I A Setema 7, 1950, ne fai au mo fai se tokotasi o te kāiga Peteli i Brooklyn. I te taimi tenā, e toko 355 taina mo tuagane mai i atufenua kese‵kese e aofia i te kāiga Peteli mai te 19 ki te 80 tausaga te ma‵tua. A te tokoukega o latou ne Kelisiano fakaekegina.

Ne tauloto au ke tavini atu ki ‵tou “Atua fiafia” mai i toku mātua. (1 Timo. 1:11) Ne kamata tou fafine o tavini atu ki a Ieova i te taimi koi foliki ei au. I te taimi ko sefulu ei oku tausaga i a Iulai 1, 1939, ne papatiso ei au i te fono o kogā fenua (ko taku nei ko te fono o te fenua) i Columbus, Nebraska, U.S.A. E nofo ki te tokoselau o matou ne maopoopo i se koga ne ‵togi o fakalogo‵logo ki te lāuga a Iosefa Latafoti ne puke telā e fai penei “Fascism or Freedom.” Ko nofo kogāloto a te lāuga, kae ko lavea atu se potukau o tino mai tua o te fale foliki telā e maopoopo ei matou. Ne ulu mālō mai latou ki loto, faimālō mai ke taofi te motou fakatasiga, kae atuli matou ki tua mo te fa‵kai. Ne maopoopo matou i se koga tokilakau kae fagai manu o se taina telā e se ‵mao mai te fa‵kai o fakalogo‵logo ki te ‵toega o te polokalame. E pelā mo te mea e mafai o masaua ne koe, ne seki puli aka eiloa i a au a te po masina ne papatiso ei au!

Ne taumafai malosi toku mātua o puti aka au i te munatonu. E tigā eiloa a toku tamana se tagata kae se tamana ‵lei, e se fiafia malosi tou tagata ki lotu io me ko toku feitu faka-te-agaga. Ne tuku mai ne toku mātua mo nisi Molimau i te Fakapotopotoga i Omaha, a fakamalosiga e uke kolā e manakogina ne au.

I te taimi ko pili ei au o oti mai te akoga maluga, e ‵tau o fai ne au se fakaikuga ki te mea ka fai ne au ki toku olaga. I taimi katoa e malolo ei au mai te akoga, e tavini atu au e pelā me se paenia malōlō (ko taku nei ki te paenia lagolago), fakatasi mo nisi tino kolā e kautama mo au.

E tokolua a taina talavou seki a‵vaga ne fatoa oti mai i te fitu o vasega i te Akoga i Kiliata—ko John Chimiklis mo Ted Jaracz—ne ‵tofi ke ga‵lue i te motou kogā koga i te galuega oloolo malaga. Ne poi au me ko taki 20 tupu fua a lā tausaga. I te taimi tenā, ko 18 i ei oku tausaga kae ko pili fua o oti mai te akoga maluga. Koi masaua eiloa ne au te taimi ne ‵sili mai ei a te Taina ko Chimiklis me ne a mea ka fai ne au ki toku olaga. I te taimi ne fai atu ei au ki a ia, ne fakamalosi mai tou tagata ki a au: “Ao, fano ‵tonu  eiloa koe ki loto i te taviniga tumau. E se iloa lele ne koe te koga e iku atu koe ki ei.” Ne fakamalosi ‵ki mai ki a au a pati konā fakatasi mo fakaakoakoga a taina konā. Tela la, i taku otiga mai te akoga, ne kamata ei au o paenia i te 1948.

I a Iulai 1950, ne olo matou mo oku mātua ki te fono i atufenua i te Yankee Stadium i New York City. A koi nofo atu au i te fono, ne kau atu au ki te fai‵patiga mō latou kolā e fia‵fia o ga‵lue i te Peteli. Ne tuku atu ne au se tusi e fakaasi atu i ei me ka fiafia au o galue i konā.

