‘Ke Tonu te Akoako Atu o te Muna a te Atua’

“Taumafai malosi o tuku atu koe ki te Aliki e pelā mo se tino ko fakamaonia me ko ‵tau, se tino galue telā e se ‵tau mo ia o taema ki se mea, kae se tino e akoako tonu eiloa ne ia a te munatonu a te Atua.”​​—2 TIMOTEO 2:15.

1, 2. (a) Kaia e ma‵nako ei a tino ga‵lue ki mea faigaluega? (e) Ne a galuega e aofia i ei a Kelisiano, kae e fakaasi atu pefea ne latou me e ‵sala muamua latou ki te Malo?

E MA‵NAKO a tino ga‵lue ki mea faigaluega ke fai ki ei olotou galuega. Kae e se fai fua te galuega ki so se mea faigaluega. E ‵tau o maua ne te tino galue a te mea faigaluega tonu, kae e ‵tau foki o fakaaogā ne ia i te auala tonu. Kafai e faite aka se tamā fale, kae manako koe o soko se avā laupapa, e se manako fua koe ki se samala mo fao. E ‵tau o iloa ne koe o ‵tuki a te fao ki loto i te laupapa kae sē piko. Ka faigata ‵ki ke ‵tuki ne koe se fao ki se laupapa māfai e se iloa ne koe o fakaaogā te samala. Kae ka fesoasoani mai te fakaaogāga tonu o mea faigaluega ke fakaoti faka‵lei ‵tou galuega kae ke fia‵fia foki ki ei.

² E pelā me ne Kelisiano, e isi se galuega e fai ne tatou. Ko te ‵toe galuega tāua eiloa. Ne fakamalosi atu a Iesu Keliso ki ana soko ke ‘‵sala muamua ki te malo.’ (Mataio 6:33) E mafai pefea o fai ne tatou te mea tenā? A te auala e tasi ko te loto finafinau o talai atu te Malo mo te faiga o soko. A te suā auala ko te fakavae tonu o te ‵tou galuega ki te Muna a te Atua. A te tolu o auala ko ‵tou amioga ‵lei. (Mataio 24:14; 28:​19, 20; Galuega 8:​25; 1 Petelu 2:​12) Ko te mea ke magoi kae ke fia‵fia tatou ki te ‵tou galuega faka-Kelisiano, e ‵tau o maua ne tatou a mea faigaluega ‵tonu kae ke iloa foki ne tatou o fakaaogā a mea faigaluega konā. I te feitu tenei, ne tuku mai ne te apositolo ko Paulo se fakaakoakoga sili e pelā me se tavini Kelisiano, kae ne fakamalosi atu a ia ki ana taina tali‵tonu ke fakaakoako atu ki a ia. (1 Kolinito 11:1; 15:10) Tela la, ne a ‵tou mea e mafai o tauloto mai i a Paulo, te ‵tou taina tavini?

Paulo​​—Se Tino Talai Loto Finafinau o te Malo

3. Kaia e mafai ei o fai atu me i te apositolo ko Paulo se tino talai loto finafinau o te Malo?

³ A Paulo, se vaegā tino galue pefea? Ne loto finafinau eiloa a ia. Ne fakapalele ana mafi i te folafolaatuga o te tala ‵lei i koga e uke i tafatafa o te Tai Metitilani. Ne fai mai te apositolo fui ‵fiu e uiga ki te pogai ne maua ei ne ia te loto finafinau ke folafola atu te tala ‵lei o te Malo, penei: “Me kafai e folafola ne au te tala ‵lei, e se se mea e ‵tau o fakamatamata au ki ei. Au e pulea ne fakatonuga ke fai ne au. Kae ka pefea eiloa i te masei a  mea ka ‵tupu ki a au, manafai e se folafola ne au a te tala ‵lei!” (1 Kolinito 9:16) E mata, ne manavase fua a Paulo i a ia ma fakasala? Ikai. Ne seki saga ifo a Paulo ki a ia eiloa. I lō te fai penā, ne manako a ia ke maua foki ne nisi tino a mea aogā mai te tala ‵lei. Ne tusi mai a ia, penei: “Tela la, e ola au i so se vaegā olaga o tino, ko te mea ke fakaola ne au nisi o latou.”​—1 Kolinito 9:22.

