1. Se a te fakapotopotoga ne sui ne ia Isalaelu aposetate e pelā me ne tino mō te igoa o Ieova? (Ke onoono ki te ata i te kamataga.)

E ‵TAU eiloa o tavae atu ki a Ieova mō te fakatūga o te fakapotopotoga Kelisiano i te senitenali muamua mo te faka‵leiga o te tapuakiga tonu i taimi fakamuli nei. E pelā mo te mea ne lavea atu i te mataupu mai mua atu, ne sui ne te fakapotopotoga telā e aofia i ei a soko mua o Keliso a te fenua aposetate o Isalaelu e pelā me ne tino mō te igoa o Ieova. Ne ‵sao a te fakapotopotoga fou telā ne fakatāua malosi ne Ieova i te fakamaofaga o Ielusalema i te 70 T.A. (Luka 21:20, 21) A mea kolā ne ‵tupu i te senitenali muamua se ata o mea ‵tupu kolā ka aofia i ei a tavini a Ieova i aso nei. Ko pili fua o oti atu te lalolagi a Satani, kae ko te fakapotopotoga saukātoa a te Atua ka sao atu i aso fakaoti. (2 Timo. 3:1) E mafai pefea o fakamautinoa aka ne tatou a te mea tenei?

2. Ne a pati a Iesu e uiga ki te “fakalavelave lasi,” kae ka kamata pefea?

² Ne fai mai a Iesu e uiga ki tena fakatasi mai sē matea ki mata mo te gataga o te olaga tenei: “Ko te taimi eiloa tenā ka tupu i ei te ‵toe fakalavelave lasi telā e seki tupu aka eiloa talu mai te kamataga  o te lalolagi ke oko atu eiloa ki te aso tenei, kae ka se toe tupu eiloa se mea penā.” (Mata. 24:3, 21) Ka kamataga a te fakalavelave lasi tenei i te taimi e fakaseai ei ne Ieova a “Papelonia te Sili,” te emupaea o lotu ‵se, mai te fakaaogaga o malo fakapolitiki. (Faka. 17:3-5, 16) Se a te mea ka tafa mai ki ei?

3. Kafai ko oti ne fakaseai a lotu ‵se, se a te osoatuga ka taumafai o fai ki tino o Ieova?

³ Kafai ko oti ne fakaseai a lotu ‵se, ka taua atu a Satani mo vaega kese‵kese o tena lalolagi ki tavini a Ieova. E uiga ki a ‘Koka mai te fenua o Makoka,’ e fai mai te Tusi Tapu: “A ia tenā mo tena kautau, mo malo katoa konā e ‵kau i a ia ka taua atu ki te fenua tenā pelā me se afā, kae ufi te fenua pelā me ufi ne se kaumana.” Ona ko Molimau a Ieova e seai ne ana kautau kae ko toe tino filemu i te lalolagi, e foliga mai me e faigofie ke taua atu ki a latou. Kae se matugā mea ‵se ke taua atu ki a latou!—Eseki. 38:1, 2, 9-12.

4, 5. Ka saga atu pefea a Ieova ki taumafaiga fakasatani ke fakaseai ana tavini?

⁴ Ka saga atu pefea te Atua ki taumafaiga fakasatani ke fakamasei ana tino? Ka tu a Ieova mō latou mai te fakaaogaga o tena saolotoga e pelā me ko te Pule o te Iunivesi. E kilo atu a Ieova ki te oso atu ki ana tavini e pelā me e taua atu ki a ia. (Faitau te Sakalia 2:8.) Tela la, ka gasuesue fakavave a te ‵tou Tamana faka-te-lagi ko te mea ke faka‵sao tatou. Ka fakaoti a te faka‵saoga tenā ki te fakaseaiga o te lalolagi a Satani i Amaketo, “te taua i te aso lasi o te Atua Malosi Katoatoa.”—Faka. 16:14, 16.

