1. Ne aoga pefea a te fono telā ne fai i te 1935 ki se tamataene e tokotasi?

E ISI se tamataene ko 18 ana tausaga kae ne papatiso i te 1926. Ana mātua ne Tino A‵koga ki te Tusi Tapu, ko te igoa o Molimau a Ieova i te taimi tenā. E tokotolu lā tamaliki tāgata kae tokolua tamaliki fa‵fine kolā ne puti aka ne lāua ke tavini ki a Ieova kae fakaakoako ki a Iesu Keliso. Kae pelā mo te mea e fai ne Tino A‵koga ki te Tusi Tapu i aso konā, ne kai kae inu a te tamataene tenei ki te falaoa mo te uaina i tausaga katoa i te ‵Kaiga a te Aliki i te Afiafi. Kae ne ‵fuli tena fakamoemoega ki aso mai mua ne te lāuga tāua kae e se mafai o fakapuli ko “Te Vaitino Tokouke.” Ne fai a te lāuga tenā ne J. F. Rutherford i te 1935 i te fono lasi i Washington, D.C., U.S.A. Se a te mea ne fakaasi mai i te fono tenā?

2. Se a te munatonu fakafiafia ne fakaasi mai i te lāuga a te Taina ko Rutherford?

² I tena lāuga, ne fakamatala mai ne te Taina ko Rutherford a tino kolā ka fai pelā me ko te “vaitino tokouke” (King James Version), telā e fakaasi mai i te Fakaasiga 7:9. Muamua la, ne tali‵tonu latou me i te vaitino tokouke se suā potukau telā e olo foki ki te lagi kae ko te lotou fakatuanaki e se lasi pelā mo te kau fakaekegina. Ne fakaaoga ne te Taina ko Rutherford a te Tusi Tapu ke fakamatala atu i te vaitino e seki filifili ke ola i te lagi, kae ko latou ko nisi mamoe * a te Keliso kolā ka ‵sao i  te “fakalavelave lasi” kae ka ola ki te se-gata-mai i te lalolagi. (Faka. 7:14) Ne folafola mai a Iesu: “E isi foki ne aku nisi mamoe, kolā e se ‵tu i te lulu tenei; e ‵tau foki o aumai ne au a latou ki loto, kae ka faka‵logo latou ki toku leo, kae ka fai latou mo lafu mamoe e tasi, mo te tausi mamoe e tokotasi.” (Ioa. 10:16) A “nisi mamoe” konei ko Molimau a Ieova kolā e fakamaoni kae fakamoe‵moe ke ola ki te se-gata-mai i te Palataiso i te lalolagi nei. (Mata. 25:31-33, 46) Ka onoono nei tatou ki te auala ne ‵fuli i ei ne te mainaga fou tenei a olaga o tino o Ieova e tokouke, e aofia i ei a te taina telā ko 18 ana tausaga.—Sala. 97:11; Faata. 4:18.

3-4. I te fono i te 1935, ne a mea ne iloa aka ne tino e tokouke e uiga ki te lotou fakamoemoega, kae kaia?

³ Te taimi fakafiafia i te fono ko te taimi ne fesili atu ei te failauga ki te kautaina: “Fakamolemole e mafai o ‵tu ki luga a tino katoa kolā e fakamoe‵moe ke ola ki te se-gata-mai i te lalolagi?” Ne fai mai se tino telā ne nofo i konā, e silia atu mo te āfa o te toko 20,000 afe tino kolā ne ‵nofo i konā ne ‵tu ki luga. Fai atu ei a te Taina ko Rutherford: “Kiloke! Ki te vaitino tokouke!” Kae ne paka‵laga katoa a tino mo te fia‵fia. Ne iloa ne tino kolā ne tu ki luga i a latou ne seki filifili ke ola i te lagi. Ne iloa ne latou me seki fakaeke latou ki te agaga o te Atua. I te suā aso o te fono, e ‵tusa mo te toko 840 molimau fou ne papatiso, kae ko te tokoukega o latou ne nisi mamoe.

