E mafai o masei ‵ki a fakamaseiga e fai ne tulaga fakafanoanoa ki luga i a tatou. E mafai o fakamasei mai ki ‵tou mafaufau, fakavāivāi tatou, kae pokotia i ei ‵tou kilokiloga e uiga ki te olaga. Ne pokotia malosi a te tupu o Isalaelu ko Tavita i tulaga faiga‵ta e uke. Ne fakafesagai atu pefea tou tagata ki ei? Ne tali mai a Tavita i se salamo fakamalosi loto: “Ko kalaga atu au ki te Aliki [Ieova] mō se fesoasoani; au e fakatagi ki a ia. Ko fakaasi atu ne au ki a ia a mea e se fiafia au ki ei; ko taku atu ne au ki a ia oku puapuaga katoa. Kafai au ka takavale, e iloa ne ia te mea e ‵tau mo au o fai.” Ao, ne ‵talo atu eiloa a Tavita mo te loto maulalo ki te Atua mō fesoasoani.​—Sala. 142:1-3.

Ne usu mai a Tavita i te suā salamo: “E tasi te mea ne fakamolemole atu ei au ki a Ieova​—ko te mea telā ka ‵sala au ki ei—ko te mea ke nofo au i te fale o Ieova i aso katoa o toku olaga, o ‵pula ‵toka atu ki te aga‵lei o Ieova kae ‵kilo atu mo te loto fakafetai ki tena faletapu.” (Sala. 27:4, NW) A Tavita e sē se tino Levi, kae mafaufau la i a ia e tu i tua o te titi ‵malu i tafa eiloa o te kogāloto o te tapuakiga tonu. Ko ‵fonu te loto o Tavita i te loto fakafetai ko ala ei o manako tou tagata o nofo i konā i aso o tena olaga kae “‵pula ‵toka atu ki te aga‵lei o Ieova.”

A te pati “aga‵lei” e soko tasi mo te tulaga o te “lotomalie io me fakafiafia ki te mafaufau mo lagonaga.” E kilo atu faeloa a Tavita mo te loto fakafetai ki te fakatokaga a te Atua mō tapuakiga. Se mea ‵lei ke ‵sili ifo ki a tatou eiloa, ‘E mata, e ‵pau oku lagonaga mo Tavita?’

A te fakatokaga a Ieova i aso nei ke tapuaki atu a tino ki a ia e se fakavae ki se fale faka-te-foitino. Kae e aofia i ei te faletapu sili o te Atua​—te fakatokaga ‵malu o te tapuakiga tonu. * Kafai tatou e “‵kilo atu mo te loto fakafetai” ki te fakatokaga tenei, e mafai ne tatou o “‵pula ‵toka atu ki te aga‵lei o Ieova.”

Mafaufau ki te fatafaitaulaga palasi io me kopa e ‵sunu i ei a taulaga telā e tu i mua o te mataloa o te faleie. (Eso. 38:1, 2; 40:6) Ne sui mai ne te fatafaitaulaga tenā a te loto fiafia o te Atua o talia a te ola faka-te-foitino o Iesu e pelā me se taulaga. (Epe. 10:5-10) Mafaufau me se a te aoga o te mea tenā mō tatou! Ne tusi mai te apositolo ko Paulo: “Ne toe faka‵lei tatou mo te Atua, a koi fai tatou mo ana fili, e auala i te mate o tena Tama.” (Loma 5:10) Mai te fakatuanaki ki te toto maligi o Iesu, e fia‵fia eiloa tatou ki te taliaga mo te loto talitonu telā e maua mai te fai mo fai a taugasoa o te Atua. Kae ko te ikuga, e maua ne tatou se “va fakataugasoa ‵pili mo Ieova.”​—Sala. 25:14, NW.

Ona ko ‵tou agasala e mafai o “‵solo kea‵tea,” e oko mai ‘te taimi ka maua ei ne tatou te malosi fou mai i a Ieova.’ (Galu. 3:19) E tai ‵pau ‵tou tulaga mo se pagota telā ne salamō ki ana mea mua ne fai kae fai ne ia a ‵fuliga ‵lasi a koi fakatalitali a ia ki tena fakasalaga. I te kilo atu ki te mea tenei, ne ‵solo faka‵ma ne se famasino alofa a te li‵poti o te tagata​—o tapale kea‵tea a tena fakasalaga ki te mate. Mafāga o fakatapūga kae fakafiafia e oko ki se pagota penā! E pelā mo te famasino tenā, e ‵fuli atu a Ieova mo te fiafia ki tino sala‵mo kae tapale kea‵tea a te fakasalaga ki te mate.

