‘Akoako Atu Latou ke Faka‵logo ki Mea Katoa ne Fakatonu Atu ne Au ki a Koutou’

“Tela la, olo atu koutou ki fenua katoa ke fai a tino i ei mo oku soko . . . , akoako atu foki latou ke faka‵logo ki mea katoa kolā ne fakatonu atu ne au ki a koutou.”​—MATAIO 28:​19, 20.

1. Se a te sau‵talaga ne fai i te va o te soko ko Filipo mo te tagata Aitiope?

NE MALAGA atu se tagata mai Aitiope ki Ielusalema. Ne tapuaki atu ei i konā ki te Atua telā ne alofa a ia ki ei, ko Ieova. E manino ‵lei foki me ne fiafia malosi a ia ki te Muna a te Atua. I tena auala o toe foki atu i tena kaliota, ne faitau a ia ki se ‵kopi o tusitusiga a te pelofeta ko Isaia i te taimi ne fetaui ei laua mo te soko o Keliso, ko Filipo. Ne fesili atu a Filipo ki te tagata Aitiope: “E malamalama koe i te tusi e faitau ne koe?” Ne tali atu te tagata: “Ikai, seiloga ke fesoasoani mai se tino.” Ne kamata ei a Filipo o fesoasoani atu ki te tino loto fakamaoni tenei ke fai mo fai se soko o Keliso.​​—Galuega 8:​26-​39.

2. (a) E aogā pefea te tali ne tuku mai ne te Aitiope? (e) Ne a fesili e uiga ki te fakatonuga a Keliso ke fai a soko, ka mafau‵fau nei tatou ki ei?

² E tāua ‵ki eiloa te tali a te Aitiope. Ana muna: ‘E mafai pefea o malamalama au, seiloga ke fesoasoani mai se tino.’ E tonu, ne manako a ia ki se fesoasoani, se tino ke akoako atu ki a ia te auala tonu. E fakaasi mai i te tali tenei a te tāua o te fakatonuga fakapito telā ne aofia ne Iesu i tena fakatonuga ke fai a soko. Se a te fakatonuga tenā? Ke maua te tali ki ei, ke na mafau‵fau aka tatou ki pati a Iesu kolā e maua i te Mataio mataupu e 28. Ne fakaasi mai i te mataupu muamua me kaia? kae tefea? foki te koga e ‵tau o fai i ei te galuega. Ka mafau‵fau nei tatou ki nisi fesili e lua e uiga ki te fakatonuga a Keliso ke fai a soko​​—ne a mea e ‵tau o akoako atu? kae ‵tau o fakagata mafea te galuega tenā?

“Akoako Atu Foki Latou ke Faka‵logo ki Mea Katoa”

3. (a) E fai pefea se tino mo fai se soko o Iesu Keliso? (e) Se a te mea e aofia i te akoakoatuga o soko?

³ Ne a mea e ‵tau o akoako atu ne tatou ke fesoasoani atu ei ki nisi tino ke fai mo fai ne soko o Keliso? Ne fakatonu atu a Iesu ki ana soko: “Tela la, olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama, mo te agaga tapu. Akoako atu foki latou ke faka‵logo ki mea katoa kolā ne fakatonu atu ne au ki a koutou.” (Mataio 28:​19, 20) Tela la, e ‵tau o akoako ne tatou a mea kolā ne fakatonu mai ne Keliso. * Se a la te mea ka fesoasoani mai ke fakamautinoa aka me i te tino telā e akoako atu ki ei a fakatonuga a Iesu ka sē fai fua mo fai se soko, kae ka tumau foki eiloa penā? E tasi te auala tāua e lavea atu i te fakaeteete o Iesu i te filifiliga o ana pati. Masaua la, me ne seki fai atu fua a ia, penei: ‘Akoako atu ki a latou a mea katoa ne fakatonu atu ne au.’ I lō te fai penā, ne fai atu a ia: ‘Akoako atu latou ke tausi ki mea katoa ne fakatonu atu ne au.’ (Mataio 19:17) Se a te mea e fakaasi i ei?

4. (a) Se a te uiga ke fakalogo ki se fakatonuga? (e) Fakamatala mai te auala e akoako ei ne tatou se tino ke fakalogo ki fakatonuga a Keliso.

