‘‵Sala Tou Fiafia ki a Ieova’

“‵Sala tou manuia [io me ko “te fiafia,” Tusi Paia, Samoa] ki te Aliki, kae ka avatu ne ia ki a koe te mea e manako koe ki ei.”​—SALAMO 37:4.

“AMUTIA [io me “ke fia‵fia”] a latou kolā e iloa ne latou i a latou e ma‵tiva faka te agaga, . . . ke fia‵fia a latou kolā e a‵lofa atu, . . . ke fia‵fia a latou kolā e fakatupu te filemu.” Ne aofia i tugāpati konei fakatasi mo nisi tugāpati e ono e uiga ki tino fia‵fia, i te fakatomuaga o te Lauga takutakua a Iesu i luga i te Mauga, telā ne tusi ne te tino tusi Evagelia ko Mataio. (Mataio 5:​3-​11) E fakamaoni mai ne pati a Iesu me e mafai eiloa o maua ne tatou te fiafia.

² Ne fakasino atu se pese i te salamo, telā ne ‵fatu ne te Tupu ko Tavita i Isalaelu mua, ki te tino telā ne māfua mai ei te fiafia tonu, ko Ieova. Ne fai mai a Tavita, penei: “‵Sala tou fiafia ki te Aliki , kae ka avatu ne ia ki a koe te mea e manako koe ki ei.” (Salamo 37:4, Tusi Paia, Samoa) Kae e maua pefea te “fiafia” ona ko te iloa ne tatou a Ieova mo ana uiga kese‵kese? E tuku mai pefea ne te mafaufau ki mea ko oti ne fai ne ia mo mea kolā e seki fai ne ia i te fakataunuga o ana fuafuaga, a te fakamoemoega ke maua a “mea e manako koe ki ei”? A te sukesuke ‵loto ki fakamatalaga i te Salamo 37, te fuaiupu e 1 ki te 11, e maua mai i ei a tali ki fesili konei.

“Sa Loto Ma‵sei”

³ Ko ola nei tatou i “taimi faiga‵ta” kolā ko ‵fonu i amioga ma‵sei. Ko oti ne lavea ne tatou te fakataunuga o pati a te apositolo ko Paulo, penei: “Ka ko tino amio ma‵sei mo te fakaloiloi tino, ka kamata eiloa latou mai te masei o fakasolo o na ma‵sei atu, i te fakaloiloi ki nisi tino, kae toe pa‵kia foki eiloa latou i olotou loi.” (2 Timoteo 3:​1, 13) Kae e faigofie fua ke pokotia tatou i te manuia mo te maumea fakaloiloi o tino ma‵sei! E mafai ne mea katoa konā o fai tatou ke ‵saga atu ki nisi mea, kae ke sē ‵saga tonu atu ki mea faka-te-agaga. Mafaufau la ki te auala e fakamalosi mai ne pati kamata o te Salamo 37 ke matapula‵pula tatou i te feitu fakamataku tenei: “Sa manava‵se ki faiga a tino amio ma‵sei; sa loto ma‵sei foki ki tino fai mea sē ‵tonu.”

⁴ E tuku mai faeloa i aso takitasi ne mea fakasalalau tala i te lalolagi kātoa a tala e uiga ki faifaiga sē fakamaoni. E sē fakasala sāle a tino faipisinisi kolā e se fakamaoni. E maneanea sāle ne tino solitulafono a tino kolā e fakaloiloigofie. E se ti ‵poa aka a tino tatino io me e se fakasala sāle latou. A vaegā tulaga katoa penā o faifaiga sē fakamaoni e mafai o fakaitaita kae fakamakosu i ei te filemu o ‵tou mafaufau. A te manuia fakaloiloi o tino amio ma‵sei e mafai foki o fakamalosi aka ei a te loto masei. Kae e mata, ka faka‵lei aka ne te ‵tou sē fia‵fia a te tulaga tenā? E mata, e mafai o ‵fuli ne te loto masei ki tulaga ‵lei ko maua ne tino ma‵sei a te ikuga o latou? Ikai, e se tāitāi eiloa! Kae e se ‵tau eiloa mo tatou o “loto ma‵sei” ki ei. Kaia?