4. Se a te mea faigaluega e fakatāua malosi ne Kelisiano?

⁴ A te apositolo ko Paulo se tagata agamalū telā e iloa ne ia me e se mafai o fakalagolago katoatoa a ia ki tena atamai. E pelā eiloa mo te kamuta telā e manako ki se samala, ne manako foki a Paulo ki se mea faigaluega tonu ke faka‵goto ifo i ei a muna‵tonu mai te Muna a te Atua ki loto o ana tino fakalogo‵logo. Se a la te mea faigaluega sili ne fakaaogā ne ia? Ko te Muna a te Atua, ko te Tusi Tapu. E penā foki te fai o te Tusi Tapu mo fai te ‵toe mea faigaluega sili ke fesoasoani mai ki a tatou i te faiga o soko.

5. Ko te mea ke fai tatou e pelā me ne tino talai ma‵goi, ne a ‵tou mea e ‵tau o fai i tafa o te faitau atu fua mai te Tusi Tapu?

⁵ Ne iloa ne Paulo me e uke atu a mea e aofia i te akoako tonu atu o te Muna a te Atua i lō te faitau fua ki ei. Ne “taumafai a ia ke ‵fuli mai latou.” (Galuega 28:23) E pefea la? Ne manuia eiloa a Paulo i te fakaaogāga o te Muna a te Atua ke fakatalitonu atu ki tino ke talia ne latou te munatonu e uiga ki te Malo. Ne fakasako‵sako a ia mo latou. I te tolu masina ne nofo atu ei a Paulo i Efeso, ne fakasako ‵sako mo latou, “kae ne taumafai atu foki a ia ke ‵fuli mai latou ki te Malo o te Atua.” E tiga eiloa ne “isi ne tino o latou ko oko eiloa i te loto make‵ke kae sē fia tali‵tonu,” ne faka‵logo eiloa a nisi tino. Ona ko galuega a Paulo i Efeso, ne “salalau atu kae ola malosi ake” ei te Muna a te Atua.​—Galuega 19:​8, 9, 20.

6, 7. Ne faka‵malu pefea ne Paulo a tena galuega, kae mafai pefea o fai foki tatou penā?

⁶ E pelā me se tino talai o te Malo loto finafinau, ne ‘faka‵malu ne Paulo a tena galuega.’ (Loma 11:13) E pefea la? Ne seki fia lauiloa a Paulo io me ne mā i a ia ma lauiloa e pelā me se tino galue a te Atua. I lō te fai penā, ne kilo atu a ia ki tena galuega e pelā me ko te ‵toe mea tāua eiloa. Ne apo a Paulo i te fakaaogāga o te Muna a te Atua kae magoi foki. Ne fakamalosi atu ki nisi tino a fua o ana galuega kae fesoasoani atu foki ki a latou ke fakataunu faka‵lei te lotou galuega. I te auala foki tenei ne faka‵malu atu ei ki tena galuega.

⁷ E pelā mo Paulo, e mafai foki o ‵malu te ‵tou galuega e pelā me ne faifeau mai te fakaaogā faeloa mo te magoi a te Muna a te Atua. I vaega katoa o te ‵tou galuega, a te fakamoemoega tāua ko te fai atu o se mea mai te Tusi Tapu ki tino e tokouke. E mafai pefea o magoi te faiga o te mea tenā? Ke mafau‵fau ki feitu tāua e tolu: (1) Ke fakasino tonu atu ki te Muna a te Atua ko te mea ke āva a tino ki ei. (2) Ke atafai au fakamatalaga ki mea kolā e fakaasi mai i te Tusi Tapu mo te auala ke fakagalue aka ei. (3) Ke fakasakosako atu mai te Tusi Tapu i se auala telā e faigofie o talitonu ki ei.