E ui eiloa ne seki ‵teke toku tamana ki taku galuega fakapaenia kae nofo eiloa i te fale, ne manatu aka tou tagata me e ‵tau o ‵togi ne au se aofaki tupe ki toku potu mo aku mea‵kai. Tela la, i te aso e tasi i te kamatamataga o Aokuso, i toku auala o ‵sala se galuega ‵togi, ne āsi muamua atu au ki te pokisi meli a matou. Ne maua ne au i ei taku tusi mai i Brooklyn. Ne saina mai loto i te tusi ko Natano H. Noa, telā ne tusi mai penei: “Ko oti ne maua ne matou tau tusi ke galue koe i te Peteli. E malamalama au me e lotomalie koe o tumau i te Peteli ke oko ki te taimi e ave ei koe kea‵tea ne te Aliki. Tela la, e manako au ke vau koe ki te Peteli i te 124 Columbia Heights, Brooklyn, Niu Ioki, i a Setema 7, 1950.”

I te fokimaiga toku tamana mai te galuega i te aso tenā, ne fai atu au ki tou tagata me ko maua ne au se galuega. Ana muna, “Ko ‵lei la, ka galue koe i fea?” Ne tali atu au, “I te Peteli i Brooklyn, kae $10.00 i te masina.” Ne tai poi eiloa tou tagata i te mea tenā, kae ne fai mai a ia me kafai e tenā te mea ne filifili ne au ke fai, ke taumafai au o fai ke iku manuia. Ne seki leva foki te taimi mai tua o te fono i atufenua i te Yankee Stadium i te 1953, kae papatiso tou tagata!

Se mea fakafiafia, me ne ‵kami foki ki te Peteli i te taimi tenā, ko toku taugasoa paenia ko Alfred Nussrallah, kae ne ma‵laga fakatasi atu māua ki konā. Fakamuli ifo, ne avaga tou tagata kae ne olo tasi mo tena avaga ko Joan ki Kiliata, ki te taviniga fakamisionale i Lepanona, kae oti aka, toe ‵foki ei ki te Iunaite Sitete o ga‵lue pelā me ne ovasia faima‵laga.

A taku galuega muamua i te Peteli ko te koga telā e faite i ei a tusi. A te lōmiga muamua ne galue au ki ei ko te tusi ko te What Has Religion Done for Mankind? Mai tua o se valu masina ne galue ei au i te koga e faite ei a tusi, ne ‵tofi au ke galue i te Matagaluega mō te Galuega Talai mai lalo i te takitakiga a te Taina ko Thomas J. Sullivan. Se mea fakafiafia ke ga‵lue fakatasi mo ia kae maua a mea aoga mai te poto mo te malamalama faka-te-agaga telā ne maua ne ia i loto i te fakapotopotoga.

Mai tua o te fakamāumāuga ne au toeitiiti kae kātoa te tolu tausaga i te Matagaluega mō te Galuega Talai, kae fai mai a te ovasia o te fale e faite ei a mea, ko Max Larson, i te Taina ko Noa e manako mai ki a au. Ne mafaufau au me se a taku mea ‵se ne fai. I te taimi ne fai mai ei a te Taina ko Noa me ne fia iloa ne ia me e isi saku palani ke tiakina ne au te Peteli i se taimi mai mua, pelā aka eiloa toku loto. Ne manako tou tagata ki se tino ke galue sē tumau i tena ofisa kae ne fia iloa ne ia me e mafai ne au o tausi te tofiga tenā. Ne fai atu au me e seai saku palani o tiakina te Peteli. Kae ko te ikuga, ne taulia au o galue i tena ofisa i te suā 20 tausaga.

Ne masani au o faipati me e se mafai eiloa ne au o ‵togi a te akoakoga ne maua ne au mai te ga‵lue tasi mo Taina ko Sullivan mo Noa, e pelā foki mo nisi tino i te Peteli, e pelā mo Milton Henschel, Klaus Jensen, Max Larson, Hugo Riemer, mo Grant Suiter. *

A taina kolā ne ga‵lue fakatasi mo au ne fakatoka faka‵lei eiloa mō galuega kolā ne fai ne latou e sui ei  te fakapotopotoga. Ne manako a te Taina ko Noa telā e seai se fi‵ta o kilo ki te gasolo ki mua o galuega fai o te Malo ki te lasi telā e mafai o oko ki ei. Ne lavea foki ne taina kolā e ga‵lue i tena ofisa a te faigofie o fai‵pati atu ki tou tagata. Kafai foki e lasi te ‵kese o motou manatu e uiga ki se mea, e mafai loa ne matou o fakaasi omotou manatu kae e isi eiloa sena loto talitonu ki ei.