⁵ E tali mai penei te faisalamo: “Ka ‵galo atu latou e pelā mo mouku kolā ko paku‵paku; ka ‵mate foki latou e pelā mo lakau kolā ko mage‵mage.” (Salamo 37:2) E mafai o gali te kilo atu ki mouku lauusiusi, kae e se leva ko magemage kae paku‵paku olotou lau. E penā foki eiloa a tino ma‵sei. E tiga eiloa e foliga mai me e manuia atu latou i a tatou, e se tumau te tulaga tenā. Kafai ko ‵mate latou, e se mafai eiloa o fesoasoani atu te lotou mau‵mea i auala sē ‵tonu ki a latou. Fakamuli loa ka ‵poa aka a tino katoa e auala i te faiga o fakamasinoga fakamaoni. Ne tusi mai a Paulo, penei: “Me i te taui o te agasala ko te mate.” (Loma 6:​23) Ka maua eiloa ne tino ma‵sei mo tino sē fakamaoni katoa te lotou “taui.” Ma‵faga o vaegā olaga sē aogā!​​—Salamo 37:​35, 36; 49:​16, 17.

⁶ Tela la, e mata, e ‵tau o talia ne tatou te maumea fakaloiloi o tino ma‵sei ke fakalavelave mai ki a tatou? Tenei la te akoakoga tāua mai fuaiupu muamua e lua i te Salamo 37: Ke mo a eiloa ma talia ne koe te lotou manuia ke kalo keatea koe mai tau filifiliga ke tavini atu ki a Ieova. I lō te fai penā, ke na saga tonu atu koe ki fakamanuiaga mo fakamoemoega faka-te-agaga.​​—Faataoto 23:17.

‘Fakatuanaki ki a Ieova Kae Fai Mea ‵Lei’

⁷ E fakamalosi mai ki a tatou te faisalamo, penei: “Fakatuanaki ki [a Ieova] kae fai mea ‵lei.” (Salamo 37:3a) Kafai ko pokotia tatou i te manavase io me ko te fakalotolotolua, e ‵tau o fakalago‵lago katoatoa tatou ki a Ieova. Ko Ia eiloa telā e tuku mai ne ia te puipuiga katoatoatoa faka-te-agaga. “So se tino e fano ki te Aliki ke sao a ia,” ko pati a Mose, “e nofo i lalo o te tausiga a Ia telā e o ia te Malosi Katoatoa.” (Salamo 91:1) Kafai e fakamanavase mai a amioga solitulafono kolā e olo aka faeloa o ma‵sei i te lalolagi tenei, ko te lasi foki tenā o te ‵tou fakalago‵lago ki a Ieova. Kafai e makui tou fatugugu, ka fiafia eiloa koe māfai e fesoasoani atu se taugasoa. E penā foki eiloa māfai e taumafai tatou ke tumau i te fakamaoni, e ma‵nako tatou ki te fesoasoani o Ieova.​​—Isaia 50:10.

⁸ A te faka‵leiga e tasi ki faka‵tukaga ona ko te faifai ‵lei o tino amio ma‵sei, ko te tumau i te ‵sala atu ki tino e pelā me ne mamoe kae fesoasoani atu ke maua ne latou te iloaga tonu e uiga ki fuafuaga a Ieova. Ona ko te oloakaga o amioga ma‵sei, e ‵tau o momea aka foki te ‵tou ga‵lue malosi i te fesoasoani atu ki nisi tino. Muna a Paulo: “Sa puli i a koutou o fai te mea ‵lei, kae ke fesoasoani foki te suā tino ki te suā tino, me ko taulaga konei e fiafia ki ei te Atua.” A te ‵toe “mea ‵lei” e fai ne tatou ko te fakaasiatuga ki nisi tino a te gali o te tala ‵lei e uiga ki te Malo o te Atua. E fai eiloa te ‵tou galuega talai mo fai se ‘taulaga o tavaega’ ki te Atua.​—Epelu 13:​15, 16; Kalatia 6:​10.

