e se ita vave tatou i pati e fai ne latou. Mafaufau ki se mea ne tupu i te taimi ko pili ei o mate a Iesu. Ne fai atu a ia ki ana soko me e ‵tau mo latou o ‵kai ki ana ‵kano kae inu ki tena toto ko te mea ke maua ne latou te ola. (Ioa. 6:53-57) Ne fai fakaa‵tea ki soko e tokouke a pati konā, tenā ne tiaki ei ne latou a ia—kae e se ko ana taugasoa ‵tonu, e aofia ei a Ioane. Ne ‵piki ‵mau latou mo te fakamaoni ki a ia. Ne seki malamalama latou i te uiga o pati a Iesu, tenā ne tai ‵poi eiloa latou i ei. Kae ko taugasoa fakamaoni o Iesu ne seki mafau‵fau me e ‵se ana pati io me ne kaitāua ki ei. I lō te fai penā, ne tali‵tonu latou me e faipati eiloa a ia ki te munatonu. (Ioa. 6:60, 66-69) Se mea tāua eiloa mō tatou ke mo a ma ita vave ona ko pati e fai ne ‵tou taugasoa! Kae ke tuku atu te avanoaga ke fakamatala mai a te mea e fakauiga latou ki ei.—Faata. 18:13; Fai. 7:9.

14. Kaia e se ‵tau ei o talia ne tatou ke takalia‵lia ki ‵tou taina mo tuagane?

¹⁴ Ne fakamalosi mai foki a Ioane ki a tatou ke mo a ma takalia‵lia ki ‵tou taina mo tuagane. Kafai e se faka‵logo tatou ki pati fakatonutonu konā, ka mafai o fakaaoga tatou ne  Satani. (1 Ioa. 2:11; 3:15) Tenā te mea ne tupu ki nisi tino i te senitenali muamua T.A. Ne fai ne Satani te ‵toe mea e mafai ne ia o fai ke fakamalosi te uiga takalialia ke fai ei ke mavae‵vae a tino o te Atua. I te otiga ne tusi ne Ioane ana tusi, ne ulu atu ki loto i te fakapotopotoga a tāgata kolā e fai pelā mo Satani. E pelā mo Siofilisi, ne taumafai a ia o fai ke mavae‵vae a te fakapotopotoga e tasi. (3 Ioa. 9, 10) Ne seki āva a ia ki taina faima‵laga kolā e sui mai ne latou te potukau pule. Ne taumafai foki a ia o ‵pei ki tua mo te fakapotopotoga a latou kolā e talimalo ki tino kolā e takalialia a ia ki ei. Ko oko loa i te masei! Koi taumafai eiloa a Satani o fai ke mavae‵vae a tino o te Atua i aso nei. Ke mo a eiloa ma talia ne tatou te uiga takalialia ke fai ei ke ‵nofo mavae‵vae tatou.

15. Se a te mea e ‵tau o masaua ne se ulu o se kāiga?

¹⁵ A te auala e tasi e fakamaoni atu ei ne se ulu o te kāiga me alofa a ia ki tena kāiga ko te tausi atu ki manakoga faka-te-foitino o tena kāiga. (1 Timo. 5:8) Kae e ‵tau o masaua ne ia me e se mafai ne mea faka-te-foitino o fakamalie aka ne ia a manakoga faka-te-agaga o tena kāiga. (Mata. 5:3) Mafaufau ki te fakaakoakoga ne tuku mai ne Iesu mō ulu o kāiga. E fai mai te Evagelia a Ioane, me i te taimi ko pili ei a Iesu o mate i te pou fakasaua, koi mafaufau eiloa a ia ki tena kāiga. Ne ‵tu a Ioane mo te mātua o Iesu, ko Malia, i te koga tenā ne tamate ei a Iesu. Faitalia te logo‵mae o ia, ne fakatoka ne Iesu a Ioane ke tausi ne ia a Malia. (Ioa. 19:26, 27) E isi ne taina mo tuagane o Iesu kolā e mautinoa me ka tausi atu ki a Malia, kae e foliga mai me seki ai se tino i a latou kai fai mo fai se soko. Tela la, ne fia fakamautinoa ne Iesu me isi se tino e saga tonu o tausi ki a Malia i te feitu faka-te-foitino pelā foki mo te feitu faka-te-agaga.