⁴ A te tausi ki se fakatonuga e fakauiga ki te  “fakafetaui aka o faifaiga a se tino” ki se fakatonuga​​—ke fakalogo, io me ke tausi ki ei. E akoako atu la pefea ne tatou se tino ke tausi, io me ke fakalogo, ki mea kolā ne akoako mai ne Keliso? Ia, ke mafaufau ki te auala e akoako atu se faiakoga fakateletele motokā ki tino fakaakoako ke tausi ki tulafono o te auala. E mafai o akoako atu ne te faiakoga a tino fakaakoako i te faleakoga. Kae ke akoako atu ki tino fakaakoako ke faka‵logo ki tulafono o te auala, e ‵tau o fakatonutonu ne ia latou i loto eiloa i auala e ‵tele i ei a motoka kae taumafai ke fakagalue aka a mea kolā ko oti ne tauloto ki ei. E penā foki māfai e sukesuke fakatasi tatou mo nisi tino ki te Tusi Tapu, e akoako atu ne tatou a fakatonuga a Keliso. Kae e ‵tau foki o fesoasoani atu tatou ki a latou i te taimi e taumafai ei ke fakagalue aka ne latou a fakatonuga a Keliso i olotou olaga i aso katoa kae e penā foki i te galuega talai. (Ioane 14:15; 1 Ioane 2:3) Tela la, a te fakataunuga katoatoa o te fakatonuga a Keliso ke fai a soko, e manakogina i ei ke fai tatou mo fai ne faiakoga e pelā foki mo tino fakatonutonu. I te fai penā, e fakaakoako atu ei tatou ki te fakaakoakoga ne tuku mai ne Iesu e pelā foki eiloa mo Ieova.​​—Salamo 48:14; Fakaasiga 7:​17.

5. Kaia e mafai ei o faigata ki se akoga faka-te-Tusi Tapu ke fakalogo ki te fakatonuga a Keliso ke fai a soko?

⁵ A te akoako atu o nisi tino ke faka‵logo ki fakatonuga a Iesu e aofia i ei te fesoasoani atu ke faka‵logo ki te fakatonuga ke fai a soko. E mafai o faigata te mea tenei ki nisi tino kolā e suke‵suke mo tatou ki te Tusi Tapu. Kafai foki loa ne fai muamua latou mo fai ne tino ma‵losi i nisi lotu i Lotu Kelisiano ‵Se, e iloa ne tatou me e seki akoako eiloa a latou ne olotou faifeau mua ke olo atu o fai a soko. E taku ‵tonu mai ne nisi takitaki lotu me e matuā fakata‵mala a Lotu Kelisiano ‵Se i te akoako atu ki olotou lafu ke olo o talai. I tena fakamatalaga e uiga ki te fakatonuga a Iesu ke olo atu ki te lalolagi kae fesoasoani atu ki tino katoa ke fai mo fai ne soko, ne fai mai se tino sukesuke ki te Tusi Tapu, ko John R. W. Stott: “A te ‵tou fakata‵mala o faka‵logo ki te tāua o te uiga o te fakatonuga tenei ko te ‵toe vāivāiga lasi eiloa o Kelisiano i te faiga o te galuega talai i aso nei.” Ne toe fai mai a ia: “E pelā me e folafola atu ne tatou te ‵tou fekau mai i se koga ‵mao. E fai tatou i nisi taimi e pelā me ne tino kolā e ‵tu i te matafaga kae paka‵laga atu o fesoasoani ki tino kolā ko ma‵lemu i te tai. E se ‵kau atu tatou o faka‵sao latou. E se fia aofia eiloa a tatou i ei.”

6. (a) I te fesoasoani atu ki se akoga faka-te-Tusi Tapu, e tau‵tali atu pefea tatou ki te fakaakoakoga a Filipo? (e) E fakaasi atu pefea ne tatou te ‵tou amanaia māfai ko kamata o kau atu se akoga faka-te-Tusi Tapu ki te galuega talai?

⁶ Kafai se tino e a‵koga mo tatou i te Tusi Tapu se tino ne lotu i se lotu telā “e se fia aofia i te galuega talai,” e mafai o faigata ke manumalo a ia i te fakalavelave tenā, kae ke fakalogo ki te fakatonuga a Keliso ke fai a soko. Ka manako eiloa a ia ki se fesoasoani. Tela la, e ‵tau o kufaki  tatou i te tukuatuga o vaegā akoakoga mo fakatakitakiga kolā e faka‵poko aka ei tena malamalama ke gasuesue, e pelā eiloa mo akoakoga a Filipo kolā ne fakamalosi atu ki te Aitiope ke papatiso. (Ioane 16:13; Galuega 8:​35-​38) I tafa i ei, a te ‵tou manakoga ke akoako atu a ‵tou tino a‵koga ke faka‵logo ki te fakatonuga ke fai a soko, e fakamalosi mai foki ke ga‵lue fakatasi mo latou kae fesoasoani atu i te taimi muamua e olo atu ei latou i te galuega talai o te Malo.​​—Failauga 4:​9, 10; Luka 6:​40.