⁵ E uiga ki Amaketo, e fai mai te valoaga i te Tusi Tapu: “Ka ko tena leo ka lagona i feitu e fa o te lalolagi. E isi se tagi a te Aliki [Ieova] e fia fai e uiga ki malo. Ka ave ne ia a tino katoa ki te fono kae tamate a tino amio ma‵sei katoa. Ko te Aliki [Ieova] tenā ne faipati. A te Aliki Malosi ne fai mai i te mala ka oko mai, e fakasolo mai eiloa i malo takitasi, kae e isi foki se afā lasi eiloa tenā e fakaputuputu mai i feitu ‵mao o te lalolagi. I te aso tenā, a foitino o tino kolā ne tamate ne te Aliki [Ieova] ka tafola valevale mai i te suā mata o te lalolagi ke oko ki te suā mata. E seai se tino e tagi fanoanoa ki a latou, kae e seai foki se tino e vau o ave latou o tanu. Ka tafola latou i luga i te laukele e pelā me ne faka‵tuga kaiao.” (Iele. 25:31-33) A te olaga masei tenei ka fakaseai atu i Amaketo. Ka palele atu te lalolagi a Satani, kae ko te vaega faka-te-lalolagi o te fakapotopotoga saukātoa a Ieova ka sao.

6, 7. (a) E o‵mai mai fea a tino kolā e aofia i te “vaitino e tokouke”? (e) Ne a faopoopoga ko oti ne oko ki ei i tausaga fakamuli nei?

⁶ E salalau kae ola te fakapotopotoga saukātoa a te Atua i te lalolagi me i tino i ei e talia ne ia. E fakatalitonu mai te Tusi Tapu ki a tatou: “E kilo atu a mata o Ieova ki tino amio‵tonu, kae e lagona ne ia ki ana taliga olotou ‵talo.” (1 Pe. 3:12) E aofia i tino amio‵tonu “se vaitino e tokouke” kolā e “‵sao i te fakalavelave lasi.” (Faka. 7:9, 14) A tino konei e ‵sao e sē “se vaitino” fua. A latou “se vaitino e tokouke”—se aofaki lasi ‵ki o tino. E mata, e aofia koe i a latou e pelā me se tino e sao mai i “te fakalavelave lasi”?

⁷ E o‵mai mai fea a tino kolā e aofia i te vaitino e tokouke? Ne fakamaopoopo mai latou ona ko te mea telā ne folafola mai ne Iesu e pelā me se vaega o te fakailoga o tena fakatasi mai. Ana muna: “A ko te tala ‵lei tenei o te Malo ka talai atu ki te lalolagi nofoaki kātoa mo fai se molimau ki atufenua katoa; ko oko mai ei te gataga.” (Mata. 24:14) I aso fakaoti konei, tenei eiloa te ‵toe galuega tāua o te fakapotopotoga saukātoa a te Atua. Ona ko te galuega talai mo te faiga o akoakoga a Molimau a Ieova i te lalolagi kātoa, e lau i miliona a tino ko oti ne tauloto ke tapuaki atu ki te Atua “i te agaga mo te munatonu.” (Ioa. 4:23, 24) Pelā me se fakaakoakoga,  i se sefulu tausaga fakamuli nei—i te vaitausaga faka-te-taviniga mai te 2003 ki te 2012—e silia atu i te 2,707,000 tino ne papatiso e fakamailoga ei te lotou tukuatuga ki te Atua. Tela la, e silia atu nei i te 7,900,000 Molimau i te lalolagi kātoa, kae lau foki i miliona a tino e ‵kau fakatasi mo latou, maise eiloa i taimi e fai ei a Fakamanatuga. E se fakamata‵mata tatou i te tokouke o tino, me ko ‘te Atua eiloa e fai ne ia ke ola.’ (1 Koli. 3:5-7) Tela la, e manino ‵lei i te vaitino e tokouke e fanaka eiloa ki luga kae gasolo aka eiloa o tokouke i tausaga takitasi.

8. Se a te pogai o te fanakaga fakaofoofogia o te fakapotopotoga saukātoa a Ieova i aso nei?

⁸ E fakaofoofogia eiloa te fanakaga o te aofaki o tavini a te Atua me e ‵lago atu a Ieova ki ana Molimau. (Faitau te Isaia 43:10-12.) Ne ‵valo mai a te fanakaga tenei i pati fakavaloaga konei: “A tino mu‵tana ka fai mo fai se tokoafe kae ko te fenua foliki ka fai mo fai se fenua malosi. Ka fakava‵vave ne au, Ieova, a te mea tenā i te taimi tonu.” (Isa. 60:22, NW) E tasi te taimi ne fai ei a te ‵toega o te kau fakaekegina e pelā “ne tino mu‵tana,” kae ne fanaka te aofaki o latou e pelā mo te aumaiga o nisi tino Isalaelu faka-te-agaga ki loto i te fakapotopotoga saukātoa a te Atua. (Kala. 6:16) Ona ko fakamanuiaga a Ieova i tausaga e uke, e fanaka faeloa te aofaki ki luga fakatasi mo te fakamaopoopomaiga o te vaitino e tokouke.

