1. Ona ko tatou ne faite ki te fakatusa o te Atua, ne a mea e mafai ne tatou o fai?

E ISI se tugāpati e masani o fai sāle, “e soko eiloa te tama ki tena tamana.” E tonu, a te tokoukega o tama‵liki e ‵soko eiloa ki olotou mātua. Ne māfua mai i te tamana mo te mātua a te fanau mai o te lā tamaliki. A Ieova, te ‵tou Tamana faka-te-lagi, ko te Tino telā e tuku mai ne ia te ola. (Sala. 36:9) Kae ko tatou, ana tamaliki faka-te-foitino, e ‵soko ki a ia i nisi feitu. Ona ko tatou ne faite ki tena fakatusa, e mafai ne tatou o fakasako‵sako, fai a fakaikuga, ati aka kae fakatumau a va fakataugasoa.​—Kene. 1:26.

2. Se a te mea e fakavae ki ei a te mafai o fai a Ieova mo ‵tou Taugasoa?

² E mafai o fai a Ieova mo ‵tou Taugasoa pele. E fakavae a te fai taugasoa penā ki te alofa o te Atua ki a tatou mo ‵tou fakatuanaki ki a ia mo tena Tama. Ne fai mai a Iesu: “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai.” (Ioa. 3:16) E uke a fakaakoakoga o tino kolā ne ‵pili olotou fesokotakiga mo Ieova. Ke mafau‵fau tatou ki tino e tokolua mai i a latou.

3, 4. Fakamatala mai a te ‵kese o Apelaamo mo ana fanau e uiga ki te va fakataugasoa mo Ieova.

³ Ne faipati a Ieova e uiga ki te toeaina kae ko te tupuga o tino  Isalaelu e pelā me ko “toku taugasoa ko Apelaamo.” (Isa. 41:8) Ne taku foki Apelaamo i te 2 Nofo. 20:7 me ko te taugasoa o te Atua. Se a te mea e fakavae ki ei a te tumau o te va fakataugasoa o te tagata fakamaoni tenā mo tena Mafuaga? Ko te fakatuanaki o Apelaamo.​—Kene. 15:6; faitau te Iakopo 2:21-23.

⁴ A fanau a Apelaamo kolā ne fai mo fai te fenua mua o Isalaelu, ne fai ne latou a Ieova e pelā me ko te lotou Tamana mo te Taugasoa i te kamataga. Kae se mea fakafanoanoa me ne galo i a latou te lotou va fakataugasoa mo te Atua. Kaia? Ona ko latou ne fakata‵mala o fakatuanaki ki tautoga a Ieova.

5, 6. (a) Ne fai pefea a Ieova mo fai tou Taugasoa? (e) Ne a fesili e ‵tau o ‵saga tonu tatou ki ei?

⁵ Ko te uke o au mea e tauloto e uiga ki a Ieova, ko te malosi o tou fakatuanaki ki a ia, kae ka gasolo aka o ‵poko tou alofa ki a ia. Ke toe mafaufau ki te taimi ne iloa ei ne koe i te Atua se Tino tonu, se tino telā e mafai ne koe o ati aka se fesokotakiga ‵pili mo ia. Ne tauloto foki ne koe i a tatou katoa ne fa‵nau mai i te agasala ona ko te sē fakalogo o Atamu. Ne malamalama foki koe i tino ne ‵vae kea‵tea mai te Atua. (Ko. 1:21) Kae nei la, ko iloa ne koe i ‵tou Tamana alofa i te lagi e sē se tino telā e nofo ‵mao ona ko ia e se fiafia mai ki a tatou. I te taimi ne tauloto ei tatou e uiga ki te fakatokaga ne ia te taulaga togiola a Iesu kae fakatuanaki ki ei, ne kamata ei tatou o ati aka se va fakataugasoa mo te Atua.

⁶ Kafai e toe ‵kilo nei tatou ki tua, se mea ‵lei ke ‵sili ifo ki a tatou eiloa: ‘E mata, e gasolo nei au ki mua i toku va fakataugasoa mo te Atua? E mata, e malosi a toku talitonu fakamaoni ki toku Taugasoa pele, ko Ieova, kae tupu aka faeloa toku alofa ki a ia i aso takitasi?’ A te suā tino telā ne ‵pili a tena fesokotakiga mo Ieova i aso taumua ko Kitiona. Ke mafaufau tatou ki tena fakaakoakoga ‵lei kae faka‵goto ki ‵tou loto.