⁴ Mai tua o te lāuga, ne fakagata ne te tamataene telā ne sae mai muamua mo nisi tino e tokouke a te lotou ‵kai kae inu ki te falaoa mo te uaina i te taimi o te ‵Kaiga a te Aliki i te Afiafi. Ne fakaasi mai ne se taina a lagonaga o nisi tino e tokouke i ana pati konei: “A te Fakamanatuga i te 1935 ko te ‵toe taimi ne kai kae inu ei au ki te falaoa mo te uaina. Ko iloa ne au me seki filifili aka au ne te agaga tapu o Ieova ke ola i te lagi, kae ui i ei, e maua ne au a te fakamoemoega ke ola i te lalolagi kae kau ki te ‵fuliga ke fai pelā me se palataiso.” (Loma 8:16, 17; 2 Koli. 1:21, 22) Talu mai te taimi tenā, ne gasolo aka ki luga te aofaki o te vaitino tokouke kae ne ga‵lue fakatasi a latou mo te ‵toega * o te kau fakaekegina.

5. Se a te kilokiloga a Ieova ki tino kolā ko oti ne fakagata te lotou ‵kai kae inu ki mea fakatusa o te Fakamanatuga?

⁵ Se a te kilokiloga a Ieova ki a latou kolā ne taofi aka te lotou ‵kai kae inu ki te falaoa mo te uaina i te 1935? Kae e a māfai e isi se Molimau papatiso i aso nei ne talitonu i a ia e ‵tau o kai kae inu ki te falaoa mo te uaina i te ‵Kaiga a te Aliki i te Afiafi kae fakamuli ifo ko iloa ne ia i a ia e seki fakaekegina ki te agaga tapu? (1 Koli. 11:28) A nisi tino ne kai kae inu ki te falaoa mo te uaina me e se malamalama i te lotou fakamoemoega. Kae kafai e fakaasi atu ne latou mo te fakamaoni te lotou mea ‵se, fakagata te ‵kai kae inu ki te falaoa mo te uaina, kae tumau i te tavini mo te fakamaoni ki a Ieova, e mautinoa eiloa me ka aofia ne ia latou i nisi mamoe. E tiga eiloa e se ‵kai kae inu latou ki te falaoa mo te uaina, ne ‵kau eiloa latou ki te Fakamanatuga ona ko te lasi o te lotou loto fakafetai ki te mea ne fai ne Ieova mo Iesu ki a latou.

6. Ne a mea ne fakatonu atu ne Iesu ke fai ne agelu?

⁶ Ona ko te pili mai o te fakalavelave lasi, ka mafai o fakamalosigina tatou māfai e sau‵tala  ki pati i te Fakaasiga mataupu e 7 e uiga ki Kelisiano fakaekegina mo te vaitino tokouke o nisi mamoe. Ne fakatonu atu a Iesu ki agelu ke tumau i te taofi o matagi e fa o te fakaseaiga. E se ‵tau o ‵tala mai ne latou a matagi konā ki te lalolagi ke oko ki te taimi e fakamailoga i ei a Kelisiano fakaekegina, ko tena uiga ko oti ne talia latou ne Ieova. (Faka. 7:1-4) E pelā me se ‵togi o te lotou fakamaoni, ka fai eiloa a taina fakaekegina o Keliso e pelā me ne tupu mo faitaulaga fakatasi mo ia i te lagi. (Faka. 20:6) Ka fia‵fia eiloa a Ieova, Iesu mo agelu ke ‵kilo atu ki te kau fakaekegina kolā e toko 144,000 e maua te lotou taui i te lagi.

7. E pelā mo te mea e fakaasi mai i te Fakaasiga 7:9, 10, ko oi ne lavea ne Ioane i te fakaasiga, kae ne a olotou mea e fai? (Ke onoono ki te ata i te ‵kava.)

⁷ I te otiga ne faipati e uiga ki tupu mo faitaulaga konei e toko 144,000, ne lavea ne Ioane se mea fakafiafia, “se vaitino tokouke” kolā ne ‵sao i Amaketo. E se pelā mo te potukau muamua, a te potukau tenei i te lua e tokouke atu kae seai se aofaki mautinoa o latou. (Faitau te Fakaasiga 7:9, 10.) A latou “e ‵pei ki gatu ‵loa ‵kena,” e fakaasi mai ei me ne tausi ne latou a latou ke ‵ma “e aunoa mo se lailaiga” mai te lalolagi a Satani kae ne tumau latou i te fakamaoni ki te Atua mo Keliso. (Iako. 1:27) E ka‵laga latou i a latou ne faka‵sao ona ko te mea ne fai ne Ieova mo Iesu, telā ko te Tamā Mamoe a te Atua. Kae puke eiloa i olotou lima a kaula o te lakau ko te pama, telā e fakaasi atu ei ne latou mo te fia‵fia me ko talia ne latou a Iesu e pelā me ko te tupu filifilia a Ieova.—Fakatusa ki te Ioane 12:12, 13.