⁹ Ne toe fai mai a Tavita, penei: “Ke ola ‵lei koutou i te fenua mo te fakamaoni.” (Salamo 37: 3e, Tusi Paia, Samoa) A “te fenua” i aso o Tavita ko te koga telā ne tuku atu ne Ieova ki tino Isalaelu, ko te Fenua o te Folafolaga. I aso o te pulega a Solomona, a tuakoi o te fenua tenā ne kamata mai i Tanu ki matū ke oko ki Pelesepa i saute. Tenā eiloa te fenua o Isalaelu. (1 Tupu 4:​25) I aso nei, faitalia te koga e ‵nofo ei tatou i te lalolagi, e olioli eiloa  tatou ki te taimi ka fai ei te paneta kātoa tenei mo fai se palataiso i te lalolagi fou kae amiotonu. Kae e ola eiloa tatou i aso nei i se olaga tokagamalie i te feitu faka-te-agaga.​​—Isaia 65:​13, 14.

¹⁰ Se a te ikuga e mafai o maua māfai e ‘ola tatou i te fakamaoni’? E fakamasaua mai ki a tatou te faataoto mai te Atua, penei: “A tino fakamaoni e maua ne latou se olaga gali kae fiafia.” (Faataoto 28:20) A te ‵tou tumau i te fakamaoni o talai atu te tala ‵lei ki so se tino i so se koga e ‵nofo tatou i ei, e maua eiloa ne tatou i ei a fakamanuiaga mai i a Ieova. E pelā mo Falani mo tena avaga, ko Losa, ne talia ne laua te tofiga ke paenia i te 40 tausaga ko ‵teka i se fa‵kai i te feitu ki mātū o Sikotilani. Ne tapea‵pea atu keatea a nāi tino kolā ne fia‵fia ki te munatonu. I lō te faka‵tuka atu ki a laua, ne kamata ne te tauavaga paenia tenei te galuega talai mo te faiga o soko. Nei la, ko tokouke ‵ki eiloa a tino i te fakapotopotoga i te fa‵kai tenā. Ona ko te fakamaoni o te tauavaga tenei ne maua eiloa ne laua a fakamanuiaga mai i a Ieova. Ne fai mai a Falani mo te loto maulalo, penei: “A te ‵toe fakamanuiaga sili, me koi tumau eiloa maua i te munatonu kae aogā foki maua ki a Ieova.” E tonu, kafai e ‘ola ‵lei tatou i te fakamaoni,’ e fia‵fia kae ka maua foki ne tatou a fakamanuiaga e uke.

‘Ke ‵Sala Tou Fiafia ki a Ieova’

¹¹ Ke fakamalosi aka ‵tou fesokotakiga mo Ieova kae fakatumau te ‵tou fakalagolago ki a ia, e ‵tau mo tatou o “‵sala te ‵tou fiafia ki a Ieova.” (Salamo 37:4a, Tusi Paia, Samoa) E fai pefea ne tatou te mea tenā? I lō te ‵saga malosi ifo ki a tatou eiloa, faitalia te faigata, e ‵saga tonu atu tatou ki a Ieova. E tasi te auala ke fai penā, ko te fakaavanoaga o te taimi ke faitau ki tena Muna. (Salamo 1:​1, 2) E mata, e maua ne koe te fiafia i te faitau ki te Tusi Tapu? E mafai eiloa o fai penā māfai e faitau koe mo te fakamoemoega ke uke atu au mea e tauloto e uiga ki a Ieova. Mai te faiga penā, kaia e se manava malie aka ei koe mai tua o se vaega e tasi kae fesili ifo, penei: ‘Se a te mea e akoako mai ne te vaega tenei e uiga ki a Ieova?’ Kāti e faigofie atu ke isi sau faoao io me se pepa i te taimi e faitau ei koe ki te Tusi Tapu. I taimi takitasi e mānava ei koe ke mafaufau ki te uiga o mea ne faitau ne koe, tusi ki lalo a mea kolā e fakamasaua atu ki a koe e uiga ki uiga ‵gali o te Atua. I te salamo e tasi, ne usu mai a Tavita, penei: “Te Aliki, toku lafiga mo toku fakaolataga, ke talia mai ne koe aku muna mo oku mafaufauga.” (Salamo 19:14) A te mafaufau ‵loto ki te Muna a te Atua se mea telā e “talia” ne Ieova kae fakafiafia mai ki a tatou.