9. Se a te mea e ‵tau mo tatou o fai māfai e fia maua ne tatou a te taimi fakafiafia mai mua telā ne tauto mai ki ei te Muna a te Atua?

⁹ Faitalia me ko tatou ne Kelisiano fakaekegina io me ko tino o te vaitino e tokouke, e mafai eiloa o maua ne tatou a te taimi fakafiafia mai mua telā ne tauto mai ki ei a te Muna a te Atua. Ke fai penā, e ‵tau mo tatou o fai a mea kolā e manako mai a Ieova ki ei. (Isa. 48:17, 18) Ke mafaufau ki te kau Isalaelu mai lalo i te Tulafono a Mose. A te pogai tāua e tasi o te Tulafono ko te puipuiga o tino Isalaelu mai te tukuatuga ki a latou a tulafono fakavae kolā e pule atu ki amioga fakatauavaga, faifaiga fai pisinisi, tausiga o tamaliki, faifaiga e ‵tau o fai ki tino, mo nisi mea aka. (Eso. 20:14; Levi. 19:18, 35-37; Teu. 6:6-9) A te fai ne tatou a mea kolā e manako mai ki ei te Atua e aoga ki a tatou i auala e ‵tai ‵pau—kae mautinoa me e se to ‵mafa a te faiga ne tatou a tena loto. (Faitau te 1 Ioane 5:3.) E pelā mo te kau Isalaelu kolā ne puipuigina ne te Tulafono, a te faka‵logo o tatou ki tulafono mo fakatakitakiga fakavae a Ieova te Atua e se puipui fua tatou i ei kae fai foki i ei tatou ke “ma‵losi . . . i te fakatuanaki.”—Tito 1:13.

10. Kaia e ‵tau ei o fakaavanoa ne tatou ne taimi mō sukesukega faka-te-Tusi Tapu mo se Tapuakiga a Kāiga i te vaiaso?

¹⁰ A te vaega faka-te-lalolagi o te fakapotopotoga saukātoa a Ieova e gasue ki mua i auala kese‵kese. Pelā me se fakaakoakoga, a ‵tou malamalama i muna‵tonu i te Tusi Tapu e gasolo aka faeloa o maina malosi. E ‵tau eiloa o fai penei, i “te auala telā e sa‵sale i ei a tino amiotonu e pelā mo te la e kamata o fanake, e gasolosolo malie eiloa o vau te mainaga ke oko eiloa ki te taimi ko ao mai ei.” (Faata. 4:18) Kae se mea ‵lei ke fesili ifo tatou, penei: ‘E mata, e olo tasi au mo mafuli‵fuliga i ‵tou mainaga i muna‵tonu i te Tusi Tapu? E mata, e masani au o faitau ki te Tusi Tapu i aso katoa? E mata, e loto finafinau au o faitau ki ‵tou lōmiga? E mata, e fai ne au mo oku tino pele se Tapuakiga a te Kāiga i vaiaso katoa?’ Ka lotoma‵lie a te tokoukega o tatou me e se tō faigata ke fai a mea konei. A te mea tenei se mea fua ki te fakaavanoaga o se taimi ke fai a mea konā. Kae ko oko eiloa i te tāua ke maua ne tatou a te iloaga tonu mai te Tusi Tapu, fakagalue a te mea tenā, kae gasolo ki mua i te feitu faka-te-agaga—maise eiloa i te taimi nei me ko pili ‵ki mai a te fakalavelave lasi!

11. I auala fea ne aoga ei a ‵kaiga fia‵fia i aso mua mo fakatasiga, fono o te fenua, mo fono o te atufenua i aso nei?

 ¹¹ E fai eiloa ne te fakapotopotoga saukātoa a Ieova a te ‵toe mea ‵lei mō tatou mai te fakamalosi mai ke faka‵logo tatou ki pati fakatonutonu a te apositolo ko Paulo: “Ke na ‵saga atu tatou te suā tino ki te suā tino o fakama‵losi atu ke fakatau a‵lofa kae fai a mea ‵lei, ke mo a ma ‵galo sale tatou i ‵tou fakatasiga, e pelā mo te masani a nisi tino, kae ke fakamalosi atu te suā tino ki te suā tino, kae maise eiloa me ko iloa ne koutou i te aso tenā ko pili mai.” (Epe. 10:24, 25) Ne fakamalosi aka a te kau Isalaelu i te feitu faka-te-agaga e auala i ‵kaiga fia‵fia i te tausaga mo nisi maopoopoga mō tapuakiga. E se gata i ei, a faigāmea pelā mo ‵Kaiga o Fale Fakamalumalu i aso o Neemia ne taimi fakafiafia. (Eso. 23:15, 16; Nee. 8:9-18) E maua foki ne tatou a mea aoga mai i ‵tou fakatasiga, fono o fenua, mo fono o te atufenua. Ke na fakaaoga katoatoa ne tatou a fakatokaga konei ko te mea ke ma‵losi kae fia‵fia tatou i te feitu faka-te-agaga.—Tito 2:2.