“Ki Mea Katoa”

7. Ne a fakatonuga e aofia i te akoakoga o nisi tino ke ‘faka‵logo ki mea katoa’?

⁷ E se gata fua i te akoako ne tatou o soko ‵fou ki te faiga o soko. Ne fakatonu mai a Iesu ke akoako ne tatou a nisi tino ke “faka‵logo ki mea katoa” ne fakatonu mai ne ia. E aofia eiloa i te mea tenā a tulafono tafasili i te tāua e lua​​—ke alofa ki te Atua mo te alofa ki tuakoi. (Mataio 22:​37-​39) E mafai pefea o akoako atu se soko fou ke fakalogo ki tulafono konā?

8. Fakamatala mai te auala e mafai ei o akoako atu ki se soko fou te fakatonuga ke fakaasi atu te alofa.

⁸ Toe mafaufau ki te tala fakatusa e uiga ki se tino e fakaakoako ki te fakatele motokā. I te taimi e fakatele atu ei ne te tino fakaakoako te motokā i te auala mo te faiakoga i ana tafa, e se tauloto fua te tino akoga mai te fakalogo ki te faiakoga, kae mai te onoono atu foki nisi tino fakatele‵tele. E pelā me se mea e tasi, e mafai o fakasino atu te faiakoga ki se tino fakateletele e tuku atu ne ia te avanoaga ki se isi tino ke fanatu i ana mua; io me se tino telā e kī ana moli ki lalo ko te mea ke mo a ma faka‵segi atu ki motoka kolā e o‵mai i ana mua; io me se tino e fesoasoani atu ki se taugasoa telā ko tupu se fakalavelave ki tena motokā. E akoako atu a vaegā fakaakoakoga penā ki te tino fakaakoako ke fakagalue ne ia i te taimi e fakateletele ei. E penā foki eiloa te soko fou telā e faimalaga atu i te auala ki te ola, e se tauloto fua mai tena faiakoga kae mai fakaakoakoga ‵lei foki kolā e lavea atu ne ia i te fakapotopotoga.​​—Mataio 7:​13, 14.

9. E mafai pefea o tauloto se soko fou ki te uiga o te fakalogo ki te fakatonuga ke fakaasi atu te alofa?

⁹ E pelā me se akoga faka-te-Tusi Tapu telā e lavea ne ia se mātua taka telā e taumafai malosi ke o‵mai latou mo ana tama‵liki fo‵liki ki te Kingdom Hall. E mafai o lavea ne ia se tino loto māfatia telā e fakamaoni faeloa o vau ki fakatasiga faitalia tena loto māfatia, se lōmatua ko mate tena avaga telā e avatu faeloa ne ia a nisi tino ma‵tua ki te Kingdom Hall, io me se talavou telā e kau atu faeloa ki te ‵fuluga o te Kingdom Hall. E mafai foki o lavea atu ne se akoga faka-te-Tusi Tapu se toeaina telā e fai ne ia te takitakiga mo te fakamaoni i te galuega talai faitalia te uke o ana tiute i te fakapotopotoga. E mafai foki o fetaui laua mo se Molimau telā e se katoatoa tena foitino kae e se mafai o fano sāle kae e fai mo fai se fakamalosiga i te feitu faka-te-agaga ki tino katoa kolā e āsi atu ki a ia. E mafai o lavea ne te tino akoga se tauavaga kolā ko fai ne laua a ‵fuliga ‵lasi i lā olaga ko te mea ke tausi atu ki lā mātua kolā ko ma‵tua. Mai te lavea atu o vaegā faifaiga atafai, fesoasoani, kae fakatuagagina a Kelisiano, e tauloto ei te soko fou ki te uiga o te fakalogo ki te fakatonuga a Keliso ke alofa ki te Atua mo tuakoi, kae maise eiloa ki taina tali‵tonu. (Faataoto 24:32; Ioane 13:35; Kalatia 6:​10; 1 Timoteo 5:​4, 8; 1 Petelu 5:​2, 3) I te auala eiloa tenei e fai ei​​—kae e ‵tau foki eiloa o fai​​—a tino taki tokotasi i te fakapotopotoga Kelisiano mo fai ne faiakoga mo tino fesoasoani.​​—Mataio 5:​16.