¹² E maua pefea ne tatou te fiafia mai te ‵tou sukesuke mo te mafaufau ‵loto? E mafai o fakamoe‵moe tatou ke tauloto ki mea e uke e maua ne tatou e uiga ki a Ieova mo ana auala. A vaegā tusi pelā mo Te ‵Toe Tagata Sili Telā ne Ola mo te Draw Close to Jehovah * e tuku mai i ei a fakamatalaga e uke kolā e mafai o mafau‵fau ki ei mo te loto fakafetai. E fakatalitonu atu a Tavita ki tino amio‵tonu, me i a Ieova “ka avatu ne ia ki a koe te mea e manako koe ki ei.” (Salamo 37:4e) Ko te loto talitonu foki tenei ne fakamalosi aka ei a apositolo ko Ioane ke tusi ki lalo a pati konei: “Tenei te pogai e maua ei ne tatou te loto malosi i mua o te Atua; e tali‵tonu foki tatou me e talia ne ia manafai e fakatagi tatou ki so se mea e ‵tusa mo tena loto. Kafai e iloa ne tatou me e lagona ne te Atua a mea kolā e fakatagi atu ei tatou ki a ia, ko iloa ei ne tatou me e talia eiloa ne te Atua a mea kolā e fakatagi atu ei tatou ki a ia.”​​—1 Ioane 5:​14, 15.

¹³ E pelā me ne tino fakamaoni, a ‵toe mea fakafiafia ki a tatou ko te kilo atu ki te taku‵leiga o te pulega sili a Ieova. (Faataoto 27:11) E mata, e sē ‵fonu a ‵tou loto i te fia‵fia i te iloa atu me e lasi a te galuega talai telā e fai ne ‵tou taina i fenua kolā ne ola mai lalo i pulega fakasauā? E olioli eiloa tatou ke matea atu a nisi saolotoga penā a koi tuai o oko mai te gataga o te olaga masei tenei. E fai ne ‵tou taina e tokouke i atufenua saoloto, se tusaga lasi i te talai atu ki tama‵liki a‵koga, tino fakaa‵lofa mai nisi fenua, mo nisi tino sē ‵nofo tumau i fenua konā kae kolā e maua foki ne latou te saolotoga i te feitu tau tapuakiga. E olioli eiloa tatou ke tumau a tino konei, māfai ko ‵foki atu ki olotou fenua, i te fakamaina atu o te mainaga i fenua kolā e fakatapu i ei te galuega.​​—Mataio 5:​14-​16.

“Tuku Atu Kātoa a Koe ki te Aliki”