I te taimi e tasi, ne faipati mai a te Taina ko Noa ki a au e uiga ki te tausiga o tamā mea. Ne fai mai tou tagata me i te taimi ne fai ei a ia mo ovasia i te fale e faite ei a mea, ne telefoni atu a te Taina ko Latafoti kae fai atu: “Te Taina ko Noa, kafai koe e vau mai konā ki te ‵kaiga i te afiafi, ko aumai aka ne koe ne lapa ‵solo penitala ma aku. E manako au ki ei i luga i taku taipola.” Muna a te Taina ko Noa me i te mea muamua ne fai ne ia ko te fano o puke mai a lapa ‵solo penitala mai te potu telā e tuku i ei, kae faulu ki loto i tena taga. I te fakaafiafi, ne fanatu ei a ia o avatu a mea konā ki te ofisa o te Taina ko Latafoti. Se mea foliki fua, kae e aoga ki te Taina ko Latafoti. Tenā, ne fai mai ei a te Taina ko Noa ki a au: “E manako au ke isi ne penitala ko oti ne fakamata i luga i taku taipola. Fakamolemole, ke tuku a mea konā i luga i te taipola i taeao katoa.” Ne onoono au i tausaga e uke ko ana penitala ke fakamata faeloa.

Ne masani o faipati a te Taina ko Noa e uiga ki te manakoga ke fakalogologo faka‵lei māfai e fakamolemole mai ke fai ne matou se galuega. I te taimi e tasi, ne tuku mai ne tou tagata ki a au se fakatonuga manino ki te auala e fai ei se mea mautinoa, kae ne fakatamala au o fakalogologo faka‵lei ki ei. Ne iku atu ei ki te fakafanoanoa malosi ne au a ia. Ne ma‵sei ‵ki oku lagonaga, tenā ne tusi atu ei taku tusi o fakatoese mō taku mea ne fai kae fakaasi atu oku manatu me e ‵lei atu ki a au ke sē galue au i loto i tena ofisa. Fakamuli ifo i te taeao tenā, kae vau a te Taina ko Noa ki taku taipola. “Lopati,” ko ana pati, “ko oti ne maua ne au tau tusi. A koe e ‵se. Ne faipati atu au e uiga ki ei, kae talitonu au me ka tai fakaeteete koe i te taimi mai mua. Tāua nei ka toe ‵foki o ga‵lue.” Ne loto fakafetai malosi au ki tena manavase mai.

Mai tua o te valu tausaga ne tavini ei au i te Peteli, ne seki ai eiloa ne aku palani ne fai kae na ko te galue faeloa i te Peteli. E ui i ei, e isi se ‵fuliga ne fai. I te taimi ne fai ei a te fono i atufenua i te Yankee Stadium mo Polo Grounds i te 1958, ne matea ne au a Lorraine Brookes, telā ne fetaui mo au i te 1955 i te taimi ne galue fakapaenia ei au i Montreal, Kanata. Ne fakamalosi mai ki a au a tena kilokiloga e uiga ki te taviniga tumau mo tena loto fiafia o fano ki so se koga e uga atu a ia ne te fakapotopotoga a Ieova. Ne fakamoemoe a Lorraine ke fano a ia ki te Akoga i Kiliata. I te taimi ko 22 ei ana tausaga, ne talia a ia ke kau ki te vasega 27, i te 1956. I te otiga mai konā, ne ‵tofi tou fafine ke fano o galue i Brazil e pelā me se misionale. Ne toe fakamalosi aka te mā vā fakataugasoa mo Lorraine i te 1958, kae ne talia ne ia taku fekau ke avaga māua. Ne palani māua ke avaga i te tausaga mai tua ifo mo te fakamoemoega ke ga‵lue fakatasi māua i te taviniga fakamisionale.

I taku faiatuga ki te Taina ko Noa e uiga ki aku  fuafuaga, ne fakaasi mai ana manatu ke faka‵tali māua ki se tolu tausaga, avaga, ko ga‵lue ei i loto i te Peteli i Brooklyn. I taimi konā, e mafai fua o ga‵lue tumau se tauavaga i te Peteli mai tua o te taimi ne avaga ei, māfai a te tokotasi i a lāua ko oti ne galue i te Peteli i se sefulu tausaga io me uke atu kae ko te suā tino e nofo ki se tolu tausaga. Ne lotomalie a Lorraine ke galue a ia i te Peteli i Brazil mō se lua tausaga kae tasi tausaga i te Peteli i Brooklyn a koi tuai o avaga māua.