16. Ne a tiute o Ioane?

¹⁶ E uke ‵ki a tiute o Ioane. E pelā me se tokotasi o apositolo, ne takitaki ne ia te faiga o te galuega talai. Kāti e isi foki sena avaga, tela la, e ‵tau foki o tausi faka‵lei a ia ki manakoga o tena kāiga i te feitu faka-te-foitino mo te feitu faka-te-agaga. (1 Koli. 9:5) Se a te akoakoga mō ulu o kāiga i aso nei?

17. Kaia e tāua ei ke tausi se ulu o te kāiga ki manakoga faka-te-agaga o tena kāiga?

¹⁷ Kāti e uke a tiute tāua e ‵tau o saga atu ki ei se taina telā se ulu foki o se kāiga. E pelā  me se fakaakoakoga, e ‵tau mo ia o galue mo te fakamaoni i tena galuega ‵togi ko te mea ke avatu ei a vikiga ki te igoa o Ieova. (Efe. 6:5, 6; Tito 2:9, 10) Kae kāti e isi foki ne ana tiute i te fakapotopotoga, e pelā mo asiga e pelā me ne tausi mamoe mo te takitakiga o te galuega talai. E se gata i ei, e ‵tau foki o fai ne ia a sukesukega ki te Tusi Tapu mo tena avaga mo ana tama‵liki. Ka loto fakafetai eiloa latou ki ana taumafaiga ke tausi atu ki a latou i te feitu faka-te-foitino, feitu tau lagonaga, mo te feitu faka-te-agaga.—Efe. 5:28, 29; 6:4.

18. Se a te mea ne mautinoa i a Ioane?

¹⁸ Ne ola a Ioane i tausaga e uke kae uke a mea ne ‵tupu ki a ia. Ne fepaki a ia mo vaegā tulaga faiga‵ta kese‵kese kolā ne mafai o fakavāivāi ki a ia. Kae ne fai faeloa ne ia te ‵toe mea e mafai ke fakalogo ki fakatonuga a Iesu, e aofia ei te fakatonuga ke alofa ki ana taina mo tuagane. Tela la, ne mautinoa i a Ioane me i a Ieova mo Iesu e a‵lofa ki a ia kae ka tuku atu ne lāua ki a ia a te malosi ke manumalo i so se tofotofoga. (Ioa. 14:15-17; 15:10; 1 Ioa. 4:16) Ne seki mafai ne Satani mo tena lalolagi o taofi a Ioane mai te fakaasi atu o te alofa.

19. Se a te mea e fakamalosi mai i te 1 Ioane 4:7 ke fai ne tatou, kae kaia?

¹⁹ E pelā mo Ioane, e ola tatou i se lalolagi e pule ne Satani, te atua uiga takalialia o te olaga tenei. (1 Ioa. 3:1, 10) E tiga loa e manako a ia ko tatou ke sē a‵lofa ki ‵tou taina mo tuagane, e se mafai o taunu te mea tenā seiloga ke talia ne tatou a ia ke fai te mea tenā. Ke na fakaiku aka ne tatou ke a‵lofa ki ‵tou taina mo tuagane, ke fakaasi atu te alofa tenā e auala i ‵tou pati, kae fakamaoni atu te alofa tenā i ‵tou mea e fai. Tenā ka maua ei ne tatou te fiafia i loto i te kāiga fiafia o Ieova, kae ka aoga eiloa ki a tatou te olaga.—Faitau te 1 Ioane 4:7.