8. Ne a mea faigaluega o te Malo e mafai o maua i aso nei, kae ne fakaaogā pefea ne koe?

⁸ Ne seki maua ne Paulo a mea faigaluega kolā ko maua ne tino talai o te Malo i aso nei, i te faiga o tena galuega. E aofia i ei a tusi, mekesini, polosiua, pepa ‵kami, tamā pepa mo letio mo vitio kaseti. I aso mua ne fakaaogā sāle foki a testimony cards, laleo, mea faka‵lasi leo i motoka mo fakasalalauga i letio. Kae e tonu la me i te ‵toe mea faigaluega tāua a tatou ko te Tusi Tapu kae e ‵tau o fakaaogā faka‵lei a te mea faigaluega tenā.

E ‵Tau o Fakavae te ‵Tou Galuega ki te Muna a te Atua

9, 10. E ‵tusa mo te fakaaogāga o te Muna a te Atua, ne a mea e mafai o tauloto ne tatou mai pati polopoloki a Paulo ki a Timoteo?

⁹ E mafai pefea o magoi te fakaaogā ne tatou a te Muna a te Atua e pelā me se mea faigaluega? Mai te ‵saga tonu atu ki pati a Paulo ki tena taina galue ko Timoteo: “Taumafai malosi o tuku atu koe ki te Aliki e pelā mo se tino ko fakamaonia me ko ‵tau, se tino galue telā e se ‵tau mo ia o taema ki se mea, kae se tino e akoako tonu eiloa ne  ia a te munatonu a te Atua.” (2 Timoteo 2:15) Ne a mea e aofia i te ‘akoako ‵tonu atu o te munatonu a te Atua’?

¹⁰ A te pati Eleni telā e fakauiga ki te “akoako tonu” e fakauiga ki te “‵kati faka‵tonu” io me ko te “‵kati faka‵tonuga o se auala.” Ne fakaaogā fakatasi fua te tugāpati tenā i pati polopoloki a Paulo ki a Timoteo i Tusitusiga Eleni faka-Kelisiano i te Tusi Tapu. E mafai foki o fakauiga a te pati tenā ki te ‵tonu o laina o lakau kaina i se fatoaga. Se mea fakamā ‵ki ki se tino fai fatoaga apo māfai e piko te faifaiga tenā. Ko te mea ke fai pelā me se “tino galue telā e se ‵tau mo ia o taema ki se mea,” ne fakamasaua atu ki a Timoteo me e se mafai o talia ke ‵seke ana akoakoga mai te Muna a te Atua. E seki ‵tau o fakaaogā ne Timoteo ana manatu totino i ana akoakoga. Ne ‵tau eiloa o fakavae tonu tena talaiga mo ana akoakoga ki te Tusi Tapu. (2 Timoteo 4:​2-4) I te faiga tenei, ko ‵taki atu ei a tino loto fakamaoni ki manatu o Ieova kae sē ki manatu fia ‵poto o te lalolagi. (Kolose 2:​4, 8) E penā foki eiloa i aso nei.

E ‵Tau o ‵Lei ‵Tou Amio

11, 12. E aogā pefea a ‵tou amioga i te akoako tonu atu o te Muna a te Atua?

¹¹ E ‵tau o uke atu ‵tou mea e fai i tafa o te akoako ‵tonu atu o te Muna a te Atua mai te folafolaatuga o te munatonu. E ‵tau o fetaui ‵tou amioga mo mea kolā e fakaasi mai i ei. Me i a tatou e “ga‵lue fakatasi mō te Atua,” e se ‵tau o taku tatou pelā me ne tino ‵pelo. (1 Kolinito 3:9) E fai mai te Muna a te Atua, penei: “Ai a e akoako ei ne koe a nisi tino, kae sē akoako koe ki a koe eiloa? E lauga atu ne koe te sē kaisoa, ka ko koe e kaisoa. Ne fai mai koe me sē ‵tau se tino o mulilua, ka ko koe e mulilua. A koe e takalialia ki tupua, kae tela la, e ‵fao mālō ne koe a mea tapu i fale tapuaki ki tupua.” (Loma 2:​21, 22) E pelā me ne tino ga‵lue  a te Atua i aso nei, a te auala e tasi e mafai ei o akoako tonu atu ne tatou a te Muna a te Atua ko te ‵saga tonu atu ki pati polopoloki konei: “Talitonu ki te Aliki mo tou loto katoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.”​—Faataoto 3:​5, 6.