8. Se a te mea e fakaasi mai i te Fakaasiga 7:11, 12 e uiga ki te kaukāiga o Ieova i te lagi?

⁸ Faitau te Fakaasiga 7:11, 12. Ne a mea ne ‵tupu ki tino i te lagi? Ne lavea ne Ioane a tino katoa i te kāiga o Ieova i te lagi e fia‵fia i te taimi ne lavea ei ne latou a tino o te vaitino tokouke e ‵viki ki te Atua. Ka fia‵fia eiloa a te kaukāiga o Ieova i te lagi ke ‵kilo atu ki te fakataunuga o te fakaasiga tenei, māfai ko ‵sao mai ki tua a te vaitino tokouke mo te fakalavelave lasi.

9. E pelā mo te Fakaasiga 7:13-15, ne a mea e fai ne te vaitino tokouke i aso nei?

⁹ Faitau te Fakaasiga 7:13-15. E fai mai a Ioane i te vaitino tokouke “ne ‵ta ne latou olotou gatu ‵loa kae faka‵kena ki te toto o te Tamā Mamoe.” E fakaasi mai ei me maua ne latou se loto lagona ‵ma mo se tulaga amiotonu i mua o Ieova. (Isa. 1:18) A latou ne Kelisiano papatiso kolā ne malosi te lotou fakatuanaki ki te taulaga a Iesu kae ne maua ne latou se fesokotakiga ‵lei mo Ieova. (Ioa. 3:36; 1 Pe. 3:21) Tela la, ne fetaui ‵lei eiloa latou ke ‵tu i mua o te nofogaaliki o te Atua kae tuku atu “te taviniga tapu ki a ia i te ao mo te po” i te koga ateatea o tena faletapu faka-te-agaga i te lalolagi. Kae i te taimi tenei, e fai ne latou mo te loto finafinau a te vaega lasi o te galuega ki te talaiga o te Malo mo te faiga o soko, kae fakamuamua ne latou a manakoga o te Malo i lō olotou manakoga.—Mata. 6:33; 24:14; 28:19, 20.

10. Se a te mea e mautinoa i te vaitino tokouke, kae se a te folafolaga telā ka lavea ne latou tena fakataunuga?

¹⁰ E mautinoa i te vaitino tokouke kolā ka ‵sao i te fakalavelave lasi i te alofa o te Atua ka tumau eiloa, me i “te Atua telā e sagasaga i te nofogaaliki ka ‵fola ne ia tena faleie mai i luga i a latou.” Kae ko te folafolaga telā ne ma‵nako malosi a nisi mamoe ke lavea ne latou me ka fakataunu ka taunu eiloa: “Ka ‵solo kea‵tea ne [te Atua] a loimata katoa mai i olotou mata, kae ka se toe ai se mate, ka se toe  ai foki se fanoanoa, se tagi io me se ‵mae.”—Faka. 21:3, 4.

11-12. (a) E pelā mo te Fakaasiga 7:16, 17, ne a fakamanuiaga ka maua ne te vaitino tokouke i aso mai mua? (e) Ne a mea e mafai o fai ne nisi mamoe i te Fakamanatuga, kae kaia?