E aofia i vaega o te tapuakiga tonu telā ne matea ne Tavita i te fale o Ieova ko te maopoopoga o te vaitino  Isalaelu e tokouke, te faitauga i mua o tino mo te fakamatalaga o te Tulafono, te ‵sunuga o mea ma‵nogi, mo te tukuatuga o te taviniga tapu ne faitaulaga mo te kau Levi. (Eso. 30:34-38; Nume. 3:5-8; Teu. 31:9-12) E tai ‵pau a vaega konei o te tapuakiga tonu i Isalaelu mua mo mea i aso nei.

I aso nei, “ko oko eiloa i te gali mo te ‵lei, manafai e ‵nofo tasi a tino o te Atua e pelā me ne taina!” (Sala. 133:1) E fakaofoofogia a te fanakaga o te aofaki o ‵tou “kautaina kātoa” i te lalolagi. (1 Pe. 2:17) E faitau kae fakamatala te Muna a te Atua i mua o tino i ‵tou fakatasiga. Ko oti ne fakatoka ne Ieova se polokalame tāua o akoakoga e auala i tena fakapotopotoga. E uke foki a mea‵kai faka-te-agaga e mafai o maua i tusi ke fakaaoga ne tatou i ‵tou sukesukega totino mo sukesukega a te kāiga. Ne fai mai se sui e tokotasi o te Potukau Pule: “A te mafaufau ‵loto ki te Muna a Ieova, mafaufau ki tena aoga, kae sukesuke ke maua te poto mo te malamalama ne faka‵fonu ki ei oku itula ne ala ei au ki koloa mo te lotomalie faka-te-agaga.” Ao, ‘ka fiafia eiloa koe i a koe e poto.’​—Faata. 2:10.

I aso nei, e avatu a ‵talo a tavini a te Atua ki a Ieova i aso takitasi. Ki a Ieova, a ‵talo penā e ‵pau mo te manogi o se taulaga manogi ‵lei. (Sala. 141:2) Ko oko eiloa i te fakamalie loto ke iloa atu i a Ieova te Atua e fiafia mai ki a tatou māfai e ‵talo atu tatou ki a ia mo te loto maulalo!

Ne ‵talo atu penei a Mose: “Te Aliki [Ieova] te motou Atua, ke i a matou tau fakamanuiaga. Tuku mai te fakamanuiaga ki mea katoa a matou e fai.” (Sala. 90:17) E fakamanuia ne Ieova a ‵tou galuega talai māfai e fai ne tatou mo te loto finafinau. (Faata. 10:22) Kāti ko oti ne fesoasoani atu tatou ki nisi tino ke tauloto ki te munatonu. E se taumate ne kufaki tatou i tausaga e uke i te faiga o te galuega talai faitalia te sē toaga, te fakamasakisaki, te ‵mae o lagonaga, io me ko fakasauāga. (1 Tesa. 2:2) E tigā te feitu tenā, e mata, ne seki lavea ne tatou a “te aga‵lei o Ieova” kae iloa aka i ei i ‵tou Tamana i te lagi e fiafia malosi ki ‵tou taumafaiga?

Ne usu mai a Tavita: “Te Aliki [Ieova], ko koe eiloa toku tofi, e tuku mai ne koe a mea katoa e manako au ki ei; a toku ola foki e i ou lima. Ko oko eiloa te fakaofoofogia o au meaalofa ne tuku mai ki a au; ko oko eiloa i te lei.” (Sala. 16:5, 6) Ne loto fakafetai a Tavita mō tena “tofi,” telā ko te mauaga o se fesokotakiga ‵lei mo Ieova mo te tauliaga ke tavini atu ki a ia. Kāti e logo‵mae tatou i tulaga faiga‵ta pelā mo Tavita, kae ko oko eiloa i uke o fakamanuiaga faka-te-agaga e maua ne tatou! Tela la, ke fia‵fia faeloa ki te tapuakiga tonu kae tumau i te “‵kilo atu mo te loto fakafetai” ki te faletapu faka-te-agaga o Ieova.