¹² Ne a ikuga e maua ne tatou mai te akoako tonu atu o te Muna a te Atua? Ke mafaufau ki te malosi o te Muna tusia a te Atua ki olaga o tino loto fakamaoni.

Te Malosi ‵Fuli Tino o te Muna a te Atua

13. Se a te mea e mafai o maua ne se tino mai te ola e tusa mo te Muna a te Atua?

¹³ Ona ko te mea e fakatuagagina, e tuku mai ne te fekau i te Muna a te Atua se fakamalosiga tāua telā e fesoasoani atu ki tino ke fai ne latou a ‵fuliga i olotou olaga. Ko oti ne lavea ne Paulo te malosi o te muna a te Atua kae ne molimau atu e uiga ki ei ki tino kolā ko oti ne fai pelā me ne Kelisiano i Tesalonia. Ne fai atu ei a ia ki a latou, penei: “E fakafetai faeloa matou ki te Atua. I te avatuga ne matou a te talaiga a te Atua, ne lagona kae talia foki ne koutou, e se ona ko te mea se talaiga a se tino, ka ko te talaiga eiloa a te Atua. Me i te Atua e galue i loto i a koutou konā e tali‵tonu.” (1 Tesalonia 2:13) Ki Kelisiano konā​—e pelā foki mo soko ‵tonu katoa o Keliso​—e se tāitāi eiloa o fetaui a poto o tāgata mo te lasi o te poto o te Atua. (Isaia 55:9) Muna a Paulo ki te kau Tesalonia: “E ui eiloa i te puapuagatia masei o koutou, kae ne maua eiloa ne koutou a te talaiga mo te fiafia lasi telā ne alatu i te Agaga Tapu.” Kae ne fai te mea tenā mo fai se fakaakoakoga ki nisi tino tali‵tonu.​—1 Tesalonia 1:​5-7.

14, 15. E pefea te malosi o te fekau i te Muna a te Atua, kae kaia?

¹⁴ E malosi ‵ki te Muna a te Atua e pelā eiloa mo tena Māfuaga, ko Ieova. Ne maua te mea tenā mai i te “Atua ola,” ko te tino telā ne faite ne ia “a lagi” i tena fakatonuga, kae e ‘se mafai o sē fakataunu’ ne te muna tenā so se mea telā ne fai atu ke fai ne ia. (Epelu 3:12; Salamo 33:6; Isaia 55:11) Ne fai mai se tagata poto i te Tusi Tapu, penei: “E se ‵vae ne te Atua a ia keatea mo tena Muna. E se fakafiti foki ne ia e pelā me se mea fakaatea. . . . Tela la, e se mafai eiloa o fai te muna e pelā me se mea mate fua, telā e se pokotia i mea kolā e ‵tupu ki ei; ona ko te la fesokotakiga mo te Atua ola.”

¹⁵ E pefea te malosi o te fekau telā e maua i te muna a te Atua? E malosi ‵ki eiloa. E fetaui ‵lei mo pati a Paulo: “Me i te muna a te Atua e ola kae galue mo te ‵mana. E sili atu foki tona ‵kai i se pelu e ‵kai matalua. E suki ne ia te loto mo te agaga ke mavaelua, ke oko foki eiloa ki sokoga ivi mo ‵kano; e fakamasino foki ne ia a manako mo mafaufauga o loto o tino.”​—Epelu 4:12.