¹⁴ Ko oko eiloa i te lasi o te fakatapūga ke iloa atu me e mafai eiloa o ave keatea a mea kolā e manava‵se tatou ki ei mo mea kolā e foliga mai me e faka‵mafa mai ki a tatou! E pefea la? Ne fai mai a Tavita, penei: “Tuku atu kātoa a koe ki te Aliki; fakatuanaki ki a ia, kae ka fesoasoani a ia ki a koe.” (Salamo 37:5) E maua ne tatou a fakamaoniga e uke i ‵tou fakapotopotoga me e ‵lago atu a Ieova ki ei. (Salamo 55:22) E mafai o fakamaoni mai ne tino katoa kolā e ga‵lue tumau i te taviniga, faitalia me ne paenia, toeaina faima‵laga, misionale, io me ko volenitia i fale Peteli, a te ‵tonu o te atafai o Ieova. Kaia e se faipati atu ei koe ki tino kolā e iloa ne koe i a latou konā me ne fesoasoani atu pefea a Ieova ki a latou? E seai se fakalotolotolua me ka lagona ne koe a tala ‵gali e uke kolā e fakaasi mai i ei a te fesoasoani o Ieova, ke oko foki eiloa i taimi faiga‵ta. E tuku mai faeloa ne ia a mea e lava mō tausi tatou.​​—Salamo 37:25; Mataio 6:​25-​34.

¹⁵ Kafai e fakalago‵lago kae tali‵tonu katoatoa tatou ki a Ieova, ka pelā eiloa tatou mo pati i te faisalamo, penei: “Ka fai ne ia tau amio ‵lei ke maina atu e pelā mo te mainaga o te la i te tutonu.” (Salamo 37:6) E masani sāle o ‵se te kilokiloga a tino ki a tatou, e pelā me ne Molimau a Ieova. Kae e ‵tala ne Ieova a mata o tino loto fakamaoni ke fesoasoani atu ke iloa ne latou me e fakamalosi tatou ne te alofa ki a Ieova mo ‵tou tuakoi ke fai te galuega talai. Kae e se mafai eiloa o ‵funa aka a ‵tou amioga ‵lei, faitalia te fakauiga ‵se ne tino e tokouke. E fesoasoani mai eiloa a Ieova ki a tatou i vaega kese‵kese katoa o ‵tekemaiga mo fakasauāga. E iku atu i ei ki te maina atu o te amiotonu  o tino o te Atua e pelā mo te mainaga o te la i te tutonu.​​—1 Petelu 2:​12.

“Fifilemu Kae Fakatalitali”

¹⁶ Ne toe fai mai te faisalamo, penei: “Fifilemu kae fakatalitali ki te taimi e fai ei ne te Aliki a te mea e ‵tau o fai; sa manavase koe ki tino kolā e manuia, io me ki tino kolā e taunu ‵lei a fuafuaga ma‵sei a latou.” (Salamo 37:7) E faka‵mafa mai ne Tavita a te tāua ke faka‵tali tatou mo te kufaki ke gasuesue a Ieova. E tiga eiloa e seki oko mai te gataga o te olaga tenei, e se ‵tau eiloa o fāmeo tatou i ei. E mata, e seki lavea ne tatou a te lasi o te alofa fakamagalo mo te kufaki o Ieova i lō te mea telā ne tali‵tonu tatou ki ei? E mata, e mafai foki o fakaasi atu nei ne tatou me e faka‵tali tatou mo te kufaki i te taimi e gasue‵sue malosi ei tatou i te talaiatuga o te tala ‵lei a koi tuai o oko mai te gataga? (Maleko 13:10) Tenei eiloa te taimi ke ‵kalo keatea mai te sōna faiga o se mea telā e mafai o taofi aka ei te ‵tou fiafia mo te tokagamalie faka-te-agaga. Tenei eiloa te taimi ke ‵teke malosi atu ei ki fakamalosiga sē ‵lei a te lalolagi a Satani. Kae tenei foki eiloa te taimi ke tumau tatou i te ‵mā kae ke mo a ma fakamasei te ‵tou tulaga amiotonu i mua o Ieova. Ke na tumau tatou i te ‵kalo keatea mai mafaufauga ma‵sei mo faifaiga sē ‵lei i va o tāgata mo fāfine io me i te va o tāgata io me ko fāfine i a latou eiloa.​​—Kolose 3:5.