“Ke Oko Eiloa ki te Gataga o te Lalolagi”

10. (a) Ka pefea te leva e fai ei ne tatou a soko? (e) Se a te fakaakoakoga ne tuku mai ne Iesu e uiga ki te faiga o te galuega?

¹⁰ E ‵tau o fakagata mafea te faiga o soko? Ke oko eiloa ki te gataga o te lalolagi. (Mataio 28:20) E mata, e mafai o fakataunu ne tatou te vaega tenei o te fakatonuga a Keliso? E pelā me se fakapotopotoga i te lalolagi kātoa, e loto ma‵losi eiloa tatou ke fai penā. I te fia o tausaga ko ‵teka, ne loto fia‵fia eiloa tatou o fakaaogā ‵tou taimi, malosi, mo kope ke ‵sala atu ki tino “loto ‵lei mō te ola se gata mai.” (Galuega 13:​48, NW) I aso nei, e fakamāumāu ne Molimau a Ieova se aofaki o itula e silia atu i te tolu miliona i aso katoa o te tausaga i te talaiatuga o te Malo mo te faiga o soko i te lalolagi kātoa. E fai tatou penā i te tau‵tali atu ki te fakaakoakoga a Iesu. Ana muna: “A taku  meakai, ko te fai ne au a te loto o ia telā ne uga mai ne ia au, kae o fakapalele foki a te galuega ne tuku mai ne ia ki a au ke fai.” (Ioane 4:34) Tenā foki eiloa te mea e ma‵nako tatou ki ei. (Ioane 20:21) E ma‵nako tatou ke uke atu ‵tou mea e fai i lō te kamataga fua o te galuega telā ne tuku mai; e ma‵nako eiloa tatou ke fakaoti faka‵lei.​​—Mataio 24:13; Ioane 17:4.

11. Ne a mea ko oti ne ‵tupu ki nisi o ‵tou taina mo tuagane Kelisiano, kae se a te mea e mafai o fesili ifo ne tatou ki a tatou eiloa?

¹¹ Se mea fakafanoanoa ke lavea atu me ko gasolo ifo foki o vāi‵vāi a nisi o ‵tou taina tali‵tonu i te feitu faka-te-agaga, kae ko sē gasue‵sue malosi io me ko oti ne fakagata te lotou faka‵logo ki te fakatonuga a Keliso ke fai a soko. E mata, e isi ne auala e mafai ei ne tatou o fesoasoani atu ki a latou ke toe ‵kau mai ki te fakapotopotoga mo te faiga o soko? (Loma 15:1; Epelu 12:12) A te auala ne fesoasoani atu ei a Iesu ki ana apositolo i te taimi ne vāi‵vāi malie ei latou, e fakaasi mai ei a mea e mafai ne tatou o fai i aso nei.

Fakaasi Atu te Amanaia ki Nisi Tino

12. (a) Mai mua malie o te mate o Iesu, ne a mea ne fai ne ana apositolo? (e) Ne a mea ne fai ne Iesu ki ana apositolo faitalia te lotou vāi‵vāi malosi?

¹² I te fakaotiga o te galuega a Iesu i te lalolagi, i te taimi ko pili ei o mate, ne “tiaki ei a ia ne ana soko katoa kae ‵tele.” E pelā mo te mea ne ‵valo mai ne Iesu, “ka mafuta valevale ei koutou; ka taki fano eiloa te tino ki tona kāiga.” (Maleko 14:50; Ioane 16:32) Ne a mea ne fai ne Iesu ki ana taugasoa kolā ko vāi‵vāi i te feitu faka-te-agaga? Mai tua malie ifo o tena toetuga, ne fai atu a Iesu ki nisi o ana soko: “Sa ma‵taku! Olo o taku atu ki oku taina ke olo ki Kalilaia, me e fetaui matou i konā.” (Mataio 28:10) E tiga eiloa ne fakaasi atu ne apositolo te lotou vāi‵vāi malosi, ne tumau eiloa a Iesu i te taku ne ia o latou ko “oku taina.” (Mataio 12:49) Ne seki ‵fiu tou tagata i a latou. Ne fakaasi atu ei i te auala tenei me ne alofa kae loto fakamagalo a Iesu, e pelā eiloa mo Ieova e alofa kae loto fakamagalo. (2 Tupu 13:23) E fakaakoako atu pefea tatou ki a Iesu?