16. E ‵fuli katoatoa pefea ne te Muna a te Atua se tino?

¹⁶ A te fekau i te Muna a te Atua e sili atu tona “‵kai i se pelu e ‵kai matalua.” Tela la, e sili atu a tena malosi i lō so se isi mea faigaluega a tāgata. E ‵suki ne te Muna a te Atua a te loto o te tino ke ‵fuli ana amioga, ana mafaufauga, mo mea e fina ki ei ke talia ei a ia ke galue mō te Atua. Ko tafaga la te malosi o te mea faigaluega tenei!

17. Ke fakamatala mai te malosi o te Muna a te Atua ke ‵fuli ne ia a tino.

¹⁷ E fakaasi faka‵lei mai ne te Muna a te Atua a mea i te ‵kano loto o te tino māfai e fakatusa ki ana manatu e uiga ki a ia eiloa io me ko mea kolā e talia ne ia ke matea ne nisi tino. (1 Samuelu 16:7) I nisi taimi e mafai ne se tino amio masei o ‵funa aka a mea i tena loto mai te fakaasiatuga o uiga atafai io me mai te toaga ki lotu. E fulifuli ne tino amio ma‵sei olotou faifaiga ‵loi ona ko pogai ma‵sei. E taumafai a tino fakamata‵mata o fakaasi atu te loto maulalo kae fakatali‵tali eiloa ke maua ne latou a tavaega mai nisi tino. Kae mai te fakaasi faka‵sau atu o mea i te loto, e mafai o fakamalosi atu a te Muna a te Atua ki tino taki tokotasi ke ave keatea a uiga mua kae ke “pei ki te foitino fou, telā ne faite i foliga o te Atua i te amiotonu mo te ‵malu.” (Efeso 4:​22-24) E mafai foki o ‵fuli ne akoakoga i te Muna a te Atua a tino mata ma‵taku ke fai pelā me ne Molimau a Ieova loto ma‵losi kae loto finafinau e pelā me ne tino talai o te Malo.​—Ielemia 1:​6-9.

18, 19. Mai palakalafa konei io me ko au tala i te galuega talai, ke fakaasi mai a te auala ne mafai ei o ‵fuli ne te munatonu mai te Tusi Tapu a uiga o tino.

¹⁸ E aogā ‵ki a te malosi o te Muna a te Atua ke  ‵fuli ei a tino i koga valevale. E pelā mo tino talai o te Malo i Phnom Penh, Cambodia, kolā ne talai sāle i te fa‵kai ko Kompong Cham fakalua i te masina. I te taimi ne lagona ei ne se faifeau a nisi faifeau e fakamasei ne latou a Molimau a Ieova, ne fai ne ia se fakatokaga ke fetaui a ia mo Molimau māfai e toe āsi atu ki te lotou fa‵kai. Ne fai ana fesili kae kinau atu foki e uiga ki aso fakamanatu kae ne fakalogologo faka‵lei a ia ki olotou fakamatalaga kolā e fai atu mai te Tusi Tapu. Fakamuli ifo ne fai atu tou fafine, penei: “Ko iloa nei ne au me i pati a nisi faifeau ne fai e uiga ki a koutou e ‵se katoa! Ne fai mai latou me e se fakaaogā ne koutou te Tusi Tapu, kae i te taeao nei tenā eiloa te mea ne fakaaogā ne koutou!”

¹⁹ Ne tumau a te fafine tenei i te sau‵tala sāle mo Molimau kae ne seki talia ne ia a te mataku ma fakaseai tena tofi faifeau ke taofi ei a te mea tenā. Ne fakaasi atu ne ia a te mea tenā ki sena taugasoa, kae ne kamata i ei tena akoga faka-te-Tusi Tapu mo Molimau. Ne fiafia malosi a tena taugasoa ki mea ne tauloto ne ia, kae i te taimi e tasi ne nofo ei i tena lotu, ne fai atu a ia mo te loto malosi penei, “O‵mai o sukesuke mo Molimau a Ieova ki te Tusi Tapu!” Mai tua malie ifo ne kamata ei o sukesuke ki te Tusi Tapu a te faifeau mua tenā mo nisi tino fakatasi mo Molimau a Ieova.