A te auala fua e tasi e mafai ei māua o fesokotaki i te lua tausaga muamua o te faiga o te mā feagaiga ko te ave tusi. Ko tō ‵togi ‵mafa a te fakaaogaga o telefoni, kae seai foki ne meli iti i aso konā! I te taimi ne avaga ei māua i a Setema 16, 1961, ne taulia eiloa māua me ne fai ne te Taina ko Noa a te lāuga o te mā fakaipoipoga. E tonu, ne foliga mai pelā me se taimi leva a te fakatali ki nāi tausaga konā. Kae nei la, kafai e toe ‵kilo māua ki tua mo te fiafia lasi ki te 50 tupu tausaga o te mā fakaipoipoga, e loto ma‵lie māua me ne aoga eiloa a te faka‵tali ki ei!

I te 1964, ne tuku mai ki a au a te tauliaga ke āsi atu ki nisi atufenua e pelā me se ovasia o atufenua. I taimi konā, e se olo tasi avaga fa‵fine mo olotou avaga i malaga konā. I te 1977 ne fakamafuli ei a te mea tenā, kae ne kamata i ei o olo tasi a avaga fa‵fine mo olotou avaga. I te tausaga tenā, ne olo tasi māua mo Lorraine mo Grant mo Edith Suiter o āsi ki ofisa lagolago i Siamani, Austria, Eleni, Kupelu, Turkey, mo Isalaelu. Ko oti ne āsi atu au ki nisi atufenua e 70 i te lalolagi kātoa.

I te malaga e tasi penā ki Brazil i te 1980, ne afe muamua māua i Belém, se fa‵kai i te ekueta telā ne tavini muamua i ei a Lorraine i te galuega fakamisionale. Ne āsi foki māua ki taina i Manaus. I te lāuga telā ne fai i se malae ta‵fao, ne matea ne māua se potukau o tino e saga‵saga fakatasi kae sē fai ne latou a te tuu masani i Brazil telā e uma atu ei te fafine ki te kalafau o te suā fafine kae ko taina e lūlū lima te suā tino ki te suā tino. Kaia la?

A latou ko ‵tou taina mo tuagane mai i tino lepela kolā e ‵nofo loa i te kogāloto o te togāvao i te Amazon. E pelā me se puipuiga, e se ma‵nako latou o fakapa‵tele ki tino kolā ne ‵kau atu. E ui i ei, ne fia‵fia ‵ki a mā loto kae ka sē puli lele i a māua a te fiafia ne lavea atu i olotou mata! Ko oko eiloa i te ‵tonu o pati a Isaia: “Aku tavini ka ka‵laga fia‵fia ona ko te ‵lei o te tulaga o te loto.”—Isa. 65:14, NW.

Ne mafau‵fau faeloa māua mo Lorraine ki te onosefulu tupu tausaga ne tavini atu ei māua ki a Ieova. E fia‵fia ‵ki eiloa māua ki auala ne fakamanuia ei māua ona ko te talia ne māua a Ieova ke takitaki ne ia māua e auala i tena fakapotopotoga. Faitalia me ko sē mafai ne au o faimalaga i te lalolagi e pelā mo tausaga mua, koi mafai eiloa ne au o fai aku galuega i aso takitasi e pelā me se tino fesoasoani ki te Potukau Pule, ga‵lue fakatasi mo te Komiti o Kouotineita mo te Komiti o te Galuega Talai. E loto fakafetai malosi au ki te tauliaga ke ‵lago malie atu ki te kautaina i te lalolagi kātoa i te auala tenei. E ofo faeloa tatou i te ‵kilo atu ki se aofaki lasi o tamataene mo tamāfine kolā e ga‵lue i te taviniga tumau e maua ne latou te kilokiloga a Isaia, telā ne fai atu penei: “Ko au, uga mai au!” (Isa. 6:8) E fakaasi mai ne tino taki tokotasi e tokouke konei a te ‵tonu o pati a te ovasia o fenua telā ko leva ne fai mai ki a au: “Fano tonu eiloa ki loto i te taviniga tumau. E se iloa lele ne koe te koga ka iku atu koe ki ei.”