12. E ‵tau o pefea ‵tou lagonaga ki te galuega talai o te Malo?

¹² E pelā mo latou kolā ne ‵kau fakatasi mo te fakapotopotoga saukātoa a te Atua, e fia‵fia eiloa tatou o ga‵lue i “te galuega tapu o te tala ‵lei.” (Loma 15:16) A te ‵kau ki te “galuega tapu” tenei e fai ei tatou ke “ga‵lue fakatasi” mo Ieova, “te Tino Tapu.” (1 Koli. 3:9; 1 Pe. 1:15) A te talaiga o te tala ‵lei e ‵lago atu ki te fakamalugaga o te igoa tapu o Ieova. Kae mautinoa eiloa me se tauliaga sē fuafuagina ke tuku mai ki a tatou a “te tala ‵lei e uiga ki te Atua fiafia.”—1 Timo. 1:11.

13. Se a te mea e fakalagolago ki ei a te mauaga o te malosi mo te ola ‵lei i te feitu faka-te-agaga?

¹³ E manako te Atua ke tumau tatou i te ma‵losi i te feitu faka-te-agaga mai te ‵piki ‵mau ki a ia kae ‵lago ki tena fakapotopotoga saukātoa i ana galuega kese‵kese. Ne fai atu a Mose ki te kau Isalaelu: “Au e kalaga ki te lagi mo te lalolagi ke molimau ki te mea ka fili ne koutou. Ko te ola e ‵tau o filifili ne koutou. A‵lofa ki te Aliki [Ieova] te otou Atua, faka‵logo ki a ia kae tali‵tonu ki a ia, kae ka ‵nofo leva koutou mo tino i otou gafa i te fenua telā ne tauto ei a ia ke tuku ki otou tupuga ko Apelaamo, Isaako mo Iakopo.” (Teu. 30:19, 20) E fakalagolago ‵tou ola ki te faiga o te loto o Ieova, a‵lofa ki a ia, faka‵logo ki tena leo, kae ‵piki ‵mau ki a ia.

14. Ne pefea a lagonaga o se taina e tokotasi e uiga ki te vaega matea o te fakapotopotoga saukātoa a te Atua?

¹⁴ Ne tusi mai a te taina ko Pryce Hughes, telā me ‵piki ‵mau ki te Atua kae olo tasi faeloa mo Tena fakapotopotoga, penei: “Ko oko eiloa i toku fakafetai me ne ola au e ‵tusa mo fuafuaga a Ieova mai i aso taumua konā mai mua malie eiloa o te 1914 . . . Kafai e fakafesili aka me se a te ‵toe mea tāua ki a au, a te mea tenā ko te fakapilipili faeloa ki te fakapotopotoga matea saukātoa a Ieova. Mai i mea kolā ne tauloto muamua ne au, iloa aka ei ne au a te ‵se o te fakalagolago ki mafaufauga faka-te-tagata. I te taimi eiloa ne fakaiku aka ne au me e tonu te manatu tenā, taumafai ei au o olo tasi faeloa mo te fakapotopotoga fakamaoni tenā. Se a te suā auala e mafai ei ne se tino o maua te taliaga mo fakamanuiaga a Ieova?”

15. Tuku mai se fakaakoakoga mai te Tusi Tapu ki te auala e ‵tau ei o ‵kilo atu tatou ki ‵fuliga i ‵tou malamalama ki mataupu i te Tusi Tapu.