7-9. (a) Se a te mea fakaofoofogia ne oko ki a Kitiona, kae se a te ikuga ne maua mai i ei? (Ke onoono ki te ata i te kamataga.) (e) E mafai pefea o maua ne tatou se va fakataugasoa mo Ieova?

⁷ Ne tavini atu te famasino ko Kitiona ki a Ieova i se vaitaimi sē tokagamalie i te tala fakasolopito o Isalaelu i te otiga ne ulu ki loto i te Fenua o te Folafolaga. E fai mai te Famasino mataupu e 6 i te agelu a Ieova ne āsi atu ki a Kitiona i Ofala. I te taimi tenā, ne fai a te kau Mitiana mo mea fakamataku ki te kau Isalaelu. Ona ko te pogai tenā, ne tuki saito ei a Kitiona, e se i te malae kae i te koga ‵tau uaina, te koga telā e mafai ne ia o ‵funa fakavave i ei a fuaga tāua. Ona ko te poi me ko sae mai te agelu kae faipati e uiga ki a ia e pelā me se “tagata toa kae malosi,” ne fesili atu a Kitiona me ko Ieova telā ne fakasao ne ia te kau Isalaelu mai i Aikupito ka fesoasoani atu eiloa ki a latou i te taimi nei. Ne taku tonu atu ne te agelu ki a Kitiona e sui ei ne ia te Mafuaga, i a Ieova e ‵lago tonu eiloa ki a ia.

⁸ Ne mafaufau a Kitiona me e mafai pefea ne ia o “faka‵sao Isalaelu mai tino Mitiana.” I te tali telā ne fai atu ki a ia, ne fai tonu atu a Ieova: “I a au e fesoasoani atu ki a koe. Ka ‵ta ne koutou a tino Mitiana e pelā eiloa me ta ne koutou se tagata e tokotasi.” (Fama. 6:11-16) Ne ‵sala a Kitiona ki se fakailoga me koi sē mautinoa i a ia me e fakagalue aka pefea a te mea tenei. Onoono la ki te sau‵talaga tenei me e seai se fakalotolotolua i a Kitiona ne kilo atu ki a Ieova e pelā me se Tino tonu.

⁹ A te suā mea telā ne tupu ne fakamalosi atu ki te fakatuanaki o Kitiona kae ne fai ei ke pili malosi atu a ia ki te Atua. Ne fakatoka ne Kitiona se ‵kaiga kae tuku atu ki te agelu. I te taimi ne ‵ka ei a mea‵kai ne te afi i te patelega o te tokotoko a te agelu ki ei, ne iloa aka i ei ne Kitiona i te agelu ko te sui o Ieova. Ona ko te ofo, ne fai aka ei a Kitiona: “Te Aliki Maluga [Ieova]! Ko oti ne lavea ne au tau agelu ki oku mata!” (Fama. 6:17-22) E mata, ne fakatu aka ne te sau‵talaga tenā se ‵pui i te va o Kitiona mo tena Atua? Ikai! Ne  ‵kese te mea ne tupu. Ne kamata o iloa ne Kitiona a Ieova i se auala telā e maua ei se va filemu mo te Atua. E iloa ne tatou a te mea tenei i te igoa o te fatafaitaulaga telā ne fakatu ne Kitiona i te koga tenā​—“Te Aliki [Ieova] e o ia te Filemu.” (Faitau te Famasino 6:23, 24.) Kafai e mafau‵fau ‵loto tatou ki mea e fai ne Ieova i aso takitasi mō tatou, ko iloa ei ne tatou i a ia se Taugasoa tonu. A te ‵talo faeloa ki te Atuae momea aka i ei a lagonaga filemu kae fakamalosi foki i ei ‵tou va fakataugasoa mo ia.

10. E ‵tusa mo te Salamo 15:3, 5, se a te mea e manako mai a Ieova ke fai ne tatou māfai e fai tatou mo fai ana taugasoa?

