E ISI se poloka fatu mo tusitusiga i luga i ei, kolā kāti ne tusi i te 700-600 T.L.M., e tuku i te Fale Tausi Mea Mua ko te Bible Lands i Ielusalema. Ne maua a te fatu tenā i se ana telā ne tanu sāle ei a tino ‵mate i Hepelona i Isalaelu. E tusi i luga i ei a pati konei: “Ke malaia a Hagaf te tama tagata a Hagav e auala i a Yahweh Sabaot.” E ‵lago atu pefea te tusitusiga tenei ki te Tusi Tapu? E fakaasi mai ei me ne lauiloa a te igoa o te Atua, telā ne tusi i mataimanu Epelu ko te YHWH, kae ne fakaaoga i aso takitasi i taimi o te Tusi Tapu. A nisi tusitusiga kolā ne maua i ana penā e fakaasi mai ei me i tino kolā ne masani o maopoopo io me ‵muni i ana konā, ne tusi sāle ne latou a te igoa o te Atua, mo igoa totino kolā e isi se vaega o te igoa o te Atua e ulu i ei, i luga i ‵pui.

Ne fai mai a Dr. Rachel Nabulsi mai te University of Georgia e uiga ki tusitusiga konā, penei: “A te fakaaoga ‵soko o te igoa o YHWH e tāua ‵ki. . . . E fakaasi mai i tusitusiga konā a te tāua o YHWH i olaga o tino Isalaelu mo tino Iuta.” E ‵lago atu te mea tenei ki te Tusi Tapu telā e sae mai ei te igoa o te Atua i te ‵gana Epelu, ko YHWH, fakafia afe taimi. Se mea masani o aofia te igoa o te Atua i igoa totino o tino.

A “Yahweh Sabaot,” telā ne tusi i luga i te poloka fatu tenā, e fakauiga ki a “Ieova o kautau.” E foliga mai me e se ko te igoa fua o te Atua ne lauiloa i taimi o te Tusi Tapu kae penā foki te tugapati “Ieova o kautau.” E ‵lago atu foki te mea tenei ki te fakaaogaga o te tugapati “Ieova o kautau,” telā e sae mai faka-283 taimi i Tusitusiga Epelu, maise i tusitusiga a Isaia, Ielemia, mo Sakalia.