¹⁵ Ko te mea ke maua ne tatou taki tokotasi te taliaga mo te fakamanuiaga a Ieova, e ‵tau mo tatou o ‵lago ki tena fakapotopotoga kae talia a ‵fuliga ki ‵tou mainaga i te Tusi Tapu. Ke mafau‵fau ki te mea tenei: Mai tua o te mate o Iesu, e lau i afe a Kelisiano Iutaia kolā ne fakamaoni ki te Tulafono ne faigata o tiakina ne latou. (Galu. 21:17-20) Fakatasi mo te fesoasoani o te tusi a Paulo ki te kau Epelu, ne talia ei ne latou a te manatu tonu me ne seki faka‵ma latou e auala i  taulaga kolā ne ofo “e ‵tusa mo te Tulafono” kae “e auala i te ofoatuga o te foitino o Iesu Keliso fakatasi mō taimi katoa.” (Epe. 10:5-10) E seai se fakalotolotolua me ne ‵fuli ne Kelisiano kolā e isi ne telega Iutaia olotou mafaufauga kae ga‵sue ki mua i te feitu faka-te-agaga. E ‵tau foki mo tatou o suke‵suke faka‵lei kae ke loto malamalama māfai e isi ne ‵fuliga i mainaga i te Muna a te Atua io me ko ‵tou galuega talai.

16. (a) Ne a fakamanuiaga ka fai ei ke fakaofoofogia te olaga i te lalolagi fou? (e) Se a te mea e fakamoemoe koe ki ei i te lalolagi fou?

¹⁶ Ka tumau eiloa o fakamanuia ne Ieova a tino katoa kolā e a‵lofa fakamaoni ki a ia mo tena fakapotopotoga saukātoa. Ka maua ne tino fakaekegina kolā e tumau i te fakamaoni a tauliaga fakapito ke ‵kau fakatasi mo Keliso i te lagi. (Loma 8:16, 17) Kafai e fakamoe‵moe tatou ke ola i te lalolagi, mafaufau ki te fiafia telā ka maua ne tatou i te Palataiso. E pelā me se vaega o te fakapotopotoga saukātoa a Ieova, ko oko eiloa i te fia‵fia o tatou i te taimi nei ke fakailoa atu ki nisi tino e uiga ki te lalolagi fou telā ne folafola mai ne te Atua! (2 Pe. 3:13) “Ka ko latou kolā e loto ma‵lalo, ka fai mō latou te fenua,” ko pati i te Salamo 37:11, “kae ka maua ne latou te manuia mo te filemu katoatoa.” A tino “ka faite olotou fale ko ‵nofo ei i ei” kae ka maua eiloa ne latou te fiafia mai “fua o olotou galuega.” (Isa. 65:21, 22) Ka sē toe ai ne pulega sauā, oge mea‵kai, mo te fia‵kai. (Sala. 72:13-16) Ka sē toe fakaloiloi se tino ne Papelonia te Sili, me ka galo atu eiloa tou fafine ki te se-gata-mai. (Faka. 18:8, 21) Ka toe faka‵tu aka a tino ‵mate kae tuku atu ki a latou te avanoaga ke ola ki te se-gata-mai. (Isa. 25:8; Galu. 24:15) Mafaga o fakamoemoega fakafiafia e maua ne te fia miliona o tino kolā ko oti ne tukugina atu ki a Ieova! Ko te mea ke fai a tautoga mai te Tusi Tapu e pelā me ne mea ‵tonu ki a tatou taki tokotasi, e ‵tau o tumau tatou i te ga‵solo ki mua i te feitu faka-te-agaga, olo fakatasi ki mua mo te fakapotopotoga saukātoa a te Atua, kae tautali faeloa i ei.

17. Se a te kilokiloga e ‵tau o maua ne tatou e uiga ki te tapuakiga a Ieova mo tena fakapotopotoga saukātoa?

¹⁷ Ona ko te pili ‵ki mai o te gataga o te olaga tenei, ke na tumau tatou i te fakatuanaki kae fakaasi atu te ‵poko o ‵tou loto fakafetai ki te fakatokaga a te Atua mō te tapuakiga. Tenā te kilokiloga a te faisalamo ko Tavita telā ne usu mai, penei: “E tasi faeloa te mea ne fakatagi atu ei au ki te Aliki [Ieova]; e tasi foki eiloa te mea e manako au ki ei: Ke nofo au i te fale o te Aliki [Ieova] i toku olaga kātoa, ko te mea ke ofo au i te ‵lei katoatoa o te Aliki [Ieova], kae fakatagi atu ki tena takitakiga.” (Sala. 27:4) Ke na ‵piki ‵mau tatou taki tokotasi ki te Atua, ‵kau fakatasi faeloa mo ana tino, kae tumau i te ga‵sue fakatasi ki mua mo te fakapotopotoga saukātoa a Ieova.