20. E fakaasi mai pefea ne te mea ne tupu ki se fafine i Ghana a te malosi o Muna a te Atua?

²⁰ Ne lavea atu foki a te malosi o te Muna a te Atua i te mea telā ne tupu ki a Paulina, se fafine mai Ghana. Ne fai ne se tino talai galue tumau se akoga faka-te-Tusi Tapu mo ia i te Tusi ko Te Iloaga Telā e Takitaki Atu ei ki te Ola Se-Gata-Mai. * Ne aofia a Paulina i faigā avaga tokouke kae ne lavea ne ia te manakoga ke fai se ‵fuliga ki ei kae ne ‵teke atu tena avaga mo ana kāiga mo te fakasauā ki a ia. Ne taumafai foki a tena tupuna tagata, telā se famasino maluga kae se tiakono foki o tena ekalesia, o faka‵tuka atu ki a ia mai te fakauiga ‵se ne ia o pati i te Mataio 19:​4-6. Ne foliga mai me e tonu eiloa te famasino tenā, kae ne iloa fakavave ne Paulina me ne ‵pau eiloa a faifaiga konā mo faifaiga a Satani telā ne fakauiga ‵se ne ia a pati i te Tusi Tapu i te taimi ne taumafai ei o tofotofo a Iesu Keliso. (Mataio 4:​5-7) Ne masaua ne ia a pati ma‵nino a Iesu e uiga ki te fakaipoipoga, me ne faite ne te Atua a tino, te tagata mo te fafine, e se ko te tagata mo fāfine, kae ne ‵tau ei o fai laua mo foitino e tasi kae e se tokotolu i te foitino e tasi. Ne tu ‵mautakitaki a ia i tena fakaikuga kae fakamuli ne mafai ei o ‵tala tena avaga mo te tagata ne avaga a ia ki ei telā e tokouke foki ana nisi avaga. Ne seki leva kae fai a ia mo fai se tino papatiso fiafia o te Malo.

Ke Tumau i te Akoako Tonu Atu a te Muna a te Atua

21, 22. (a) Se a te fakaikuga e fia fai ne tatou e pelā me ne tino talai o te Malo? (e) Ne a mea ka sau‵tala tatou ki ei i te suā mataupu?

²¹ E tonu, e malosi ‵ki a te mea faigaluega ko te Muna tusia a te Atua i te fesoasoani atu ki nisi tino ke fai a ‵fuliga ki olotou olaga ko te mea ke mafai ei o fakapili‵pili atu latou ki a Ieova. (Iakopo 4:8) E pelā eiloa mo galuega ‵lei a tino apo i te fakaaogāga o mea faigaluega, ke na fakaiku aka ne tatou ke kausaki atu i te fakaaogāga ke magoi te Muna a te Atua ko te Tusi Tapu i te faiga o te galuega ne tuku mai ne te Atua e pelā me ne tino talai o te Malo.

²² E mafai pefea o ma‵goi a ‵tou fakamatalaga mai te Tusi Tapu i te faiga o te galuega ko te faiga o soko? A te auala e tasi ko te atiakaga o ‵tou atamai ke fai pelā me ne faiakoga āpo i te fakatalitonu atu. Ke na onoono nei ki te suā mataupu me e fakaasi mai i ei a auala kolā e mafai ei o akoako kae fesoasoani atu ki nisi tino ke talia ne latou te fekau o te Malo.

[Fakamatalaga mai lalo]

Masaua ne Koe?

• Ne a mea faigaluega e avanoa ki tino talai o te Malo?

• I te auala fea ne fai ei a Paulo e pelā me se fakaakoakoga ‵lei i te talaiatuga o te Malo?

• Ne a mea e aofia i te akoako tonu atu o te Muna a te Atua?

• E pefea te malosi o te mea faigaluega a Ieova telā ko tena Muna?

[Fesili mo te Sukesukega]

[Ata i te itulau e 10]

Nisi mea faigaluega kolā e fakaaogā ne Kelisiano i te folafolaatuga o te Malo