13. E ‵tau o pefea ‵tou kilokiloga ki tino kolā ko oti ne vāi‵vāi i te feitu faka-te-agaga?

¹³ E ‵tau o lasi te ‵tou amanaia ki tino kolā ko sē gasue‵sue malosi io me ko oti ne fakagata te lotou ‵kau mai ki te galuega talai. Koi masaua eiloa ne tatou a galuega a‵lofa a ‵tou taina tali‵tonu i aso ko ‵teka​​—kāti mō te fia o tausaga, a nisi tino. (Epelu 6:​10) E se mafai o puli i a tatou a ‵tou fesokotakiga ‵gali i aso mua. (Luka 15:​4-7; 1 Tesalonia 2:​17) E mafai la pefea o fakaasi atu te ‵tou amanaia ki a latou?

14. I te fakaakoako atu ki a Iesu, e mafai pefea o fesoasoani atu tatou ki se tino ko vāivāi i te feitu faka-te-agaga?

¹⁴ Ne fai atu a Iesu ki ana apositolo loto vāi‵vāi ke ‵mua ki Kalilaia kae ka fetaui latou i konā. A te ‵tonuga loa, ne ‵kami ne Iesu latou ke ‵kau atu ki se fakatasiga fakapito. (Mataio 28:10) E penā foki i aso nei, e fakamalosi atu tatou ki tino vāi‵vāi i te feitu faka-te-agaga ke ‵kau atu ki fakatasiga a te fakapotopotoga Kelisiano, kae e ‵tau eiloa o fakamalosi atu faeloa ki a latou ke fai penā. E pelā mo te kau apositolo, ne aogā eiloa te ‵kamiga tenā, me “ne olo atu te tinoagafulu mo te tokotasi soko ki te mauga i Kalilaia, telā ne fai atu ei a Iesu ke olo ki ei.” (Mataio 28:16) Ko oko eiloa i te fia‵fia o tatou māfai ko talia ne tino vāi‵vāi a te ‵kamiga alofa kae toe ‵kau atu ki fakatasiga Kelisiano!​​—Luka15:6.

15. E tau‵tali atu pefea tatou ki te fakaakoakoga a Iesu i te talimālō atu ki tino vāi‵vāi kolā e o‵mai ki fakatasiga?

¹⁵ Ka pefea ‵tou faifaiga māfai ko oko mai se Kelisiano vāivāi ki te Kingdom Hall? Ia, ne a mea ne fai ne Iesu i te taimi ne lavea ei ne ia ana apositolo, kolā ko vāi‵vāi te lotou fakatuanaki, i te koga ne fai atu a ia ke olo ki ei? “Ne fakapilipili io me ne fanatu a Iesu ki a latou kae fai atu.” (Mataio 28:18) Ne seki kilokilo atu a ia ki a latou mai i se koga ‵mao kae ne fanatu ‵tonu eiloa ki a latou. Mafaufau la ki te fakatapūga ne maua ne te kau apositolo i te taimi ne gasuesue muamua ei a Iesu o fanatu ki a latou! Ke na gasue‵sue muamua foki tatou kae talimālō faka‵lei atu ki tino vāi‵vāi i te feitu faka-te-agaga kolā e toe ‵foki mai ki te fakapotopotoga Kelisiano.

16. (a) Ne a mea e tauloto ne tatou mai i faifaiga a Iesu ki ana soko? (e) E mafai pefea o fakaasi atu ne tatou te kilokiloga a Iesu e uiga ki tino vāi‵vāi? (Ke onoono ki te fakamatalaga fakaopoopo.)

¹⁶ Ne a foki a nisi mea ne fai ne Iesu? Muamua la, ne fai ne ia se faka‵pulaga: “Ko oti ne tuku mai  ki a au a te pule kātoa.” A te lua o mea, ne tuku atu ne ia se galuega: ‘Tela la, olo atu o fai a soko.’ A te tolu o mea, ne tauto atu: “Au e fakatasi faeloa mo koutou.” Kae, e mata, e lavea ne koe a te mea ne seki fai ne Iesu? Ne seki kote ne ia te kau soko mō te lotou fakata‵mala mo te fakalotolotolua. (Mataio 28:17) E mata, ne magoi te auala ne fakaaogā ne ia? Ao. E seki leva, kae ne toe kamata te kau apositolo o “akoako atu kae lauga atu ki tino e uiga ki a Iesu.” (Galuega 5:​42) Mai te tau‵tali atu ki te fakaakoakoga a Iesu e uiga ki ‵tou kilokiloga mo faifaiga ki tino vāi‵vāi, ko mafai ei o fakamoe‵moe tatou ke lavea atu ne ikuga fakafia‵fia i ‵tou fakapotopotoga. *​​—Galuega 20:35.