¹⁷ Ne polopoloki mai a Tavita, penei: “Sa manavase io me kaitaua; me e ‵taki fua ne ia koe ki fakalavelave. A latou kolā e fakatuanaki ki te Aliki, ka fai mo latou te fenua, ka ko tino amio ma‵sei ka afuli keatea.” (Salamo 37:​8, 9) E tonu, e mafai eiloa o ‵kilo atu tatou mo te loto tali‵tonu ki te taimi​​—telā ko pili mai​​—ko te taimi ka fakaseai atu ei ne Ieova a mea ma‵sei katoa mo tino kolā e māfua mai i ei a mea konā

“E se Toe Leva Nei”

¹⁸ “E se toe leva nei, ka ‵galo atu ei a tino amio ma‵sei; ka salasala ne koe latou, kae sē maua ne koe.” (Salamo 37:10) Ko oko eiloa i te fakamalosi mai o pati konā i te taimi ko pili atu ei tatou ki te gataga o te olaga tenei telā ka fakaoti eiloa ki te fakaseaiga fakamataku o te olaga fia tu tokotasi mai i a Ieova! Ne seki iku manuia eiloa a vaegā malo io me ko pulega kolā ne taumafai ki ei a tino. Kae nei la, ko pili atu tatou ki te taimi ka pule mai ei te Atua, ko te Malo o Ieova i lima o Iesu Keliso. Ka pule katoatoa mai eiloa ki te lalolagi kae ave keatea ei a tino katoa kolā e ‵teke ki te Malo o te Atua.​​—Tanielu 2:​44.

¹⁹ I te lalolagi fou mai lalo i te Malo o te Atua, kafai e ‵sala atu tatou ki “tino amio ma‵sei,” ka sē maua eiloa ne tatou. A te ‵tonuga loa, so se tino ‵teke i loto i ei, ka tamate fakavave ne Ieova. Ka sē nofo atu i konā se tino telā e ‵teke ki tena pulega sili io me e fakatamala o fakalogo ki ana fakatonuga. Ka ‵pau eiloa tatou mo ‵tou tuakoi i te taumafai ke fakafiafia atu ki a Ieova. Ka sē fuafuagina eiloa te tokagamalie telā ka maua atu i konā​​—sē toe ai ne ‵loka, ne ‵pui, sē toe ai se mea telā e fakamasei ei te ‵tou loto tali‵tonu mo te fiafia katoatoa!​​—Isaia 65:20; Mika 4:4; 2 Petelu 3:​13.

²⁰ “Ka ko latou kolā e loto ma‵lalo, ka fai mo latou te fenua.” (Salamo 37:11a) Kae ko oi la a tino “loto ma‵lalo”? A te pati telā ne ‵fuli ki te “loto malalo” e māfua mai i se pati telā e fakauiga ki te “fakapuapuagā, ke fakamalalo, ke fakamasiasi.” E tonu, a tino “loto ma‵lalo” ko latou kolā e faka‵tali mo te loto maulalo ki a Ieova ke faka‵tonu aka ne ia a faifaiga sē fakamaoni katoa kolā e fakalogo‵mae atu ki a latou. “Ka maua ne latou te manuia mo te filemu katoatoa.” (Salamo 37:11e) E maua foki ne tatou i aso nei te filemu lasi i te  palataiso faka-te-agaga telā e aofia i ei te fakapotopototoga Kelisiano tonu.