¹⁰ Ko te mea ke fai a Ieova mo fai ‵tou Taugasoa, e ‵tau o fakafetaui ‵tou mea e fai mo tulaga mautinoa. E pelā mo mea ne tusi i te Salamo e 15, ne usu mai ne Tavita a te mea telā e manakogina ne tatou ko te mea ke ‘ulu atu tatou ki te Faletapu o Ieova,’ ko tena uiga, ke fai mo fai se taugasoa o te Atua. (Sala. 15:1) Ke mafau‵fau tatou ki mea e lua konei—te ‵kalo kea‵tea mai te gutu fatufatu mo te fakamaoni i ‵tou mea katoa e fai. E ‵tusa mo mea konei, ne fai mai a Tavita e uiga ki te tino telā e ulu ki loto i te Faletapu o Ieova: “Kae sē fakasalalau foki ne ia ne pati fakalumaluma e uiga ki ona tuakoi. . . . e se talia ne ia se ‵togi ke fakasala ei se tino e se sala.” ​—Sala. 15:3, 5.

11. Kaia e ‵tau ei tatou o ‵kalo kea‵tea mai te fatufatuga o se tino?

¹¹ Ne fai mai foki a Tavita i te suā salamo: “Sa faipati la ki pati ma‵sei mo pati loi.” (Sala. 34:13) A te fakatamala o faka‵logo ki te polopolokiga tenei ka faite mai i ei se vā i te vasia o tatou mo ‵tou Tamana amiotonu i te lagi. A te tonuga loa, a te gutu fatufatu ko te uiga masani o te fili sili o Ieova, ko Satani. A te pati “Tiapolo” ne maua mai i se pati Eleni telā e fakauiga ki te “gutu fatufatu.” A te pule atu ki ‵tou pati e fai e uiga ki nisi tino e fai ei ke ‵pili malosi atu tatou ki a Ieova. Kae maise eiloa ‵tou kilokiloga ki tāgata filifilia i loto i te fakapotopotoga.​—Faitau te Epelu 13:17; Iuta 8.

12, 13. (a) Kaia e ‵tau ei mo tatou o fakamaoni i mea katoa? (e) E aoga pefea a ‵tou fakamaoni ki nisi tino?

¹² E penā foki a te fakamaoni, se uiga telā e lavea atu i tavini a Ieova, kae e se ko te uiga takolekole. Ne tusi mai te apositolo ko Paulo: “‵Talo faeloa mō matou. E tali‵tonu matou me ko maua ne matou se loto lagona ‵ma, me e ma‵nako eiloa matou ke fakamaoni matou i mea katoa kolā e fai ne matou.” (Epe. 13:18) Me ne fakaiku aka ne tatou “ke fakamaoni . . . i mea katoa,” e ‵kalo tatou kea‵tea mai te fakaaoga ‵se o ‵tou taina Kelisiano. Pelā me se fakaakoakoga, kafai e ga‵lue latou mai lalo i a tatou i galuega a te malo, e ‵tau o fai faka‵lei kae ‵togi e ‵tusa mo te feagaiga ne fai ne tatou ki a latou. E pelā me se Kelisiano, e fakamaoni tatou i ‵tou faifaiga e fai ki ‵tou tino ga‵lue mo nisi tino katoa. Kae kafai e fakaga‵lue tatou ne se taina Kelisiano, e ‵tau mo tatou o fakaeteete ke mo a e fakaaoga ‵se ne tatou a ia mai te ma‵nako ki tauliaga fakapito.

¹³ E masani o lagona ne tatou a pati fakafetai mai i tino o te lalolagi kolā e fesokotaki mo Molimau a Ieova i mea tau galuega! Pelā me se fakaakoakoga, ne matea ne te pule o se fakapotopotoga lasi i mea fakatu‵tu i Molimau a Ieova e tausi eiloa ki olotou pati. “E fakamaoni faeloa koe ki mea ne lotomalie koe o fai,” ko ana pati. (Sala. 15:4) E fesoasoani mai a uiga penā ke tumau ‵tou va fakataugasoa mo Ieova. E se gata i ei, e avatu foki i ei a tavaega ki ‵tou Tamana alofa i te lagi.

14, 15. E mafai pefea o fesoasoani atu tatou ki nisi tino ke fai mo fai ne taugasoa o Ieova i ‵tou galuega talai?