“Au e Fakatasi Faeloa mo Koutou”

17, 18. Ne a manatu fakamalosi loto e maua ne tatou i pati a Iesu, “Au e fakatasi faeloa mo koutou”?

¹⁷ A pati fakaoti i te fakatonuga a Iesu, “Au e fakatasi faeloa mo koutou,” e maua i ei se manatu fakamalosi loto mō tino katoa kolā e taumafai o fakataunu te fakatonuga a Keliso ke fai a soko. Faitalia me ne a ‵tekemaiga ki te ‵tou galuega talai mo fatufatuga e fai mai ne ‵tou fili, e seai eiloa se pogai e ‵tau ei o ma‵taku tatou. Kaia? Me i a Iesu, te ‵tou Takitaki, telā e i a ia “te pule kātoa i te lagi mo te lalolagi,” e fakatasi mai o fesoasoani mai ki a tatou!

¹⁸ A te folafolaga a Iesu “Au e fakatasi faeloa mo koutou” se fakamafanafanaga gali. I te ‵tou taumafai o faka‵logo ki te fakatonuga a Keliso ke fai a soko, e se maua fua ne tatou te fiafia i ei kae e isi foki ne taimi fakafanoanoa. (2 Nofoaiga Tupu 6:​29) E ola a nisi o tatou i loto i taimi fakafanoa‵noa ona ko te mate o se tino pele. (Kenese 23:2; Ioane 11:​33-​36) E fakafesagai atu a nisi tino ki te olaga matua, māfai ko fanaifo te malosi ki lalo. (Failauga 12:​1-6) Kae e pokotia a nisi tino i te loto māfatia i te fia o aso. (1 Tesalonia 5:​14) Kae ko gasolo aka foki o tokouke tatou kolā e kausaki atu i loto i se olaga mativa. Kae tiga eiloa a feitu konā, e iku manuia eiloa te ‵tou galuega me i a Iesu ‘e fakatasi faeloa mo tatou,’ ke oko foki eiloa ki taimi faiga‵ta o ‵tou olaga.​​—Mataio 11:​28-​30.

19. (a) Ne a fakatonuga e aofia i te galuega a Iesu ke fai a soko? (e) Se a te mea e fesoasoani mai ke fakataunu ne tatou te fakatonuga a Keliso?

¹⁹ E pelā mo te mea ne lavea ne tatou i te mataupu tenei mo te mataupu mai mua atu i ei, e aofia a feitu kese‵kese katoa i te fakatonuga a Iesu ke fai a soko. Ne fai mai ne Iesu me kaia kae tefea foki te koga e ‵tau ei o fai a tena fakatonuga tenā. Ne fai mai foki ne ia a me ne a mea e ‵tau o akoako atu ne tatou kae fakagata mafea te fakatonuga tenā. E tonu, a te fakataunuga o te fakatonuga sili tenei se mea faigata. Kae fakatasi mo te malosi o te pule a Keliso telā e ‵lago mai ki a tatou mo tena fakatasi mai i ‵tou tafa, e mafai eiloa o fai ne tatou tena fakatonuga! E mata, e lotomalie koe ki ei?

[Fakamatalaga mai lalo]

Ka Tali Mai Koe Pefea?

• E akoako pefea ne tatou a nisi tino ke faka‵logo ki fakatonuga a Iesu?

• Ne a akoakoga e mafai o tauloto ne se soko fou mai nisi tino i te fakapotopotoga?

• Ne a mea e mafai ne tatou o fai ke fesoasoani atu ki tino kolā ko gasolo o vāi‵vāi i te feitu faka-te-agaga?

• Se a te fakamalosiga mo te fakamafanafanaga e maua ne tatou mai te folafolaga a Iesu “Au e fakatasi faeloa mo koutou”?

[Fesili mo te Sukesukega]

[Ata i te itulau e 29]

E ‵tau o fai tatou mo fai ne faiakoga mo tino fakatonutonu

[Ata i te itulau e 32]