²¹ E tiga eiloa e seki saoloto tatou mai logo‵maega, e fakatau fesoasoani tatou kae fakamafanafana atu foki ki tino kolā e loto māfatia. E iku atu i ei ki te fakamalosiakaga o te fiafia tonu i tino o Ieova. E tavini atu mo te a‵lofa a taina kolā ne ‵tofi aka ke fai mo fai ne tausi mamoe ki te tausiga o ‵tou manakoga i te feitu faka-te-agaga​​—kae penā foki loa i te feitu faka-te-foitino i nisi taimi​​—telā e mafai ei ne tatou o kufaki i logo‵maega ona ko te amiotonu. (1 Tesalonia 2:​7, 11; 1 Petelu 5:​2, 3) Ko oko eiloa i te tāua o te filemu tenei! E maua foki ne tatou te fakamoemoega ko te ola se-gata-mai i te Palataiso filemu telā ko pili mai. Ke na fakaakoako nei tatou ki te Tavita Sili, ko Keliso Iesu, telā ne fakaosofia ne tena loto finafinau mō Ieova ke tavini atu mo te fakamaoni ke oko eiloa ki te fakaotiga. (1 Petelu 2:​21) Kafai e fai tatou penā, ka tumau eiloa tatou i te fia‵fia, mai te tavae atu ki te tino telā e fia‵fia malosi tatou ki ei, ko te ‵tou Atua, ko Ieova.

[Footnote]

E Mafai o Tali Mai ne Koe?

• Ne a akoakoga tāua ne tauloto ne koe mai te Salamo 37:​1, 2?

• E mafai pefea ne koe o ‘‵sala tou fiafia ki a Ieova’?

• Ne a fakamaoniga e fakaasi mai i ei me e mafai eiloa o fakalago‵lago tatou ki a Ieova?

[Fesili mo te Sukesukega]

1, 2. Ko oi e māfua mai i ei te fiafia tonu, kae ne fakasino atu pefea te Tupu ko Tavita ki te manatu tonu tenei?

3, 4. E pelā mo te Salamo 37:​1, se a te fakamalosiga telā e tuku mai ne Tavita, kae kaia e ‵lei ei ke faka‵logo ki ei i aso nei?

5. Kaia e faka‵tusa ei a tino ma‵sei ki mouku?

6. Se a te akoakoga tāua e mafai o maua ne tatou mai te Salamo 37:​1, 2?

7. Kaia e ‵tau ei o fakalago‵lago tatou ki a Ieova?

8. E fesoasoani mai pefea te galuega talai ke mo a ma sōna loto ma‵sei tatou ona ko te faifai ‵lei o tino amio ma‵sei?

9. Ke fakamatala mai te uiga o te fakamalosiga a Tavita ke “ola ‵lei koutou i te fenua.”

10. Se a te ikuga e maua māfai e ‘ola tatou i te fakamaoni’?

11, 12. (a) E mafai pefea o ‘‵sala te ‵tou fiafia ki a Ieova’? (e) Se a te fakamoemoega e mafai o kausaki ki ei e uiga ki te faiga o sukesukega totino, kae se a te ikuga ‵lei e mafai o maua mai i ei?

13. Ne fakalauefa atu pefea te galuega talai o te Malo i fenua e uke i tausaga fakamuli nei?

14. Se a te fakamaoniga e tali‵tonu tatou ki ei me e mafai eiloa o fakalago‵lago atu tatou ki a Ieova?

15. E maina atu pefea te amiotonu o tino o te Atua?

16, 17. E ‵tusa mo te Salamo 37:​7, se a te taimi telā ko pili mai, kae kaia e fai ei penā?

18, 19. Se a te fakamalosiga e maua ne koe mai te Salamo 37:10?

20, 21. (a) Ko oi a tino “loto ma‵lalo” i te Salamo 37:​11, kae e maua ne latou i fea te “filemu katoatoa”? (e) Ne a fakamanuiaga e maua ne tatou māfai e fakaakoako atu tatou ki te Tavita Sili?

[Ata i te itulau e 23]

‘E se loto ma‵sei a Kelisiano ki tino fai mea sē ‵tonu’

 [Ata i te itulau e 24]

‘Fakatuanaki ki a Ieova kae fai mea ‵lei’

[Ata i te itulau e 25]

Ke fia‵fia malosi ki a Ieova mai te tauloto ki mea e uke e mafai ne koe e uiga ki a ia

 [Ata i te itulau e 26]

“Ka ko latou kolā e loto ma‵lalo, ka fai mo latou te fenua”