¹⁴ E ui eiloa kāti e tali‵tonu latou me e isi se Atua, a te tokoukega o tino kolā e fetaui mo tatou i ‵tou galuega talai e se ‵kilo atu ki a ia e pelā ko te lotou Taugasoa pele. E mafai pefea o fesoasoani atu tatou ki a latou? Ke mafau‵fau ki fakatonuga ne tuku atu ne Iesu ki te toko 70 o ana soko i te taimi ne uga atu ei ne ia ke olo taki  tokolua o talai: “I so se fale e ulu koutou ki ei, fai atu muamua penei: ‘Ke i te fale tenei a te filemu.’ Kae kafai e nofo i konā se taugasoa o te filemu, ka maua ei ne ia te otou filemu. Kae kafai e seai, ko toe fakafoki mai ei te otou filemu ki a koutou.” (Luka 10:5, 6) E mafai foki ne tatou o fakalatalata mai a tino ki te munatonu e auala i ‵tou pati fakatomua kolā e fai atu mo te atafai. E uiga ki tino ‵teke, kāti e fesoasoani foki a te faiga tenei ke fakaseai a te loto kaitaua kae ‵sae i ei se auala ke taliagofie i te suā taimi.

¹⁵ Kafai e fetaui tatou mo tino taki tokotasi kolā e ma‵losi i lotu ‵se io me tau‵tali i tuu mo aganuu kolā e se ‵lago ki ei te Tusi Tapu, e tumau eiloa tatou i te fakaasi atu o uiga filemu kae atafai.  E talia ne tatou i ‵tou fakatasigaa tino kolā ema‵nako o tauloto ki mea e uke atu e uiga ki te Atua telā e tapuaki tatou ki ei ona ko te sē lotoma‵lie ki mea e fai ne tino i aso nei. E tuku mai i mataupu i loto i te fakasologa “E ‵Fuli ne te Tusi Tapu a Olaga o Tino” a fakaakoakoga ‵lei e uke ki a tatou.

16. I te feitu fea e mafai ei o fai tatou mo fai ne ana taugasoa kae “ga‵lue fakatasi” mo ia?

¹⁶ E masani o ati aka ne tino kolā e ga‵lue fakatasi se va fakataugasoa ‵pili. Ne maua ne tino katoa kolā ne tukugina atu ki a Ieova a te tauliaga ke fai mo fai ana taugasoa kae “ga‵lue fakatasi mo te Atua.” (Faitau te 1 Kolinito 3:9.) E tonu, kafai e fakalave‵lave malosi tatou i te galuega talai mo te faiga o soko, e gasolo aka eiloa o ‵poko a ‵tou malamalama i uiga fakaofoofogia o ‵tou Tamana faka-te-lagi. E lavea ne tatou te auala e fesoasoani mai ei a tena agaga tapu o fakatoka tatou ke fakataunu a ‵tou tiute ke talai atu a te tala ‵lei.

17. E fakaasi mai pefea i mea‵kai faka-te-agaga kolā e tuku mai i ‵tou fono o fenua mo fono o atufenua i a Ieova ko ‵tou Taugasoa?

¹⁷ Ko te ga‵lue malosi o tatou i te faiga o soko, ko te lagona ne tatou a te ‵pili malosi o tatou ki a Ieova. Pelā me se fakaakoakoga, e matea ne tatou te auala ne taofi ei ne Ieova a tino ‵teke. Toe ‵kilo ki tua i nāi tausaga ko ‵teka. E mata, ne seki lavea faka‵lei ne tatou te auala ne takitaki mai ei tatou ne te Atua? E ofo tatou i te maua mai faeloa o mea‵kai faka-te-agaga. E fakaasi mai i polokalame o fono o te atufenua mo fono o fenua a te alofa o ‵tou Tamana o kilo ‵loto ki ‵tou fakalavelave mo mea e ma‵nako ki ei. Ne tusi mai se kāiga e tasi e uiga ki te loto fakafetai o latou ki se fono o te atufenua: “Ne ‵goto tonu ki omotou loto a te polokalame. Ne lagona ne matou a te lasi o te alofa o Ieova ki a matou katoa taki tokotasi kae manako ke iku manuia matou.” Mai tua o te ‵kauatuga ki se fono fakapito i Ireland, ne fakaasi mai ne se tauavaga mai Siamani a te lā loto fakafetai ki te auala ne tali fia‵fia kae tausi atu ki a lāua, kae toe fai mai: “Kae fakasilisili eiloa te fakafetai a māua ki a Ieova mo tena Tupu ko Iesu Keliso. Ne ‵kami ne lāua a māua ke fai mo vaega o te fenua ‵kau fakatasi tonu tenei. E se fai‵pati fua  māua ki te ‵kau fakatasi kae ko maua ne māua i aso katoa. A mea kolā ne fetaui mo māua i te fono fakapito i Dublin ka fakamasaua mai faeloa ki a māua a te tauliaga tāua ko maua ne māua ke tavini atu ki ‵tou Atua sili fakatasi mo koutou katoa.”