¹¹ Faitau te Fakaasiga 7:16, 17. I te taimi nei, e fe‵paki a tino o Ieova mo te fia‵kai ona ko te sē lava o tupe mo ‵togi meakai io me ko pokotiaga mai taua i loto i te fenua. Ne falepuipui a nisi tino ona ko te lotou fakatuanaki. Kae fia‵fia eiloa te vaitino tokouke ke iloa atu me kafai ko ‵sao latou i te fakanofonofoga masei tenei, ka maua faeloa ne latou a meakai faka-te-agaga mo meakai faka-te-foitino e uke. Kafai ko fakaseai te fakanofonofoga a Satani, ka ‵sao eiloa a te vaitino tokouke mai “mea ‵vela” o te kaitaua o Ieova telā ka ‵ligi ki luga i fenua. Kafai ko oti te fakalavelave lasi, ka takitaki ne Iesu a latou konei ne ‵sao i te lalolagi ki “vai o te ola [se-gata-mai].” Mafaufau la: E maua eiloa ne te vaitino tokouke se fakamoemoega tu ‵kese. E fia piliona o tino kolā e ola, ka se mate eiloa!—Ioa. 11:26.

¹² E maua ne nisi mamoe se fakamoemoega gali ke loto fakafetai ki a Ieova mo Iesu! E se fili latou ke ola i te lagi, kae e se ko tena uiga me e se tāua latou ki a Ieova. E mafai katoa ne tino mai potukau e lua o ‵viki ki te Atua mo Keliso. E tasi te auala ke fai penā ko te ‵kau atu ki te ‵Kaiga a te Aliki i te Afiafi.

13-14. Kaia e ‵tau ei o kau so se tino ki te Fakamanatuga o te mate o Keliso?

¹³ I tausaga fakamuli kāti a te lasiga o fakapotopotoga e seai se tino e kai kae inu ki te falaoa mo te uaina i te Fakamanatuga. A te tokoukega kolā e ‵kau ki te Fakamanatuga e fakamoe‵moe ke ola i te lalolagi. Kae kaia e ‵kau ei latou ki te ‵Kaiga a te Aliki i te Afiafi? A te pogai e ‵kau ei latou e ‵pau eiloa mo te pogai e ‵kau ei a tino ki se fakaipoipoga a se lotou taugasoa. E ‵kau latou ke fakaasi atu te lotou a‵lofa kae ‵lago ki te tauavaga fatoa fakaipoipo. Tela la, a nisi mamoe e ‵kau ki te Fakamanatuga ke fakaasi atu te lotou a‵lofa kae ‵lago ki a Keliso mo te kau fakaekegina. E ‵kau atu foki a nisi mamoe ke fakaasi atu te lotou loto fakafetai ki te taulaga telā e fakamanatu i ei te Fakamanatuga, se taulaga telā  ko mafai ei o ola latou ki te se-gata-mai i te lalolagi.

¹⁴ A te suā pogai e ‵kau ei a nisi mamoe ki te Fakamanatuga, ko te mea ke faka‵logo ki te fakatonuga a Iesu. I te taimi ne kamata ei ne Iesu a te ‵kaiga fakapito tenā mo ana apositolo fakamaoni, ne fai atu a ia: “Ke fai faeloa te mea tenei mo fai se fakamasauaga ki a au.” (1 Koli. 11:23-26) E tumau loa te lotou ‵kau ki te ‵Kaiga a te Aliki i te Afiafi ki te leva loa e ola ei a te ‵toega o tino fakaekegina i te lalolagi nei. Tela la, e ‵kami ne nisi mamoe so se tino ke ‵kau fakatasi mo latou ki te Fakamanatuga.

15. E mafai pefea o ‵viki atu koe ki te Atua mo Keliso i te Fakamanatuga?

¹⁵ I te Fakamanatuga, e maua ne tatou te avanoaga ke ‵viki ki te Atua mo Keliso e auala i pese mo ‵talo. A te matua o te lāuga telā ka fai i te tausaga tenei ko te “Ke Loto Fakafetai ki te Mea ne Fai ne te Atua mo Keliso mō Koe!” Ka faka‵poko ne ia te ‵tou loto fakafetai ki a Ieova mo Keliso. Kafai ko pāsi a te falaoa mo te uaina, ka masaua ne tino kolā ne ‵kau atu ki ei a uiga o mea fakatusa konā—ko te foitino o Iesu mo tena toto. Ka masaua foki ei ne tatou me ne talia ne Ieova ke mate tena Tama mō tatou, ke mafai o maua ne tatou te ola. (Mata. 20:28) A tino katoa kolā e a‵lofa ki te ‵tou Tamana i te lagi mo tena Tama ka fia ‵kau atu ki te Fakamanatuga.

