Te Tulaga Faigata o te Putiakaga o Tama‵liki i Aso Nei

KO FAKATOKA te tino i o ia te fale‵kai o ‵pono i te afiafi po e tasi. Kae ulu atu i ei a fāfine e tokolua mo se tamaliki e tokotasi o ōta olotou meakai. Ona ko te lasi o tena fi‵ta, toeitiiti kae fai atu te tino i o ia te fale‵kai me ko ‵pono tena fale, kae ne fakaiku aka ne ia ke fai te lotou ōta. A koi kai‵kai kae sau‵tala a fāfine konei, ne teletele valevale te tamaliki i loto i te fale‵kai, laku tatelatela atu a masikeke ki te fola kae lakalaka ne ia. I lō te ‵liko atu ki ei, ne fakamisikata atu fua tena mātua ki ei. I te taimi ne olo ei latou, ne ‵fulu eiloa ne te tino i o ia te fale‵kai telā ko tu poloki eiloa i ana fi‵ta a te fola lailai o tena fale.

E pelā mo te mea kāti ko iloa ne koe, e fakaasi mai i vaegā mea konei e ‵tupu i te olaga, me e se ‵lei te putiakaga o tama‵liki i kāiga e tokouke. E uke a pogai. E tuku tiaki ne mātua olotou tama‵liki ke fai a mea e ma‵nako latou ki ei, i te lotou tali‵tonu me ‵tau o puti aka olotou tama‵liki ke maua ne latou te saolotoga. Io me kāti ko tō fakalave‵lave latou, ko sē lava a taimi o mātua ke ‵saga tonu atu ki olotou tama‵liki ke puti aka latou i se auala ‵tau. E mafau‵fau a nisi mātua me i akoakoga a te tamaliki ko te ‵toe mea tāua, telā la, toeitiiti ko saoloto fua te tamaliki o fai so se mea, māfai e ‵lei tena tulaga i te akoga kae talia foki ke ulu atu ki se akoga maluga takutakua.

Kae ui i ei, e fai mai a nisi tino me e ‵tau o toe onoono aka a mātua mo tino katoa ki olotou kilokiloga e uiga ki mea tau amioga. E kinau mai latou me ko aofia a tama‵liki i amioga solitulafono katoa kae e gasolo aka faeloa o uke a amioga fakasauā i akoga i aso takitasi. Tela la, ne faka‵mafa mai ne te pule faiakoga o se akoga i Seoul, Kolea, me e ‵tau o fakamuamua te akoakoga o amioga ‵lei ki tama‵liki. Ana muna: “Kafai ko oti ne ati aka ne koe a uiga ‵lei ko maua i ei te poto.”

E se fia ‵saga atu a mātua e tokouke kolā e ma‵nako ke ulu atu olotou tama‵liki ki akoga ma‵luga kae ke manuia foki olotou olaga ki pati aogā penā. Kafai koe se mātua, se a te vaegā tamaliki e manako koe ki ei? E mata, ke fai pelā me se tino matua amio ‵lei kae e iloa foki ne ia ana tiute? Se tino telā e amanaia ki nisi tino, e faigofie ana uiga, kae e loto fesoasoani? Kafai e penā loa, ke onoono la ki te suā mataupu.