18. Se a te mea e mafai o fesili ifo ki a tatou eiloa e uiga ki ‵tou fesokotakiga mo Ieova?

¹⁸ E gasolo o ‵poko a te va fakataugasoa māfai e ‵lei a te fesokotakiga. I te vaitaimi tenei o poto fou i te faiga o fesokotakiga, ko lauiloa a te aveavega o fekau i te Itaneti. Kafai e faka‵tusa ne tatou, e fakatulaga pefea ne tatou taki tokotasi a ‵tou fesokotakiga totino mo ‵tou Taugasoa pele, ko Ieova? E tonu, a ia ko te “Tino telā e fakalogologo ki ‵talo.” (Sala. 65:2, NW) Kae e pefea te uke o taimi e fai‵pati muamua sāle ei tatou ki a ia?

19. Se a te fesoasoani e mafai o maua ne tatou māfai e faigata o ‵tala ne tatou ‵tou loto ki ‵tou Tamana faka-te-lagi?

¹⁹ E se faigofie ki nisi tavini a te Atua ke ‵tala olotou loto kae fakaasi atu olotou lagona ‵loto. Kae tenā eiloa te mea e manako a Ieova ke fai ne tatou māfai e ‵talo atu tatou. (Sala. 119:145; Tagi. 3:41) Kafai foki e faigata o fakamatala i pati a lagonaga ‵loto penā, e isi se ‵tou fesoasoani. Ne tusi atu a Paulo ki Kelisiano i Loma: “Kafai e se iloa ne tatou a te mea e ‵tau o ‵talo atu tatou e uiga ki ei, e fakatagi atu eiloa te agaga mō tatou i mea kolā e manava fi‵ta tatou i ei kae e se mafai o fakamatalagina. Kae e iloa ne te tino telā e iloilo ne ia a loto o tino a galuega a te agaga, me ko ia telā e fakatagi atu ki te Atua mō te kau tapu.” (Loma 8:26, 27) A te mafaufau ‵loto o tatou ki pati i loto i tusi o te Tusi Tapu pelā mo Iopu, Salamo, mo Faataoto ka fesoasoani mai ke fakaasi atu ne tatou a ‵tou lagonaga ‵loto ki a Ieova.

20, 21. Se a te fakamafanafanaga e tuku mai i pati a Paulo i te Filipi 4:6, 7?

²⁰ Kafai e fe‵paki tatou mo tulaga fakafanoanoa, ke faka‵logo tatou ki pati fakatonutonu a Paulo ki te kau Filipi: “Ke mo a ma manava‵se koutou ki so se mea, kae ke tuku atu a mea katoa kolā e ma‵nako koutou ki ei ki te Atua fakatasi mo otou fakafetai e auala i otou talosaga.” E mautinoa ‵lei me i fesokotakiga penā mo ‵tou Taugasoa pele ka maua i ei ne tatou a fakamafanafanaga, me e toe fai mai a Paulo: “A ko te filemu o te Atua telā e sili fakafia atu i mea katoa kolā e malamalama i ei a tino ka puipui ne ia otou loto mo otou mafaufau e auala i a Keliso Iesu.” (Fili. 4:6, 7) Ke fakatāua faeloa ne tatou a te “filemu o te Atua” telā e puipui tonu ki ei ‵tou loto mo te malosi o ‵tou mafaufau.

²¹ E fesoasoani mai a te ‵talo ke ati aka ne tatou se va fakataugasoa mo Ieova. Tela la, “ke ‵talo faeloa” tatou. (1 Tesa. 5:17) Ke na fakamalosi aka ne te sukesukega tenei a ‵tou fesokotakiga tāua mo te Atua mo ‵tou fakaikuga ke tau‵tali i ana manakoga amio‵tonu. Kae ke fakaavanoa ne tatou a taimi e lava ke mafau‵fau ‵loto ki fakamanuiaga kolā ko maua ne tatou me e fai eiloa a Ieova mo fai ‵tou Tamana, ‵tou Atua, mo ‵tou Taugasoa.