16. I auala fea e ‵pau ei a tino fakaekegina mo nisi mamoe?

¹⁶ A te ‵kese i te kau fakaekegina mo nisi mamoe e se ko te lotou tāua ki te Atua. E ‵pau eiloa te lotou tāua ki a ia. E se gata i ei, e tasi te ‵togi ne ‵togi ki ei a tino fakaekegina mo nisi mamoe, ko te ola o tena Tama pele. A te ‵kesega fua i potukau e lua konei ko olotou fakamoemoega e ‵kese. Kae ko potukau katoa e lua e ‵tau o tumau i te fakamaoni ki te Atua mo Keliso. (Sala. 31:23) E ‵pau eiloa te malosi o te agaga tapu o te Atua e galue i a tatou katoa. Ko tena uiga, e tuku mai ne Ieova a tena agaga tapu ki tino taki tokotasi e ‵tusa mo te mea e manakogina.

17. Ne a mea e olioli malosi ki ei a te ‵toega o te kau fakaekegina?

¹⁷ A Kelisiano fakaekegina ne seki fa‵nau mai mo te fakamoemoega ke ola i te lagi. Ne tuku ne te Atua ki olotou loto. E mafau‵fau latou ki te lotou fakamoemoega, e ‵talo latou e uiga ki ei, kae olioli malosi ke maua te lotou taui i te lagi. E se iloa ne latou me ka pefea olotou foitino faka-te-agaga. (Fili. 3:20, 21; 1 Ioa. 3:2) Tela la, e olioli malosi latou ke fetaui mo Ieova, Iesu, mo agelu, mo te kau fakaekegina katoa. E ma‵nako malosi latou o puke olotou tulaga i te Malo i te lagi.

18. Ne a mea e olioli malosi ki ei a nisi mamoe?

 ¹⁸ A nisi mamoe e fakatāua ne latou te fakamoemoega telā ne fa‵nau mai loa mo latou, ko te ola ki te se-gata-mai i te lalolagi. (Fai. 3:11) E olioli malosi latou ki te aso ka fesoasoani ei latou o ‵fuli te lalolagi mo fai se palataiso. E ma‵nako malosi latou ki te aso ka mafai ei o faite olotou fale, ‵toki olotou fatoaga, kae puti aka olotou tamaliki i se olaga telā e ‵lei katoatoa. (Isa. 65:21-23) E ma‵nako foki latou ke mata‵mata i te lalolagi—mauga, vao, mo kogā tai—kae ke tauloto foki latou ki mea e uke a te Atua ne faite. Kae sili i mea katoa, e fia‵fia malosi latou ke iloa atu i te lotou fesokotakiga mo Ieova e gasolo aka eiloa o malosi kae pili.

19. Se a te avanoaga e tuku mai ne te Fakamanatuga ki a tatou taki tokotasi, kae ko te taimi fea ka fai ei a te Fakamanatuga i te tausaga tenei?

¹⁹ Ne tuku mai ne Ieova ki ana tavini tukugina atu taki tokotasi se fakamoemoega gali i aso mai mua. (Iele. 29:11) E tuku mai ne te Fakamanatuga o te mate o Keliso se avanoaga fakapito ki a tatou taki tokotasi ke ‵viki ki te Atua mo Keliso ona ko mea ne fai ne lāua mō tatou ke maua te ola se-gata-mai. E seai se fakalotolotolua i te Fakamanatuga ko te ‵toe fakatasiga tāua mō Kelisiano ‵tonu ke ‵kaufakatasi. Ka fai a te Fakamanatuga i te Aso Ono, Mati 27, 2021 māfai ko tō te mata o te la. I te tausaga tenei e tokouke a tino ka mafai o ‵kau ki te fakatasiga tāua tenei i so se koga e ‵lei ki a latou. Ka ‵kau atu a nisi tino faitalia a tekemaiga. A nisi tino ka fakamanatu ne latou i loto i falepuipui. I te taimi e kilo‵kilo mai ei a Ieova, Iesu, agelu mo te kau fakaekegina, e fakamoe‵moe eiloa latou ke gali a te faiga o Fakamanatuga a fakapotopotoga katoa, potukau, mo tino taki tokotasi!